CHAPIT 30

Èske nou vrèman pare pou nou marye?

Ou jwenn moun ou t ap chèche a, e nou gentan gen yon bon ti tan depi nou renmen donk nou konnen nou damou. Ou gentan imajine ou menm ak moun nan ki marye e k ap viv ak kè kontan. Èske sa ap fèt vre? Pandan w sou wout pou w pran youn nan pi gwo desizyon nan lavi w, ou kòmanse poze tèt ou kesyon...

Èske nou vrèman pare pou nou marye?

LI NÒMAL pou w gen kèk ti dout konsènan maryaj, menmsi w damou. Lefètke chak jou vin  gen pi plis moun ki marye ki pap viv ak kè kontan oswa menm ki divòse se yon bagay ki nòmal pou w pridan lè w ap anvizaje marye, paske se yon etap ki pral chanje lavi w. Ki jan w ka fè konnen si w pare pou sa? Kounye a, ou vrèman bezwen retire tout rèv oswa ide ou gen sou maryaj ki pa reyalis nan tèt ou. Pa egzanp:

RÈV 1 “Menmsi nou pa gen anyen, se pa grav, lanmou pi enpòtan.”

Reyalite: Lanmou pa ka peye depans ki gen pou fèt yo, ni li pa ka rezoud pwoblèm ekonomik. Anfèt, moun k ap fè rechèch yo fè konnen, lajan se konn youn nan bagay ki lakòz pwoblèm nan maryaj e li konn menm lakòz divòs. Lè nou pa gen yon bon pwennvi sou lajan sa ka ban nou pwoblèm nan domèn afektif, sa ka gen move efè sou relasyon nou ak Bondye e tikras pa tikras, sa ka kraze relasyon nou ak moun nou marye avè l la (1 Timote 6:9, 10). Ki leson nou aprann nan sa? Pa ret tann jis lè nou fin marye pou nou pale sou fason n ap jere lajan nou!

Labib di: “Kiyès nan nou la a ki vle bati yon fò ki pap chita anvan pou l kalkile konbyen sa ap koute l?” — Lik 14:28.

Men yon ide: Se pou ou menm ak moun ou pral marye avè l la pale sou fason nou vle jere kòb nou anvan nou marye (Pwovèb 13:10). Men kèk kesyon nou ka egzamine: Kòman nou pral jere kòb n ap touche? Èske n ap mete kòb nou yo ansanm sou yon sèl kont oswa èske chak moun ap gen kont pa l? Kiyès nan nou ki gen plis kapasite pou l kenbe lajan fanmi an e pou l jere depans yo *? Ki kantite kòb nou chak la kapab depanse san l pa mete lòt la okouran? Se depi kounye a pou nou kòmanse travay antanke ekip! — Eklezyas 4:9, 10.

RÈV 2 “Maryaj nou ap byen mache paske nou toujou dakò sou tout bagay!”

Reyalite: Si nou toujou dakò sou tout bagay, siman se  paske nou te fè tout sa n kapab pou n evite sijè ki te ka lakòz diskisyon. Men, maryaj pap ban nou chans sa a, n ap oblije pale de yo. Reyalite a sèke pa gen de moun ki antann yo tèlman byen ki fè yo pa janm gen mezantant, sa ap rive kanmenm (Women 3:23; Jak 3:2). Ou bezwen gade nonsèlman jis nan ki pwen nou antann nou men tou gade ki jan nou reyaji lè nou pa antann nou sou yon sijè. Yon maryaj ki solid se relasyon ant de moun ki aksepte diferans ki gen lakay youn lòt e ki travay pou yo rezoud pwoblèm nan avèk matirite e yon fason ki amikal.

Labib di: “Pa al dòmi ak kòlè nan kè nou.” (Efezyen 4:26, Bib la).

Men yon ide: Byen reflechi sou fason ou regle pwoblèm ou gen ak paran w oswa ak frè ak sè w. Fè yon tablo ki sanble ak tablo ki nan paj 93 nan liv sa a oswa ki nan paj 221 Volim 2 a. Mete sitiyasyon ki te lakòz pwoblèm nan, mete fason w te reyaji e mete ki pi bon fason ou te ka reyaji. Pa egzanp, lè w gen yon pwoblèm, si premye reyaksyon w se kouri al nan chanm ou epi frape pòt la byen fò, ekri yon pi bon fason ou te ka reyaji, yon bagay k ap ede w rezoud pwoblèm nan olye w fè l vin pi mal. Li nesesè pou w aprann pi byen reyaji devan pwoblèm depi kounye a paske sa ap ede w gen kè kontan nan maryaj ou.

