Chapit diznèf

Kontinye pale Pawòl Bondye a avèk kran

1. a) Ki bon nouvèl disip Jezi yo t ap pwoklame, men kòman sèten Juif te reyaji ? b) Ki kesyon nou ka poze tèt nou ?

GEN prèske 2 000 an, yo te wenn Jezi Kris, Pitit Bondye a, kòm pwochen Wa sou tout tè a. Ènmi relijye yo te lakòz yo egzekite Jezi, men Jewova te resisite l sot nan lanmò. Grasa Jezi, lavi etènèl vin posib kounye a. Sepandan, lè disip Jezi yo te kòmanse pwoklame bon nouvèl sa a piblikman, pèsekisyon te met pye. Yo te fèmen kèk ladan yo nan prizon, yo te menm filange yo ak kout fwèt epi yo te ba yo lòd pou yo sispann pale konsènan Jezi (Travay 4:1-3, 17 ; 5:17, 18, 40). Ki sa yo t apral fè ? Ki sa ou menm ou t ap fè ? Èske w t ap kontinye preche avèk kran ?

2. a) Ki nouvèl estrawòdinè ki dwe pwoklame nan epòk nou an ? b) Kiyès ki gen responsablite pou preche bon nouvèl la ?

² An 1914, Jezi Kris, Wa Wayòm Bondye a, te resevwa otorite nan syèl la pou l ‘ gouvène nan mitan ènmi l yo ’. (Sòm 110:2.) Apre sa, yo jete Satan ansanm ak demon l yo sou tè a (Revelasyon 12:1-5, 7-12). Dènye jou sistèm mechan sa a te kòmanse. Lè peryòd sa a fini, Bondye pral detwi tout sistèm de choz Satan an (Dànyèl 2:44 ; Matye 24:21). Moun ki chape yo pral gen posiblite devan yo pou yo viv etènèlman sou tè a ki pral tounen yon paradi. Si w aksepte bon nouvèl sa a,  w ap anvi pataje l ak lòt moun (Matye 24:14). Men, ki jan w ka atann moun yo ap reyaji ?

3. a) Ki jan moun yo reyaji devan mesaj Wayòm nan ? b) Ki kesyon nou dwe reponn ?

³ Lè w ap pwoklame bon nouvèl Wayòm nan, sèten moun kapab byen akeyi l, men pifò moun ap montre yo endiferan (Matye 24:37-39). Gen kèk moun ki ka pase w nan rizib oswa yo ka opoze avè w. Jezi te avèti opozisyon sa a ka soti nan pwòp fanmi w (Lik 21:16-19). Li ka soti tou nan travay ou oswa nan lekòl ou. Gen kèk peyi sou tè a kote Temwen Jewova yo konn menm anba entèdiksyon gouvènmantal. Lè w ap fè fas ak sitiyasyon konsa, èske w ap kontinye pale Pawòl Bondye a avèk kran e èske w ap kontinye “ kenbe fèm nan lafwa ” ? — 1 Korentyen 16:13.

Pa konte sou pwòp fòs nou

4. a) Ki sa ki fondamantal pou nou pwouve nou se sèvitè Bondye ki fidèl ? b) Poukisa reyinyon yo sitèlman enpòtan ?

⁴ Sa ki fondamantal pou yon moun rete yon sèvitè Jewova fidèl, se pou l gen konfyans nan dispozisyon Jewova yo. Youn nan dispozisyon sa yo se reyinyon kongregasyon an. Ekriti yo ankouraje nou pou nou pa neglije yo (Ebre 10:23-25). Moun ki kontinye rete Temwen Jewova ki fidèl fè gwo efò pou yo asiste reyinyon yo regilyèman ansanm ak lòt adoratè parèy yo. Nan reyinyon sa yo, konesans nou sou Ekriti yo vin ogmante. Anplis de sa, nou vin apresye plis toujou yon seri verite nou te deja konnen byen, e konpreyansyon nou sou fason pou nou itilize yo vin afine. Nou vin pi pwòch frè nou yo nan adorasyon ini an, e nou fòtifye pou nou fè volonte Bondye. Lespri Jewova ban nou  direksyon grasa kongregasyon an, e pa mwayen lespri sa a, Jezi nan mitan nou. — Matye 18:20 ; Revelasyon 3:6.

5. Lè Temwen Jewova yo anba entèdiksyon, kòman yo fè reyinyon yo ?

⁵ Èske w asiste tout reyinyon yo regilyèman, e èske pèsonèlman ou aplike sa w tande ladan yo ? Gende fwa, sa konn nesesè pou Temwen Jewova yo fè reyinyon pa ti gwoup nan mezon prive. Se sa k rive lè yo anba entèdiksyon. Andwa kote y ap fè reyinyon yo ansanm ak lè a ka chanje, e yo ka pa toujou bon pou nou. Gen kèk reyinyon ki konn fèt ta nan lannuit. Men, malgre enkonvenyan pèsonèl ak danje, frè ak sè ki fidèl yo fè efò sensè pou yo la nan chak reyinyon.

