Chapit uit

‘ Lite kont fòs espirityèl mechan yo ’

1. Poukisa aktivite espri mechan yo enterese nou patikilyèman ?

ANPIL moun panse li ridikil pou moun kwè gen espri mechan ki egziste. Men se pa bagay pou moun ri. Kit moun yo kwè sa, kit yo pa kwè, espri mechan yo egziste, e y ap eseye fè presyon sou tout moun. Adoratè Jewova yo pa egzan. Anfèt, se yo menm espri mechan yo vize an premye. Apot Pòl avèti nou sou sa. Li di : “ Nou gen yon lit n ap mennen, non pa kont lachè ak san, men kont gouvènman [envizib] yo, kont otorite yo, kont chèf mondyal k ap dirije fènwa sa yo, kont fòs espirityèl mechan ki nan zòn selès yo. ” ​(Efezyen 6:12). Nan tan pa nou an, presyon fòs espirityèl mechan yo depase tout lòt epòk, paske yo chase Satan nan syèl la e li ankòlè anpil, piske l konnen tan li rete a kout. — Revelasyon 12:12.

2. Ki jan l ap fè posib pou nou genyen batay la kont espri ki pi fò pase lèzòm ?

² Èske li posib pou moun genyen nan yon batay kont fòs espirityèl yo ki pi fò pase lèzòm ? Wi, men se sèlman si nou konte totalman sou Jewova. Nou dwe koute li e nou dwe obeyi Pawòl li. Lè nou fè sa, n ap evite anpil domaj fizik, moral e afektif moun jwenn lè yo anba kontwòl Satan. — Jak 4:7.

Chèf mondyal ki nan zòn selès yo

3. Kont kiyès Satan opoze avèk vyolans, e ki jan l fè sa ?

³ Jewova dekri pou nou sitiyasyon monn nan yon fason  ki vivan, jan li wè bagay yo depi nan pozisyon l ye nan syèl la. Li te bay apot Jan yon vizyon kote yo reprezante Satan kòm “ yon gwo dragon koulè dife ”. Dragon an te pare pou l devore, si posib, Wayòm mesyanik Bondye a depi menm kote li te pran nesans nan syèl la an 1914. Piske Satan echwe nan tantativ sa a, li anvayi reprezantan Wayòm nan ki sou tè a ak opozisyon vyolan (Revelasyon 12:3, 4, 13, 17). Ki jan Satan mennen batay sa a ? Li sèvi ak moun ki reprezantan pa l yo.

4. Kiyès ki bay gouvènman lèzòm yo pisans, e ki jan nou fè konn sa ?

⁴ Apre sa, yo montre Jan yon bèt sovaj ki gen sèt tèt ak dis kòn, yon bèt ki gen pouvwa “ sou tout tribi, tout pèp, tout lang ak tout nasyon ”. Bèt la reprezante tout sistèm politik mondyal la. Yo te fè Jan konnen “ dragon an [Satan Ledyab] bay bèt la pisans li e li ba l twòn li ansanm ak yon gwo pouvwa ”. (Revelasyon 13:1, 2, 7.) Wi, se Satan ki bay gouvènman lèzòm yo pisans ak pouvwa. Konsa, tankou apot Pòl ekri, vrè “ chèf mondyal ” yo se “ fòs espirityèl mechan ki nan zòn selès yo ”, yo menm k ap kontwole gouvènman lèzòm yo. Tout moun ki vle adore Jewova bezwen byen konprann tout siyifikasyon enfòmasyon sa a genyen. — Lik 4:5, 6.

5. Pou ki bagay dirijan politik yo ap rasanble kounye la a ?

⁵ Menmsi anpil dirijan politik fè konnen yo se moun ki relijye, pa gen okenn nasyon ki soumèt anba dominasyon Jewova oswa anba dominasyon Wa li nome a, Jezi Kris. Yo tout ap lite yon fason fewòs pou yo kenbe pwòp pouvwa yo. Jodi a, jan liv Revelasyon an montre sa, “ pawòl demon enspire ” yo ap rasanble dirijan ki nan monn nan pou “ lagè gran jou Bondye Toupisan an ” nan Amagedòn. — Revelasyon 16:13, 14, 16 ; 19:17-19.

