Ki kote monn sa a prale ?
Ki kote monn sa a prale ?
Chak jou nou leve se pwoblèm grav ak evènman chokan n ap tande nan nouvèl y ap bay toupatou nan monn nan. Ki sa bagay sa yo vle di ?
SEKIRITE : Bonm ap eklate nan mache. Yo tire pwofesè ak elèv nan lekòl. Yo kidnape timoun kou paran yo bay do. Yo atake fi ak granmoun gason gwo midi pou vòlè zafè yo.
SITIYASYON RELIJYON YO : Legliz ap kore gwoup ki nan lagè. Klèje a anba akizasyon pou jenosid. Prèt fè abi seksyèl sou jenn timoun, legliz kase fèy kouvri sa. Asistans nan legliz bese, yo vann lokal yo.
ANVIWÒNMAN : Yo debwaze forè pou yo fè komès. Malere debalize rak bwa pou chèche bwa pou yo boule. Nap dlo anba tè kontamine, li vin pa potab. Dechè ki sot nan izin ansanm ak kèk metòd modèn pou fè lapèch fini ak pwason nan dlo. Tèlman gen polisyon nan lè a, nou prèske pa ka respire.
MWAYEN POU MOUN VIV : Dapre rapò yo bay, revni an mwayèn pou chak moun nan yon ane nan zòn Afrik Sibsaaryèn nan se apeprè 480 dola ameriken. Dirijan afre ki alatèt gwo antrepriz yo lakòz yo fè fayit, sa ki lage plizyè milye moun nan chomaj. Fwod lakòz moun k ap envesti yo pèdi tout ekonomi yo.
RATE MANJE : Apeprè 800 000 000 moun nan lemonnantye al dòmi grangou regilyèman.
LAGÈ : Plis pase 100 000 000 moun pèdi lavi yo akoz lagè ki fèt nan 20yèm syèk la. Gen ase zam nikleyè nan estòk pou detwi tout limanite plizyè fwa. Gè sivil. Zak teworis gaye sou tout kò tè a.
EPIDEMI AK LÒT MALADI ANKÒ : Apati ane 1918, gen yon grip yo rele grip espayòl ki touye 21 000 000 moun. Kounye a, sida vin tounen “ pi gwo epidemi ki fè plis ravaj nan listwa lèzòm ”. Kansè ak maladi kè pote lapenn nan lemonnantye.
Pa rete sèlman sou yon grenn nouvèl. Èske evènman yo se evènman ki izole ? Oswa èske yo fè pati yon seri evènman mondyal ki gen yon vrè siyifikasyon ?
[Kare/Foto nan paj 5]
Èske sa enterese Bondye toutbonvre ?
Anpil moun ki nan detrès akoz boulvès yo sibi oswa gwo pèd yo fè ap mande poukisa Bondye pa entèvni pou l anpeche bagay konsa rive.
Wi, sa enterese Bondye. Li ban nou bon direksyon ak bonjan soulajman depi kounye a (Matye 11:28-30 ; 2 Timote 3:16, 17). Li deja pran dispozisyon pou l fini nèt ak vyolans, maladi ak lanmò. Dispozisyon l pran yo montre li pa senpleman enterese nan moun ki nan yon nasyon, men li enterese nan moun tout nasyon, tout tribi, tout lang. — Travay 10:34, 35.
Jis nan ki pwen nou menm nou enterese nan Li ? Èske w konnen kiyès Kreyatè syèl la ak tè a ye? Èske w konn non l ? Èske w konn pwogram li ? Li reponn kesyon sa yo nan Bib la. Ladan l li fè nou konnen ki dispozisyon li pran pou l mete yon fen nan vyolans, nan maladi ak nan lanmò. Pou nou jwenn byenfè sa yo, ki sa nou dwe fè ? Nou bezwen aprann konnen l e aprann konnen pwogram li. Ki jan nou ka espere jwenn byenfè nan dispozisyon li pran yo si nou pa egzèse lafwa nan li (Jan 3:16 ; Ebre 11:6) ? Li enpòtan tou pou nou obeyi egzijans li yo (1 Jan 5:3). Èske sa enterese w ase pou w fè sa ?
Pou nou rive kapte poukisa Bondye pèmèt sitiyasyon ki gen kounye a, gen yon kesyon enpòtan nou dwe konprann. Labib bay esplikasyon sou li. N ap jwenn kesyon sa a, nan paj 15 bwochi sa a.
