“ Anvan tout bagay, se pou nou gen yon lanmou ki fò anpil ”

“ Lafen tout bagay vin pi pre. [...] Anvan tout bagay, se pou nou gen yon lanmou ki fò anpil youn pou lòt. ” — 1 PYÈ 4:7, 8.

• Ki konsèy Jezi te bay disip li yo anvan li kite yo, e ki sa k montre Pyè te kapte sa li te di a (§ 1-2) ?

JEZI te konnen dènye moman l ak apot li yo t ap gen anpil valè. Li te konn sa k t ap tann yo pi devan. Yo te gen yon gwo travay pou yo akonpli, men yo t apral rayi yo, yo t apral pèsekite yo menm jan avè l (Jan 15:18-20). Plizyè fwa nan dènye nuit yo t ap pase ansanm nan, li te raple yo nesesite pou “ youn renmen lòt ”. — Jan 13:34, 35 ; 15:12, 13, 17.

² Apot Pyè ki te la jou swa sa a te kapte enpòtans sa li te di a. Plizyè ane apre, yon tikras tan anvan destriksyon Jerizalèm nan, Pyè te ekri pou l ensiste sou enpòtans lanmou genyen. Men konsèy li te bay kretyen yo : “ Lafen tout bagay vin pi pre. [...] Anvan tout bagay, se pou nou gen yon lanmou ki fò anpil youn pou lòt. ” ​(1 Pyè 4:7, 8). Pawòl Pyè yo vle di anpil bagay pou moun k ap viv diran “ dènye jou ” sistèm de choz sa a ki la kounye a (2 Timote 3:1). Ki sa “ lanmou ki fò anpil ” la ye ? Poukisa li enpòtan pou nou gen yon lanmou konsa pou lòt moun ? E ki jan nou ka demontre nou genyen l ?

“ Lanmou ki fò anpil ” : Sa l ye ?

• Ki sa “ lanmou ki fò anpil ” la ye (§ 3-5) ?

³ Anpil moun konsidere lanmou tankou yon santiman ki dwe parèt natirèlman. Men, Pyè pa t pale konsènan nenpòt kalite lanmou. Li te pale konsènan lanmou sou fòm ki pi elve a. Mo “ lanmou ” nou jwenn nan 1 Pyè 4:8 la se tradiksyon agapè, yon mo grèk. Mo sa a gen ladan l yon lanmou ki san egoyis. Lanmou sa a se prensip ki dirije l oswa ki gouvène l. Gen yon liv referans ki di : “ Yo kapab kontwole lanmou agapè, paske se pa prensipalman yon emosyon, men se yon desizyon w pran ki mennen w nan aksyon. ” Piske nou eritye tandans egoyis, nou bezwen rapèl pou nou montre lanmou youn pou lòt. N ap fè sa jan prensip Bondye yo mande. — Jenèz 8:21 ; Women 5:12.

⁴ Sa pa vle di nou dwe renmen youn lòt senpleman paske nou oblije. Agapè pa mache san afeksyon ak santiman. Pyè te di nou dwe “ gen yon lanmou ki fò anpil [literalman “ ki etann ”] youn pou lòt ” *. (Kingdom Interlinear.) Sepandan, yon lanmou konsa mande efò. Men sa yon biblis di konsènan mo grèk ki tradui “ fò anpil ” la : “ Li dekri imaj yon atlèt k ap detire mis li yo nan dènye efò l ap fè nan finisman yon kous. ”

⁵ Donk, lanmou nou pa dwe limite sèlman nan fè sa ki parèt fasil pou nou oswa sèlman pou kèk moun nou chwazi. Lanmou kretyen mande pou nou “ elaji ” kè nou, pou nou etann lanmou nou menm lè sa parèt difisil pou nou (2 Korentyen 6:11-13). Li klè, kalite lanmou sa a se yon bagay nou bezwen devlope nan nou e nou bezwen travay sou sa, menm jan yon atlèt dwe fè antrènman pou l gen plis ladrès. Li esansyèl pou nou gen yon lanmou konsa youn pou lòt. Poukisa ? Pou omwen twa rezon.

 Poukisa nou dwe gen lanmou youn pou lòt ?

• Poukisa nou dwe renmen youn lòt (§ 6-8) ?

