CHAPIT 4

Poukisa manman m ak papa m separe?

“M te la jou papa m kite kay la. M te gen sizan lè sa a, se sa k fè m pa t konprann sa k t ap pase a. M te chita atè a ap gad tele, e m te tande manman m k ap kriye e ki t ap sipliye papa m pou l pa ale. Papa m desann eskalye a ak yon ti malèt, li bese bò kote m, li bo m e li di: ‘Papi ap toujou renmen w.’ Epi li soti. Mwen pa t wè papa m pandan yon bon tan apre sa. Depi lè a, mwen te pè pou manman m pa ale tou.” — Elaine, 19 an.

 SI PARAN W divòse, ou ka gen enpresyon tout bagay fini e sa pral lakòz ou viv nan mizè pandan tout rès vi w. Byen souvan, sa ka fè w vin gen yon pakèt santiman, tankou lawont, kòlè, strès, ou ka pè pou moun pa abandone w, ou ka santi w koupab, ou ka fè depresyon e ou ka santi yon gwo vid anndan w, e pafwa menm ou ka anvi tire revanj.

Si paran w pa gen lontan depi yo separe, ou ka gen santiman sa yo e se nòmal, paske Kreyatè nou an te vle pou se ni manman ni papa ki leve pitit yo (Efezyen 6:1-3). Men kounye a, gen youn nan paran w yo ki pap viv avè w e petèt ou renmen l anpil. Daniel, yon jèn paran l te separe lè l te gen setan, di: “M te gen anpil respè pou papa m e m te vle viv avè l. Men, se ak manman m Leta te otorize nou viv.”

Poukisa gen paran ki separe?

Byen souvan, timoun yo sezi lè paran yo separe paske paran yo pa t kite yo konnen yo gen pwoblèm. Rachel te gen 15 an lè paran l divòse, li di: “Mwen te sezi. Mwen te toujou panse yo damou.” Menm lè paran yo konn fè kont devan timoun yo, sa toujou yon gwo chòk pou timoun yo lè paran yo separe.

Nan anpil ka, paran yo separe paske youn ladan yo te fè imoralite seksyèl. Nan ka sa a, Bondye bay moun ki inosan an dwa pou l divòse e li lib pou l marye ak yon lòt moun (Matye 19:9). Gen lòt ka kote ‘move san, rèl, joure’ konn lakòz youn nan paran yo sibi vyolans, sa ki fè li konn pè ni pou li ni pou pitit li. — Efezyen 4:31.

Fò n di tou, gen paran ki separe san yo pa gen bon rezon pou sa. Lè yo gen pwoblèm, olye yo chèche rezoud yo, yo pito annik divòse paske yo di yo “pa gen kè kontan” oswa “youn pa renmen lòt ankò”. Bondye pa renmen sa, paske l “rayi [mòd] divòs” sa yo (Malachi 2:16). Jezi te fè  konnen gen kèk fanmi ki t ap separe paske youn nan konjwen yo vin kretyen. — Matye 10:34-36.

Kèlkeswa sa k lakòz divòs la, lefètke paran w chwazi pa di w anyen oswa yo ba w yon senp esplikasyon sou rezon ki fè yo divòse a, sa pa vle di yo pa renmen w. Kòm yo ret konsantre sou pwòp soufrans yo, yo twouve l difisil pou yo pale sou divòs la (Pwovèb 24:10). Yo ka twouve l dwòl oswa anbarasan pou yo rekonèt yo toude antò.

Sa w ka fè

Chèche wè sa k fè w pè. Kòm divòse paran w divòse a ka chanje lavi w nèt, ou ka kòmanse enkyete w pou yon seri bagay ou te twouve nòmal lontan. Malgre sa, ou ka toujou fè yon jan pou w kontwole enkyetid ou yo lè w rive idantifye yo. Mete ti siy tcheke a ✔ nan ti kare anba a ki ale ak sa k plis enkyete w la, oswa ekri sa k enkyete w la bò kote bwat ki ekri “Lòt” la.

□ Lòt paran m nan ap kite m tou.

□ Fanmi an pap gen ase lajan pou l viv.

□ Se fòt mwen ki fè yo divòse.

□ Si m marye, maryaj mwen ap kraze tou.

□ Lòt ․․․․․

Pale sou sa k enkyete w. Wa Salomon te di gen “yon lè pou moun pale”. (Eklezyas 3:7.) Chèche pi bon moman pou w pale ak paran w sou sa ki enkyete w ou te mete nan lis la. Si w santi w tris oswa ou santi gen bagay ou pa fin konprann, fè yo konn sa. Petèt y ap ka esplike w sa k ap pase a e konsa sa ka redui strès ou. Si paran w pa dispoze oswa yo pa kapab ede w nan moman an, ou ka pale ak  yon zanmi ki gen matirite. Pran inisyativ pou w al pale avè l. Lefètke w konnen gen yon moun k ap koute w, sa sèlman ka ba w yon gwo soulajman. — Pwovèb 17:17.

