Chapit sèz

“ Se pou nou gen yon lanmou ki pwofon youn pou lòt ”

1. Ki sa souvan ki enpresyone moun ki fèk kòmanse vin nan reyinyon Temwen Jewova yo ?

LÈ MOUN vin nan reyinyon Temwen Jewova pou premye fwa, souvan yo enpresyone pou lanmou yo wè moun yo demontre. Yo wè sa nan bèl akèy yo resevwa, e nan bèl anbyans amikal ki gen nan mitan moun yo. Vizitè ki vin nan kongrè nou yo remake lanmou sa a tou. Men sa yon jounalis ekri konsènan yon kongrè : ‘ Pa gen pèsonn ki anba dwòg ni pèsonn ki sou. Pa gen kri, e pa gen rèl. Pa gen pouse e pa gen bourade. Pa gen ni moun k ap joure ni moun k ap ensilte moun. Pa gen blag betiz, ni pa gen moun k ap di gwo mo. Pa gen lafimen sigarèt nan lè a. Pa gen vòlè. Pa gen pèsonn k ap jete fatra sou gazon. Vrèmanvre, moun pa abitye wè sa. ’ Tout sa se prèv lanmou, kalite lanmou ki “ pa aji yon fason ki endesan, [ki] pa chèche pwòp enterè pa li ”. — 1 Korentyen 13:4-8.

2. a) Avèk letan, ki sa moun ta dwe konstate konsènan lanmou nou demontre ? b) Pou nou imite Kris, ki kalite lanmou nou bezwen kiltive ?

² Lanmou fratènèl se mak ki idantifye vrè kretyen yo (Jan 13:35). Toutpandan n ap grandi espirityèlman, n ap aprann eksprime lanmou an pi konplètman. Apot Pòl te priye pou lanmou kretyen parèy li yo “ ogmante plis toujou ”. (Filipyen 1:9.) Apot Jan te montre lanmou nou ta dwe reflete lespri sakrifis. Men sa l ekri : “ Se konsa nou vin konnen lanmou, paske [Pitit Gason Bondye a] te livre  nanm li pou nou, e nou gen obligasyon pou nou livre nanm nou pou frè nou. ” ​(1 Jan 3:16 ; Jan 15:12, 13). Èske n ap bay vi nou toutbonvre pou frè nou yo ? Malgre pifò sikonstans yo pa mande sa, jis nan ki pwen nou dispoze fè gwo efò pou nou ede yo kounye a, menm lè sa deranje nou ?

3. a) Kòman nou ka eksprime lanmou nou pi konplètman ? b) Poukisa li trèzenpòtan pou se kounye a menm nou gen yon lanmou ki pwofon youn pou lòt ?

³ Anplis aksyon n ap fè ki montre nou gen lespri sakrifis, nou bezwen gen yon afeksyon ki sensè pou frè nou yo. Nan Pawòl Bondye a nou jwenn ankourajman sa a : “ Nan lanmou fratènèl, se pou nou gen yon afeksyon ki gen tandrès youn pou lòt. ” ​(Women 12:10). Nou tout nou konn gen santiman konsa pou kèk moun, men, èske nou kapab aprann demontre yon lanmou konsa pou lòt moun ankò ? Toutotan lafen sistèm sa a ap pwoche, li trèzenpòtan pou nou vin pi pwòch kretyen parèy nou yo. Bib la di : “ Lafen tout bagay vin pi pre. [...] Anvan tout bagay, se pou nou gen yon lanmou ki pwofon youn pou lòt, paske lanmou kouvri yon pakèt peche. ” — 1 Pyè 4:7, 8.

Lè gen pwoblèm

4. a) Poukisa ka gen pwoblèm ant moun ki nan yon kongregasyon ? b) Ki bon rezilta n ap jwenn si nou aplike konsèy Bib la bay menmsi nou pa toujou anvi fè sa ?

⁴ Natirèlman, toutotan nou enpafè, sa ka rive nou fè yon bagay ki ofanse lòt moun. Frè nou yo tou kapab peche kont nou divès fason (1 Jan 1:8). Si ou menm ou twouve w nan sitiyasyon konsa, ki sa w ta dwe fè ? Ekriti yo bay enstriksyon ki nesesè sou sa pou nou fè. Men, sa Ekriti yo di yo ka pa tonbe daplon ak sa nou menm nou anvi fè, antanke moun enpafè (Women 7:21-23). Poutan, bonjan efò nou fè pou nou aplike konsèy ki gen nan  Bib la ap pwouve dezi sensè nou genyen pou nou fè Jewova plezi. Mete sou sa, lè nou aji konsa, sa pral amelyore kalite lanmou nou genyen pou pwochen nou.