⁶ Premyèman, “ paske se nan Bondye lanmou soti ”. (1 Jan 4:7.) Jewova, li menm ki Sous kalite atiran sa a, te renmen nou an premye. Apot Jan di : “ Se pa mwayen sa a Bondye te montre li renmen nou, paske Bondye te voye sèl Pitit li te fè a nan monn nan, pou nou ka jwenn lavi grasa li. ” ​(1 Jan 4:9). Bondye “ te voye ” Pitit li a vini antanke moun pou l akonpli ministè li, e pou l mouri sou yon poto soufrans. Tout sa te fèt “ pou nou kapab gen lavi ”. Ki jan nou kapab montre rekonesans nou pou kokennchenn demonstrasyon lanmou Bondye a ? Men sa Jan di : “ Si se konsa Bondye renmen nou, alò nou menm nou gen obligasyon pou youn renmen lòt. ” ​(1 Jan 4:11). Note sa Jan ekri : “ Si se konsa Bondye renmen nou. ” Se pa ou menm sèl, men, se nou. Pwen an klè, si Bondye renmen adoratè parèy nou yo, alò nou dwe renmen yo tou.

⁷ Dezyèmman, li vrèman enpòtan pou nou gen plis lanmou youn pou lòt nan moman sa a, yon fason pou nou ede frè nou yo ki nan bezwen paske “ lafen tout bagay vin pi pre ”. (1 Pyè 4:7.) N ap viv nan “ tan ki di e ki difisil pou moun sipòte ”. (2 Timote 3:1.) Kondisyon ki gen nan monn nan, katastwòf natirèl, ak opozisyon nou jwenn lage nou nan pwoblèm. Anba sikonstans difisil yo, nou bezwen vin pi pwòch youn ak lòt plis toujou. Lanmou ki fò anpil la ap kenbe nou ini byen fèm youn ak lòt e sa ap motive nou pou nou gen “ sousi youn pou lòt ”. (1 Korentyen 12:25, 26.)

⁸ Twazyèmman, nou bezwen gen lanmou youn pou lòt paske nou pa vle “ fè plas pou Dyab la ” pou l pa pran pye sou nou (Efezyen 4:27). Satan toujou la pou l sèvi ak enpèfeksyon kretyen parèy nou yo, tankou mankman yo, fot yo ak erè yo fè kòm yon obstak pou nou. Èske yon remak moun fè san reflechi oswa yon aksyon ki pa janti ap lakòz nou kite kongregasyon an (Pwovèb 12:18) ? Sa pap fèt si nou gen yon lanmou ki fò anpil youn pou lòt ! Yon lanmou konsa ede nou pou nou konsève lapè e pou nou sèvi Bondye “ kòtakòt ” nan linite. — Sefànya 3:9.

Fason pou nou montre nou renmen lòt moun

• Ki jan w ka demontre ou renmen lòt moun (§ 9-18) ?

⁹ Demontre nou gen lanmou, se anndan kay sa dwe kòmanse. Jezi te di, yo ta dwe idantifye moun ki disip li toutbon nan lanmou yo genyen youn pou lòt (Jan 13:34, 35). Yo dwe wè lanmou non sèlman nan kongregasyon an, men tou nan fanmi, ant mari ak madanm, ant paran ak pitit. Sa pa sifi pou nou santi nou gen lanmou pou manm fanmi nou, nou bezwen montre nou genyen l yon fason ki reyèl.

¹⁰ Ki fason de moun ki marye youn ak lòt ka montre yo gen lanmou youn pou lòt ? Yon mari ki renmen madanm li toutbon fè l konnen li gen anpil enpòtans pou li. Li fè sa ni nan pawòl li ni nan aksyon l, ni lè yo devan moun ni lè yo poukont yo. Li respekte diyite madanm li, li gen konsiderasyon pou sa l panse, pou opinyon l ak pou santiman l (1 Pyè 3:7). Li mete enterè madanm li anvan enterè pa l, e li fè tout sa l kapab pou l konble bezwen materyèl, bezwen espirityèl ak bezwen afektif li (Efezyen 5:25, 28). Yon madanm ki vrèman renmen mari l montre yon “ gwo respè ” pou li, menmsi gende lè mari a pa rive fè sa li t ap atann nan (Efezyen 5:22,  33). Li soutni mari l e li soumèt devan l. Li pa mande l sa ki pa rezonab, men li kowopere avèk li toutpandan yo rete konsantre sou bagay espirityèl yo. — Jenèz 2:18 ; Matye 6:33.

