PANDAN monn Satan an ap jwenn pwoblèm youn apre lòt, vrè adoratè Jewova yo menm kontinye “gen anpil bagay pou [yo] fè nan travay Seyè a”. (1 Kor. 15:58.) Rapò ki vin annapre yo montre jan Temwen Jewova yo toupatou sou tè a fè tout sa yo kapab pou yo ‘mete konfyans yo nan Jewova, yo fè sa ki bon epi yo aji avèk fidelite’. — Sòm 37:3.

Agrandisman lokal Wòlkil la, nan Nouyòk, te fini nan dat 1^ye fevriye 2016, sa ki te pèmèt yo transfere Komite filyal Etazini an, Depatman Sèvis la ak kèk lòt depatman al nan lokal sa a. E kòm travay ki t ap fèt Wòwik yo te prèske fini, fanmi Betèl Bwouklin nan te kòmanse bwote kite vil Nouyòk pou y ale nan  zòn andeyò kote nouvo bilding syèj mondyal la ye a, e se yon gwo travay sa te ye.

Moun ap ka kòmanse vizite syèj mondyal la nan Wòwik apati lendi 3 avril 2017. Nan vizit sa a, gen twa ekspozisyon w ap ka suiv poukont ou e gen yon vizit yon moun ap fè pou ou.

1. “Bib la ak non Bondye.” Ekspozisyon sa a prezante yon seri tradiksyon Labib ki ra e li montre non Bondye gen plas li nan Ekriti yo.

2. “Yon pèp pou non Jewova.” Ekspozisyon sa a prezante yon seri bagay ki gen rapò ak istwa pèp Jewova a, e li montre fason Jewova te gide pèp li a tikras pa tikras, fason l te anseye yo epi òganize yo pou yo fè volonte l.

3. “Syèj mondyal: Lafwa ann aksyon.” Nan ekspozisyon sa a, se ou menm k ap kapab jwe videyo yo ki esplike travay divès komite ki nan Kolèj santral la ap fè pou yo ede pèp Bondye a reyini ansanm, fè disip, manje manje espirityèl e demontre lanmou youn pou lòt.

Ekspozisyon sa yo ap disponib soti lendi pou rive vandredi ant 8 è nan maten a 4 è nan aprèmidi. Moun k ap vizite yo ap gen posiblite pou yon moun fè yo vizite kèk nan bilding kote ki gen biwo ak kèk sèvis ansanm ak lakou Betèl la. Vizit sa a ap dire 20 minit, e ap gen vizit lendi pou rive vandredi soti 8 è nan maten rive 11 è nan maten e soti 1 è nan aprèmidi rive 4 è nan aprèmidi.

Anvan nou fè aranjman pou n vizite, tanpri ale sou jw.org epi gade anba seksyon ENFÒMASYON SOU NOU > VIZITE BIWO NOU YO > Etazini.