Kouman pou w pwoche kote Bondye
Chapit 16
Kouman pou w pwoche kote Bondye
1. Ki resanblans moun jwenn nan anpil relijyon ?
YON TOURIS ki t ap vizite yon peyi ann Oryan te sezi wè seremoni relijye ki t ap fèt nan yon tanp boudis. Kwak estati yo se pa t estati Mari oswa estati Kris, gen yon kantite nan seremoni yo ki sanble tèt koupe ak sa yo konn pratike lakay li, nan legliz li. Paregzanp, li te remake yo t ap sèvi ak chaplè, e yo t ap resite priyè. E gen lòt moun ki fè menm remak la. Keseswa ann Oryan oswa ann Oksidan, fason fidèl yo eseye pwoche kote Bondye oswa bagay y ap adore yo, yo sanble anpil.
2. Kouman yo esplike sa lapriyè ye, e sa ki fè anpil moun lapriyè ?
2 Anpil moun chèche pwoche kote Bondye espesyalman pa mwayen lapriyè. Yo di lapriyè se “ yon aksyon lòm fè pou l gen kominikasyon ak sakre a oswa ak sen an : Bondye, dye yo, monn envizib la, oswa fòs sinatirèl yo. ” (The New Encyclopœdia Britannica). Toutfwa, gen moun lè yo pwoche kote Bondye nan lapriyè, se sèlman dèyè avantaj yo ye. Paregzanp, yon jou yon mesye te mande yon Temwen Jewova : “ Si w priye pou mwen, èske pwoblèm familyal mwen yo, travay mwen pa jwenn ak difikilte sante m yo ap rezoud ? ” Sanble mesye a te kwè sa. Men gen anpil moun lè yo lapriyè, yo gade yo wè pwoblèm yo genyen yo la pirèd. Kidonk nou te ka mande : ‘ Akwabon pou yon moun chèche Bondye ? ’
POUKISA POU MOUN PWOCHE KOTE BONDYE
3. Kilès nou ta dwe adrese priyè nou yo, e poukisa ?
3 Lapriyè se pa yon seremoni san sans ni se pa senpleman yon mwayen pou moun benefisye kichòy. Yon gwo rezon ki fè nou pale ak Bondye se pou nou mare bonjan relasyon avè l. Se poutètsa se Jewova Dye nou ta dwe adrese priyè nou yo. Salmis David te di : “ Jewova pre tout moun ki envoke li. ” (Sòm 145:18). Jewova envite nou vin mare relasyon pezib avè l (Izayi 1:18). Moun ki asepte envitasyon sa a dakò ak salmis la ki te di : “ Kanta mwen, pwoche kote Bondye bon pou mwen. ” Poukisa ? Paske moun ki pwoche kote Jewova Dye nonsèlman y apral jwi vrè bonè a men tou y ap gen kè poze. — Sòm 73:28.
4, 5. a) Poukisa li enpòtan pou nou priye Bondye ? b) Ki kalite relasyon nou kapab vin genyen avèk Bondye grasa lapriyè ?
4 Poukisa pou n oblije priye Bondye pou l ede nou si l ‘ konnen sa nou bezwen anvan menm nou mande li ’ ? (Matye 6:8 ; Sòm 139:4.) Priyè nou yo demontre nou gen lafwa nan Bondye e yo demontre nou konsidere l kòm Sous “ tout bèl don ak tout kado pafè ”. (Jak 1:17 ; Ebre 11:6.) Jewova pran plezi nan priyè nou yo (Pwovèb 15:8). Li kontan tande nou esprime gratitid ak lwanj ki soti nan fon kè nou, menm jan yon papa kontan tande tipitit li di rekonesans sensè li genyen pou li (Sòm 119:108). Kote ki gen bonjan relasyon papa ak pitit vin gen yon kominikasyon chaje ak afeksyon. Yon pitit cheri se tout plezi li pou l pale ak papa l. Menm bagay la vre tou pou relasyon nou avèk Bondye. Si reyèlman nou apresye sa nou aprann sou Jewova ansanm ak lanmou li demontre li genyen pou nou, se pral tout plezi nou pou nou anvi pale avè l nan lapriyè. — 1 Jan 4:16-18.