¹¹ Paran, ki jan nou ka montre lanmou pou pitit nou ? Devouman nou genyen pou nou travay di pou satisfè bezwen materyèl yo se prèv nou renmen yo (1 Timote 5:8). Men, timoun yo bezwen plis pase manje, rad ak kote pou yo rete. Si nou vle yo aprann renmen vrè Dye a e pou yo sèvi l, yo bezwen fòmasyon espirityèl (Pwovèb 22:6). Sa siyifi planifye tan pou nou etidye Labib an fanmi, pou nou patisipe nan ministè a e pou nou asiste reyinyon (Detewonòm 6:4-7). Pou nou regilye nan aktivite sa yo, sa mande gwo sakrifis, espesyalman nan tan di sa yo. Sousi nou genyen ak efò n ap fè pou nou konble bezwen espirityèl pitit nou se prèv nou gen lanmou pou yo. Konsa, nou montre nou vrèman sousye de byennèt etènèl yo. — Jan 17:3.

¹² Li enpòtan tou pou paran yo montre lanmou pou pitit yo lè yo satisfè bezwen afeksyon yo. Timoun yo frajil. Kè wòwòt yo genyen an bezwen gen asirans nou renmen yo. Di yo nou renmen yo, ba yo anpil afeksyon, paske sa kapab ba yo asirans yo merite pou moun renmen yo e yo gen valè. Felisite yo ak tout kè nou avèk senserite, paske sa kapab lese yo konprann nou wè efò y ap fè e nou bay sa enpòtans. Disipline yo avèk amou, paske koreksyon konsa fè yo konprann nou enterese nan jan de moun y ap ye demen (Efezyen 6:4). Bèl demonstrasyon lanmou konsa ede nou bati yon fanmi solidè ki gen kè kontan, ki pi byen prepare pou reziste anba presyon ki genyen nan dènye jou sa yo.

¹³ Lanmou pouse nou pase sou defo lòt moun. Sonje lè Pyè t ap avèti moun ki t ap li lèt li yo, li te di yo pou yo “ gen yon lanmou ki fò anpil youn pou lòt ”. Li te bay rezon ki fè sa enpòtan konsa : “ Paske lanmou kouvri yon pakèt peche. ” ​(1 Pyè 4:8). “ Kouvri ” peche pa vle di ‘ kache ’ peche grav. Li bon pou nou mete moun ki responsab nan kongregasyon an okouran de peche sa yo e yo dwe pran sa an men (Levitik 5:1 ; Pwovèb 29:24). Se ta pi gwo mank lanmou e sa t ap kontrè ak sa Bib la di, si nou ta kite yon moun ki komèt gwo peche kontinye ap fè inosan soufri. — 1 Korentyen 5:9-13.

¹⁴ Nan pifò ka, erè ak fot kretyen parèy nou yo fè pa gen anpil enpòtans. Detanzantan, nou tout nou konn bite nan pawòl n ap di oswa nan aksyon n ap poze. Youn konn desevwa lòt oswa menm youn konn ofanse lòt (Jak 3:2). Èske nou dwe prese pibliye defo lòt moun ? Bagay konsa t ap sèlman sèvi pou kreye hinghang anndan kongregasyon an (Efezyen 4:1-3). Si nou kite lanmou dirije nou, nou pap “ devwale yon defo ” yon adoratè parèy nou genyen (Sòm 50:20). Menm jan mastik ak penti kouvri tach ki sou yon mi, se konsa lanmou kouvri enpèfeksyon lòt moun. — Pwovèb 17:9.

¹⁵ Lanmou ap pouse nou ede moun ki vrèman nan bezwen. Piske kondisyon ki gen nan dènye jou yo ap vin pi mal, sa ka rive gende lè kretyen parèy nou ap bezwen èd nan domèn materyèl oswa nan domèn fizik (1 Jan 3:17, 18). Pa egzanp, èske gen yon manm nan kongregasyon an k ap soufri anba gwo pwoblèm finans oswa ki pèdi travay li ? Lè sa a nou ka petèt ofri kèk èd materyèl, selon mwayen nou (Pwovèb 3:27, 28 ; Jak 2:14-17). Èske kay yon vèv ki granmoun anpil bezwen reparasyon ? Lè sa a nou ka petèt pran dispozisyon ki nesesè pou nou bay èd nou nan kèk travay. — Jak 1:27.