6. Poukisa li nesesè pou nou pran prekosyon pou nou pa twouve nou ap soutni sistèm Satan an ?

 ⁶ Chak jou, hinghang nan domèn politik, sosyal, ekonomik e relijye afekte lavi moun, sa dechire sosyete a. Nan hinghang sa yo, li kouran pou moun pran pati pou nasyon pa yo, tribi pa yo, gwoup ki pale lang pa yo oubyen pou klas sosyal pa yo, swa nan pawòl yo swa nan aksyon yo. Menm lè moun yo pa dirèkteman enplike nan kèk chirepit, yo konn montre yo an favè yon kan e yo kont lòt kan an. Men, kèlkeswa moun oswa kèlkeswa koz y ap defann nan, an reyalite kiyès y ap soutni ? Labib di kareman : “ Lemonnantye anba pouvwa mechan an. ” ​(1 Jan 5:19). Alò, ki jan yon moun ka fè pou l evite pou yo pa twonpe l ansanm ak rès monn nan ? Se sèlman si l soutni totalman Wayòm Bondye a, e si l rete konplètman net nan chirepit monn nan. — Jan 17:15, 16.

Riz mechan an itilize

7. Ki jan Satan montre li abil nan fason li sèvi ak fo relijyon ?

⁷ Nan tout peryòd nan listwa, Satan sèvi ak pèsekisyon an pawòl oswa ak pèsekisyon fizik pou l fè moun abandone vrè adorasyon an. Li sèvi tou ak metòd ki pi sibtil tankou twonpri ak riz. Avèk abilite, li sèvi ak fo relijyon pou l kenbe yon bon valè moun nan inyorans. Li fè yo kwè y ap sèvi Bondye. Piske yo pa gen konesans egzak sou Bondye e yo pa gen lanmou pou laverite, sèvis relijye mistik, sèvis relijye ki aji sou emosyon ka atire yo, oubyen zèv pisans kapab fè gwo enpresyon sou yo (2 Tesalonisyen 2:9, 10). Men, yo avèti nou, menm pami moun ki di y ap pratike vrè adorasyon an, “ kèk moun ap abandone [...], y ap pote atansyon sou pawòl enspire blòf ak ansèyman demon ”. (1 Timote 4:1.) Kòman sa ka fè rive ?

8. Kòman Satan kapab atire nou nan fo relijyon menmsi n ap adore Jewova ?

 ⁸ Anba anba, Dyab la jwe sou feblès nou. Èske krent lòm se yon antrav pou nou ? Si se sa, nou kapab pran nan presyon fanmi, oswa nan presyon vwazen pou nou patisipe nan pratik ki soti nan fo relijyon. Èske nou gen ògèy ? Si se sa, nou kapab santi nou ofanse lè yo ban nou konsèy oswa lè n ap defann yon ide lòt moun pa aksepte (Pwovèb 15:10 ; 29:25 ; 1 Timote 6:3, 4). Olye pou nou korije pwennvi nou pou nou konfòme l ak egzanp Kris, nou kapab panche bò kote moun k ap ‘ fè zòrèy nou dous ’ pandan y ap di : annik li Labib, epi mennen yon vi nòmal tankou tout moun, yon vi kòrèk, sa sifi (2 Timote 4:3). Kit n al nan yon lòt relijyon, kit nou chwazi rete nan relijyon nou ye a, sa pa gen enpòtans pou Satan, depi nou pa adore Jewova jan li mande sa pa mwayen Pawòl li ak òganizasyon l lan.

9. Avèk riz, ki jan Satan sèvi ak sèks pou l reyalize plan l yo ?

⁹ Avèk riz tou, Satan kapab antrene moun satisfè dezi nòmal yo genyen nan move fason. Li fè sa ak dezi seksyèl moun gen lakay yo. Gen anpil moun nan monn nan, piske yo rejte prensip moral ki nan Bib la, yo konsidere relasyon seksyèl ant moun ki pa marye kòm yon plezi lejitim, oubyen kòm yon fason pou yo pwouve yo se granmoun. E pou moun ki marye yo menm, kòman sa ye ? Anpil ladan yo komèt adiltè. Gen lòt, menm lè pa gen enfidelite nan maryaj yo, anpil nan yo mande divòs oswa separasyon. Konsa, yo kapab al viv ak yon lòt moun. Yon metòd anba anba Satan genyen se pouse moun viv pou plezi tousuit. Li fè yo fèmen je yo sou konsekans sa ap genyen alalong, non sèlman sou yo menm oswa sou lòt moun, men sitou sou relasyon yo  avèk Jewova ansanm ak Pitit li a. — 1 Korentyen 6:9, 10 ; Galat 6:7, 8.

