Chapit onz

‘ Kontinye chèche wayòm nan an premye ’

1. a) Poukisa Jezi te egzòte moun ki t ap tande l yo pou yo chèche Wayòm nan an premye ? b) Ki kesyon nou ta dwe poze tèt nou ?

GEN plis pase 1 900 an, nan yon diskou Jezi t ap fè nan Galile, men egzòtasyon li te bay moun ki t ap tande l yo : “ Kontinye chèche wayòm nan ak jistis [Bondye]. ” Men, pou ki rezon sa te ijan konsa ? Èske plizyè syèk pa t ap gen pou pase anvan Kris resevwa pouvwa Wayòm nan ? Wi, men se grasa Wayòm mesyanik la Jewova t apral jistifye dwa l genyen pou l gouvène, e pou l reyalize gwo objektif li gen pou tè a. Nenpòt moun ki te konprann toutbon enpòtans bagay sa yo genyen t ap bay Wayòm nan premye plas nan lavi li. Si sa te vrè nan premye syèk la, alewè pou jodi a, piske Kris chita sou twòn nan antanke Wa kounye a ! Kidonk, kesyon ki poze a se : Èske fason m ap viv la montre se Wayòm nan m ap chèche an premye ? — Matye 6:33.

2. Dèyè ki bagay pifò moun ap kouri ak tout fòs ?

² Anfèt, jodi a, gen plizyè milyon moun toupatou nan lemonn k ap chèche Wayòm nan an premye. Yo montre y ap soutni dominasyon Wayòm nan lè yo santre lavi yo sou fè volonte Jewova, piske yo vwe vi yo ba li. Yon lòt bò, pifò moun ki sou tè a, sa k enterese yo se chèche bagay ki nan monn nan. Moun yo ap kouri dèyè lajan, y ap kouri dèyè byen materyèl ak plezi lajan  pèmèt moun achte. Oubyen yo mete tout enèji yo deyò pou yo reyisi karyè yo. Fason y ap viv la demontre prensipal sousi yo se pwòp tèt yo, bagay materyèl ak plezi. Si yo kwè nan Bondye, yo mete l nan yon pozisyon segondè. — Matye 6:31, 32.

3. a) Ki kalite trezò Jezi ankouraje disip li yo chèche, e poukisa ? b) Poukisa li pa nesesè pou nou enkyete nou twòp pou bagay materyèl ?

³ Sepandan, men konsèy Jezi te bay disip li yo : “ Sispann sere trezò pou nou sou tè a ”, piske okenn nan byen sa yo pap dire nètale. Li te di yo : “ Pito nou sere trezò pou nou nan syèl la ”, lè nou sèvi Jewova. Jezi te ankouraje disip li yo pou je yo rete “ senp ”, lè yo konsantre atansyon yo ak fòs yo sou fè volonte Bondye. Li te di yo tou : “ Nou pa kapab travay kòm esklav pou Bondye e pou Richès. ” Men, e pou bezwen materyèl tankou manje, rad ak kote pou moun rete ? Jezi te bay konsèy sa a : “ Sispann enkyete nou. ” Li te atire atansyon yo sou zwazo yo : Bondye ba yo manje. Jezi te ankouraje disip li yo pou yo pran leson sou flè yo : Bondye abiye yo. Èske lèzòm, sèvitè Jewova ki entèlijan, pa gen plis valè pase nenpòt nan bagay sa yo ? Jezi di : “ Kidonk, kontinye chèche wayòm nan ak jistis li an premye e y ap ajoute tout lòt bagay [nesesè] sa yo pou nou. ” ​(Matye 6:19-34). Èske aksyon w montre ou kwè sa ?

Pa kite anyen toufe verite Wayòm nan

4. Si yon moun bay bagay materyèl twòp enpòtans, ki sa k ka rive finalman ?

⁴ Li nòmal pou yon moun sousye l de bezwen materyèl li ak bezwen materyèl fanmi li. Sepandan, si yon moun enkyete twòp pou bagay materyèl, sa ka mennen l nan katastwòf. Menm lè li pretann li kwè nan  Wayòm nan, si nan kè l se lòt bagay li mete an premye, sa ap toufe verite Wayòm nan (Matye 13:18-22). Pa egzanp, yon lè, yon jèn chèf rich te mande Jezi : “ Ki sa m dwe fè pou m eritye lavi etènèl ? ” Li t ap mennen yon vi ki ann amoni ak prensip moral e li te byen aji ak lòt moun, men li te twò atache ak byen materyèl li posede. Li pa t ka aksepte abandone yo, yon fason pou l vin yon disip Kris. Konsa, li te rate posiblite pou l ta nan Wayòm selès la ansanm ak Kris alavni. Nan sikonstans sa a, Jezi te di : “ Ala yon bagay k ap difisil pou moun ki gen lajan antre nan wayòm Bondye a ! ” — Mak 10:17-23.

