PREMYE fwa mwen tande pale de Temwen Jewova se lè m te nan inivèsite nan vil Koutaysi. Gen yon vwazen ki te di m Temwen yo pa sèvi ak imaj nan adorasyon yo e yo pa kwè Jezi se Bondye toupisan an. Kwayans sa yo pa t menm ditou ak kwayans mwen antanke kretyen òtodòks, e mwen te renmen kwayans mwen yo anpil.

Nan peryòd ete 1992, lè m te tounen lakay mwen Tisageri, m te jwenn Temwen yo ap preche nan zòn nan tou. Manman m te tande anpil bon bagay sou yo. Men, kòm mwen te toujou gen yon move panse sou yo, li te di m: “Al wè ak pwòp je w sa y ap anseye yo.”

Gen de frè, Pavle ak Paata, de pyonye, ki te konn vizite yon fanmi sou katye a regilyèman. Anpil vwazen te pwofite  vizit sa yo pou yo koute epi poze kesyon. Kidonk, mwen te deside ale nan youn nan rankont sa yo. Chak fwa mwen te poze yon kesyon, frè yo te fè m li repons lan nan Bib la. Sa te gen yon gwo efè sou mwen, sa te pèmèt mwen wè ak de je m sa Bib la di!

Anvan lontan, mwen te fè pati yon gwoup moun frè yo t ap etidye Labib avè yo. Nan ete lòt ane, dis nan nou te batize. Annapre, manman m te vin Temwen Jewova tou.

Lè m ap reflechi, m vrèman kontan lefètke frè yo te fè m li repons tout kesyon m te poze yo nan Bib la. Sa te ede m rezoud pwoblèm m te genyen ak tèt mwen lè m te kòmanse mete pwòp kwayans mwen an dout. Lè m sonje ki jan sa te ede m lefètke yo te fè m li nan Bib la dirèkteman, m fè menm bagay la pou m ede lòt moun apresye laverite.