10. Pa ki mwayen Satan ap eseye pèvèti atitid nou anvè imoralite ak vyolans ?

¹⁰ Yon lòt dezi natirèl moun genyen se dezi pou yo pran detant. Lè detant lan se bonjan detant, sa kapab rebay fòs nan domèn fizik, mantal ak afektif. Men, ki jan nou reyaji lè Satan, avèk abilite, sèvi ak moman detant yo pou l eseye fè nou ekate Bondye nan panse nou ? Pa egzanp, nou konnen Jewova rayi ni imoralite seksyèl ni vyolans. Lè y ap prezante bagay sa yo nan sinema, nan pwogram televizyon, oubyen nan pyès teyat, èske nou chita chita nou san nou pa fè anyen epi nou kontinye ap gade yo ? Pa bliye tou, Satan ap veye pou bagay sa yo vin pi degradan, anmezi tan pou yo lage l nan abim nan ap vin pi pre. Piske “ moun mechan ansanm ak moun ki fè tèt yo pase pou sa yo pa ye ap vin pi mal toujou, y ap lage moun nan erè e yo menm yo nan erè ”. (2 Timote 3:13 ; Revelasyon 20:1-3.) Konsa, se tout tan pou nou rete sou gad nou kont plan Satan yo. — Jenèz 6:13 ; Sòm 11:5 ; Women 1:24-32.

11. Nan ki sans menm yon moun ki konnen laverite konsènan espiritis ka pran nan pyèj si l pa vijilan ?

¹¹ Nou konnen tou moun ki livre tèt yo nan yon fòm espiritis tankou pratike divinasyon, fè maji, oswa kominike ak mò, moun sa yo detestab pou Jewova (Detewonòm 18:10-12). Lè nou sonje sa, nou pap gen nan lide nou pou n al kay bòkò e se sèten, nou pap akeyi yo lakay nou pou yo vin fè pratik demonyak yo a. Men, si yo parèt sou ekran televizyon nou oswa sou Entènèt, èske n ap koute yo ? Menmsi nou pap janm aksepte tretman nan men yon bòkò, èske nou ta mare yon ti kòdon nan  ponyèt yon timoun piti nou genyen nan lide pou nou pwoteje l kont malefis ? Piske nou konnen Bib la kondane moun ki mare lòt moun anba pouvwa majik, èske n ap pèmèt yon ipnotizè kontwole lespri nou ? — Galat 5:19-21.

12. a) Ki jan yo sèvi ak mizik pou fè nou panse sou yon seri bagay nou konnen ki mal ? b) Ki jan rad yon moun, stil kwafi li oswa fason l pale kapab montre si l gen admirasyon pou moun Jewova pa apwouve fason y ap viv ? c) Ki sa nou dwe fè pou nou pa viktim anba riz Satan yo ?

¹² Labib di fònikasyon ak tout kalite salte pa dwe menm mansyone (avèk entansyon malsen) nan mitan nou (Efezyen 5:3-5). Men, e si yo mete jan de pawòl sa yo nan mizik ki gen bèl melodi, ki gen yon rit atiran, ki gen yon bit pèsistan ? Èske n ap etone wè nou menm k ap repete pawòl ki fè elòj pou sèks andeyò maryaj, pawòl ki fè elòj pou itilizasyon dwòg pou plezi ansanm ak lòt move zak ankò ? Oubyen malgre nou konnen nou pa dwe imite fason moun ki lage kò yo nan jan de bagay sa yo ap viv, èske nou gen tandans sanble ak yo lè nou imite fason yo abiye, stil kwafi yo oswa fason yo pale ? Ala sounwa metòd Satan itilize pou l fè lèzòm adopte pwòp fason l panse ki kòwonpi a sounwa (2 Korentyen 4:3, 4) ! Pou nou pa viktim anba riz li yo, nou dwe veye pou nou pa ale aladeriv ak monn nan. Nou bezwen sonje kiyès ki “ chèf mondyal fènwa sa yo ” epi lite toutbonvre kont enfliyans yo. — 1 Pyè 5:8.

