Nan peyi Ostrali, Olivia te envite dam ki te pwofesè l la nan Memoryal lè l te nan kindègadenn. E li te kontinye envite pwofesè a chak ane, li te fè sa pandan uit an. Finalman, nan ane 2016, pwofesè a te rele l nan telefòn pou l di l li ta renmen asiste Memoryal la. Li di li te santi se yon onè sa ye pou li lefètke  Olivia te envite l chak ane. Donk, pwofesè a t ale nan Memoryal la ansanm ak mari l. Mari a sonje lè Sal Wayòm nan t ap konstwi paske lè sa a li te travay nan biwo majistra vil la. Li di frè yo jan li enpresyone pou jan pwojè konstriksyon Sal Wayòm nan te byen òganize. Ni pwofesè a ni mari l te tèlman renmen moman yo te pase nan Memoryal la, yo te pami dènye moun ki te kite Sal la jou swa sa a.

Jacintu ak madanm li ap viv Timò oryantal. Kòm yo te de katolik wouj, se pa ti sezi yo te sezi lè yon neve Jacintu te kite relijyon katolik la, relijyon fanmi l te ladan l lan, pou l vin Temwen Jewova. Kòm, Jacintu te vle montre neve l la li nan erè, li te deside li liv Ki sa Labib anseye toutbonvre? a. Li te li liv la nan objektif pou l jwenn fo ansèyman ladan l. Annapre, li di madanm li: “Mwen li liv la wi. Tout sa k ladan l bon.”

Madanm nan di l: “Siman ou pa t byen li l. Li l ankò, men fwa sa a li l dousman.”

Jacintu te fè sa. E li te di madanm li ankò: “Tout sa k ladan l bon.” Li di tou: “Tout sa ki ladan l soti nan Bib la! Menm sa li di konsènan adorasyon mò yo soti nan Bib la.”

Madanm li di l: “Li l yon twazyèm fwa, men fwa sa a souliye chak paragraf, etidye l byen etidye. Liv la pa ka bon.”

 Jacintu te pran san l pou l etidye liv la, li te souliye chak paragraf. Apre li te fin pran san l pou l li l yon twazyèm fwa, li di: “Tout sa l di se laverite! Neve nou an gen rezon.” Kounye a, Jacintu ap etidye Labib avèk Temwen Jewova yo.

Gen yon sè pyonye, ki rete Gwanm, ki te vizite yon dam ki soti Ponpey e li te montre dam nan videyo ki gen tit Poukisa nou dwe etidye Labib? la. Sè a te di l ap retounen ankò. Malgre li te retounen plizyè fwa, li pa t ka jwenn dam nan lakay li. Yon jou, pitit fi dam nan te ouvè pòt la e sè a te deside montre l yon videyo nan seri videyo Fè zanmi ak Jewova a. Se pa ti renmen tifi a te renmen videyo a. Pwochen fwa sè a vini, manman an te ouvè pòt la e li te koute mesaj ki sot nan Bib la. Ta sanble  pitit fi an te di manman l li dwe ale nan legliz dam ki te montre l videyo a. Sanble se sa ki te chofe manman an pou l konn plis. Sè a te montre l kòman yon etid Labib fèt, e li te fè aranjman pou etid la kontinye.

Terence, yon siveyan sikonskripsyon, te vwayaje ak Stella, madanm li, pou y ale Inakò, yon tèritwa ki nan Papwazi Nouvèl Gine e ki pa sou responsablite okenn kongregasyon. Men sa Terence di: “Premye jou a, nou te tande moun ap frape nan pòt nou byen bonè nan maten alòske nou potko menm leve. Te gen yon pakèt moun ki t ap tann nou deyò a, donk nou te kòmanse  preche yo depi sizè nan maten pou rive midi. Nou te fè yon ti kanpe pou n al benyen, men apre sa nou te wè gen yon pakèt moun toujou ki t ap tann nou. Donk, nou te rekòmanse preche soti dezè nan aprèmidi pou rive minui.” Nan demen maten, koup la te deside kite byen bonè pou y al vizite yon lòt zòn. Yon lòt fwa ankò, yon pakèt moun te vini kote yo te rete a, men yo pa t jwenn yo. Men sa Terence di: “Lè yo te vin konnen ki kote n ale, yo te chèche nou e yo te jwenn nou. Yon lòt fwa ankò, nou te preche jiska midi. Lè nou te retounen kote nou te rete a, te gen yon lòt gwoup ki t ap tann nou. Se konsa sa te ye chak jou. Moun yo nan zòn nan te ‘tankou mouton ki san bèje’.” — Mat. 9:36.

Agnès, yon sè pyonye k ap viv Nouvèl Kaledoni, te oblije ale kay yon fizyoterapis (se yon moun ki fè tretman pou moun ki gen pwoblèm nan jwenti, nan mis oswa nan nè) akoz yon doulè li gen nan bra. Pandan terapis la t ap pran swen Agnès, li di l li tèlman wè moun k ap soufri l ap mande tèt li si Bondye pa mechan. Agnès fè yon priyè nan kè l, li remèsye Jewova pou posiblite li ba li pou l defann li. Apre sa, li montre terapis la feyè Èske soufrans ap janm fini? an epi li li Revelasyon 21:3, 4 pou li.

Men sa terapis la di: “M pa kwè m ap jwenn vèsè ou sot montre m nan nan bib mwen an, se sèl Evanjil yo li genyen.” Lè l vin rann li kont Agnès se Temwen Jewova, li di l li te konn rankontre Temwen yo lè l te nan peyi l, anpalan de Chili.

 Agnès sonje gen yon rapò yo te fè sou filyal Chili yo mete sou Tele JW a. Donk, pwochen fwa l al lakay terapis la, li te pote tablèt li e l te montre l videyo a. Terapis la te vrèman enpresyone lè l te wè Betèl ak Sal asanble Chili a. Apre sa, Agnès di: “M gen yon lòt bagay pou ou, men yon Bib ki konplè, konsa w ap ka li Revelasyon 21:3, 4, vèsè m te li pou ou semèn pase a!” Terapis la tèlman kontan li leve pou l bay Agnès yon akolad epi li di: “Mèsi anpil pou de bèl kado sa yo!”

Nan pwochen vizit la, Agnès te pote liv Ki sa Labib anseye toutbonvre? a pou li epi li te ba l plis detay sou sa ki lakòz soufrans sou tè a. Terapis la di l li gen pou l al an vakans Chili, li prale ak liv la pou l ka li l nèt.