Nan peyi Jòji, gen yon mesye ki pwoche bò kote yon charyo piblikasyon e li di byen fò: “M pap kite nou preche bò isit la! Jòji se yon peyi òtodòks!” Frè ki te bò kot charyo a mande l avèk jantiyès si l te janm li youn nan piblikasyon nou yo. Mesye a reponn: “Non, pa vrèman.” Avèk tak, frè a fè l konprann li t ap bon pou l fè sa. Sa te kalme mesye  a, e li te pran kèk piblikasyon. Kèk jou apre, mesye a te retounen vin mande eskiz sou jan li te aji anvan an. Li di li te li peryodik yo pou manman l ki avèg. Ni li menm ni manman l te vrèman renmen peryodik sa yo e yo vle gen lòt. Kounye a, li pase vin pran dènye peryodik yo regilyèman nan charyo a.

Pandan kèk frè te nan predikasyon nan peyi Azèbayidjan, gen de nan frè yo ki te pwoche bò kote yon jèn gason ki kanpe devan yon bilding e yo kòmanse preche l. Mesye a di: “M pa kapab koute bagay sa yo paske se t ap yon peche.” Li foure men l nan pòch li, li rale yon kouto epi li di: “Yo fè m enjistis, mwen pral sèvi ak kouto sa a pou m fè tèt mwen jistis.”

Frè yo te sezi, men yo di: “Touye moun se yon peche.”

Mesye a di: “Ki sa m dwe fè?” Frè yo li Women 12:17-21 avè l e yo esplike l vanjans se pou Bondye e nou pa dwe “kite sa ki mal pot laviktwa sou [nou], men kontinye pot laviktwa sou sa ki mal [lè n] fè sa ki byen”. Yo di l pouvwa sa genyen lè nou pale avèk dousè, e yo di l si l blese yon moun oswa touye l, konsyans li ap bat li. Sa mesye a te tande a te fè wo efè sou li.

Anviwon inèdtan apre mesye a te fin kite frè yo, li jwenn yo e li di yo: “Mwen fèk sot pale ak moun mwen te vle touye a. Mwen pa fè l anyen ki mal, mwen regle pwoblèm mwen te gen avè l la. Mwen vle di n mèsi paske n evite m tonbe nan pwoblèm.” Frè yo esplike l an reyalite se Jewova ki ede l.

Gen yon sè nan peyi Nòvèj ki te kite laverite depi plizyè ane. Apre yo te kòmanse sèvi ak charyo piblikasyon nan temwayaj an piblik, souvan, lè li pral achte li te konn pase bò kot youn.

Byenke li pa t janm pwoche bò kot charyo yo, li te toujou renmen wè postè piblikasyon ki sou charyo yo. Mete sou sa, li te renmen wè jan Temwen ki bò charyo yo amikal e jan yo byen abiye. Tout sa te fè l anvi retounen vin jwenn Jewova ak pèp li a.

Epitou li te remake logo jw.org la, sit Entènèt nou an. Donk, li te deside al sou sit la. Li te sezi wè jan li fasil pou l jwenn adrès Sal Wayòm ki pi pre l la ak lè reyinyon ki genyen yo. Li te telechaje piblikasyon nou yo e li te ale nan Sal la tou jennen. Yo te byen resevwa l, e ansyen yo te pran dispozisyon pou yon sè etidye Labib avè l. Annapre, li te fè bon zanmi nan kongregasyon an e li te repran aktivite espirityèl li te abitye fè yo. Kounye a, li patisipe regilyèman nan reyinyon yo ak nan travay predikasyon an. Li kontan paske li retounen gen yon bon relasyon ak Jewova.

Nan peyi Nòvèj, gen yon sè ki gen 15 an ki rele Ronja ki t ap pale ak twa tigason ki nan klas li konsènan evolisyon. Fason ti mesye yo te pale montre yo pa t respekte kwayans li ditou, e sa te mete l malalèz. Kòm li pa t fin twò alèz ak sijè a, li te mande manman l pou l ede l jwenn kèk bon agiman pou l montre gen yon kreyatè.

