DEPI lè Sanel nan vant, doktè yo te fè paran l konnen li ka pa viv e menmsi l ta rive fèt vivan, l ap gen gwo pwoblèm sante. Depi jou Sanel fèt la, li te gentan bezwen fè yon operasyon. Paran l t ap viv Abkazya, yon zòn ki te pran endepandans li parapò ak Jòji, e yo pa t ka jwenn yon doktè pou fè Sanel operasyon an san yo pa ba l san.

Paran yo te pran kontak ak Komite lyezon ospitalye a (KLO) *. Se pa ti soulaje yo te soulaje lè frè yo ki nan KLO a te jwenn yon doktè nan Tibilisi, kapital peyi Jòji, byen vit. Men, manman Sanel potko fin refè apre akouchman an e li pa t ka fè vwayaj la. Se konsa yo te deside se toule de grann Sanel yo ki Temwen Jewova ki t ap mennen bebe a lopital nan Tibilisi.

Operasyon difisil sa a te byen pase. Yon ti tan apre, men sa toude grann Sanel yo te ekri: “Nou te rete nan lopital la plis pase 20 jou. Pandan tan sa a, anpil frè ak sè jòjyen te vizite nou e yo te ofri nou èd yo e yo te fè nou konnen sa fè yo lapenn. Nou te konn li jan frè ak sè nan lemonnantye demontre lanmou youn pou lòt, men kounye a, nou fè eksperyans lan nou menm.”