5. a) Ak ki bagay Pòl te ankouraje Timote pou l te kontante l, e poukisa ? b) Kòman Satan sèvi ak “ lanmou pou lajan ” kòm yon pyèj ki pou detwi moun ?

⁵ Plizyè ane apre, apot Pòl te ekri Timote ki te twouve l nan Efèz, yon sant komèsyal ki te rich. Pòl te fè l sonje : “ Nou pa t pote anyen nan monn nan, e nitou nou pa ka ale ak anyen. Se sa k fè, piske nou gen manje ak rad, n ap kontante nou avèk bagay sa yo. ” Se nòmal pou nou travay pou nou jwenn “ manje ak rad ” pou tèt nou ansanm ak fanmi nou. Men, Pòl bay yon avètisman : “ Moun ki detèmine pou yo rich tonbe nan tantasyon, nan yon pyèj ak nan anpil anvi ki ensanse e ki nuizib, ki lage moun nan destriksyon e nan dezas. ” Satan rize. Toudabò, li kapab atire yon moun nan bagay ki pa sanble gen anpil enpòtans. Apre sa, li vini ak presyon ki pi gwo. Petèt se posiblite pou nou pran pwomosyon oswa pou nou jwenn yon pi bon djòb ki byen peye, men ki egzije tan, tan nou te konn rezève pou aktivite espirityèl anvan sa. Si nou pa veyatif, “ lanmou pou lajan ” kapab toufe enterè Wayòm nan ki pi enpòtan lontan  pase bagay sa yo. Men rezime Pòl fè sou sa : “ Gen kèk moun, lè yo panche pou yon lanmou konsa, yo pèdi chemen lafwa a e yo pèse kò yo toupatou avèk anpil soufrans. ” — 1 Timote 6:7-10.

6. a) Pou nou evite pran nan pyèj materyalis, ki sa nou dwe fè ? b) Ki asirans nou dwe genyen malgre jan sitiyasyon ekonomik lan ye nan monn nan jodi a ?

⁶ Avèk yon lanmou sensè, Pòl te ankouraje Timote, ki te frè l nan lafwa, pou l “ kouri pou bagay sa yo ” epi pou l “ konbat nan bèl konba lafwa a ”. (1 Timote 6:11, 12.) Nou bezwen fè efò serye pou nou evite tonbe nan lavi materyalis monn ki alantou nou an. Men, si nou lite ann amoni ak lafwa nou, Jewova pap janm abandone nou. Kèlkeswa jan lavi a chè e kèlkeswa jan sa difisil pou moun jwenn travay, li ban nou asirans n ap jwenn sa nou reyèlman bezwen. Men sa Pòl ekri : “ Se pou fason n ap viv la pa gen okenn tras lanmou lajan ladan l, men, se pou nou kontante nou ak sa nou genyen kounye a. Paske [Bondye] di : ‘ Mwen pap kite nou okenn fason, ni nonplis mwen pap abandone nou okenn fason. ’ Dekwa pou nou ka gen bon kouraj e pou nou di : ‘ Se Jewova ki èd mwen, mwen pap pè. Ki sa lòm ka fè m ? ’ ” ​(Ebre 13:5, 6). Wa David bò kote pa l te ekri : “ Mwen te yon jèn gason, apre sa mwen vin vyeyi. E poutan mwen pa wè okenn moun ki jis abandone konplètman, ni m pa wè desandan li ap chèche pen. ” — Sòm 37:25.

Premye disip yo ban nou egzanp

7. Ki enstriksyon Jezi te bay disip li yo konsènan predikasyon, e poukisa sa te apwopriye ?

⁷ Apre Jezi te fin bay apot li yo yon fòmasyon apwopriye, li te voye yo preche bon nouvèl la ann Izrayèl e li  te di yo pou yo anonse : “ Wayòm syèl la vin pi pre. ” Ala yon mesaj vibran ! Jezi Kris, Wa mesyanik la, te pami yo. Piske apot yo te mete tout devouman yo nan sèvis Bondye, Jezi te ankouraje yo pou yo gen konfyans Bondye ap pran swen yo. Konsa li te di : “ Pa pote anyen pou vwayaj la, ni baton ni sak pou pwovizyon, ni pen ni lajan monnen, ni de rad. Men, toupatou kote nou antre nan yon kay, rete la e de la etan, ale. ” ​(Matye 10:5-10 ; Lik 9:1-6). Jewova t ap veye pou yo jwenn sa yo bezwen nan men Izrayelit parèy yo ki te gen abitid montre ospitalite anvè etranje.

