Chapit senk

Libète adoratè Jewova yo jwi

1, 2. a) Ki kalite libète Bondye te bay de premye moun yo ? b) Site kèk nan lwa ki t ap dirije aktivite Adan ak Èv ?

LÈ JEWOVA te kreye premye gason an ak premye fi a, yo te gen yon libète ki depase lontan libète lèzòm genyen jodi a. Se nan Paradi a, nan bèl jaden Edenn nan, yo te rete. Okenn maladi pa t anpeche yo viv ak kè kontan paske lespri yo ak kò yo te pafè. Yo pa t gen lanmò ki t ap tann yo menm jan l ap ret tann tout moun depi lè sa a. Se pa t wobo yo te ye nonplis, men, yo te resevwa yon kado estrawòdinè : libète pou yo chwazi, kapasite pou yo pran pwòp desizyon yo. Sepandan, pou yo te kontinye jwi libète estrawòdinè sa a, yo te dwe respekte lwa Bondye yo.

² Pa egzanp, ann pran lwa fizik Bondye etabli yo. Natirèlman, lwa sa yo pa t defini, men Adan ak Èv te fèt yon fason ki fè li te toutafè natirèl pou yo obeyi lwa sa yo. Lè yo te grangou, sa te fè yo konnen yo bezwen manje, e lè yo te swaf, sa te fè yo konnen yo bezwen bwè. Lè solèy kouche, yo te konnen yo bezwen dòmi. Mete sou sa, Jewova te ba yo yon travay pou yo fè. Anfèt, responsablite sa a te yon sòt de lwa pou yo, piske li t ap dirije aksyon y ap antreprann. Yo te gen pou yo fè pitit, pou yo domine sou tout kalite kreyati vivan ki sou tè a. E yo te gen pou yo etann limit Paradi a jiskaske li kouvri tout glòb la nèt (Jenèz 1:28 ; 2:15). Ala yon lwa ki te bon pou yo,  ala yon lwa ki te pwofitab pou yo ! Avèk lwa sa a, yo te gen yon travay ki te satisfè yo totalman. Sa t ap pèmèt yo sèvi ak kapasite yo omaksimòm e yon fason ki itil. Yo te gen tout libète pou yo deside fason y ap akonpli travay sa a. Ki sa yon moun ta ka bezwen pase sa ?

3. Ki jan Adan ak Èv t ap ka aprann sèvi ak libète yo genyen pou yo pran desizyon an avèk sajès ?

³ Natirèlman, lè Adan ak Èv te resevwa privilèj pou yo pran desizyon, sa pa vle di nenpòt desizyon yo t ap pran t ap bay bon rezilta. Libète yo genyen pou yo pran desizyon an, yo te dwe egzèse l nan limit lwa ak prensip Bondye yo. Ki jan yo t ap ka aprann lwa sa yo ak prensip sa yo ? Se lè yo koute Kreyatè yo a, lè yo egzamine travay li fè. Bondye te bay Adan ak Èv entèlijans ki nesesè pou yo aplike sa yo aprann. Piske yo te kreye pafè, tandans natirèl yo t ap gen lakay yo se reflete kalite Bondye yo lè y ap pran desizyon. Anfèt, yo t ap fè sa avèk swen si vrèman yo te gen rekonesans pou sa Bondye fè pou yo, e si yo te vle fè l plezi. — Jenèz 1:26, 27 ; Jan 8:29.

4. a) Èske kòmandman Bondye te bay Adan ak Èv pou yo pa t manje fwi nan pyebwa a te retire libète yo ? b) Poukisa se te yon restriksyon ki apwopriye ?

⁴ Kidonk, se te dwa Bondye pou l te teste atachman yo gen pou li antanke Moun ki ba yo lavi a. Se te dwa li tou pou l teste si yo gen volonte pou yo rete nan limit li fikse yo. Jewova te bay Adan kòmandman sa a : “ Nan tout pyebwa nan jaden an ou mèt manje jis ou rasazye. Men kanta pou pyebwa konesans sa ki byen ak sa ki mal la, ou pa dwe manje ladan l, paske lejou w manje ladan l, w ap mouri san mank. ” ​(Jenèz 2:16, 17). Apre kreyasyon Èv, li menm tou li te jwenn enfòmasyon sou lwa sa a (Jenèz 3:2, 3). Èske restriksyon sa a te retire libète  yo ? Sètènman non. Menm lè yo pa t manje fwi ki nan pyebwa sa a, yo te chaje ak bon manje tout kalite pou yo manje (Jenèz 2:8, 9). Li te toutafè apwopriye pou yo rekonèt tè a se pwopriyete Bondye, piske se li ki te kreye l. Konsa, li gen dwa pou l fè lwa ki ann amoni ak objektif li, e ki pwofitab pou limanite. — Sòm 24:1, 10.

