Chapit de

Glorifye Jewova antanke sèl vrè Dye

1. Kiyès ki sèl vrè Dye a ?

BIB la di menmsi gen anpil swadizan dye, “ pou nou menm, gen reyèlman yon sèl Bondye, Papa a ”. (1 Korentyen 8:5, 6.) “ Sèl Bondye ” sa a se Jewova, Kreyatè tout bagay la (Detewonòm 6:4 ; Revelasyon 4:11). Jezi te pale de li kòm “ Bondye m e Bondye nou an ”. (Jan 20:17.) Li te dakò ak Moyiz ki te di anvan sa : “ Jewova se vrè Dye a. Apre li pa gen lòt ankò. ” ​(Detewonòm 4:35). Jewova pi siperyè lontan pase tout sa moun bay adorasyon, tankou zidòl yo, moun yo konsidere kòm dye, oswa ènmi Bondye a, Satan Ledyab, “ dye sistèm de choz sa a ”. (2 Korentyen 4:3, 4.) Kontrèman ak tout dye sa yo, se Jewova ki “ sèl vrè Dye a ”, jan Jezi te rele l la. — Jan 17:3.

2. Tank n ap aprann konsènan Jewova, ki efè sa ta dwe fè sou vi nou ?

² Moun ki gen rekonesans, ki aprann kalite atiran Bondye genyen yo, e ki aprann sa l deja fè ak sa li pral fè ankò pou nou, atire pou yo vin jwenn li. Tank lanmou yo pou Jewova ap ogmante, se tank y ap santi yo pouse pou yo ba l glwa. Kòman ? Yon fason yo fè sa se lè yo pale de li ak lòt moun. Women 10:10 di : “ Se avèk bouch la yon moun fè deklarasyon piblik pou l ka sove. ” Yon lòt fason yo fè sa, se lè yo imite l, kit se an pawòl, kit se ann aksyon. Efezyen 5:1 di : “ Se pou nou vin imitatè Bondye, antanke pitit byenneme. ” Pou nou fè sa pi byen, nou bezwen konnen kiyès Jewova ye toutbonvre.

3. Ki kalite prensipal Bondye genyen ?

 ³ Atravè tout Bib la, gen anpil deklarasyon ki fè nou rekonèt kalite remakab Bondye yo. Kat kalite prensipal li yo se sajès, jistis, pisans ak lanmou. “ Lakay li gen sajès. ” ​(Jòb 12:13). “ Tout chemen l se jistis. ” ​(Detewonòm 32:4). Li “ fò nan pisans ”. (Izayi 40:26.) “ Bondye se lanmou. ” ​(1 Jan 4:8). Sepandan, nan kat kalite prensipal Bondye yo, kiyès ladan yo ki pi remakab e ki montre plis pase tout lòt yo ki jan de Dye li ye ?

“ Bondye se lanmou ”

4. Kiyès nan kalite Bondye yo ki te pouse l kreye linivè ak tout sa ki vivan ladan l ?

⁴ Ann egzamine ki sa k te motive Jewova pou l kreye linivè e pou l fè kreyati entèlijan yo, espri ak moun. Èske se te sajès li oswa pisans li ? Non, paske menm lè Bondye te sèvi avèk kalite sa yo tou, se pa t yo menm ki te fòs ki te motive l. E jistis li pa t oblije l pataje don lavi a. Se kokenn lanmou Bondye genyen pito ki te pouse l pataje ak lòt moun lajwa ki genyen pou yo egziste antanke pèsòn entèlijan. Se lanmou ki te pouse l gen objektif pou moun ki obeyisan yo viv nan Paradi a pou toutan (Jenèz 1:28 ; 2:15). Se lanmou ki fè l pran dispozisyon pou l leve kondanasyon transgresyon Adan an lage sou limanite.

5. Selon Bib la, ki kalite Jewova pèsonifye, e poukisa ?

⁵ Konsa, nan tout kalite Bondye genyen yo, kalite ki pi remakab la se lanmou. Kalite sa a fondamantal lakay li, li natirèl lakay li. Byenke sajès, jistis ak pisans Jewova enpòtan anpil, Bib la pa janm di Jewova se youn nan kalite sa yo. Men, li di Jewova se lanmou. Wi, Jewova pèsonifye lanmou. Lanmou sa a se prensip ki dirije l, se pa santiman. Lanmou Bondye a se prensip sou verite ak prensip sou jistis ki gouvène l. Se fòm lanmou ki pi elve a, jan  Jewova Dye li menm li bay modèl la. Lanmou sa a se demonstrasyon yon total abnegasyon, e li toujou gen aksyon ki akonpaye l kòm prèv vizib.