¹⁶ Se pa pou moun k ap viv bò kote nou sèlman nou dwe montre nou gen lanmou. Detanzantan, nou tande rapò konsènan sèvitè  Bondye nan lòt peyi ki viktim anba gwo move tan, tranblemanntè, oswa gè sivil. Yo kapab nan gwo bezwen manje, rad ak lòt bagay ankò. Nou pa bezwen konnen si yo sot nan lòt ras oswa nan lòt gwoup etnik. Nou “ renmen tout kominote frè yo nèt ”. (1 Pyè 2:17.) Konsa, menm jan ak kongregasyon premye syèk yo, nou chofe pou nou bay sipò nou nan sekou yo òganize pou bay èd (Travay 11:27-30 ; Women 15:26). Lè nou montre lanmou nou nan tout fason sa yo, nou fòtifye chenn ki ini nou an nan dènye jou sa yo. — Kolosyen 3:14.

¹⁷ Lanmou pouse nou pataje bon nouvèl Wayòm Bondye a ak lòt moun. Annou konsidere egzanp Jezi. Poukisa li te preche e li te anseye ? “ Kè l te fè l mal ” pou foul yo akoz kondisyon espirityèl yo te ba anpil (Mak 6:34). Fo bèje relijye yo te dwe anseye yo laverite nan domèn espirityèl e yo te dwe ba yo espwa, men yo te neglije yo e yo te twonpe yo. Se sa k fè, pwofon lanmou ak konpasyon Jezi te gen nan kè l te pouse l pou l konsole pèp la ak “ bon nouvèl wayòm Bondye a ”. — Lik 4:16-21, 43.

¹⁸ Jodi a tou, yo neglije anpil moun nan domèn espirityèl e yo twonpe yo. Yo san espwa. Si, menm jan ak Jezi, nou vin pi sansib pou bezwen espirityèl moun ki poko konnen vrè Dye a, lè sa a n ap kite lanmou ak konpasyon pouse nou pataje bon nouvèl Wayòm Bondye a avèk yo (Matye 6:9, 10 ; 24:14). Lè nou konsidere tan ki rete a kout, li vin pi ijan toujou pou nou preche mesaj sa a, mesaj k ap sove lavi a. — 1 Timote 4:16.

“ Lafen tout bagay vin pi pre ”

• Poukisa se pa lemoman pou n ap pran lèz kò nou, e ki sa nou dwe detèmine pou nou fè (§ 19-20) ?

¹⁹ Sonje sa, Pyè te kòmanse konsèy li te bay pou nou gen lanmou youn pou lòt la ak pawòl sa yo : “ Lafen tout bagay vin pi pre. ” ​(1 Pyè 4:7). Talè konsa, monn nouvo jistis Bondye a pral ranplase monn mechan sa a (2 Pyè 3:13). Ebyen, jodi a, se pa lemoman pou n ap pran lèz kò nou. Jezi te di nou : “ Veye kò nou, pou kè nou pa janm vin lou nan fè eksè nan manje, nan bwè twòp, nan tètchaje lavi a, e bridsoukou pou jou sa a pa rive tousuit sou nou tankou yon pyèj. ” — Lik 21:34, 35.

²⁰ Donk, ann fè tout sa nou kapab pou nou “ kontinye veye ”, pou nou veye ki kote nou ye nan tan k ap pase a (Matye 24:42). Annou rete sou pinga nou kont nenpòt nan tantasyon Satan yo ki ta kapab fè nou distrè. Pa janm kite monn ensansib, san lanmou sa a, anpeche nou montre lanmou pou lòt moun. Sa ki pi enpòtan, se pou nou vin pi pwòch vrè Dye a, Jewova, plis toujou, li menm ki pral akonpli pwogram glorye l la sou tout tè a talè konsa pa mwayen Wayòm mesyanik li a. — Revelasyon 21:4, 5.

[Nòt anba paj]

KESYON POU ETID

[Foto nan paj 29]

Yon fanmi ki solidè pi byen prepare pou l reziste anba presyon ki gen nan dènye jou sa yo.

[Foto nan paj 30]

Lanmou pouse nou ede moun ki vrèman nan bezwen.

[Foto nan paj 31]

Pataje bon nouvèl Wayòm Bondye a ak lòt moun se yon aksyon ki montre nou gen lanmou.