 Nan demen, pandan Ronja nan bis la, li bay agiman li te prepare yo. Men, ti mesye yo te pase l nan jwèt paske li gen lafwa nan Jewova. Youn ladan yo te di byen fò: “Pa gen moun nan bis sa a ki kwè nan Jewova! Moun ki kwè nan Jewova leve men nou, e moun ki kwè nan evolisyon leve men nou.” Ronja te sezi wè yon tigason ki gen 12 an ki chita toupre l leve men l epi li di: “M kwè nan Jewova!” Gen de lòt timoun ki di: “Mwen menm tou!” Sa montre gen lòt elèv ki te tande konvèsasyon Ronja te gen ak kamarad klas li yo, e agiman l te bay yo te ede kèk ladan yo kwè nan Bondye.

Yon aprèmidi, gen de mesye ki soti Siri e ki pale Arab ki vin nan biwo filyal peyi Dànmak la. Yo di sè ki nan  resepsyon yo y ap chèche Temwen Jewova yo. Mesye yo te kontan tande ki kote yo te ye. Ki jan yo te fè jwenn adrès la? Yo t al nan yon bibliyotèk e yo te montre moun k ap travay yo yon foto yo te pran ak telefòn yo. Se foto paj editè liv Ki sa Labib anseye toutbonvre? a. Se konsa moun ki t ap travay nan bibliyotèk la te rive ba yo adrès filyal la.

De mesye yo t ap fè anpil efò pou yo pale dànwa. Donk, sè yo te rele yon frè ki pale arab. Li te klè gen youn nan mesye yo ki te vrèman vle aprann plis sou Bib la. Frè a te pran enfòmasyon pou l kontakte l e li te pwomèt l ap vizite l anvan lontan e l ap vin ak yon lòt frè ki pale arab.

Lè frè yo al vizite mesye a lakay li, yo aprann li potko janm jwenn okenn Temwen Jewova vizite l. Li te di yo li te jwenn liv la nan bwatalèt li, byenke pa t gen okenn non sou bwatalèt la ki pou te fè yo konnen se yon moun ki pale arab ki rete nan kay la. Kòm li pa t konn li, li te mande yon zanmi l li liv la pou li, e yo te fin li l sou twa jou. Sa l te tande yo te ase pou konvenk li li jwenn laverite.

Lefètke li se yon refijye e li lwen fanmi l, sa vrèman dekouraje l. Men, li jwenn konsolasyon nan Bib la. Premye fwa frè yo te vin lakay li, li te mande yo: “Poukisa nou pa t vin vizite m anvan? Mwen te vrèman bezwen sa.” Frè yo kontinye etidye avè l e li vrèman kontan aprann sa l ap aprann yo.

Dmitry t ap travay kòm manadjè nan yon konpayi tabak nan peyi Ikrèn. Men, lè l te vin pi byen konnen tout  move efè sigarèt genyen sou sante moun, li te kite travay la malgre li te touche trè byen. Men, nan yon peryòd twa mwa, ni manman l ni bèlmè l mouri. Se te yon gwo chòk pou li pou l pèdi de moun sa yo li te renmen anpil. Li te panse moun nan legliz li a t ap ede l jwenn konsolasyon e yo t ap ba l repons pou kesyon li te genyen yo, men se pa sa ki te fèt. Gen yon zanmi ki di l yon òtodòks se yon moun ki gen “yon kwa nan kou l men kè l vid”. Se egzakteman konsa Dmitry te santi l. Li te rann li kont li pa t konn anyen ni sou Bondye ni sou Bib la. Kòm li te santi l sanzespwa, li te kòmanse priye pou l mande èd. Annapre, li vin sonje li te tande pale de Temwen Jewova yo. Li t al chèche sou Entènèt e l te jwenn sit nou an. Li te sezi wè tout enfòmasyon sit la gen sou Bib la. Apre sa, li te chèche Sal Wayòm ki pi pre a. Lè l te rive nan pakin nan, youn nan moun yo te byen akeyi l, e l te mande l si l bezwen l ede l. Dmitry di: “Mwen bezwen yon etid Labib.” Sa gentan fè sis mwa depi l ap etidye, li asiste reyinyon yo regilyèman e li patisipe ladan yo.

