“ Yo pa t teni kont de anyen ”

PA PRAN avètisman oserye konn mennen nan dezas.

Dawin, yon vil ann Ostrali, t ap fè preparasyon pou aktivite fèt nan ane 1974 lè yo bay sirèn pou avèti pral gen yon siklòn. Men, depi anviwon 30 an, pa t gen siklòn ki frape Dawin. E poukisa pou sa ta rive kounye a ? Pifò nan moun ki te abite nan zòn nan pa t wè danje e yo pa t pran sa oserye jiskaske van vyolan te kòmanse rache tèt kay, demoli mi kay kote moun yo t al pran refij. Nan demen maten, vil la te devaste.

Nan peyi Kolonbi, an novanm 1985, gen yon vòlkan ki te eksploze. Li te fonn nèj ak glas, sa te lakòz yon debòdman labou ki te antere plis pase 20 000 moun ki te abite nan vil Amewo. Èske pa t gen avètisman alavans ? Mòn nan t ap tranble depi plizyè mwa. Sepandan, pifò moun nan Amewo pa t bay sa regle anyen pou yo piske yo abitye viv toupre vòlkan. Yo avèti otorite yo dezas la ap gen pou l frape nan yon tikras tan, men yo pa prèske fè anyen pou yo avèti piblik la. Anons bay nan radyo yon fason pou mete popilasyon an an konfyans. Yo sèvi ak pòtvwa legliz la pou yo ankouraje moun yo rete kalm. Diran sware a te gen de gwo eksplozyon ki fèt. Èske w t ap abandone sa w posede pou w kouri ? Se sèlman kèk moun ki te fè efò pou yo fè sa, jiskaske l te twò ta.

Souvan, jewològ yo konn predi avèk anpil presizyon ki kote tranblemanntè yo ap fèt. Men, yo prèske pa ka predi ki lè egzakteman y ap frape. An 1999, tranblemanntè ki fèt toupatou nan lemonn touye anviwon 20 000 moun. Anpil nan moun ki mouri yo te panse sa pa t ap janm rive.

Ki jan w reyaji devan avètisman Bondye li menm li bay ?

Depi lontan alavans, Labib te dekri evènman ki t ap reprezante mak fabrik dènye jou yo. Anrapò ak sa, li ankouraje nou reflechi sou “ jou Noye yo ”. “ Nan jou sa yo anvan delij la, ” moun yo te okipe nan aktivite yo abitye mennen nan lavi a, byenke, pa gen  dout, vyolans ki te gaye lè sa a te enkyete yo. Menm jan pou avètisman Bondye te bay pa mwayen sèvitè li Noye, “ yo pa t teni kont de anyen jiskaske delij la vini e li pote yo tout ale ”. (Matye 24:37-39.) Èske ou menm ou t ap koute avètisman an ? Èske w fè sa kounye a ?

Ki sa w t ap fè si w te abite Sodòm, toupre lanmè Mòt, nan epòk yon nonm yo te rele Lòt ki te yon neve Abraram ? Rejyon an te tankou yon paradi. Zafè moun nan vil la te bon. Moun yo te kè kalm. Nan epòk Lòt la, “ yo t ap manje, yo t ap bwè, yo t ap achte, yo t ap vann, yo t ap plante, yo t ap bati ”. Nan sosyete yo t ap viv la tou, imoralite te depase limit. Èske w t ap pran avètisman ki te bay la oserye, lè Lòt te kondane move bagay ki t ap fèt yo ? Èske w t ap koute si l te di w Bondye deside detwi vil Sodòm ? Oswa èske w t ap pase sa nan jwèt, menm jan ak bofis li yo ? Èske petèt ou t ap kòmanse kouri retire kò w, epi w al vire gad dèyè menm jan ak madan Lòt ? Malgre lòt moun yo pa t pran avètisman an oserye, jou Lòt soti kite Sodòm, “ gen yon lapli dife ak souf ki sot nan syèl la e li detwi yo tout ”. — Lik 17:28, 29.

Pifò moun nan epòk nou an pa teni kont de anyen. Men, egzanp sa yo konsève nan Pawòl Bondye a kòm yon avètisman pou nou, pou ankouraje nou KONTINYE VEYE !

[Kare/Foto nan paj 22]

Èske te gen yon delij inivèsèl toutbonvre ?

Anpil save k ap fè kritik di : non. Men Labib di : wi.

Jezi Kris anpèsòn te pale de sa, e li te deja egziste lè sa te fèt. Li te wè sa detan l nan syèl la.

[Kare/Foto nan paj 23]

Èske se vre Sodòm ak Gomò te detwi ?

Akewoloji sètifye evènman sa a.

Listwa pwofàn pale de sa.

Jezi Kris konfime evènman an. E sa ki te rive a parèt nan 14 liv nan Bib la.