8. a) Yon ti tan anvan Jezi mouri, poukisa li te bay nouvo enstriksyon pou predikasyon ? b) Ki sa disip Jezi yo te dwe toujou mete an premye nan lavi yo ?

⁸ Apre sa, jis anvan Jezi mouri, li te avèti apot li yo alavni yo t ap gen pou yo travay nan sikonstans ki diferan. Akoz opozisyon ofisyèl ki t apral gen sou aktivite predikasyon an, moun pa t ap tou prèt pou ofri yo ospitalite ankò ann Izrayèl. Anplis de sa, talè konsa, yo t apral pote mesaj Wayòm nan nan peyi Janti yo. Nan moman sa a, yo t ap oblije pote “ yon bous ” ak “ yon sak pwovizyon ”. Malgre sa, yo te dwe kontinye chèche Wayòm Jewova a ak jistis li an premye, avèk konfyans Bondye ap beni efò yo t ap fè pou yo jwenn manje ak rad. — Lik 22:35-37.

9. Ki jan Pòl te mete Wayòm nan an premye nan lavi li toutpandan li t ap okipe l de bezwen materyèl li, e ki konsèy li te bay sou sa ?

⁹ Apot Pòl te yon bèl egzanp moun ki te aplike konsèy Jezi a. Pòl te mete ministè a an premye nan lavi li (Travay 20:24, 25). Lè l te ale nan yon zòn pou l preche, li te pran swen tèt li materyèlman, pa egzanp li te  konn fabrike tant. Li pa t atann pou se lòt moun ki pou pran swen l (Travay 18:1-4 ; 1 Tesalonisyen 2:9). Poutan, avèk rekonesans, li te aksepte ospitalite ak don lòt moun fè l, lè yo eksprime lanmou yo pou li nan fason sa a (Travay 16:15, 34 ; Filipyen 4:15-17). Pòl te ankouraje kretyen yo pou yo pa neglije obligasyon familyal yo poutèt predikasyon, men pito pou yo fè ekilib ant divès responsablite yo genyen. Li te konseye yo pou yo travay, pou yo renmen fanmi yo e pou yo pataje ak lòt moun (Efezyen 4:28 ; 2 Tesalonisyen 3:7-12). Li te ankouraje yo pou yo mete konfyans yo nan Bondye, non pa nan byen materyèl. Li te ankouraje yo tou pou yo itilize lavi yo yon fason ki montre yo konprann vrèman ki bagay ki pi enpòtan. Ann amoni ak sa Jezi te anseye, sa siyifi se pou yo chèche Wayòm Bondye a ak jistis li an premye. — Filipyen 1:9-11.

Kontinye bay Wayòm nan premye plas nan lavi nou

10. Ki sa sa siyifi chèche Wayòm nan an premye ?

¹⁰ Jis nan ki pwen pèsonèlman nou pataje bon nouvèl Wayòm nan avèk lòt moun ? An pati, sa depann de sitiyasyon nou ak pwofondè rekonesans nou. Sonje Jezi pa t di : ‘ Chèche Wayòm nan lè nou pa gen anyen ankò pou nou fè. ’ Lefètke li konnen enpòtans Wayòm nan, li te eksprime volonte Papa l lè l te di : “ Chèche wayòm li an san rete. ” ​(Lik 12:31). Malgre pifò nan nou bezwen travay pou nou pran swen tèt nou ak fanmi nou, si nou gen lafwa, lavi nou ap santre sou travay Wayòm nan Bondye ban nou fè a. Anmenmtan, n ap andose responsablite familyal nou. — 1 Timote 5:8.

11. a) Ki jan Jezi te montre tout moun pa t ap ka fè menm kantite nan travay simaye mesaj Wayòm nan ? b) Ki sitiyasyon ki ka enfliyanse kantite sa yon moun ka fè ?

 ¹¹ Sèten nan nou kapab dispoze plis tan pase lòt pou preche bon nouvèl Wayòm nan. Men, nan parabòl Jezi te bay konsènan divès kalite tè yo, li te montre tout moun ki gen kè yo sanble ak bon tè a ap pote fwi. Jis nan ki pwen ? Sitiyasyon tout moun pa menm. Laj, sante, responsablite familyal, tout sa konte. Men, si nou gen bonjan rekonesans nou kapab reyalize anpil bagay. — Matye 13:23.