5. Si yon moun ofanse nou, poukisa nou pa ta dwe tire revanj ?

⁵ Gen moun, lè lòt moun ofanse l, pafwa l ap chèche okazyon pou l tire revanj. Men se sèlman agrave sa agrave sitiyasyon an. Si gen yon koreksyon ki nesesè, nou ta dwe kite sa nan men Bondye (Pwovèb 24:29 ; Women 12:17-21). Gen lòt moun ki evite tout kontak ak moun ki ofanse yo a. Men, nou pa ta dwe fè moun k ap adore Bondye menm jan avèk nou bagay konsa, paske, pou adorasyon nou an akseptab, nan yon sèten mezi sa depann de lanmou nou gen pou frè nou (1 Jan 4:20). Se poutèt sa, Pòl ekri : “ Kontinye sipòte nou youn lòt, e kontinye padone nou youn lòt san grate tèt, si yon moun gen dekwa pou l plenyen kont yon lòt. Menm jan Jewova padone nou san grate tèt, nou menm tou fè menm jan an. ” ​(Kolosyen 3:13). Èske w ka fè sa ?

6. a) Konbyen fwa nou ta dwe padone yon frè nou ? b) Ki bagay si nou konprann li k ap ede nou byen reyaji lè moun komèt peche kont nou ?

⁶ E si yon moun peche kont nou plizyè fwa, men li pa komèt yon peche grav ki ka mennen yo eskominye l nan kongregasyon an ? Pou ti fot konsa, apot Pyè sijere pou nou padone “ jiska sèt fwa ”. Men Jezi te di : “ Se pa : Jiska sèt fwa, men se : Jiska swasanndisèt fwa. ” Li te mete aksan sou kokenn dèt nou genyen anvè Bondye an konparezon ak sa nenpòt moun te ka dwe nou (Mat. 18:21-35). Chak jou nou peche kont Bondye divès fason : gende fwa se nan yon aksyon egoyis, nan sa nou di oswa nan sa nou panse. Oubyen se nan sa nou pa rive fè, san nou pa menm rann nou kont nou peche (Women 3:23). Poutan, Bondye kontinye fè nou mizèrikòd (Sòm 103:10-14 ; 130:3, 4).  Li mande nou pou nou aji menm jan an youn anvè lòt (Matye 6:14, 15 ; Efezyen 4:1-3). Konsa, n ap pratike kalite lanmou ki “ pa teni kont de bagay mal yo fè l ”. — 1 Korentyen 13:4, 5 ; 1 Pyè 3:8, 9.

7. Ki sa nou ta dwe fè si yon frè gen yon bagay kont nou ?

⁷ Gende lè, nou ka santi yon frè gen yon bagay kont nou byenke nou menm nou pa gen anyen mal nan kè nou kont li. Nou kapab chwazi ‘ kouvri sa avèk lanmou ’ jan 1 Pyè 4:8 sijere l la. Oubyen nou kapab pran inisyativ pale avè l epi eseye retabli relasyon ki pezib. — Matye 5:23, 24.

8. Si yon kwayan parèy nou fè yon bagay ki fè nou fache, ki sa pou nou fè ?

⁸ Sa ka rive yon kwayan parèy nou ap aji yon fason nonsèlman ki fè nou fache, men ki fè lòt moun fache tou. Èske li pa ta saj pou nou pale avè l ? Petèt. Si pèsonèlman ou esplike l pwoblèm nan yon fason ki emab, sa kapab pote bon rezilta. Men, toudabò ou dwe mande tèt ou : ‘ Èske vrèmanvre li fè yon bagay ki kontrè ak sa Bib la di ? Oubyen, èske pwoblèm nan pa plis poze paske li pa soti menm kote avèk mwen e li pa gen menm edikasyon ak mwen ? Pran prekosyon pou w pa etabli pwòp prensip pa w e ansuit pou w ap jije moun dapre prensip sa yo (Jak 4:11, 12). Jewova aksepte moun ki soti tout kote san patipri e li pasyan avèk yo toutpandan y ap pwogrese espirityèlman.

9. a) Nan ka kote gen fot grav ki fèt nan kongregasyon an kiyès ki la pou okipe de sa ? b) Ki lè se moun yo peche kont li a ki gen responsablite pou l aji an premye, e avèk ki objektif ?

⁹ Si yon moun nan kongregasyon an enplike nan yon fot grav, tankou imoralite, yo ta dwe regle sa tousuit. Kiyès ki pou regle sa ? Ansyen yo (Jak 5:14, 15). Sepandan, si gen yon fot ki komèt kont yon moun, petèt nan  kesyon biznis oswa nan fè medizans, lè sa a, se moun yo peche kont li a an premye ki ta dwe fè efò pou l abòde moun ki fotif la an prive (Matye 18:15). Si pwoblèm nan pa rezoud nan etap sa a, yo bezwen pase nan lòt etap, jan Matye 18:16, 17 esplike sa. Lanmou nou genyen pou frè nou ki fè fot la ak dezi nou genyen pou nou ‘ ramne ’ li ap ede nou fè sa yon fason pou nou touche kè l. — Pwovèb 16:23.