RÈV 3 “Yonfwa mwen marye, tout dezi seksyèl mwen ap konble.”

 Reyalite: Lefètke w marye, sa pa ba w garanti w ap fè sèks chak fwa w vle. Sonje, moun ou marye avè l la pa yon wobo, li gen santiman ou oblije pran an konsiderasyon. Anfèt, ap gen moman kote moun nan ap tou senpleman pa sou sa. Lefètke w marye sa pa ba w dwa pou w fòse l konble bezwen w (1 Korentyen 10:24). Reyalite a sèke ou bezwen gen metriz kit ou selibatè kit ou marye. — Galat 5:22, 23.

Labib di: “Chak moun pami nou dwe konnen ki jan pou l gen kontwòl sou pwòp kò l nan sentete ak nan onè, san l pa gen dezi seksyèl san kontwòl.” — 1 Tesalonisyen 4:4, 5.

Men yon ide: Byen gade ki sa w anvi nan domèn seksyèl ak tandans ou genyen, epi reflechi sou efè dezi sa yo ak tandans sa yo ka genyen sou maryaj ou. Pa egzanp, èske w esklav mastibasyon, yon pratik ki fè moun konsantre sou tèt yo sèlman? Èske w te gen abitid gade pònografi? Èske je w toujou toupatou, w ap gade moun ki pa menm sèks avè w avèk anvi? Mande tèt ou: ‘Si m gen pwoblèm pou m kontwole dezi seksyèl mwen genyen anvan m marye, ki jan m ap kapab fè sa lè m fin marye?’ (Matye 5:27, 28). Yon lòt bagay: Èske w te gen tandans flète, sa ki fè moun ki pa menm sèks avè w konnen w kòm moun ki pa serye? Si se sa, ki sa w konte fè pou w kontwole tandans sa a lè w fin marye, paske se sèl moun ou marye avè l la ou dwe bay afeksyon? — Pwovèb 5:15-17.

RÈV 4 “Maryaj ap ban m kè kontan.”

Reyalite: An jeneral, si yon moun pa t gen kè kontan lè l poukont li, li pap gen kè kontan lè l fin marye. Sa k fè sa? Paske se fason yon moun konsidere lavi a ki fè l gen kè kontan  se pa sikonstans lavi l (Pwovèb 15:15). An jeneral, yon moun ki gen tandans wè lavi l ap mennen an yon fason negatif ap gen tandans konsantre l sou sa ki pa genyen nan maryaj la olye l konsantre sou sa ki genyen yo. Li pi bon lontan pou w travay pou w wè lavi a yon fason ki pozitif pandan w poukont ou. Epi, lè w marye, w ap wè ni moun ou marye avè l la ni maryaj ou yon fason pozitif e sa ap ede moun nan vin menm jan an tou.

Labib di: “Li pi bon pou w pwofite sa w gen devan je w pase pou w anvi sa w pa ka genyen.” — Eklezyas 6:9.

Men yon ide: Pafwa, rezon ki konn fè moun wè lavi a yon fason ki negatif se paske yo te atann yon seri bagay ki pa reyalis. Ekri de oswa twa bagay w ap atann nan maryaj la sou yon fèy papye. Li sa w ekri a epi mande tèt ou: ‘Èske sa m ap  atann yo reyalis oswa èske se rèv? Èske se pa medya, petèt fim damou oswa liv damou ki fè m wè bagay yo konsa? Èske m plis konsantre sou sa mwen menm m ap jwenn nan maryaj la, petèt mwen pap poukont mwen ankò, m ap satisfè dezi seksyèl mwen genyen, sa ap fè zanmi m yo gen plis respè pou mwen?’ Si se sa, ou bezwen chanje fason w panse a, sispann wè tèt ou sèlman, wè ou menm ak moun nan. Pou ede w fè sa, ekri de oswa twa bagay ni ou menm ni moun ou pral marye avè l la ap atann de maryaj la.

Rèv sa yo nou sot pale de yo a kapab fè w pa gen kè kontan nan maryaj ou. Kidonk, eseye elimine mòd ide sa yo epi ranplase yo ak ide ki reyalis. Fich aktivite ki nan paj 216 ak 217 la ka ede ou menm ak moun ou pral marye avè l la pandan n ap tann pou nou jwenn youn nan pi gwo benediksyon ki gen nan lavi a, anpalan de yon maryaj ki bay kè kontan. — Detewonòm 24:5; Pwovèb 5:18.