Nou ekipe pou nou venk

13. Ki jan li fè posib pou nou ranpòte laviktwa nan monn Satan ap dirije a malgre enpèfeksyon nou ?

¹³ Anvan Jezi te mouri, li te di apot li yo : “ Pran kouraj ! Mwen venk monn nan. ” ​(Jan 16:33). Yo menm tou,  yo te kapab ranpòte laviktwa. Anviwon 60 an apre, men sa apot Jan te ekri : “ Kiyès moun ki venk monn nan si se pa sila ki gen fwa Jezi se Pitit Gason Bondye a ? ” ​(1 Jan 5:5). Nou montre nou gen lafwa sa a, lè nou obeyi kòmandman Jezi yo, e nou konte sou Pawòl Bondye, menm jan ak Jezi. Ki sa sa mande ankò ? Sa mande pou nou rete pwòch kongregasyon Jezi se chèf li a. Lè nou komèt yon peche, nou dwe repanti sensèman epi chèche padon Bondye sou baz sakrifis Jezi a. Konsa, malgre enpèfeksyon nou e malgre erè nou fè, nou menm tou nou ka ranpòte laviktwa. — Sòm 130:3, 4.

14. Li Efezyen 6:13-17, epi itilize kesyon ak tèks biblik ki nan paragraf sa a kòm baz pou w egzamine byenfè chak pati ekipman espirityèl la bay.

¹⁴ Pou nou reyisi, nou bezwen mete sou nou “ tout ekipman konba Bondye bay la ”, san nou pa neglije  okenn pati ladan l. Silvouplè, ouvri Bib ou nan Efezyen 6:13-17, epi li deskripsyon ki fèt sou ekipman sa a. Apre sa, pandan w ap reponn kesyon pi ba yo, egzamine ki jan w ka pwofite pwoteksyon chak pati nan ekipman an bay.

“ Ren nou mare ak laverite ”

Menmsi petèt nou konnen laverite, ki jan etidye regilyèman, medite sou verite ki nan Bib la, asiste reyinyon ka pwoteje nou (1 Korentyen 10:12, 13 ; 2 Korentyen 13:5 ; Filipyen 4:8, 9) ?

“ Kuiras jistis ”

Kiyès ki pou fikse règ sou sa ki jis (Revelasyon 15:3) ?

Bay egzanp pou w montre jan yon moun ki pa suiv prensip jis Jewova yo ka mete tèt li nan pwoblèm espirityèlman (Detewonòm 7:3, 4; 1 Samyèl 15:22, 23).

“ Mete ekipman bon nouvèl lapè a nan pye nou ”

Poukisa se yon pwoteksyon pou nou lè pye nou toujou aktif pou mennen nou pale ak moun konsènan dispozisyon Bondye pran pou l bay lapè a (Sòm 73:2, 3 ; Women 10:15 ; 1 Timote 5:13) ?

“ Gwo boukliye lafwa ”

Si fwa nou gen yon baz solid, ki jan n ap reyaji devan efò kèk moun ap fè pou fè nou gen dout oswa pou fè nou gen krent (2 Wa 6:15-17 ; 2 Timote 1:12) ?

“ Kas delivrans ”

Ki jan esperans delivrans lan ede nou evite tonbe nan pyèj enkyete nou twòp pou byen materyèl (1 Timote 6:7-10, 19) ?

 “ Epe lespri a ”

Sou ki sa nou dwe toujou konte lè n ap konbat atak agresif yo fè kont espirityalite nou oswa kont espirityalite lòt moun (Sòm 119:98 ; Pwovèb 3:5, 6 ; Matye 4:3, 4) ?

Ki lòt bagay ki trèzenpòtan pou nou ranpòte laviktwa nan gè espirityèl n ap mennen an ? Nan ki mezi nou dwe itilize l ? An favè kiyès nou dwe itilize l (Efezyen 6:18, 19) ?

15. Kòman nou kapab pase alatak nan konba espirityèl n ap mennen an ?

¹⁵ Antanke sòlda Kris, nou fè pati yon gwo lame ki angaje nan yon gè espirityèl. Si nou rete vijilan e nou byen itilize tout ekipman konba Bondye bay la, nou pap viktim nan gè sa a. Olye de sa, n ap yon èd ki bay fòs pou lòt sèvitè Bondye yo. N ap pare epi n ap chofe pou nou pase alatak pou nou simaye bon nouvèl Wayòm mesyanik Bondye a, gouvènman selès la, yon gouvènman Satan opoze avè l nan yon fason ki sitèlman vyolan.

Revizyon

• Poukisa adoratè Jewova yo kenbe yon netralite total nan chirepit ki gen nan monn nan ?

• Site kèk nan riz Satan itilize pou l detwi espirityalite kretyen yo ?

• Ki jan ekipman espirityèl Bondye bay la pwoteje nou nan lagè espirityèl n ap mennen an ?

[Kesyon]

[Foto nan paj 76]

Nasyon yo ap rasanble pou Amagedòn.