5. a) Kòman Adan ak Èv te fè pèdi libète glorye yo te genyen an ? b) Ki sa k te ranplase libète Adan ak Èv te genyen an, e ki efè sa gen sou nou ?

⁵ Men, ki sa k te rive ? Gen yon zanj ki te kite anbisyon egoyis pran l, li te mal sèvi ak libète l genyen an e li te vin Satan, ki siyifi “ Opozan ”. Li te twonpe Èv lè l te fè l kwè yon bagay ki kontrè ak volonte Bondye (Jenèz 3:4, 5). Adan te pran pati pou Èv, li vyole lwa Bondye a. Lefètke yo te pran sa k pa t pou yo, yo te pèdi libète glorye yo te genyen an. Peche te vin mèt yo, e tankou Bondye te avèti yo, finalman lanmò te met pye. Eritaj yo kite pou pitit yo se peche ki parèt aklè nan tandans yo fèt avè l la, tandans ki pouse yo fè sa ki mal. Peche a fè moun vin frajil tou, sa ki lakòz maladi, vyeyès ak lanmò. Enfliyans Satan agrave panchan pou moun fè sa k mal. Sa vin bay yon sosyete moun ki gen istwa yo chaje ak hèn, krim, zak maspinay, ansanm ak lagè ki pote lavi plizyè milyon moun ale. Ala diferan sa diferan ak libète Bondye te bay lèzòm okòmansman an ! — Detewonòm 32:4, 5 ; Jòb 14:1, 2 ; Women 5:12 ; Revelasyon 12:9.

Ki kote nou ka jwenn libète

6. a) Ki kote nou ka jwenn vrè libète a ? b) Konsènan ki kalite libète Jezi t ap pale ?

⁶ Lè w gade move sitiyasyon ki egziste toupatou jodi a, se pa etonan si moun anvi jwenn yon pi gran libète. Men ki kote nou ka jwenn vrè libète a ? Jezi te  di : “ Si nou rete nan pawòl mwen, nou se disip mwen toutbonvre. N ap konnen laverite, e laverite ap libere nou. ” ​(Jan 8:31, 32). Libète sa a se pa jan de libète moun yo espere jwenn lè yo ranvèse yon dirijan oswa yon fòm gouvènman an favè yon lòt. Olye de sa, libète sa a touche fon pwoblèm lèzòm yo dirèkteman. Libète Jezi t ap pale a, se libète moun jwenn lè yo libere anba esklavaj peche (Jan 8:24, 34-36). Konsa, si yon moun vin yon vrè disip Jezi Kris, se yon kokenn chanjman ki fèt nan lavi li, se yon liberasyon !

7. a) Nan ki sans nou kapab libere anba peche depi kounye a ? b) Ki sa nou dwe fè pou nou gen libète sa a ?

⁷ Sa pa vle di kounye a vrè kretyen yo pa santi efè tandans yo fèt avè l la, tandans ki pouse yo fè peche a. Piske yo eritye peche, sa lakòz yo toujou nan yon konba (Women 7:21-25). Sepandan, si yon moun ap viv ann akò ak ansèyman Jezi yo toutbonvre, li pap kontinye rete esklav peche. Peche pap tankou yon diktatè pou li ankò, yon diktatè k ap pase l lòd li oblije obeyi san reflechi. Li pap pran nan pyèj mennen yon vi ki san objektif, epi pou sa lese l ak yon konsyans koupab. L ap gen yon konsyans ki pwòp devan Bondye paske li jwenn padon pou peche l te fè nan tan pase yo, sou baz lafwa li nan sakrifis Kris la. Tandans pou l fè peche kapab vle domine sou li, men lè l refize aji selon tandans sa yo paske li sonje ansèyman Kris yo, li montre se pa peche ki mèt li ankò. — Women 6:12-17.

8. a) Ki libète vrè krisyanis lan ban nou ? b) Ki konpòtman nou dwe genyen anvè dirijan ki nan monn nan ?