NAN LÒT CHAPIT LA

Yon separasyon ka fè w santi w kòmsi w gen yon pati nan ou ki mouri. Ki jan w ka fè fas ak sa?

[Nòt anba paj]

VÈSÈ KLE

“Yon gason ap kite papa l ak manman l, li pral atache ak madanm li, e y ap vin yon sèl chè.” — Jenèz 2:24.

MEN YON IDE

Pale ak yon koup ki gen lontan depi yo marye, epi mande yo ki konsèy yo t ap bay de moun ki fèk marye sou fason pou yo reyisi maryaj yo. — Pwovèb 27:17.

ÈSKE W TE KONNEN?

Yon maryaj ki reyisi se yon maryaj kote mari ak madanm wè youn lòt tankou zanmi, yo kominike byen, yo konnen ki jan pou yo rezoud pwoblèm, e yo wè relasyon yo kòm yon relasyon k ap dire.

SA M KONTE FÈ

Men ki kalite mwen pral travay kounye a pou ede m gen yon pi bon relasyon ak moun mwen pral marye a ․․․․․

Men sa m ta renmen mande paran m sou sijè ki vin apre a ․․․․․

KI SA W PANSE?

● Nan kèk peyi, gen anpil moun ki divòse. Dapre ou menm, poukisa se konsa sa ye?

● Ki danje ki genyen si w marye jis paske w pa gen kè kontan pandan w lakay ou?

● Poukisa li enpòtan pou w suiv prensip biblik yo lè w marye?

[Antrefilè nan paj 220]

“Maryaj se yon desizyon enpòtan. Li enpòtan nonsèlman pou w byen konnen ki sa maryaj la ye men tou pou w byen konnen moun ou pral marye avè l la.” — Audra.

 [Kare/Foto nan paj 216, 217]

Fich aktivite

Èske w pare pou w marye?

Egzamine kesyon ki nan de paj sa yo. Petèt, ou te ka menm sèvi avè yo pou w pale ak moun ou pral marye avè l la. Asire w ou egzamine vèsè yo bay yo.

Lajan

□ Ki jan w wè lajan? — Ebre 13:5, 6.

□ Ki fason ou montre ou deja konn jere lajan? — Matye 6:19-21.

□ Èske w gen dèt pou kounye a? Si se wi, ki sa w pral fè pou w ka rive peye dèt ou? — Pwovèb 22:7.

□ Konbyen kòb maryaj la ap koute? Si sa ta rive nou oblije prete kòb pou maryaj la, konbyen kòb nou ta ka di ki rezonab pou nou prete? — Lik 14:28.

□ Apre nou fin marye, èske nou toude a ap bezwen travay? Si se wi, ki jan n ap fè pou nou jere orè nou ki diferan e pou nou jere kesyon transpò? — Pwovèb 15:22.

□ Ki kote ou menm ak moun ou marye a pral viv? Konbyen kòb petèt nou ka bezwen pou lwe kay, pou manje, rad ak lòt depans ankò, e ki jan n ap fè pou nou peye kòb sa yo? — Pwovèb 24:27.

 Fanmi

□ Ki jan w boule ak paran w ansanm ak frè ak sè w? — Egzòd 20:12; Women 12:18.

□ Kounye a ki jan w jere pwoblèm ou gen lakay ou? — Kolosyen 3:13.

□ Si w se yon jèn fi, ki jan ou montre ou gen “yon lespri ki dou e ki pezib”. — 1 Pyè 3:4.

□ Èske nou planifye gen timoun (Sòm 127:3)? Si se non, ki metòd n ap itilize pou n pa fè pitit?

□ Si w se yon jèn gason, ki sa w panse fè pou w pran latèt fanmi an nan domèn espirityèl? — Matye 5:3.

Kalite

□ Ki jan w montre ou renmen travay? — Pwovèb 6:9-11; 31:17, 19, 21, 22, 27.

□ Ki jan w montre ou gen espri sakrifis? — Filipyen 2:4.

□ Si w se yon jèn gason, ki jan w montre ou ka egzèse otorite menm jan ak Kris? — Efezyen 5:25, 28, 29.

□ Si w se yon jèn fi, ki prèv ki montre ou ka soumèt anba otorite? — Efezyen 5:22-24.

[Foto nan paj 219]

Maryaj tankou dlo, pa kouri plonje san w pa byen konn dlo a.