Pratike atachman pou Bondye nan fanmi nou
Chapit disèt
Pratike atachman pou Bondye nan fanmi nou
1. Ki efè aplikasyon konsèy ki nan Pawòl Bondye a gen sou maryaj ?
SE JEWOVA ki fonde maryaj, e se Pawòl li ki bay pi bon konsèy pou fanmi. Anpil moun ki aplike konsèy sa yo reyisi maryaj yo. Sèten moun ki t ap viv nan plasaj te motive pou yo anrejistre maryaj yo legalman. Moun sa yo merite felisitasyon. Gen lòt ki sispann gen relasyon seksyèl andeyò maryaj. Gen gason ki te vyolan, ki te konn maltrete madanm yo ak pitit yo, ki te konn pale mal ak yo, ki vin aprann aji avèk bonte e avèk tandrès.
2. Ki sa ki enplike nan lavi yon fanmi kote moun yo se kretyen ?
2 Gen anpil bagay ki enplike nan lavi yon fanmi kote moun yo se kretyen, tankou : fason yo konsidere maryaj ki dwe yon inyon dirab, sa yo fè pou yo akonpli responsablite yo nan fanmi an, epi kòman yo boule ak lòt manm fanmi an (Efezyen 5:33–6:4). Konnen sa Bib la di konsènan lavi fanmi se youn, men aplike konsèy ki nan Bib la se yon lòt bagay. Pa gen okenn nan nou ki ta renmen sanble ak moun Jezi te kondane yo paske yo te mete kòmandman Bondye yo sou kote. Yo te fè rezònman ki fo kòmkwa yon senp devouman relijye sifi (Matye 15:4-9). Nou pa vle gen yon fòm atachman pou Bondye, epi pou nou neglije pratike l nan pwòp kay nou. Okontrè, nou vle demontre nou gen yon vrè atachman pou Bondye, ki “ yon mwayen pou gwo avantaj ”. — 1 Timote 5:4 ; 6:6 ; 2 Timote 3:5.
Konbyen tan yon maryaj fèt pou l dire ?
3. a) Ki sa k rive yon bann maryaj, men ki ta dwe detèminasyon pa nou ? b) Pandan w ap itilize bib ou, reponn kesyon ki apre paragraf sa a.
3 De jou an jou, relasyon ant moun ki marye vin pi frajil. Kèk moun ki marye depi plizyè ane deside divòse pou yo marye ak yon lòt moun. Anplis de sa, li pa ra pou w tande jèn marye ki separe apre sèlman yon ti tan maryaj tou kout. Kèlkeswa sa lòt moun fè, nou menm nou ta dwe anvi fè Jewova plezi. Konsa, annou egzamine kesyon ki vin apre yo ansanm ak tèks biblik yo pou nou wè sa Pawòl Bondye a di sou maryaj ki dwe yon inyon dirab.
Lè yon gason ak yon fi marye, konbyen tan yo ta dwe anvizaje pou yo rete viv ansanm (Mak 10:6-9 ; Women 7:2, 3) ?
Ki sèl rezon ki valab devan Bondye pou yon moun divòse avèk posiblite pou l remarye (Matye 5:31, 32 ; 19:3-9) ?
Ki sa Jewova panse konsènan divòs Pawòl li pa otorize (Malaki 2:13-16) ?
Èske Bib la rekòmande separasyon kòm mwayen pou rezoud pwoblèm nan maryaj (1 Korentyen 7:10-13) ?
Ki sitiyasyon ki ka jistifye yon separasyon (Sòm 11:5 ; Lik 4:8 ; 1 Timote 5:8) ?
4. Sa k fè gen maryaj ki dire ?
4 Gen maryaj ki reyisi e ki dire. Sa k fè sa ? Youn nan rezon ki ka fè sa se lè toule de moun yo rete tann yo gen matirite anvan yo marye. Men, li enpòtan tou pou w jwenn yon moun ki enterese nan menm bagay ak ou, yon moun ou ka pale sou tout sijè ak li avèk franchiz. Sepandan, sa ki pi enpòtan, se jwenn yon moun ki renmen Jewova e ki konsidere Pawòl li kòm baz pou rezoud pwoblèm (Sòm 119:97, 104 ; 2 Timote 3:16, 17). Yon moun konsa pap panse si bagay yo pa mache, li ka toujou fè yon separasyon oswa li ka divòse. Li pap sèvi ak mankman moun li marye a kòm yon eskiz pou l pa pran responsablite pa l. Olye de sa, l ap fè fas ak pwoblèm yo, e l ap chèche jwenn solisyon ki pratik.
5. a) Ki wòl fidelite anvè Jewova jwe nan yon maryaj ? b) Menm lè nou rankontre opozisyon, ki byenfè n ap jwenn si nou rete atache ak prensip Jewova yo ?