⁸ Ann egzamine libète nou genyen antanke kretyen an. Nou libere ni anba efè fo ansèyman, ni anba esklavaj sipèstisyon,  ni anba esklavaj peche. Bèl verite sou sitiyasyon mò yo ansanm ak verite sou rezirèksyon an libere nou anba krent derezonab moun genyen pou lanmò. Konesans nou genyen sou Wayòm jis Bondye a, ki pral ranplase gouvènman lèzòm enpafè yo talè konsa, libere nou anba dezespwa (Dànyèl 2:44 ; Matye 6:10). Sepandan, yon libète konsa pa otorize nou manke respè ni pou otorite ki nan gouvènman yo ni pou lwa yo bay. — Tit 3:1, 2 ; 1 Pyè 2:16, 17.

9. a) Avèk amou, ki jan Jewova ede nou jwenn pi gran libète ki posib pou yon moun benefisye kounye a ? b) Ki jan nou ka fè pou nou pran desizyon ki saj ?

⁹ Jewova pa kite nou tatonnen pou nou dekouvri pi bon fason pou nou viv. Li konnen kòman nou fèt, li konnen ki sa k ap pote vrè kontantman pou nou, epi ki sa ki nan avantaj etènèl nou. Jewova konnen ki panse ak ki konduit ki kapab fè yon moun pèdi relasyon ni avèk Li ni avèk lòt moun, e ki ka menm anpeche moun sa a antre nan monn nouvo a. Avèk amou, Jewova enstwi nou sou tout bagay sa yo grasa Labib, e grasa òganizasyon vizib li a (Mak 13:10 ; Galat 5:19-23 ; 1 Timote 1:12, 13). Apre sa, se responsablite pa nou pou nou itilize libète Bondye ban nou pou nou chwazi a, pou nou deside ki jan n ap reyaji. Kontrèman ak Adan, si nou koute avèk atansyon sa Labib di nou, n ap pran desizyon ki saj. Konsa, n ap montre prensipal sousi nou nan lavi se gen bonjan relasyon ak Jewova.

Gen moun ki vle yon lòt kalite libète

10. Ki kalite libète kèk moun ki Temwen Jewova ap chèche jwenn ?

¹⁰ Pafwa gen kèk jèn Temwen Jewova, e gen kèk  granmoun ki Temwen Jewova tou, ki konn anvi yon lòt kalite libète. Monn nan kapab parèt atiran pou yo. E plis y ap panse ak sa, se plis anvi yo genyen pou yo fè sa ki kouran nan monn nan, men ki pa fèt pou kretyen, ap vin pi fò. Jan de moun sa yo ka pa gen entansyon pou yo lage kò yo nan dwòg, pou yo bwè twòp, oubyen pou yo komèt fònikasyon. Men, yo ka kòmanse frekante moun ki pa vrè kretyen, e yo ta renmen pou moun sa yo aksepte yo. Yo ka menm kòmanse imite langaj yo ak konduit yo. — 3 Jan 11.

11. Pafwa, ki kote tantasyon pou moun fè sa k mal soti ?

¹¹ Pafwa, se yon moun ki pretann l ap sèvi Jewova ki konn vini ak tantasyon ki pouse lòt moun adopte yon konduit ki pa kretyen. Sa te rive kèk nan premye kretyen yo, e menm bagay la ka rive nan epòk nou an tou. Souvan, jan de moun sa yo konn vle fè yon seri bagay yo  santi k ap fè yo plezi, men bagay sa yo se bagay ki kontrè ak lwa Bondye. Yo ankouraje lòt moun pou yo pran “ plezi ” yo. Yo ‘ pwomèt yo libète, alòske yo menm yo se esklav koripsyon ’. — 2 Pyè 2:19.

12. Ki tris konsekans sa pote lè moun gen yon konduit ki kontrè ak lwa Bondye ansanm ak prensip li yo ?

¹² Swadizan libète sa a toujou gen move konsekans, piske li siyifi dezobeyi lwa Bondye. Pa egzanp, relasyon seksyèl imoral kapab pote chagren, maladi, lanmò, gwosès moun pa t vle, e li posib pou l kraze yon maryaj (1 Korentyen 6:18 ; 1 Tesalonisyen 4:3-8). Pran dwòg ka fè yon moun irite, li ka fè l pa ka pale klè, li ka fè l pa ka wè klè. Li ka ba l vètij, li ka fè l mal pou l respire, li ka fè l reve je klè e li ka lakòz lanmò moun nan. Moun nan ka vin pa ka rete san l pa pran l, e sa ka pouse l fè krim pou l antretni vis la. Bwè twòp pote prèske menm pwoblèm yo (Pwovèb 23:29-35). Moun ki lage kò yo nan jan de pratik sa yo kapab panse yo lib, men li konn twò ta lè yo rann yo kont yo esklav peche. E ala yon mèt san pitye se peche ! Si nou reflechi sou sa kounye a, sa kapab ede nou pwoteje tèt nou pou nou pa fè eksperyans konsa. — Galat 6:7, 8.

