Frè ak sè nou yo pa t pran nan presyon, yo te kontinye reyini ansanm. Avèk sajès, ansyen yo te pran yon seri dispozisyon pou pwoteje pwoklamatè yo. Frè André Carbonneau, yon avoka kanadyen ki te defann frè nou yo nan epòk sa a, fè konnen: “Gen yon frè ki te konn rete toupre kote reyinyon an ap fèt la e ki te konn gen yon telefòn selilè. Konsa si l wè yon foul moun k ap pwoche, tousuit li fè ansyen yo konnen kapab gen yon atak.”

Apre chak atak, filyal la te toujou voye de reprezantan pou ankouraje frè yo. André di: “Sa te toujou touche frè yo ki soti nan filyal la pou yo jwenn kote nou reyini an chaje ak frè ak sè ki kontan e k ap souri.”

Frè ak sè yo pa t atake yo, e menm etidyan Labib yo, te detèmine pou yo kontinye reyini ansanm. André sonje li t ap pale ak yon dam ki t apral kòmanse preche. Dam nan te di l lè l te wè atak yo nan televizyon, li te wè  diferans ki genyen ant vrè kretyen ak fo kretyen, e li te vle vin yon vrè kretyen.

Pandan ane difisil sa yo, pwoklamatè yo te montre yo gen lafwa e yo gen kran paske yo te kontinye fè travay predikasyon an, e yo te defann frè ak sè yo devan tribinal.

Byen souvan, laprès te prezante Temwen yo kòm moun k ap kraze fanmi, ki refize tretman medikal e ki kont Leta, alòske se pa vre. Avoka ki te aksepte defann  kòz frè ak sè sa yo te konnen chwa yo te fè a te ka gen move efè sou repitasyon yo ak karyè yo.

John Burns, yon frè nan filyal Kanada ki avoka e ki te ede frè Jòji yo nan epòk la, fè konnen: “Frè ak sè nan peyi Jòji ki avoka te rann tèt yo disponib pou defann frè ak sè yo. Malgre yo te konnen desizyon yo pran an te ka gen move efè sou travay yo, yo pa t pè al devan tribinal epi idantifye tèt yo kòm Temwen Jewova.” Temwen sa yo ki te gen kouraj te patisipe pou yo “defann bon nouvèl la” epi “fè rekonèt li devan lajistis”. — Flp. 1:7.

Pandan tan sa a, yo te kontinye fè vyolans sou Temwen yo. Se sa k fè, apati 8 janvye 2001, Temwen yo te bay moun nan peyi a yon dokiman pou yo siyen pou mande gouvènman an pou l pwoteje sitwayen ki pezib kont atak foul moun ap fè sou yo e kont akizasyon yo lage sou do yo.

Frè Burns te esplike rezon ki fè yo te fè siyen dokiman sa a: “Nou te vle fè gouvènman an wè pifò jòjyen pa dakò ak vyolans k ap fèt sou Temwen Jewova yo e se yon ti gwoup moun ki fanatik nan zafè relijyon ki responsab vyolans yo.”

Nan de semèn sèlman, te gen 133 375 moun nan tout Jòji ki te siyen dokiman sa a e pifò nan moun sa yo se òtodòks. Byenke yo te bay prezidan Shevardnadze dokiman  an, sa pa t fè vyolans yo sispann pou sa. Ti gwoup fanatik nan zafè relijyon an te kontinye pèsekite Temwen yo.

Pandan tan sa a, Jewova te kontinye beni pèp li a. Toutpandan ti gwoup sa a t ap bay pèp Bondye a pwoblèm, Jewova li menm t ap atire moun ki sensè yo pou yo soti nan fo relijyon an.

Babilina Kharatishvili te pase pifò vi l kòm manm aktif Legliz òtodòks jòjyen an. Lè l te nan trantèn li, li te vwayaje sot nan yon vil al nan yon lòt, sot nan yon bouk al nan yon lòt pou l anseye moun yo sou lavi sen yo t ap mennen.

Babilina te vle aprann plis bagay sou Bondye. Donk, li te deside al asiste diskou yo t ap bay nan yon seminè Legliz òtodòks jòjyen an t ap fè. Yon lè, gen yon chèf nan legliz la ki te montre yo liv Konesans k ap mennen nan lavi etènèl la e ki te ankouraje yo pran youn nan men Temwen Jewova yo. Li te di: “Liv sa a ka aprann nou anpil bagay sou Bib la.”

Babilina te sezi. Li te toujou ap evite Temwen Jewova yo, epi kounye a men yon chèf nan legliz la ap ankouraje l li liv yo! Li te di tèt li si se nan men Temwen Jewova yo pou l aprann konn Bondye, plas li pa la a. Li pa t pran tan pou l kontakte Temwen yo nan vil Poti e l te kòmanse etidye Labib.