5 Satan pretann depi nou nan soufrans n ap abandone chemen Jewova yo (Jòb 2:4, 5 ; Pwovèb 27:11). Men pifò Temwen Jewova k ap soufri akoz opozisyon mari oswa opozisyon madanm pa rejte ve yo te fè lè yo t ap marye a. Yo kontinye montre yo fidèl ni anvè Jewova ni anvè kòmandman l yo (Matye 5:37). Kèk nan Temwen Jewova ki pèsevere yo gen lajwa wè mari yo oswa madanm yo vin sèvi Jewova bò kote yo, menm apre plizyè ane opozisyon (1 Pyè 3:1, 2). Kanta pou kretyen ki gen mari yo oswa madanm yo ki pa montre okenn siy chanjman, oubyen mari yo oswa madanm yo abandone yo poutèt y ap sèvi Jewova, kretyen sa yo konnen yo menm tou y ap jwenn benediksyon paske yo pratike atachman pou Bondye nan fanmi yo. — Sòm 55:22 ; 145:16.
Lè chak moun jwe wòl pa l
6. Pou yon maryaj reyisi, ki prensip moun yo dwe respekte ?
6 Natirèlman, reyisi yon maryaj egzije plis pase annik rete ansanm. Yon bagay mari ak madanm bezwen ki fondamantal se respè yo dwe genyen pou prensip otorite Jewova etabli a. Sa pèmèt bagay yo mache annòd e sa pèmèt tout moun nan kay la santi yo an sekirite. Nan 1 Korentyen 11:3, men sa nou li : “ Chèf chak gason se Kris, e chèf yon fi se gason, e chèf Kris se Bondye. ”
7. Kòman mari a ta dwe egzèse otorite l nan fanmi an ?
7 Èske w te remake ki sa ki mansyone an premye nan vèsè sa a ? Wi, tout gason gen yon Chèf yo dwe soumèt devan l : Kris. Sa vle di, yon mari ta dwe egzèse otorite l yon fason ki reflete kalite Jezi genyen yo. Kris soumèt devan Jewova, li gen yon lanmou pwofon pou kongregasyon an, e li pran swen li (1 Timote 3:15). Li te menm “ livre tèt li pou li ”. Jezi pa ògeye ni li pa manke konsiderasyon pou lòt moun, men li gen ‘ tanperaman dou e li gen imilite nan kè l ’. Moun ki vin anba otorite l “ jwenn fòs pou nanm [yo] ”. Lè yon mari trete fanmi li fason sa a, li montre li soumèt li devan Kris. Konsa, yon kretyèn ki marye ta dwe twouve li pwofitab e li agreyab pou l kowopere ak mari l e pou l soumèt anba otorite l. — Efezyen 5:25-33 ; Matye 11:28, 29 ; Pwovèb 31:10, 28.
8. a) Poukisa nan kèk fanmi, metòd kretyen yo kapab pa sanble bay rezilta nou swete yo ? b) Ki sa nou ta dwe fè si nou rankontre yon sitiyasyon konsa ?
8 Malgre sa, ap gen pwoblèm ki rive. Nan kèk fanmi, anvan moun yo te kòmanse aplike prensip biblik yo, te ka gen kèk ki te gen tandans fache lè lòt moun pase yo lòd, e petèt tandans sa a te gentan anrasine byen fon nan yo. Mande moun sa yo fè yon bagay avèk jantiyès, yon fason emab ka pa sanble bay rezilta. Nou konnen Bib la di pou nou retire “ ni kòlè, ni move san, ni eskandal, ni vye pawòl nan nou menm ”. (Efezyen 4:31.) Men, e si kèk moun nan fanmi an sanble pa konprann pou yo aji yon lòt fason, ki sa k ta dwe fèt ? Ebyen, Jezi pa t imite moun k ap fè menas epi k ap joure, men, li te apiye sou Papa l (1 Pyè 2:22, 23). Kidonk, lè sitiyasyon difisil konsa rive nan fanmi an, n ap demontre nou gen atachman pou Bondye lè nou priye Jewova pou l ede nou, olye pou nou adopte metòd monn nan. — Pwovèb 3:5-7.
9. Ki sa anpil mari kretyen aprann fè olye yo ret ap fè repwòch ?
9 Chanjman yo pa toujou fèt rapid, men konsèy Bib la bay yo vrèman efikas si nou aplike yo avèk pasyans e avèk dilijans. Gen anpil mari ki wè amelyorasyon kòmanse fèt nan maryaj yo lè yo vin konprann fason Kris trete kongregasyon an. Kongregasyon an se pa moun pafè ki ladan l. Poutan, Jezi renmen li, li ba li bon egzanp, e li itilize Ekriti yo pou ede l amelyore. Li te bay lavi li pou kongregasyon an (1 Pyè 2:21). Egzanp li ankouraje anpil mari kretyen pou yo vin yon pi bon chèf, e pou yo bay èd yo avèk amou pou bagay yo amelyore. Metòd sa yo bay pi bon rezilta pase fè repwòch oswa refize pale youn ak lòt.