Paul ak Faith ap viv Grann Bretay. Yo te gen yon bèl konvèsasyon avèk yon dam ki rele Susan e yo te pran dispozisyon pou tounen vizite l. Lè yo retounen, yo pa t jwenn Susan lakay li. Paul ak Faith kite yon ti nòt pou yo di y ap retounen nan demen. Se yon konsèy yo te jwenn nan Ministè Wayòm novanm 2014 la. Lè yo te retounen, yo te sezi wè gen yon ti nòt sou pòt Susan nan. Li te fè yo konnen li te soti al achte kèk bagay pou maryaj pitit fi l. Paul ak Faith kite yon lòt ti nòt pou fè  konnen y ap retounen lòt semèn. Fwa sa a, Susan te ret tann yo e yo te kòmanse etidye liv Sa Labib anseye a.

Etandone pitit fi l la t apral marye, Susan te mande si yo te ka ranvwaye pwochen vizit la. Lè Paul ak Faith te retounen, yo pa t jwenn moun, donk yo te kite yon ti nòt ki gen nimewo telefòn selilè yo. Se pa ti kontan yo te kontan lè yo te resevwa yon mesaj tèks Susan voye pou l di jan l regrèt yo pa t jwenn li. Lè yo te vini an, li t ap pale ak yon vwazen nan lakou a. Depi lè a, Susan kontinye fè etid Labib la, e dènyèman la a, li te asiste reyinyon pou premye fwa.

Paul ak Faith chofe pou yo kite nòt pou yo ka kenbe kontak ak moun yo. Men sa yo di: “Nou gen plizyè lòt moun nou vizite ki li nòt nou kite pou yo. Sa vrèman enteresan!”

Nan Ongri, gen yon frè ki t al lopital nan mwa out 2014 pou yon “embolie pulmonaire” (se lè yon boul san bloke yon gwo venn nan poumon an). Malerezman, frè a mouri yon ti tan apre. Men sa madanm li ekri konsènan Tünde, yon enfimyè ki te ede l anpil:

“Nan ete 2015, mwen te asiste kongrè rejyonal ‘Annou imite Jezi!’ a avèk pitit gason m nan. Nan fen twazyèm jou a, pandan nou te nan pakin nan nou t ap prepare nou pou nou tounen lakay nou, te gen yon dam ki te vin kanpe devan m. Li lage valiz ki te nan men l yo atè, li ban m yon akolad e li kòmanse kriye. Se te enfimyè ki t ap pran swen mari m sa gen prèske ennan nan seksyon swen entansif la. Li te esplike m chak fwa l gen pou l kòmanse travay, li te toujou priye pou se li yo mete pran swen mari m. E sa te toujou rive!

“Tünde fè konnen se bon konduit mari m, lafwa l, ak esperans li te toujou ap fè konnen li genyen ki te fè l kòmanse yon etid Labib ak Temwen Jewova yo.

“Tünde, k ap etidye Labib kounye a, ap tann moman li pral akeyi mari m lè rezirèksyon an. Li vle fè l konnen se konduit li ak lafwa solid li te genyen ki te ede l konnen Jewova ak bèl pwomès li fè yo.”

Sou fwontyè ki separe Lagrès ak Bilgari, pafwa lè yo fèmen kote pou yo fè tchèk yo, konn gen liy machin k ap tann sou plizyè kilomèt. Gen yon kongregasyon toupre a ki nan Bilgari ki te pwofite sitiyasyon an pou yo ofri moun k ap tann nan machin yo piblikasyon ki baze sou Bib la. Frè yo te ale sou fwontyè a avèk  piblikasyon nan 12 lang. Anpil nan chofè kamyon yo te fatige e yo te nève, men yo te vle pale. Frè yo te pran san yo pou koute yo, e yo te ba yo espwa ak ankourajman. Gen youn nan chofè yo ki di: “Nou se Temwen Jewova?” Lè frè yo fin reponn wi, li di: “M te konn sa paske se sèlman Temwen Jewova ki pou ta preche jan nou preche a.” Gen yon chofè ki soti Otrich ki di: “Gad jis kote nou jwenn nou! Felisitasyon! Tanpri, kontinye bay moun yo konsolasyon ak espwa.” Gen yon lòt ki di: “Mwen pa t janm anvi li piblikasyon nou yo. Men, kounye a m ap kontan li l.” Dlo te koule nan je yon chofè pandan yon frè t ap preche l. Li di li te Temwen Jewova anvan sa. Frè yo te ankouraje l nonsèlman pou l li piblikasyon yo men tou pou l pran kontak ak yon kongregasyon.