Koute te sove lavi yo

JEZI KRIS te bay avètisman alavans konsènan fen sistèm de choz juif la ki te santre sou tanp Jerizalèm nan. Li pa t bay ki dat sa ta gen pou fèt. Men li te dekri evènman ki t ap gen pou mennen nan destriksyon sa a. Li te ankouraje disip li yo pou yo kontinye veye e pou yo soti nan zòn danje a.

Jezi te predi : “ Lè nou va wè lame tabli kan toutotou Jerizalèm, lè sa a, nou mèt konnen lè a rive pou yo devaste l. ” Li te di tou : “ Lè nou remake bagay repiyan ki lakòz dezolasyon [...] kanpe nan yon andwa ki sen, [...] lè sa a, se pou moun ki nan Jide kòmanse kouri pran mòn. ” Jezi ankouraje disip li yo pou yo pa retounen al ranmase byen materyèl. Yo te dwe kouri prese prese si yo te vle sove lavi yo. — Lik 21:20, 21 ; Matye 24:15, 16.

Nan objektif pou Sestiyis Galis te mete fen nan yon revòl ki te deja dire twòp, li te pran kòmandman lame women an kont Jerizalèm nan ane 66 epòk nou an. Li te menm antre nan vil la e li te ansèkle tanp lan. Vil la te tèt anba. Moun ki t ap kontinye veye yo te kapab wè katastwòf la pa lwen rive. Men, èske l te posib pou moun chape poul yo ? Sanzatann, Sestiyis Galis retire twoup li yo. Juif rebèl yo te kouri dèyè yo. Lè sa a, moman an te rive pou moun yo kouri kite Jerizalèm ak tout zòn Jide !

Nan ane apre a, twoup women yo te retounen sou kòmandman Vespazyen ak pitit gason l Titis. Tout peyi a nèt te rantre nan lagè. Nan kòmansman ane 70 epòk nou an, Women yo te fè yon palisad ak gòl pwenti toutotou Jerizalèm. Yo bloke tout kote moun te ka chape (Lik 19:43, 44). Divès gwoupman ki te anndan vil la t ap masakre youn lòt. Rès moun ki te rete yo, swa Women yo te touye yo oswa yo te pran yo kòm prizonye. Vil la ak tanp li an te detwi rapyetè. Selon Jozèf, yon istoryen juif ki t ap viv nan premye syèk la, te gen plis pase yon milyon Juif ki te mouri anba soufrans. Yo pa janm rebati tanp sa a ankò.

Si kretyen yo te toujou ret anndan Jerizalèm nan ane 70 epòk nou an, swa yo t ap touye yo oswa yo t ap kenbe yo nan esklavaj ansanm ak tout lòt moun yo. Sepandan,  istoryen tan lontan yo fè konnen, kretyen yo te koute avètisman ki soti nan Bondye a. Yo te kouri kite Jerizalèm ak tout zòn Jide pou y al nan mòn ki nan lès rivyè Jouden an. Gen kèk ki te tabli nan Pela, ki nan pwovens Pere. Yo te abandone Jide e yo pa t retounen. Lefètke yo te koute avètisman Jezi a sa te sove lavi yo.

Èske w pran oserye avètisman ki soti nan sous ki fyab ?

Gen anpil moun, apre yo fin tande yon pakèt avètisman e yo wè anyen pa rive, tout lòt avètisman yo jwenn pa gen enpòtans pou yo. Sepandan, koute avètisman kapab sove lavi w.

An 1975, nan peyi Lachin, yo te bay avètisman konsènan yon tranblemanntè ki ta gen pou frape. Otorite yo te aji. Moun yo te reyaji. Plizyè milye vi te sove.

Ann avril 1991, nan peyi Filipin, moun ki te abite nan vilaj ki anba pye mòn Pinatoubo a te fè konnen yo wè lafimen ak sann k ap ponpe sot nan mòn nan. Apre yo fin pase de mwa ap egzamine sitiyasyon an, Enstiti ki okipe zafè vòlkan ak tranblemanntè nan peyi Filipin te anonse malè pandye a. Rapidman, yo te bwote plizyè dizèn milye moun fè yo kite zòn nan. Byen bonè nan 15 jen, gen yon kokennchenn eksplozyon ki fèt kote gen plis pase uit kilomèt kib debri ki tounen poud ki vòltije nan syèl la e yo gaye sou tout zòn nan. Koute avèk atansyon te sove plizyè milye vi.

Labib fè nou konnen sistèm de choz ki la kounye a rive nan bout li. Jodi a n ap viv nan dènye jou yo. Toutpandan lafen an ap pwoche, èske w kontinye ap veye ? Èske w pran dispozisyon pou w rete lwen zòn danje a ? Èske w aji vit pou w avèti lòt moun pou yo fè menm jan an ?

[Foto nan paj 20]

Koute avètisman te sove lavi anpil moun lè vòlkan ki nan mòn Pinatoubo a te vomi sann.

[Foto nan paj 21]

Lavi kretyen ki te obeyi avètisman Jezi te bay la te epaye lè Jerizalèm te detwi nan ane 70 epòk nou an.