10. Lè gen yon pwoblèm, ki sa k ap ede nou konsidere sitiyasyon an kòmsadwa ?

¹⁰ Lè gen yon pwoblèm, kit li gwo kit li piti, l ap pwofitab pou nou si nou chèche konprann pwennvi Jewova sou kesyon an. Li pa dakò ak peche sou kèlkeswa fòm nan, e nan moman apwopriye, l ap debarase òganizasyon l  lan ak moun k ap pratike peche grav e ki pa repanti. Sepandan, pinga nou bliye nou tout nou peche nan sa k piti e nou bezwen pasyans ak mizèrikòd li. Konsa, Jewova trase yon modèl pou nou imite lè nou anfas peche lòt moun fè. Lè nou gen mizèrikòd, nou imite lanmou li. — Efezyen 5:1, 2.

Chèche mwayen pou nou “ elaji ” nou

11. Poukisa Pòl te ankouraje Korentyen yo pou yo “ elaji ” yo ?

¹¹ Pòl te pase plizyè mwa ap fòtifye kongregasyon Korent nan peyi Grès. Li te travay di pou l ede frè ki nan kongregasyon sa a, e li te renmen yo. Men, kèk ladan yo te manke afeksyon nan kè yo pou li. Yo te kritike l anpil. Li te egzòte yo pou yo “ elaji ” yo nan fason y ap montre yo gen afeksyon (2 Korentyen 6:11-13 ; 12:15). Li ta bon pou nou tout, nou egzamine nan ki mezi nou eksprime lanmou nou pou lòt moun e li ta bon pou nou chèche mwayen pou nou elaji nou. — 1 Jan 3:14.

12. Kòman nou ka fè pou nou vin gen plis lanmou pou tout moun nan kongregasyon an ?

¹² Èske gen kèk moun nan kongregasyon an nou twouve li difisil pou nou pwòch ak yo ? Si nou fè efò pou nou pase sou kèlkeswa diferans ki genyen nan pèsonalite moun yo, jan nou ta renmen moun fè pou nou, sa kapab ede nou gen relasyon pi kòdyal antre nou. Nou kapab amelyore santiman nou anvè yo tou, si nou chèche bèl kalite yo gen lakay yo, e nou konsantre nou sou kalite sa yo. Asireman, sa ap fè nou vin gen plis lanmou pou yo. — Lik 6:32, 33, 36.

13. Ki jan nou kapab elaji nou nan lanmou n ap montre pou moun ki nan kongregasyon nou ?

¹³ Fò nou admèt sa, gen limit nan sa nou ka fè pou lòt moun. Nou ka pa gen posiblite salye tout moun nan  chak reyinyon. Lè n ap envite kèk zanmi nan yon repa, li kapab pa posib pou nou mete tout moun ladan l. Men, èske nou pa ka elaji nou lè nou pran jis kèk minit pou nou chèche pi byen konnen yon moun nan kongregasyon nou ? Èske pafwa nou pa ka envite yon moun nou pa byen konnen pou l patisipe avèk nou nan ministè a ?

14. Lè nou nan mitan kretyen nou potko janm rankontre, ki jan nou kapab montre nou gen yon lanmou ki pwofon youn pou lòt ?

¹⁴ Asanble yo ofri nou bèl posiblite pou nou elaji nou nan lanmou nou. Kapab gen plizyè milye moun ki la. Nou pap ka rankontre yo tout, men nou kapab aji yon fason ki montre nou mete byennèt yo anvan konfò pa nou. Ant sesyon yo, nou kapab montre nou enterese pèsonèlman nan yo, lè nou pran inisyativ pou nou fè konesans ak kèk moun pami sa ki alantou nou yo. Jou a pral rive kote tout moun k ap viv sou tè a pral frè ak sè ki ini nan adorasyon vrè Dye a ki Papa nou tout la. Ala kontan nou pral kontan dèske youn pral aprann konn lòt ! Lanmou ki pwofon an pral pouse nou fè sa. Poukisa nou pa kòmanse depi kounye a ?

Revizyon

• Lè gen pwoblèm ant kretyen, kòman yo ta dwe rezoud yo, e poukisa ?

• Pandan n ap grandi espirityèlman, ki fason lanmou nou tou ta dwe vin plis toujou ?

• Ki sa nou ka fè pou nou montre nou gen yon lanmou ki pwofon pou plis moun, olye pou nou genyen l jis pou yon ti gwoup zanmi entim ?

[Kesyon]

[Foto nan paj 148]

Gen anpil fason nou demontre lanmou antanke kretyen, tankou lè nou nan reyinyon kongregasyon an.