Leson 2

Kilès Bondye ye ?

Kilès vrè Dye a ye ? Ki jan l rele ? (1, 2)

Ki jan de kò li genyen ? (3)

Ki bon kalite li genyen ki pi remakab ? (4)

Èske li bon pou nou sèvi ak estati oswa ak senbòl pou nou adore l ? (5)

Gen de fason nou ka aprann konnen Bondye, ki de fason sa yo ? (6)

1. Moun adore anpil bagay. Men Bib la aprann nou genyen yon sèl VRÈ Dye. Se li ki kreye tout sa ki nan syèl la ak tout sa ki sou tè a. Paske se li ki ban nou lavi, se li menm sèl nou dwe adore. — 1 Korentyen 8:5, 6 ; Revelasyon 4:11.

2. Bondye gen plizyè tit, men li gen yon sèl bon non. Bon non sa a se JEWOVA. Yo wete bon non sa a nan pifò Bib ki genyen, epi yo mete tit SEYÈ oswa DYE nan plas li. Men, lè yo t ap ekri Bib la, non sa a, Jewova, te parèt anviwon 7 000 fwa ladann ! — Egzòd 3:15 ; Sòm 83:18.

3. Jewova gen yon kò, men kò pa l pa tankou kò pa nou. Bib la di “ Bondye se yon espri ”. (Jan 4:24.) Fòm lavi yon espri pi siperyè lontan pase fòm lavi pa nou. Pa gen okenn moun ki janm wè Bondye. Jewova abite nan syèl,  men li ka wè tout bagay (Sòm 11:4, 5 ; Jan 1:18). E lespri sen an menm, ki sa li ye ? Li pa yon moun menm jan ak Bondye. Se fòs aktif Bondye li ye depreferans. — Sòm 104:30.

4. Bib la aprann nou ki moun Jewova ye. Li montre bon kalite Bondye genyen ki pi remakab se lanmou, jistis, sajès ak pisans (Detewonòm 32:4 ; Jòb 12:13 ; Izayi 40:26 ; 1 Jan 4:8). Bib la di nou tou li gen mizèrikòd ak bonte, li gen padon, li jenere, epi li gen pasyans. Nou menm, kòm pitit obeyisan, nou dwe fè efò pou nou imite li. — Efezyen 5:1, 2.

5. Èske li ta bon pou nou pwostène oswa lapriyè devan estati, imaj, oswa senbòl lè n ap adore ? Non (Egzòd 20:4, 5) ! Jewova di se li menm sèl pou nou adore. Li pap pataje laglwa li ak pyès lòt moun ni ak pyès lòt bagay. Imaj pa kapab ede nou. — Sòm 115:4-8 ; Izayi 42:8.

6. Ki jan nou ka rive konnen Bondye pi byen ? Men youn nan fason nou ka fè sa : se lè nou pran tan gade bagay li kreye yo epi nou reflechi an pwofondè sou mesaj yo transmèt nou. Kreyasyon Bondye yo montre nou li gen gran pouvwa ak anpil sajès. Nou wè lanmou li nan tout sa l fè (Sòm 19:1-6 ; Women 1:20). Yon lòt fason nou kapab aprann konnen Bondye, se lè nou etidye Labib. Nan liv sa a, Bondye di nou pi plis bagay toujou konsènan jan de moun li ye. Mete sou sa, li pale nou de objektif li e li di nou ki sa li vle nou fè. — Amòs 3:7 ; 2 Timote 3:16, 17.

[Foto nan paj 5]

Nou aprann konnen Bondye grasa sa li kreye epi grasa Labib.