Kote pwoblèm yo kòmanse

13. a) Byen souvan ki sa ki pwovoke dezi ki mennen nan pwoblèm yo ? b) Pou nou konprann sa “ move frekantasyon ” ye, pwennvi kiyès nou bezwen genyen ? c) Toutpandan w ap reponn kesyon ki nan paragraf 13 la, montre byen klè ki pwennvi Jewova sou sa.

¹³ Reflechi sou ki kote pwoblèm yo kòmanse byen souvan. Men esplikasyon Bib la bay : “ Chak moun pase  anba eprèv lè l kite pwòp dezi l mennen l, lè l kite pwòp dezi l sedui l. Epi dezi a, lè l fegonde, li pwodui peche, e peche a li menm, lè l fin fèt, li anfante lanmò. ” ​(Jak 1:14, 15). Ki sa ki pwovoke dezi a ? Se bagay ki antre nan lespri a. Souvan se konsekans frekantasyon nou avèk moun ki pa mete prensip biblik yo an pratik. Natirèlman, nou tout konnen nou dwe evite “ move frekantasyon ”. (1 Korentyen 15:33.) Men ki frekantasyon ki move frekantasyon ? Ki pwennvi Jewova sou sa ? Lè nou rezone sou kesyon ki pi ba yo e nou gade tèks yo site yo, sa ta dwe ede nou tire bon konklizyon an.

Lefètke sèten moun sanble onorab, èske sa vle di yo se bon frekantasyon pou sa (Jenèz 34:1, 2, 18, 19) ?

Èske konvèsasyon moun sa yo, petèt blag y ap bay, kapab montre nou si nou dwe vin zanmi pwòch yo (Efezyen 5:3, 4) ?

Ki jan Jewova santi l lè nou chwazi vin zanmi entim moun ki pa renmen l (2 Kwonik 19:1, 2) ?

Menm lè n ap travay oswa nou lekòl ansanm ak moun ki pa gen menm kwayans avèk nou, poukisa li nesesè pou nou pran prekosyon (1 Pyè 4:3, 4) ?

Lè n ap gade televizyon, n al nan sinema, n ap sèvi ak Entènèt, n ap li liv, peryodik, jounal, tout se mwayen pou nou frekante lòt moun. Kont ki bagay ki soti nan sous sa yo nou bezwen fè atansyon (Pwovèb 3:31 ; Izayi 8:19 ; Efezyen 4:17-19) ?

 Ki sa moun nou chwazi pou nou frekante yo montre Jewova sou jan de moun nou ye (Sòm 26:1, 4, 5 ; 97:10) ?

14. Ki gran libète k ap tann moun ki aplike konsèy ki nan Pawòl Bondye a fidèlman depi kounye a ?

¹⁴ Monn nouvo Bondye a devan nou la a. Grasa Wayòm Bondye a, gouvènman ki nan syèl la, limanite pral libere anba enfliyans Satan ansanm ak tout sistèm de choz mechan l lan. Ofiramezi, tout efè peche a pral elimine lakay moun ki obeyisan yo, piske ni espri nou ni kò nou ap pafè. Konsa, nou pral kapab jwi lavi etènèl nan Paradi a. Finalman, tout kreyasyon an pral benefisye libète ki ann amoni total ak “ lespri Jewova ” a (2 Korentyen 3:17). Èske sa t ap gen sans pou yon moun pran risk pèdi tout bagay sa yo paske jodi a li meprize konsèy nou jwenn nan Pawòl Bondye a ? Annou tout montre aklè sa nou vrèman vle se “ libète glorye pitit Bondye yo ”, lè nou itilize libète nou genyen antanke kretyen an avèk sajès depi kounye a. — Women 8:21.

Revizyon

• Ki kalite libète de premye moun yo te genyen ? Ki diferans ki genyen ant libète sa a ak libète lèzòm genyen kounye a ?

• Ki libète vrè kretyen yo genyen ? Nan ki sans li diferan ak sa monn nan konsidere kòm libète ?

• Poukisa li vrèman enpòtan pou nou evite move frekantasyon ? Kontrèman ak Adan, desizyon ki moun nou aksepte konsènan sa ki mal ?

[Kesyon]

[Foto nan paj 46]

Pawòl Bondye a avèti nou : “ Pinga nou twonpe tèt nou. Move frekantasyon detwi abitid ki pwofitab. ”