Akoz pakèt refijye ak imigran ki antre ann Almay, vin gen plis tèritwa lang etranje. Sa pa gen lontan, nan nèf mwa sèlman gen 229 gwoup ak avangwoup ki fèt. Gen anviwon 30 klas k ap fèt nan 13 lang e gen anviwon 800 pwoklamatè ki asiste klas sa yo.

Frè yo preche nan kan refijye yo. Yo sèvi ak charyo nan plis pase 200 kote e yo deja bay anviwon 640 000 piblikasyon.

Kolèj santral la te dakò pou yo fè yon kanpay predikasyon espesyal soti me 2016 pou rive jiyè 2016. Gen  anviwon 700 pwoklamatè ki pale arab e ki soti nan sèt peyi ki te vwayaje ale dis kote ann Almay ak Otrich pou yo preche pakèt moun ki pale arab k ap viv nan zòn sa yo.

Kongregasyon Faber’s Road Kriol ki nan Beliz la gen 50 pwoklamatè, e an jeneral yo preche apye. Pifò nan frè yo pa gen anpil mwayen, men yo toujou ap chèche okazyon pou yo bay. Sa gen kèk ane, frè yo te kòmanse ranmase pyès monnen yo jwenn atè sou wout ki chaje ak pousyè pandan y ap preche pòt an pòt. Depi lè a, nan fen chak ane, yo met ansanm pou yo lave pyès yo, triye yo epi konte yo.

Malgre pifò nan pyès sa yo pa gen anpil valè (mwatye yon santim ameriken), chak ane, kantite kòb yo ranmase a vo 225 dola ameriken. Frè yo pran mwatye nan kòb sa a pou yo bay pou depans Sal Wayòm nan e yo bay lòt mwatye a kòm ofrann pou travay predikasyon k ap fèt nan lemonnantye a.

Youn nan evènman ki te pi enpòtan nan listwa teyokratik Bouwoundi se lè Anthony Griffin, yon reprezantan syèj mondyal la te vizite filyal la jou ki te 5 mas 2016 la. Yo te fè pwogram espesyal pou kongregasyon yo yo te pase sou estasyon radyo nasyonal la. Yo panse te gen anviwon kat milyon moun ki te tande pwogram nan.

Estasyon radyo a te bay yon gwo temwayaj e gen anpil moun ki te fè bèl kòmantè. Youn nan teknisyen nan estasyon an ki te asiste pwogram nan di: “Fò nou fè plis  pwogram konsa.” Men sa yon ofisyèl nan radyo a ekri: “Mwen ankouraje nou kontinye [fè pwogram menm jan an], se sèten, sa ap sove anpil moun.” Gen anpil chofè bis ak taksi ki te pase pwogram nan nan machin yo.

An 2016, nan peyi Nepal, lavèy Memoryal la, frè nan yon ti gwoup izole te vrèman dezole lè yo te aprann t apral gen yon gwo konsè mizik nan lekòl toupre lokal yo te lwe a.

Byen souvan, mizik la fò anpil nan konsè sa yo. Pandan frè yo t ap netwaye sal la nan maten Memoryal la, gen youn nan moun ki òganize konsè a ki di yo: “Nou pap ka tande anyen ankò apa mizik konsè a.”

Konsè a te kòmanse a midi, e mizik la te fò vre. Byenke frè yo te lwe yon pi gwo opalè pase sa yo te prevwa lwe a, yo pa t menm ka tande tès yo t ap fè pou mikwo yo. Frè yo te dekouraje, men yo te priye sou sa ak tout kè yo. Epi, 30 minit anvan Memoryal la kòmanse, alòske gen anpil frè ak sè ki te gentan ap vini, bridsoukou mizik la kanpe. Te gen yon goumen ki pete pami kèk moun nan konsè a ki te sou, e lapolis te fè yo sispann konsè a. Konsa, frè yo te fè Memoryal la nan lapè, nan yon anbyans ki demontre respè.

Giuseppe se yon frè ki pyonye pèmanan ann Itali. Li travay lakay li pou yon konpayi ki konseye moun nan zafè Entènèt. Nan mwa me ki sot pase a, li te asiste yon reyinyon ki te gen anviwon 70 moun ki t ap pale sou kèk nouvo ide konpayi an te ka itilize. Direktè jeneral  konpayi an fè konnen gen kèk sit Entènèt konpayi an te ka enspire sou sa yo fè pou l te ka fè kèk bagay menm jan an. Epi li montre youn nan sit yo sou yon ekran. Giuseppe te sezi wè paj akèy sit jw.org la! Direktè a di: “Se pi bon sit Entènèt ki genyen nan monn nan!” Epi li kòmanse analize kèk aspè teknik nan sit jw.org la. Li te pale an byen sou jan lyen yo fasil pou jwenn ak bèl imaj yo.