Mete sou sa, Papa w ki nan syèl la ap koute w paske li se moun ki “tande lapriyè” a (Sòm 65:2). Di l tout sa k sou kè w, “paske li gen sousi pou [ou]”. — 1 Pyè 5:7.

Sa pou w pa fè

Pa kenbe rankin. Daniel, jèn nou te pale de li pi wo a, di: “Paran m te egoyis. Yo pa t vrèman panse avè n, nitou yo pa t panse ak fason sa yo fè a t ap gen efè sou nou.” Nou ka konprann sa k fè Daniel santi l konsa e li ka gen rezon. Men, ki jan w t ap reponn kesyon ki vin apre yo? Ekri repons yo nan liy yo bay la.

Si Daniel ret fache ak paran l e l kontinye kenbe yo sou kè, ki move efè ou panse sa ka genyen sou li? (Li Pwovèb 29:22.) ․․․․․

Byenke sa ka difisil, sa k fè l ap bon pou Daniel fè efò pou l padone paran l pou lapenn yo fè l? (Li Efezyen 4:31, 32.) ․․․․․

Kòman verite nou jwenn nan Women 3:23 a ka ede Daniel wè paran l yon lòt fason? ․․․․․

Evite aji fason ki ka lakòz ou soufri. Men sa Denny di:  “Apre paran m te fin divòse, mwen pa t kontan ditou e m te dekouraje. M te kòmanse gen pwoblèm lekòl la e m te double yon klas. Apre sa, [...] m te timoun ki pi dezòd nan klas la e m te konn goumen anpil.”

Poukisa w panse Denny te vin dezòd konsa nan klas la? ․․․․․

Poukisa petèt li te konn goumen anpil? ․․․․․

Si w ta anvi aji yon fason ki mal nan objektif pou w pini paran w, kòman prensip ki nan Galat 6:7 la ka ede w panse  yon lòt fason? ․․․․․

Sa w dwe atann ou

Lè yon moun blese oswa li gen yon zo ki kase, li ka pran plizyè semèn e menm plizyè mwa anvan l geri nèt. Menm jan an tou, lè yon moun di oswa fè yon bagay ki blese yon moun, sa ka pran anpil tan anvan moun nan geri. Gen kèk espè ki panse se apre twazan yon moun ki divòse ap kòmanse geri. Sa ka parèt yon pakèt tan, men sonje, gen anpil bagay ki pou fèt anvan pou w reprann ou.

Pou kòmanse, n ap bezwen òganize nou yon lòt fason nan kay la apre divòs la. Sa ap pran tan tou anvan santiman paran w tounen nòmal ankò. Se apre sa y ap kapab ba w èd ou bezwen an. Plis w ap reprann ou se plis w ap santi w tounen nan ou menm ankò.

LI PLIS BAGAY SOU SIJÈ SA A NAN VOLIM 2 A, NAN CHAPIT 25.

NAN LÒT CHAPIT LA

Ki sa w ap fè si w pa kontan paske paran w remarye?

VÈSÈ KLE

“Gen [...] yon lè pou moun geri.” — Eklezyas 3:1, 3.

MEN YON IDE

Si paran w divòse, se fòt omwen youn ladan yo. Eseye gade ki erè yo te fè yon fason pou w pa fè menm erè a si w ta chwazi marye yon jou. — Pwovèb 27:12.

ÈSKE W TE KONNEN?

Se pa paske paran w pa reyisi maryaj yo ki fè maryaj pa w pap mache.

SA M KONTE FÈ

M ap santi m alèz pou m pale sou sa k enkyete m yo ak (ekri non yon moun ki gen matirite ou ta renmen pale avè l) ․․․․․

Si m santi m anvi aji mal yon fason pou m fè paran m soufri pou sa yo fè, men sa m ap fè pou m kontwole santiman sa a ․․․․․

Men sa m ta renmen mande paran m sou sijè sa a ․․․․․

KI SA W PANSE?

● Poukisa paran w ka ezite pale avè w sou kesyon divòs yo a?

● Poukisa li enpòtan pou w sonje se pwoblèm paran w gen antre yo ki fè yo divòse, men se pa avè w yo gen pwoblèm?

[Antrefilè nan paj 32]

“Apre manman m te fin kite kay la, m te fè depresyon e m te kriye chak jou. Men, mwen te priye souvan, mwen te rete okipe nan ede lòt moun e m te rete pwòch ak zanmi ki gen matirite. M te santi se fason sa a Jewova te ede m fè fas ak sitiyasyon an.” — Natalie.

[Foto nan paj 33]

Lè w gen yon ponyèt ki kase, ou soufri e li pran tan pou l geri, se menm bagay la lè paran w divòse, ou soufri men tikras pa tikras w ap rive geri.