12. Ki bonjan objektif espirityèl yo ankouraje sitou jèn yo pou yo anvizaje ?

¹² Li bon pou nou gen objektif k ap ede nou ogmante patisipasyon nou nan travay Wayòm nan. Jèn yo kapab reflechi seryezman sou bèl egzanp zèl Timote kite antanke jèn kretyen (Filipyen 2:19-22). Ki sa k ta ka pi bon pou yo pase antre nan sèvis aplentan lè yo fini lekòl ? Moun ki pi aje yo tou ap jwenn byenfè lè yo fikse bonjan objektif espirityèl.

13. a) Kiyès ki pou deside ki sa nou ka fè pèsonèlman nan sèvis Wayòm nan ? b) Si vrèman nou chèche Wayòm nan an premye, ki sa nou pwouve ?

 ¹³ Olye pou n ap kritike moun nou panse ki ta ka fè plis, nou ta dwe kite lafwa motive nou pou nou travay pou nou amelyore tèt nou pèsonèlman. Konsa, nou ta kapab sèvi Bondye pi plis toujou selon sa pwòp sitiyasyon nou pèmèt nou fè (Women 14:10-12 ; Galat 6:4, 5). Jan istwa Jòb la montre sa, Satan pretann prensipal sousi nou se byen materyèl, konfò nou ak byennèt pèsonèl nou. E li pretann sa ki pouse nou sèvi Bondye se rezon egoyis. Men, si nou vrèman chèche Wayòm nan an premye, n ap kontribye pou bay prèv Satan se pi gwo mantè ki egziste. N ap demontre se sèvis Bondye ki gen priyorite nan lavi nou. Konsa, ni nan pawòl nou ni nan aksyon nou, nou pwouve lanmou pwofon nou gen pou Jewova. Nou pwouve n ap soutni souvrènte li fidèlman e nou renmen pwochen nou. — Jòb 1:9-11 ; 2:4, 5 ; Pwovèb 27:11.

14. a) Poukisa yon pwogram pou predikasyon se yon bagay ki itil ? b) Jis nan ki pwen anpil Temwen patisipe nan predikasyon ?

¹⁴ Yon pwogram kapab ede nou reyalize plis bagay pase sa nou ka fè lè nou pa gen pwogram. Jewova li menm gen yon “ tan fikse ” pou l reyalize objektif li (Egzòd 9:5 ; Mak 1:15). Si sa posib, li ta bon pou nou patisipe nan predikasyon yon fwa oswa plizyè fwa nan lè ki fiks chak semèn. Plizyè santèn milye Temwen Jewova toupatou nan lemonn, ki pran sèvis pyonye oksilyè, pase anviwon dezèdtan pa jou ap preche bon nouvèl la. Gen plizyè santèn milye lòt k ap sèvi kòm pyonye pèmanan. Yo pase anviwon dezèdtan edmi pa jou ap  pwoklame mesaj Wayòm nan. Pyonye espesyal yo ak misyonè yo pase plis tan toujou nan sèvis Wayòm nan. Nou menm tou, nou ka chèche okazyon pou nou pataje esperans Wayòm nan yon fason enfòmèl ak tout moun ki vle koute (Jan 4:7-15). Dezi nou se ta dwe pou nou bay yon patisipasyon total nan travay sa a, selon sa sitiyasyon nou pèmèt nou fè, paske Jezi te predi : “ Bon nouvèl sa a konsènan wayòm nan, yo pral preche l sou tout latè ki abite kòm temwayaj pou tout nasyon. Epi apre sa lafen an ap vini. ” — Matye 24:14 ; Efezyen 5:15-17.

15. Anrapò ak ministè nou, poukisa nou santi konsèy ki nan 1 Korentyen 15:58 la se yon konsèy ki apwopriye ?

¹⁵ Sou tout kò tè a, yon fason ki ini, nan kèlkeswa nasyon Temwen Jewova yo ap viv, yo gen privilèj patisipe nan sèvis sa a. Yo aplike sou yo menm konsèy biblik enspire sa a : “ Se pou nou vin fèm, san nou pa brannen, pou nou toujou gen anpil bagay pou nou fè nan travay Seyè a, paske anrapò ak Seyè a nou konnen nou pap travay anven. ” — 1 Korentyen 15:58.

Revizyon

• Lè Jezi te di pou nou kontinye “ chèche Wayòm nan an premye ”, ki sa li te montre ki ta dwe segondè ?

• Ki ta dwe pwennvi nou sou responsablite nou genyen pou nou pran swen tèt nou ak fanmi nou nan domèn materyèl ? Ki èd Bondye ap ban nou ?

• Anrapò ak Wayòm nan, nan ki fòm sèvis nou kapab patisipe ?

[Kesyon]

[Foto nan paj 107]

Jodi a, nan tout peyi, Temwen Jewova yo ap preche bon nouvèl la anvan lafen an vini.