Giuseppe di kòlèg li yo te sezi aprann tout kantite lang ki sou sit la. Li di tou: “Nan fen prezantasyon an, sipèvizè m nan di byen fò: ‘Giuseppe se yon Temwen Jewova.’ Lè sa a, direktè a di m: ‘Òganizasyon w lan merite felisitasyon. Nou fè yon sit Entènèt tout konpayi oswa òganizasyon nan lemonn ta renmen genyen.  Mwen pa ka imajine tout travay nou fè pou nou kenbe sit sa a ajou e pou l fasil pou moun sèvi avè l, san konte nou veye sou tout ti detay ak enfòmasyon ki sou li.’ Mwen te yon ti jan jennen paske yo t ap felisite m pou yon bagay m pa t fè. Men, mwen te kontan anpil paske gen anpil moun ki pa t konnen anyen sou Temwen Jewova yo ki te jwenn temwayaj. Kounye a, mwen pale ak kèk nan kòlèg mwen yo regilyèman sou Bib la e mwen menm kòmanse yon etid Labib ak twa nan yo.” Konpayi Giuseppe ap travay ladan l lan kontinye ap “etidye” sit jw.org la e Giuseppe li menm kontinye ap pale sou Bib la ak kòlèg li yo.

Jorge se yon jèn k ap viv ann Ajantin. Nan kòmansman ane 2010 la, li te tande bon nouvèl la pou premye fwa pa mwayen yon kamarad lekòl li. Annapre li te kòmanse etidye Labib nan liv Ki sa Labib anseye toutbonvre? a. Pandan tan sa a, li te konn jwe foutbòl. Li te fò anpil e gen yon gwo klèb ki te chwazi l pou l jwe nan seleksyon yo genyen ki nan dezyèm divizyon an (oswa yon divizyon ki pi piti). Ann avril 2014, yo te ofri l pou l al jwe nan yon ekip ann Almay e sa te tante l. Li te aksepte òf la paske li te vrèman chofe pou l vin yon jwè pwofesyonèl. Kèk jou anvan l ale ann Ewòp, antrenè a di l: “Ou se Temwen Jewova pa vre? Si w al lòtbò sa a w ap gaspiye lavi w. M te Temwen Jewova lè m te jèn. Yo te envite m al jwe nan yon ekip ann Azi. Yo te fè m anpil pwomès, e sa te atire m. Mwen menm ak fanmi m te ale lòtbò a men, nou te tounen paske nou pa t jwenn sa n t ap atann nan.” Jorge di: “Sa l te di a te fè yon gwo  efè sou mwen e mwen te deside pa al ann Ewòp ankò. Mwen te vin pwoklamatè an 2015 e m te batize nan menm ane a.”

Kongrè rejyonal ki te gen tit “Annou imite Jezi!” a te fèt an septanm 2015 nan Kanmpala, nan peyi Ouganda. Se pa ti kontan moun ki te asiste kongrè sa a te kontan lè Mark Sanderson, yon manm Kolèj santral la, te fè konnen Labib — Tradiksyon monn nouvo a parèt nan louganda.

Men sa yon etidyan Labib di: “Mwen te vrèman kontan resevwa bèl Bib sa a! Nan peryòd sa a, moun yo t ap prepare pou resevwa pap la. Pou yo te ka jwenn kòb, yo te konn vann wozè ki swadizan beni pou 30 dola ameriken. Moun yo te vle jwenn benediksyon sa a, men anpil ladan yo pa t gen kòb la. Men, mwen menm, mwen te jwenn yon vrè benediksyon san m pa peye anyen. Jewova te bay tout moun ki te vini nan kongrè a benediksyon sa a, e li te kite chak moun deside bay sa yo vle. Chak jou, lè m ap li Pawòl Jewova a nan lang manman m e m ap aprann konnen l pi byen, mwen santi m vrèman beni. Mwen di Jewova mèsi paske li ban mwen pwòp bib pa m.”

Nan yon zòn nan peyi Kongo (Kinchasa), gen kèk chèf legliz ki te fè fidèl yo konnen se nan monn envizib la yo enprime piblikasyon Temwen Jewova yo. Yo te di sa pou yo te ka lage vèni sou sit www.pr418.com. Pou yo ka pwouve sa yo di a, yo te fè konnen lèt “www” yo koresponn  ak chif 666 ki nan liv Revelasyon an (Rev. 13:18). Sa te lakòz kèk etidyan Labib kanpe etid yo.

Apre yon koup pyonye te fin priye sou kesyon an, yo te envite ni etidyan Labib yo ni konjwen yo vin lakay yo. Gen twa koup ki te vini, e apre yo fin manje, koup pyonye a te montre yo videyo ki rele Temwen Jewova yo òganize pou yo preche bon nouvèl la. Sa moun yo te wè nan videyo a te retire vye ide yo te tande konsènan kote piblikasyon nou yo soti. Nan semèn apre a, pandan koup pyonye a t ap fè etid youn nan etidyan sa yo, mari a, ki potko ap etidye, te ensiste pou yo aksepte 100 dola ameriken pou voye kòm ofrann pou travay mondyal la.

Nan yon zòn izole nan Papwazi Nouvèl Gine, byenke pa gen Entènèt, frè yo chofe pou yo aprann nouvo kantik yo. Donk, kongregasyon Mundip la voye yon frè al nan vil ki pi pre a, sa ki mande pou frè a mache pandan dezèdtan epi pou l fè dezèdtan nan bis pou l rive. Lè l rive, l al sou sit Entènèt la e li kopye pawòl nouvo kantik yo nan yon kaye. Lè l tounen, li ekri pawòl yo sou yon tablo nan Sal Wayòm nan pou tout moun ka wè. Moun yo nan kongregasyon an ekri pawòl yo pou yo ka chante nan reyinyon. Yo vrèman kontan lefètke yo ka chante menm chante ansanm ak kongregasyon toupatou sou tè a nan adorasyon y ap bay Jewova a.