Koute konsèy, aksepte disiplin
Chapit kenz
Koute konsèy, aksepte disiplin
1. a) Poukisa nou tout nou bezwen konsèy ak disiplin ? b) Ki kesyon nou bezwen poze tèt nou ?
“ NOU tout, nou bite tanzantan ”, se sa Bib la di nan Jak 3:2. Nou kapab reflechi sou kantite fwa nou pa rive montre nou se jan de moun Pawòl Bondye a ankouraje nou pou nou ye a. Konsa, nou rekonèt Bib la gen rezon lè l di : “ Koute konsèy epi aksepte disiplin, pou w ka vin saj nan avni w. ” (Pwovèb 19:20). Pa gen dout nou deja pote koreksyon nan lavi nou pou nou mete l ann amoni ak ansèyman Bib la. Men, ki jan nou reyaji lè yon kretyen parèy nou konseye nou sou yon pwen presi ?
2. Ki sa nou ta dwe fè lè pèsonèlman nou resevwa yon konsèy ?
2 Gende moun reyaksyon yo se eseye jistifye tèt yo. Yo eseye minimize gravite sitiyasyon an, oswa yo eseye lage chay la sou do lòt moun. Men, li pi bon pou nou koute konsèy e pou nou mete l an pratik (Ebre 12:11). Natirèlman, okenn moun pa dwe atann pèfeksyon kay lòt moun, ni pèsonn pa dwe ap bay konsèy tout tan sou bagay ki pa gen enpòtans, oubyen sou kesyon Bib la lese moun fè chwa pa yo. Petèt sa ka rive tou, moun k ap bay konsèy la pa pran an konsiderasyon tout sa ki enplike nan kesyon an, e li ta bezwen pou yo atire atansyon l sou yo avèk respè. Men, apre analiz, annou sipoze konsèy ki bay la oswa disiplin nan apwopriye, li baze sou Labib. Kòman yon moun ta dwe reyaji ?
Egzanp ki la pou sèvi nou avètisman
3, 4. a) Ki sa k gen nan Bib la ki ka ede nou gen yon pwennvi kòrèk sou konsèy ak disiplin ? b) Ki jan wa Sayil te reyaji devan konsèy, e ki konsekans sa te genyen ?
3 Nan pawòl Bondye a nou jwenn egzanp yon seri moun ki te egziste toutbon ki te resevwa konsèy ki itil. Gende fwa, konsèy la konn gen disiplin ki akonpaye l. Youn nan moun sa yo se Sayil ki te wa ann Izrayèl. Li pa t obeyi Jewova anrapò ak nasyon Amalèk la. Amalekit yo te opoze ak sèvitè Jewova yo, e selon jijman Jewova, yo pa t dwe epaye ni Amalekit yo, ni twoupo bèt yo te genyen. Men, wa Sayil te epaye wa yo a ansanm ak pi bon bèt yo te genyen. — 1 Samyèl 15:1-11.
4 Jewova te voye pwofèt Samyèl reprimande Sayil. Ki jan Sayil te reyaji ? Li te fè konprann li te kraze Amalekit yo, men senpleman li te deside epaye wa yo a. Sepandan, sa te kontrè ak kòmandman Jewova te bay la (1 Samyèl 15:20). Men sa Sayil te di pou l eseye lage chay la sou do pèp la poutèt li te epaye twoupo bèt yo : “ Mwen te krenn pèp la e konsa mwen te obeyi vwa li. ” (1 Samyèl 15:24). Sanble sa k te plis enterese l se te pwòp estim li. Li te menm mande Samyèl pou l onore l devan pèp la (1 Samyèl 15:30). Finalman, Jewova te rejte Sayil kòm wa. — 1 Samyèl 16:1.
5. Ki sa k te rive wa Ouziya lè l te rejte konsèy ?
5 Ouziya, yon wa nan Jida, te “ aji avèk enfidelite anvè Jewova Bondye li a, e li antre nan tanp Jewova a pou l boule lansan sou lotèl lansan an ”. (2 Kwonik 26:16.) Men legalman, se prèt yo sèlman ki te gen dwa ofri lansan. Lè prèt an chèf la te eseye stope wa Ouziya, li te reyaji avèk kòlè. Ki sa k te rive ? Bib la di : “ Lèp te parèt sou fwon l [...] paske Jewova te frape l. E Ouziya, wa a, te rete lepre jiska jou lanmò l. ” — 2 Kwonik 26:19-21.
6. a) Poukisa ni Sayil ni Ouziya te reziste devan konsèy ? b) Ki sa k fè reziste devan konsèy se yon pwoblèm grav jodi a ?
6 Poukisa ni Sayil ni Ouziya te twouve li difisil pou yo aksepte konsèy ? Prensipal pwoblèm nan se ògèy. Yo toule de te bay tèt yo twòp enpòtans. Anpil moun rale malè sou tèt yo akoz defo sa a. Sanble yo panse, lè yo aksepte konsèy, sa vle di yo gen feblès lakay yo, oubyen sa tèni repitasyon yo. Men se ògèy ki yon feblès. Ògèy ka tèlman vwale panse yon moun, li fè l gen tandans reziste devan èd Jewova bay pa mwayen Pawòl li ak òganizasyon l lan. Se sa k fè Jewova bay avètisman sa a : “ Anvan ruin gen ògèy, e anvan yon fo pa gen yon espri awogan. ” — Pwovèb 16:18 ; Women 12:3.