Plis Babilina t ap aprann konn Bib la, se plis li te fè gwo chanjman nan lavi l. Men sa l te di yon lè: “Lè m te wè ak de je m Bib la fè konnen moun pa dwe adore zidòl, mwen te evite idolatri sou tout fòm. Mwen te gen  konviksyon sa m te fè a se sa m te dwe fè.” Nan epòk sa a li pa t lwen gen 80 an e li te deside vin Temwen Jewova.

Malerezman, an 2001, Babilina te vin malad e li mouri anvan l batize. Men Izabela, pitit pitit li, te vin batize, l ap sèvi Jewova e li fidèl.

Eliso Dzidzishvili te gen 28 an lè l te vle vin mè. Etandone pa t gen kouvan toupre Tikibouli, vil kote l te ye a, li te deplase al viv Tibilisi nan ane 2001. Pandan l t ap chèche antre nan yon kouvan, li te konn bay leson. Youn nan elèv li yo se te pitit fi yon Temwen ki rele Nunu.

Eliso di: “Nou te konn pale sou Bib la souvan. Mwen te konn defann relijyon òtodòks la avèk anpil fòs, alòske Nunu te konn montre m vèsè yo youn apre lòt avèk pasyans. Yon jou, li te pwopoze m pou nou li bwochi Ki sa Bondye vle nou fè? a. Pandan nou t ap li paragraf yo e nou  t ap chèche vèsè yo nan Bib la, mwen te rann mwen kont Bondye pa dakò ditou ak kesyon adore zidòl la.”

Annapre, Eliso t al nan legliz nan zòn nan e li te poze yon prèt kèk kesyon. Repons prèt la te ba l yo te vin fè l konprann sa legliz la t ap anseye yo pa t baze sou Bib la (Mak 7:7, 8). Kòm li te gen konviksyon li jwenn laverite, li te kòmanse etidye Labib ak Temwen Jewova yo tousuit e li te batize yon ti tan annapre.

Rive nan ane 2001, te vin ap gen plis kongregasyon ki te bezwen yon kote ki apwopriye pou yo adore Bondye. Yo te vin rann yo kont yo te bezwen anviwon 70 Sal Wayòm. Se konsa, yo te vin met yon pwogram konstriksyon Sal Wayòm sou pye, malgre opozisyon ki te gen nan peyi a. — Esd. 3:3.

Anvan lontan, te gen yon ekip konstriksyon ki te kòmanse repare yon lokal plizyè kongregasyon te konn  itilize nan Tibilisi. San pèdi tan, te vin gen de lòt chantye konstriksyon, youn nan Tibilisi e lòt la nan Chyatoura, nan lwès Jòji.

Frè Tamazi Khutsishvili, ki t ap travay sou chantye Chyatoura a, di: “Te gen nou kenz ki t ap travay sou chantye a chak jou. Anvan lontan, tout moun nan vil la te konnen nou t ap konstwi yon nouvo Sal Wayòm. Pafwa, te konn gen bri k ap kouri kòmkwa gen moun ki vle vini pou detwi Sal Wayòm nan.”

Èske opozisyon sa a t ap anpeche n fini konstriksyon an? Tamazi di: “Nou te kontinye travay nou an e nou te fini Sal Wayòm nan nan twa mwa. Malgre tout bri ki t ap kouri yo, pa t gen yon opozan ki te vini.” *

Ann oktòb 2003, te gen yon pwojè konstriksyon ki te kòmanse nan vil Samtredya. Yon lòt fwa, ti gwoup  moun ki fanatik nan zafè relijyon yo te menase frè yo. Anfèt, nou te fèk fin monte mi yo e mòtye a potko fin sèch lè opozan yo te vini e yo te kraze tout bagay.

Men, an novanm 2003, frè ak sè yo nan Jòji te resi rale yon souf. Te vin gen yon chanjman nan gouvènman an, sa ki te vin fè gen plis tolerans nan zafè relijyon. Konsa, yo te arete plizyè manm gwoup òtodòks fanatik ki te atake Temwen Jewova yo.

Yon ti tan apre pèsekisyon an fini, pèp Jewova a nan Jòji te jwenn anpil benediksyon. Tradiksyon monn nouvo a — Liv ki te ekri an grèk yo te parèt an jòjyen nan kongrè distri ki te fèt an 2004 la.

 An 2006, nan kongrè distri ki te gen tit “Delivrans lan toupre!” a, se pa ti kontan delege yo te kontan lè yo te tande frè Geoffrey Jackson, yon manm Kolèj santral la, t ap gen pou fè yon diskou! E se pa ti sezi yo te sezi lè frè Jackson te fè konnen Labib — Tradiksyon monn nouvo a parèt ann antye nan lang jòjyen! Se te yon lòt gwo evènman!

Anpil delege te kriye tèlman yo te kontan. Men sa yon sè te di: “M pa gen mo pou m di jan m te kontan lè m te resevwa Bib la ann antye [...]. Se te vrèman yon evènman moun pap janm bliye.” Te gen plis  pase 17 000 moun ki te pwofite bèl pwogram espirityèl sa a, yon pwogram pèp Jewova a nan Jòji pap janm bliye.