6. Ki sa k fè li posib pou nou imite Bondye, menmsi li siperyè nou ?

⁶ Se bèl kalite sa a, lanmou, ki fè nou kapab imite yon Bondye konsa. Kòm nou se moun ki ensiyifyan, ki enpafè, ki gen tandans fè erè, nou ka panse nou pap janm ka reyisi imite l vre. Poutan, men yon lòt egzanp sou kokenn lanmou Jewova genyen an : li rekonèt nou gen limit e li pa egzije pèfeksyon lakay nou. Li konnen pou lemoman nou pa pafè ditou (Sòm 51:5). Se sa k fè Sòm 130:3, 4 di : “ Si se te fot ou t ap chèche, o Ya, o Jewova, kiyès ki t ap ka kanpe ? Paske gen vrè padon an lakay ou. ” Wi, Jewova se yon “ Bondye ki gen mizèrikòd ak konpasyon, ki pa prese fè kòlè, ki chaje bonte ki plen lanmou ”. (Egzòd 34:6.) “ Ou menm, o Jewova, ou bon e ou dispoze padone. ” ​(Sòm 86:5). Ala rekonfòtan ! Se pa ti ankourajan sa ankourajan pou nou sèvi Bondye estrawòdinè sa a e pou nou jwenn atansyon l ki chaje lanmou, ki chaje mizèrikòd !

7. Ki jan nou kapab wè lanmou Jewova nan sa l kreye yo ?

⁷ Moun ka wè lanmou Jewova tou nan sa l kreye yo. Reflechi sou kantite bon bagay Jewova bay pou plezi nou, tankou bèl mòn, bèl forè, bèl letan ak bèl oseyan yo. Li ban nou yon pakèt varyete manje nou pa ka konte pou fè bouch nou plezi e pou nouri nou. Mete sou sa, Jewova founi nou yon dividal varyete bèl flè santi bon, ansanm ak tout kalite zannimo enteresan ki nan kreyasyon an. Li kreye bagay ki bay lèzòm kè kontan, menm lè li pa t oblije fè bagay sa yo. Se vre, pandan n ap viv nan  monn mechan sa a, nan sitiyasyon enpafè nou ye la a, nou pa ka pran plezi nou nan kreyasyon l lan nèt (Women 8:22). Men, jis imajine sa Jewova pral fè pou nou nan Paradi a ! Gade asirans salmis lan ban nou : “ Ou ouvri men w epi ou satisfè dezi [lejitim] tout kreyati vivan. ” — Sòm 145:16.

8. Ki egzanp lanmou Jewova gen pou nou ki pi remakab ?

⁸ Ki egzanp lanmou Jewova gen pou limanite ki pi remakab ? Men sa Bib la esplike : “ Bondye tèlman renmen monn nan, li bay sèl Pitit Gason li fè a, dekwa pou nenpòt moun ki egzèse lafwa nan li pa detwi, men pou l gen lavi etènèl. ” ​(Jan 3:16). Èske se te akoz bonte lòm te genyen ki fè Jewova te fè sa ? Gade repons Women 5:8 bay : “ Bondye rekòmande nou pwòp lanmou li nan fason sa a : alòske nou te toujou pechè, Kris mouri pou nou. ” Annefè, Bondye te voye Pitit Gason pafè li a vin sou tè a pou l bay vi li an sakrifis kòm ranson pou rachte nou anba kondanasyon peche ak lanmò (Matye 20:28). Sa ouvri chemen pou moun ki renmen Bondye yo gen lavi etènèl. Nou rekonesan dèske lanmou Bondye etann sou tout moun ki vle fè volonte l. Paske Bib la di : “ Bondye pa gen patipri, men, nan tout nasyon, yon moun ki gen krentif pou li e ki pratike sa ki jis, li aksepte l. ” — Travay 10:34, 35.