Moun ki aksepte konsèy
7. Ki leson pozitif nou kapab aprann nan fason Moyiz te reyaji devan konsèy ?
7 Ekriti yo gen ladan yo tou bèl egzanp moun ki te aksepte konsèy, e nou kapab aprann nan egzanp sa yo. Ann konsidere Moyiz, yon moun bòpè l te ba l konsèy sou fason pou l debouye l anba travay difisil li t ap fè a ki te yon chaj pou li. Moyiz te koute l e li te aplike konsèy li a imedyatman (Egzòd 18:13-24). Malgre Moyiz te gen yon gwo otorite, poukisa li te dispoze koute konsèy ? Paske l te enb. “ Moyiz te gen plis imilite lontan pase tout moun ki te sou tout kò tè a. ” (Nonb 12:3). Ki enpòtans imilite genyen ? Sefànya 2:3 montre lavi nou depann de sa.
8. a) Ki peche David te komèt ? b) Ki reyaksyon David te genyen devan reprimann Natàn nan ? c) Ki konsekans peche David yo te genyen ?
8 Wa David te komèt adiltè avèk Batcheba, e pou l te eseye kache sa, li te fè touye Ouriya, mari Batcheba. Jewova te voye pwofèt Natàn reprimande David. David te repanti e li te admèt tousuit : “ Mwen peche kont Jewova. ” (2 Samyèl 12:13). Malgre Bondye te aksepte repantans David la, li t ap gen pou l sibi konsekans move aksyon li te fè a. Jewova te di l epe “ pap kite pwòp kay [li] ”, yo pral bay “ sanblab [li] ” madanm li yo e pitit gason ki fèt nan adiltè a ap “ mouri san mank ”. — 2 Samyèl 12:10, 11, 14.
9. Ki sa nou pa dwe bliye si yo ban nou konsèy oswa yo disipline nou ?
9 Wa David te konnen byenfè moun jwenn lè yo koute bonjan konsèy. Pafwa, li te konn remèsye Bondye pou moun li te voye vin ba l konsèy (1 Samyèl 25:32-35). Èske se konsa nou ye ? Si nou konsa, sa ap anpeche nou di e sa ap anpeche nou fè anpil bagay ki ta ka lakòz nou regrèt. Men, e si nou tonbe nan sitiyasyon ki mande pou yo konseye nou oswa menm pou yo disipline nou ? Fò nou pa bliye sa se prèv Jewova renmen nou, se byennèt etènèl nou li vize. — Pwovèb 3:11, 12 ; 4:13.
Bèl kalite pou nou kiltive
10. Ki kalite Jezi te montre moun ki gen pou yo antre nan Wayòm nan bezwen genyen ?
10 Pou nou gen yon bonjan relasyon ak Jewova ansanm ak frè nou yo, nou bezwen kiltive sèten kalite. Jezi te fè remake youn ladan yo, lè l te mete yon timoun nan mitan disip li yo e li di : “ Si nou pa kase tèt tounen e nou pa vin tankou timoun piti, nou pa gendwa antre nan wayòm syèl la. Kidonk, nenpòt moun ki imilye tèt li tankou tipitit sa a, se li ki pi gran nan wayòm syèl la. ” (Matye 18:3, 4). Disip Jezi yo te bezwen kiltive imilite, piske yo t ap diskite antre yo pou yo konnen kiyès ki pi gran. — Lik 22:24-27.
11. a) Devan kiyès li nesesè pou nou enb, e poukisa ? b) Si nou enb, ki jan n ap reyaji devan konsèy yo ban nou ?
11 Apot Pyè ekri : “ Nou tout, se pou nou mare senti nou ak imilite nan relasyon nou youn ak lòt, paske Bondye kont moun ki ògeye yo, men li bay moun ki enb yo bonte moun pa merite. ” (1 Pyè 5:5). Nou konnen nou bezwen enb devan Bondye. Men, tèks sa a montre tou nou bezwen enb nan relasyon nou ak kwayan parèy nou yo. Si se konsa nou ye, nou pap fache lè lòt moun fè nou sijesyon ki kòrèk, men n ap aprann nan men yo. — Pwovèb 12:15.
12. a) Ki kalite enpòtan ki makònen ak imilite ? b) Poukisa nou ta dwe gen sousi pou efè konduit nou genyen sou lòt moun ?