5 Lè n ap abòde Bondye Trèwo a nou ta dwe adrese l avèk respè, menmsi l pa nesesè pou nou bay tèt nou twòp pwoblèm pou mo presi n ap itilize (Ebre 4:16). Pòt toujou ouvri pou nou devan Jewova. Ala yon gwo privilèj dèske nou ka ‘ dechaje kè nou ’ bay Bondye nan lapriyè (Sòm 62:8) ! Rekonesans nou pou Jewova ap fè nou mare relasyon cho avè l menm jan ak sa Abraram gason fidèl la t ap jwi kòm zanmi Bondye (Jak 2:23). Men, lè n ap priye Seyè Souvren linivè a, nou dwe fè sa li mande fè pou nou ka abòde li.
SA KI NESESÈ POU NOU PWOCHE KOTE BONDYE
6, 7. Kwak Bondye pa egzije lajan pou l koute lapriyè nou ki sa l mande nou fè lè n ap priye ?
6 Èske nou bezwen lajan pou nou pale ak Bondye ? Anpil moun peye klèje a pou lapriyè pou yo ! Yon pòsyon moun menm kwè se dapre kantite lajan yo bay Bondye ap koute lapriyè yo. Poutan, Pawòl Bondye a pa di fòk nou fè ofrann lajan pou nou abòde Jewova nan lapriyè. Dispozisyon espirityèl li yo ansanm ak benediksyon l yo nou jwenn grasa lapriyè, se gratis li ofri nou yo. — Izayi 55:1, 2.
7 Kidonk, ki sa ki nesesè ? Yon bonjan dispozisyon kè esansyèl (2 Kwonik 6:29, 30 ; Pwovèb 15:11). Nou dwe demontre lafwa nan Jewova nan kè nou, Li menm “ ki konn tande lapriyè ” e “ ki rekonpanse moun k ap chèche l toutbonvre ”. (Sòm 65:2 ; Ebre 11:6.) Fòk nou gen imilite nan kè nou tou (2 Wa 22:19 ; Sòm 51:17). Nan youn nan egzanp Jezi Kris yo, li te demontre yon pèseptè enb ki t ap pale ak Bondye toupandan li te fè kò l piti, te bay prèv li pi jis pase yon Farizyen awogan (Lik 18:10-14). Raple nou sa lè n ap priye Bondye, “ nenpòt moun ki gen ògèy nan kè l se bagay detestab pou Jewova ”. — Pwovèb 16:5.
8. Si nou vle Bondye egzose lapriyè nou ki pirifikasyon nou dwe fè nan nou ?
8 Si nou vle Bondye egzose priyè nou yo, nou dwe debarase tèt nou ak tout konduit ki reflete peche. Lè disip Jak t ap ankouraje moun pwoche kote Bondye, li te di: “ Netwaye men nou, pechè, epi pirifye kè nou, moun ki gen de lide. ” (Jak 4:8). Menm moun k ap fè mal kapab vin viv anpè ak Jewova si yo repanti e si yo chanje fason yo t ap viv la (Pwovèb 28:13). Jewova pap tande nou si nou senpman fè sanblan nou pirifye fason n ap viv la. Pawòl Bondye a di : “ Je Jewova sou moun ki jis yo, e zòrèy li la ap tande demann yo. Men fas Jewova vire kont moun k ap fè sa k pa bon. ” — 1 Pyè 3:12.
9. Grasa ki moun nou kapab pwoche kote Jewova, e poukisa ?
9 Bib la di : “ Pa gen moun ki jis sou tè a ki toujou ap fè sa ki byen epi ki pa peche. ” (Eklezyas 7:20). Nan ka sa a, petèt ou te ka mande : ‘ Alò ki jan nou ka abòde Jewova Dye ? ’ Bib la reponn : “ Si li rive yon moun fè yon peche, nou gen yon asistan kote Papa a, Jezi Kris, yon moun ki jis. ” (1 Jan 2:1). Nou se pechè se vre, men nou kapab pwoche kote Bondye avèk franchiz grasa Jezi Kris ki te mouri kòm ranson pou nou (Matye 20:28). Li se sèl filyè nou genyen pou nou abòde Jewova Dye (Jan 14:6). Nou pa dwe pran sakrifis redanmsyon Jezi Kris la pou piyay epi chita ap fè peche pa espre (Ebre 10:26). Si nou fè tout posib nou pou nou pa fè sa k pa sa epoutan nou vin komèt yon fot, nou kapab repanti e nou kapab mande Bondye padon. Lè nou abòde li avèk imilite nan kè nou l ap koute nou. — Lik 11:4.