9. Lefètke Jewova bay Pitit Gason l lan kòm ranson pou nou, ki jan sa ta dwe enfliyanse nou ?

⁹ Lefètke Jewova bay Pitit Gason l lan kòm ranson pou nou, sa ki ouvri chemen pou moun jwenn lavi etènèl, kòman sa ta dwe enfliyanse fason n ap itilize lavi nou jodi a ? Sa ta dwe fè lanmou nou pou Jewova, vrè Dye a, vin pi pwofon. Anmenmtan, sa ta dwe fè nou anvi koute Jezi ki reprezantan Bondye. “ [Jezi] te mouri  pou tout moun yon fason pou moun k ap viv pa viv pou pwòp tèt yo ankò, men pou sila ki te mouri pou yo a. ” ​(2 Korentyen 5:15). Ala yon plezi pou moun suiv tras Jezi, paske li te bay yon bèl egzanp nan fason li imite lanmou ak konpasyon Jewova ! Sa parèt klè nan pawòl Jezi te di moun ki enb yo : “ Vin jwenn mwen, nou tout k ap travay di e ki anba chay, epi m ap reban nou fòs. Mete jouk mwen an sou nou e aprann nan men m, paske mwen gen tanperaman dou e mwen gen imilite nan kè m, e n ap jwenn fòs pou nanm nou. Paske jouk mwen an dous e chay mwen an lejè. ” — Matye 11:28-30.

Annou montre nou gen lanmou pou lòt moun

10. Site kèk fason nou kapab montre nou gen lanmou pou kretyen parèy nou.

¹⁰ Kalite lanmou Jewova ak Jezi genyen pou nou an, ki jan nou ka montre nou gen menm kalite lanmou sa a pou kretyen parèy nou yo ? Remake kantite fason nou ka fè sa : “ Lanmou pasyan e li bon. Lanmou pa jalou, li pa vante tèt li, li pa gonfle tèt li ak ògèy, li pa aji yon fason ki endesan, li pa chèche pwòp enterè pa li, li pa irite. Li pa teni kont de bagay mal yo fè l. Li pa rejwi nan enjistis, men li rejwi avèk laverite. Li sipòte tout bagay, li kwè tout bagay, li espere tout bagay, li andire tout bagay. Lanmou pap janm pase. ” — 1 Korentyen 13:4-8 ; 1 Jan 3:14-18 ; 4:7-12.

11. Pou ki lòt moun ankò nou ta dwe montre nou gen lanmou, e kòman n ap montre sa ?

¹¹ Pou ki lòt moun ankò nou ta dwe montre nou gen lanmou, e kòman n ap montre sa ? Jezi di : “ Kidonk, ale epi fè disip pami moun tout nasyon. Batize yo nan non Papa a, nan non Pitit la ak nan non lespri sen an.  Anseye yo pou yo obsève tout bagay mwen te kòmande nou yo. ” ​(Matye 28:19, 20). Sa mande pou nou menm ki deja kretyen pou nou pataje bon nouvèl sou Paradi k ap vini nan monn nouvo Bondye a, ak moun ki poko kretyen yo. Jezi te montre klè se pa moun ki gen menm kwayans ak nou sèlman nou dwe renmen. Men sa l te di sou sa : “ Si nou renmen [sèlman] moun ki renmen nou, ki rekonpans n ap genyen ? Èske pèseptè enpo yo pa fè menm bagay la tou ? E si se frè nou sèlman nou salye, ki bagay estrawòdinè nou fè ? Èske moun nan nasyon yo pa fè menm bagay la tou ? ” — Matye 5:46, 47 ; 24:14 ; Galat 6:10.

“ Mache nan non Jewova ”

12. Poukisa se sèl Bondye ki kapab pote non li genyen an ?

¹² Yon lòt aspè enpòtan nan glorifye vrè Dye a se konnen sèl non li genyen an, Jewova. Ansuit, se pou nou sèvi ak non an epi anseye lòt moun li. Salmis lan eksprime dezi sensè sa a, li di : “ Pou moun ka konnen, ou menm ki rele Jewova, se ou menm sèl ki Trèwo sou tout tè a ! ” ​(Sòm 83:18). Non Jewova siyifi “ Li fè vin tounen ”. Li se Gran Dye a ki gen objektif e ki toujou reyalize yo. E se vrè Dye a sèlman ki gen dwa pote non sa a, paske lèzòm pap janm ka sèten efò yo ap reyisi (Jak 4:13, 14). Se sèl Jewova ki ka di pawòl li “ ap reyisi san mank ” nan sa l voye l fè a (Izayi 55:11). Gen anpil moun ki sezi lè yo wè non Bondye pou premye fwa nan bib pa yo e lè yo aprann sa l siyifi (Egzòd 6:3). Men, konesans sa a ap pwofitab pou yo sèlman si yo “ mache nan non Jewova [...] pou toutan ”. — Mika 4:5.