6. Ki jan nou demontre nou gen konfyans nan Jewova, e kòman sa kapab ede nou kontinye pale avèk kran ?

⁶ Konfyans nou nan Jewova Dye ogmante, lè nou pran abitid priye l regilyèman ak tout kè nou, paske nou rann nou kont nou bezwen èd li. Èske w fè sa ? Jezi te konn priye souvan diran ministè l sou tè a (Lik 3:21 ; 6:12, 13 ; 22:39-44). E nan nuit anvan yo te kloure l sou poto a, men ankourajman li te bay disip li yo : “ Kontinye veye e kontinye priye, yon fason pou nou pa tonbe nan tantasyon. ” ​(Mak 14:38). Si nou jwenn endiferans anrapò ak mesaj Wayòm nan, nou ka tante pou nou ralanti nan ministè nou. Si moun ap pase nou nan rizib oswa y ap pèsekite nou, nou ka tante sispann preche pou nou evite pwoblèm. Men, si nou priye sensèman pou nou mande èd lespri Bondye pou nou kontinye pale avèk kran, n ap jwenn pwoteksyon pou nou pa sede devan tantasyon sa yo. — Lik 11:13 ; Efezyen 6:18-20.

 Rapò sou temwayaj ki te bay avèk kran

7. a) Poukisa rapò ki nan liv Travay la enterese nou espesyalman ? b) Reponn kesyon yo poze nan fen paragraf sa a, pandan n ap mete aksan sou fason enfòmasyon yo bay yo ka itil nou.

⁷ Rapò ki gen nan liv Travay la enterese nou tout espesyalman. Li rakonte kòman apot yo ak premye disip yo, moun ki te gen santiman ki sanble ak santiman pa nou, te rive venk obstak, e yo te pwouve yo se Temwen Jewova fidèl ki gen kran. Annou sèvi ak kesyon ki vin apre yo ansanm ak tèks biblik yo bay yo pou nou egzamine yon pati nan rapò sa a. Pandan n ap fè sa, egzamine kòman w ka tire pwofi pèsonèlman nan sa w ap li a.

Èske apot yo se moun ki te trè enstwi ? Èske tou natirèlman yo te moun ki pa t pè anyen kèlkeswa sikonstans lan (Jan 18:17, 25-27 ; 20:19 ; Travay 4:13) ?

Ki sa k te fè Pyè te ka pale avèk kran devan tribinal juif ki te kondane pwòp Pitit Bondye a (Matye 10:19, 20 ; Travay 4:8) ?

Ki sa apot yo t ap fè pandan plizyè semèn anvan yo te mennen yo devan Sanedren an (Travay 1:14 ; 2:1, 42) ?

Lè dirijan yo te bay apot yo lòd pou yo sispann preche nan non Jezi, ki jan Pyè ak Jan te reponn (Travay 4:19, 20) ?

Apre yo te fin libere apot yo, nan men kiyès yo te toujou ap chèche èd ? Èske yo te priye pou pèsekisyon an sispann, oubyen pou ki sa yo te priye (Travay 4:24-31) ?

 Pa ki mwayen Jewova te bay èd li lè opozan yo t ap chèche stope travay predikasyon an (Travay 5:17-20) ?

Kòman apot yo te montre yo konprann rezon ki te fè yo jwenn liberasyon (Travay 5:21, 41, 42) ?

Ki sa disip yo te kontinye fè menm lè anpil nan yo te dispèse akoz pèsekisyon (Travay 8:3, 4 ; 11:19-21) ?

8. Ki rezilta estrawòdinè ministè premye disip yo te bay, e kòman nou fè vin enplike nan travay sa a ?

⁸ Travay preche bon nouvèl la, se pa yon travay k ap fèt anven. Anviwon 3 000 disip te batize nan jou Pannkòt ane 33 epòk nou an. “ Moun ki kwayan nan Seyè a te kontinye vin ajoute, anpil moun, gason kou fi. ” ​(Travay 2:41 ; 4:4 ; 5:14). Avèk letan, menm Sol, moun Tas, ki te yon pèsekitè agresif pèp Bondye a, te vin kretyen e avèk kran li te kòmanse rann temwayaj pou laverite. Yo te vin konnen li sou non apot Pòl (Galat 1:22-24). Travay ki te kòmanse nan premye syèk la pa t kanpe la. Nan dènye jou sa yo travay la entansifye e li rive touche tout kote sou tè a. Nou gen privilèj pou nou patisipe nan travay sa a. E toutpandan n ap fè sa, nou kapab aprann nan egzanp Temwen fidèl ki t ap sèvi anvan nou yo te kite.