12 Gen sousi pou byennèt lòt moun, se yon kalite ki makònen ak imilite. Apot Pòl ekri : “ Se pou chak moun kontinye chèche, non pa pwòp avantaj pa l, men, pa lòt moun nan. [...] Kidonk, kit n ap manje, kit n ap bwè, oswa nenpòt lòt bagay n ap fè, fè tout bagay pou glwa Bondye. Veye pou nou pa vin lakòz ni Juif, ni Grèk, ni kongregasyon Bondye a trebiche. ” (1 Korentyen 10:24-33). Pòl pa t di nou oblije elimine tout preferans pèsonèl nou genyen, men li ankouraje nou pou nou pa fè anyen ki ka pouse yon lòt moun fè sa konsyans li di l ki mal.
13. Ki egzanp ki ka montre si nou gen abitid mete konsèy biblik yo an pratik ?
13 Èske w mete byennèt lòt moun anvan preferans pèsonèl ou ? Nou tout ta dwe aprann fè sa. Gen plizyè fason nou ka fè sa. Pa egzanp, annou konsidere abiman ak kwafi. Bagay sa yo se bagay ki gen rapò ak gou pèsonèl depi nou rete nan limit prensip biblik yo ki mande pou nou modès, pou nou byen abiye epi pou nou pwòp. Men, si w ta vin aprann akoz edikasyon moun nan zòn nan, fason w abiye ak fason w penyen anpeche lòt moun tande mesaj Wayòm nan, èske w ap dakò pou w pote chanjman ? Asireman, ede yon lòt moun jwenn lavi etènèl pi enpòtan pase fè tèt ou plezi.
14. Poukisa li enpòtan pou nou kiltive imilite e pou nou gen sousi pou lòt moun ?
14 Jezi kite yon bèl egzanp, lefètke li te enb e li te gen konsiderasyon pou lòt moun. Li te menm lave pye disip li yo (Jan 13:12-15). Men sa Pawòl Bondye a di de li : “ Kenbe etadespri sa a nan nou, etadespri ki te nan Kris Jezi tou, li menm ki, byenke li te egziste nan fòm Bondye, pa t anvizaje fè yon dappiyanp, sa vle di, pou l ta egal Bondye. Non, men li te vide tèt li, li te pran fòm yon esklav e li te vin nan resanblans moun. Anplis de sa, lè l te vin twouve l nan fòm yon òm, li te imilye tèt li e li te vin obeyisan jiskaske l mouri. ” — Filipyen 2:5-8 ; Women 15:2, 3.
Pa rejte disiplin Jewova
15. a) Ki chanjman nou bezwen fè pou nou gen yon pèsonalite ki fè Bondye plezi ? b) Pa ki mwayen Jewova bay nou tout konsèy ak disiplin ?
15 Piske nou tout se pechè, si nou vle reflete pèsonalite Bondye, nou dwe fè chanjman nan atitid nou e nan konduit nou. Nou bezwen abiye nou avèk “ nouvo pèsonalite a ”. (Kolosyen 3:5-14.) Konsèy ak disiplin ap ede nou idantifye domèn kote nou bezwen fè chanjman, e y ap ede nou wè kòman pou nou fè sa. Se Bib la menm ki prensipal sous enstriksyon nou bezwen an (2 Timote 3:16, 17). Piblikasyon biblik ak reyinyon òganizasyon Jewova a prepare yo ede nou aplike Pawòl Bondye a. Menmsi se yon konsèy nou tande deja, èske n ap rekonèt nou bezwen konsèy sa a, e èske n ap fè efò pou nou amelyore nou ?
16. Ki èd pèsonèl Jewova ban nou ?
16 Grasa sousi Jewova gen pou nou, li ede nou ak pwoblèm nou yo. Gen plizyè milyon moun ki resevwa èd pa mwayen etid biblik lakay yo. Paran yo bay pitit yo konsèy ak disiplin pou yo pwoteje yo kont konduit ki ka lakòz chagren (Pwovèb 6:20-23). Souvan, nan kongregasyon an, gen moun ki konn mande minis eksperimante yo konsèy ak sijesyon, yon fason pou yo amelyore yo nan predikasyon. Pafwa, ansyen yo kapab mande youn lòt konsèy, oubyen yo ka mande yon lòt moun ki gen eksperyans nan ministè a konsèy. Moun ki gen kalifikasyon espirityèl yo sèvi avèk Labib pou yo ede lòt kretyen ki bezwen sa, e yo fè sa avèk dousè. Si w ap bay konsèy, sonje “ veye sou tèt ou, yon fason pou ou menm tou ou pa sibi tantasyon ”. (Galat 6:1, 2.) Wi, nou tout nou bezwen konsèy ak disiplin pou nou adore sèl vrè Dye a nan inite.
Revizyon
• Avèk amou, kòman Jewova ede nou wè ki kote nou bezwen pote chanjman ?
• Poukisa anpil moun gen difikilte pou yo aksepte konsèy k ap itil yo, e èske se yon bagay ki grav ?
• Site kèk bèl kalite k ap ede nou koute konsèy, e ki egzanp Jezi bay nan domèn sa a ?
[Kesyon]
[Foto nan paj 142]
Ouziya te rejte konsèy e lèp te tonbe sou li.
[Foto nan paj 142]
Moyiz te tire pwofi lè l te aksepte konsèy nan men Yitwo.