13. Ki sa sa vle di konnen non Jewova epi mache nan non l ?

¹³ Anrapò ak non Bondye, men sa Sòm 9:10 di :  “ Moun ki konnen non w ap mete konfyans yo nan ou. ” Sa vle di plis pase annik konnen non Jewova. Paske konnen non an pa vle di otomatikman ou mete konfyans nan li. Konnen non Bondye vle di, konprann ki jan de Dye Jewova ye, respekte otorite l, obeyi kòmandman l yo, epi fè l konfyans nan tout bagay (Pwovèb 3:5, 6). Menm jan an tou, mache nan non Jewova vle di vwe tèt nou ba li, epi reprezante l antanke youn nan adoratè l yo. Sa vle di tou pou nou viv vrèman ann akò ak volonte Bondye (Lik 10:27). Èske se sa w ap fè ?

14. Si nou vle sèvi Jewova pou letènite, anplis yon santiman obligasyon, ki lòt bagay ki nesesè ?

¹⁴ Si nou vle sèvi Jewova pou letènite, gen plis bagay pase yon santiman obligasyon ki dwe motive nou. Men egzòtasyon apot Pòl te fè Timote ki te gen plizyè ane depi l ap sèvi Jewova : “ Fòme tèt ou, pandan w gen atachman pou Bondye kòm objektif. ” ​(1 Timote 4:7). Atachman soti nan yon kè ki chaje rekonesans pou moun ou gen atachman pou li a. Gen “ atachman pou Bondye ” se demontre yon pwofon onè ak yon pwofon respè pou Jewova an pèsòn. Sa tradui yon atachman ki chaje lanmou pou li paske nou gen yon kokenn estim ni pou li ni pou chemen l yo. Se santiman sa a ki fè nou ta renmen pou tout moun gen yon gwo respè pou non li. Nou dwe kiltive atachman pou Bondye nan lavi nou si nou ta renmen mache nan non Jewova, sèl vrè Dye a, pou toutan. — Sòm 37:4 ; 2 Pyè 3:11.

15. Ki fason nou kapab bay Bondye yon atachman san pataj ?

¹⁵ Pou nou sèvi Bondye yon fason ki akseptab nan je l, nou dwe ba li yon adorasyon ki san pataj, piske li se “ yon Bondye ki egzije yon atachman san pataj ”. (Egzòd 20:5.) Nou pa ka renmen Bondye epi  anmenmtan pou nou renmen monn mechan an, monn se Satan ki dye l la (Jak 4:4 ; 1 Jan 2:15-17). Jewova konnen egzakteman ki jan de moun nou chak n ap fè efò pou nou ye (Jeremi 17:10). Si nou renmen jistis toutbonvre, li wè sa, e l ap ede nou andire eprèv n ap rankontre chak jou. Avèk lespri sen li an ki pisan, l ap soutni nou, l ap pèmèt nou ranpòte laviktwa sou mechanste k ap vin pi plis nan monn sa a (2 Korentyen 4:7). Anplis de sa, l ap ede nou kenbe esperans solid nou genyen pou nou viv etènèlman nan Paradi sou tè a. Ala yon bèl avni k ap tann nou ! Nou ta dwe gen yon pwofon rekonesans pou sa, e se ak tout volonte nou nou ta dwe sèvi vrè Dye a, Jewova, li menm ki fè lavi etènèl la posib.

16. Ki sa w ta dwe anvi fè bò kote plizyè milyon lòt moun ?

¹⁶ Plizyè milyon moun toupatou sou tè a kontan aksepte envitasyon salmis lan ki ekri : “ O, annou glorifye Jewova avèk mwen, annou egzalte non l ansanm. ” ​(Sòm 34:3). Jewova envite w pou w pami foul moun ki pa sispann gwosi nan tout nasyon yo k ap fè sa.

Revizyon

• Ki jan de moun Jewova ye ? Ki byenfè n ap jwenn si nou chèche byen konprann kalite l yo ?

• Ki jan nou ka ede lòt moun aprann laverite sou Bondye ?

• Ki sa sa vle di konnen non Jewova epi mache nan non l ?

[Kesyon]

 [Foto nan paj 14]

Jewova, nan kokenn lanmou li genyen an,‘ pral ouvri men li e l ap satisfè dezi tout kreyati vivan ’.