10. a) Kòman yon mari oswa yon madanm ka fè lavi a difisil pou lòt manm fanmi an, menm lè yo di yo se kretyen ? b) Ki sa k ka fèt pou amelyore sitiyasyon an ?
10 E si yon mari pa prete atansyon ak bezwen afektif fanmi li, oubyen li pa pran dispozisyon pou gen yon etid familyal e li pa pran dispozisyon pou lòt aktivite yo ? Oubyen e si madanm nan pa kowopere, e li pa montre li soumèt jan Bondye mande a ? Gen kretyen ki jwenn bon rezilta lè yo egzamine pwoblèm yo avèk respè nan fanmi an (Jenèz 21:10-12 ; Pwovèb 15:22). Men, menmsi nou pa jwenn tout rezilta nou te espere yo, nou chak nou kapab kontribye pou nou amelyore atmosfè ki gen nan fanmi an. Nou fè sa, lè pèsonèlman nou kiltive fwi lespri a nan lavi nou e lè nou montre nou gen konsiderasyon pou lòt manm fanmi an (Galat 5:22, 23). Pwogrè yo ap vini, non pa lè nou atann pou se lòt moun ki fè yon bagay, men lè nou menm nou fè sa nou dwe fè. Konsa, nou pwouve nou pratike atachman pou Bondye. — Kolosyen 3:18-21.
Ki bò pou nou jwenn repons ?
11, 12. Ki sa Jewova ban nou pou ede nou reyisi lavi fanmi nou ?
11 Gen anpil sous kote moun chèche jwenn konsèy anrapò ak vi familyal yo. Men, nou konnen se Pawòl Bondye a ki gen pi bon konsèy, e nou rekonesan dèske Bondye ede nou mete yo ann aplikasyon grasa òganizasyon vizib li a. Èske w pwofite èd sa a totalman ? — Sòm 119:129, 130 ; Mika 4:2.
12 Anplis asiste reyinyon kongregasyon an, èske w rezève tan regilyèman pou w etidye Labib ak fanmi w ? Fanmi ki fè sa ap travay pou yo adore nan inite. Lavi fanmi yo anrichi lè yo aplike Pawòl Bondye a nan pwòp sitiyasyon pa yo. — Detewonòm 11:18-21.
13. a) Si nou gen kesyon sou sijè ki gen rapò avèk fanmi, ki kote souvan nou ka jwenn èd nesesè ? b) Ki sa tout desizyon nou pran ta dwe demontre ?
13 Ou kapab gen kesyon pou w poze sou sijè ki gen rapò avèk fanmi. Pa egzanp, ki sa yon moun dwe panse sou zafè planing ? Èske gen ka kote avòtman jistifye ? Si yon timoun pa montre twòp enterè pou kesyon espirityèl, nan ki mezi nou ta dwe egzije l patisipe nan aktivite espirityèl fanmi an ? Yo egzamine anpil kesyon konsa nan piblikasyon Temwen Jewova yo. Aprann itilize piblikasyon biblik yo, tankou endèks yo, pou w jwenn repons kesyon w yo. Si w pa gen piblikasyon kote endèks yo voye w yo, chèche nan bibliyotèk Sal Wayòm nan. Oubyen ou kapab gen posiblite jwenn piblikasyon sa yo nan òdinatè. Ou kapab pale tou de kesyon w genyen avèk kretyen oswa avèk kretyèn ki gen matirite. Men, pa toujou atann pou yo reponn ou wi oswa non pou chak kesyon. Souvan, se ou menm ki dwe deside swa pèsonèlman, swa antanke koup marye. Ansuit, pran desizyon ki demontre ou pratike atachman pou Bondye, nonsèlman an piblik, men nan fanmi w tou. — Women 14:19 ; Efezyen 5:10.
Revizyon
• Ki jan fidelite anvè Jewova makònen ak fidelite mari ak madanm genyen youn anvè lòt ?
• Lè gen presyon akoz pwoblèm ki gen nan fanmi an, ki sa k ap ede nou fè sa ki fè Bondye plezi ?
• Menmsi gen lòt moun nan fanmi an ki pa jwe wòl pa yo, ki sa nou ka fè pou nou amelyore sitiyasyon an ?
[Kesyon]
[Foto nan paj 155]
Antanke chèf, yon mari ta dwe imite kalite Jezi genyen yo.
[Foto nan paj 157]
Yon etid biblik regilye ap ede fanmi an rete ini.
