Leson 1

Men jan w ka rive konnen sa Bondye vle

Ki bagay enpòtan Bib la aprann nou ? (1)

Ki moun ki mèt Bib la ? (2)

Poukisa w ta dwe etidye Bib la ? (3)

1. Bib la se yon kado presye Bondye bay. Se tankou yon lèt yon bon papa voye bay pitit li yo. Li aprann nou laverite sou Bondye : ki moun li ye, ki jan li wè bagay yo. Li esplike kouman pou nou debouye nou ak pwoblèm yo epi kouman pou nou jwenn vrè bonè a. Se sèl Bib la ki di nou sa nou dwe fè pou fè Bondye plezi. — Sòm 1:1-3 ; Izayi 48:17, 18.

2. Anviwon karant kalite gason te patisipe nan ekri Bib la. Travay la te kòmanse an 1513 anvan epòk nou an e li te fini sou 1600 lane. Bib la fèt ak 66 ti liv. Bondye te enspire moun yo ki te ekri Bib la. Se panse Bondye yo te ekri se pa panse pa yo. Kifè se Bondye nan syèl la ki Mèt Bib la, se pa okenn moun sou latè. — 2 Timote 3:16, 17 ; 2 Pyè 1:20, 21.

3. Bondye te veye aske yo rekopye Bib la korèkteman epi pou yo konsève l. Yo enprime plis Bib pase nenpòt lòt liv. Tout moun pap kontan wè w ap etidye Labib, men pa kite sa estope w. Lavi etènèl ou depann de efò w ap fè pou w konnen Bondye ak efò pou w fè volonte l, menm si w jwenn opozisyon. — Matye 5:10-12 ; Jan 17:3.