9. a) Ki okazyon Pòl te itilize pou l bay temwayaj ? b) Ki fason ou menm ou simaye mesaj Wayòm nan bay lòt moun ?

⁹ Lè Pòl te aprann laverite konsènan Jezi Kris, ki sa l te fè ? “ Menm kote a, li kòmanse preche konsènan Jezi [...], li t ap di se Moun sa a ki pitit Bondye a. ” ​(Travay 9:20). Li te rekonesan pou bonte Bondye li pa merite a, e li te rann li kont tout moun bezwen bon nouvèl li te resevwa a. Pòl te yon Juif, e selon koutim epòk la, li  te ale nan sinagòg yo pou l bay temwayaj. Li te preche kay an kay tou e li te rezone ak moun nan zòn kote ki te gen mache. E li te dispoze deplase al nan nouvo tèritwa pou l preche bon nouvèl la. — Travay 17:17 ; 20:20 ; Women 15:23, 24.

10. a) Kòman Pòl te montre, malgre li gen kran, li te gen disènman tou nan fason li te bay temwayaj ? b) Kòman nou ka montre nou reflete menm kalite ak Pòl, lè n ap bay paran nou, kòlèg travay nou oubyen kamarad lekòl nou temwayaj ?

¹⁰ Pòl te gen kran, men li te gen disènman tou. Se menm jan an nou ta dwe ye. Pou l te atire Juif yo, li te fè sa sou baz pwomès Bondye te fè zansèt yo. Avèk Grèk yo, li te pale sou bagay yo abitye. Pafwa, li te konn itilize pwòp eksperyans pa l sou fason li te aprann laverite kòm mwayen pou l bay temwayaj. Li di : “ Mwen fè tout bagay akoz bon nouvèl la yon fason pou m ka pataje l ak lòt moun. ” — 1 Korentyen 9:20-23 ; Travay 22:3-21.

11. a) Ki sa Pòl te fè pou l evite plede fè konfwontasyon ak opozan ? b) Ki lè n ap fè byen pou nou imite egzanp Pòl, e kòman n ap fè sa ? c) Ki kote pisans pou nou kontinye pale avèk kran an ap soti ?

¹¹ Lè opozisyon te fè Pòl wè li sanble pi bon pou l preche nan yon lòt zòn pandan yon bout tan, li te fè sa, olye pou l ap plede pwovoke konfwontasyon ak opozan yo (Travay 14:5-7 ; 18:5-7 ; Women 12:18). Men, li pa t janm wont akoz bon nouvèl la (Women 1:16). Malgre Pòl te twouve tretman opozan yo te fè l sibi, avèk ensolans e menm avèk vyolans, se pa t yon bagay ki te agreyab, li ‘ te ranmase kouraj li, grasa Bondye nou an ’ pou l kontinye preche. Li di : “ Seyè a te kanpe toupre m e li te ranpli m ak pisans, poutèt pou predikasyon an te  ka totalman akonpli grasa mwen. ” ​(1 Tesalonisyen 2:2 ; 2 Timote 4:17). Jezi, Chèf kongregasyon kretyen an, kontinye ban nou pisans nou bezwen pou nou fè travay li te predi pou epòk nou an. — Mak 13:10.

12. Ki sa k montre yon kretyen gen kran, e ki sa ki baz kran sa a ?

¹² Nou gen tout rezon pou nou kontinye pale Pawòl Bondye a avèk kran, egzakteman jan Jezi ak lòt sèvitè Bondye fidèl yo te fè sa nan premye syèk la. Sa pa vle di pou nou aji san konsiderasyon oswa pou nou chèche fòse moun tande mesaj la alòske yo pa vle l. Men nou pap abandone paske moun endiferan, ni nou pap kite opozisyon fè nou fèmen bouch nou. Menm jan ak Jezi, n ap atire atansyon sou Wayòm Bondye a kòm gouvènman lejitim pou tout tè a. N ap pale avèk konfyans paske nou se reprezantan Jewova, Souvren inivèsèl la, e paske mesaj n ap pwoklame a pa vini de nou menm, men li vini de Jewova. E lanmou nou pou Jewova ta dwe prensipal rezon ki pouse nou louwe li. — Filipyen 1:27, 28 ; 1 Tesalonisyen 2:13.

Revizyon

• Poukisa li enpòtan pou nou pataje mesaj Wayòm nan ak plis moun posib, men ak ki kalite reyaksyon nou ka atann ?

• Kòman nou kapab montre nou pa konte sou pwòp fòs nou pou nou sèvi Jewova ?

• Ki leson enpòtan nou aprann nan liv Travay la ?

[Kesyon]

 [Foto nan paj 173]

Jodi a, menm jan ak lontan, sèvitè Jewova yo pale Pawòl Bondye a avèk kran.