OKAZYON POU NOU PALE AK BONDYE
10. Lè n ap lapriyè kouman nou kapab imite Jezi, e ki okazyon nou genyen pou nou lapriyè an prive ?
10 Jezi Kris te bay relasyon li te genyen ak Jewova anpil valè. Konsa, Jezi te konn prevwa tan pou l pale ak Bondye nan lapriyè an prive (Mak 1:35 ; Lik 22:40-46). N ap imite egzanp Jezi a byen si nou priye Bondye regilyèman (Women 12:12). Li konvnab pou nou lapriyè pou kòmanse lajounen an, epi anvan n al kouche remèsi Jewova pou travay jounen an. Diran lajounen an, annou pran desizyon pou n abòde Bondye “ nan tout okazyon ”. (Efezyen 6:18.) Nou kapab menm lapriyè an silans nan kè nou, piske nou konnen Jewova kapab tande nou. Pale ak Bondye an prive kapab simante relasyon nou avè l, epi priye Jewova chak jou ede nou vin pi pre l toujou.
11. a) Poukisa fanmi yo ta dwe lapriyè ansanm ? b) Lè w di “ Amèn ” nan fen yon priyè, ki sa sa vle di ?
11 Jewova koute lapriyè nou fè anfavè gwoup moun tou (1 Wa 8:22-53). Avèk chèf kay la alatèt, nou kapab pwoche kote Bondye ansanm an fanmi. Sa fè lyen ki ini fanmi an vin pi sere. Epitou, Jewova vin tounen yon pèsonaj toutbon pou jèn ki tande paran yo ap priye Bondye avèk imilite. Ki sa k pou fèt si yon moun reprezante yon gwoup nan lapriyè, paregzanp nan yon reyinyon Temwen Jewova ? Si nou nan asistans lan, se pou nou koute avèk atansyon, dekwa pou nan fen lapriyè a nou kapab di “ Amèn ” ak tout kè nou. Amèn vle di “ Se pou sa fèt konsa ”. — 1 Korentyen 14:16.
PRIYÈ JEWOVA TANDE YO
12. a) Poukisa gen lapriyè Bondye pa reponn ? b) Poukisa nou pa ta dwe konsantre sèlman sou bezwen pèsonèl nou lè n ap lapriyè ?
12 Sèten moun gen enpresyon Bondye pa reponn priyè yo, byenke yo priye nan non Kris. Poutan apòt Jan te di : “ Men asirans nou genyen nan li : kèlkeswa sa nou mande selon volonte l [volonte Bondye], l ap tande nou. ” (1 Jan 5:14). Konsa, fòk sa n ap mande a konfòm ak volonte Bondye. Piske Bondye gen sousi pou byennèt espirityèl nou, nou kapab lapriyè pou tou sa ki gen rapò ak espirityalite nou. Fòk nou reziste kont tantasyon pou nou konsantre lapriyè nou sèlman sou bezwen fizik nou yo. Paregzanp, kwak se byen pou nou lapriyè pou nou vin gen klèvwayans ak fòs moral pou sipòte maladi, enkyetid akòz move sante pa dwe pran plas preyokipasyon espirityèl nou yo (Sòm 41:1-3). Gen yon kretyèn ki te wè li chaje tèt li twòp pou sante l, li te mande Jewova ede l gen yon bon pwennvi sou maladi l la. Kòm rezilta, li vin bay nuizans sante yo mwens enpòtans, epi li te vin santi li jwenn “ pisans ki depase sa ki nòmal la ”. (2 Korentyen 4:7.) Dezi pou li ede lòt moun espirityèlman vin ogmante, se konsa li vin yon pwoklamatris Wayòm nan a plen tan.
13. Selon Matye 6:9-13 site kèk bagay nou ka mande nan priyè nou ?
13 Ki sa nou kapab mande nan priyè nou pou Jewova pran plezi tande yo ? Jezi Kris te anseye disip li yo kouman pou yo lapriyè. Nan Notrepè a, ki nan Matye 6:9-13, li te tabli yon modèl bagay ki bon pou nou mande nan priyè nou. Ki sa k ta dwe pi enpòtan nan priyè nou yo ? Non Jewova Dye ak Wayòm ni an dwe gen priyorite. Li bon pou nou lapriyè pou bezwen materyèl nou yo. Li enpòtan tou pou nou mande li padon pou peche nou yo e pou l delivre nou anba tantasyon ak anba mechan an, Satan Ledyab. Se pa yon priyè Jezi te vle pou nou resite, ni pou nou repete l sou repete, plizyè fwa, san nou pa reflechi sou sans li (Matye 6:7). Ki kalite relasyon ki ta genyen ant yon timoun ak papa l si chak fwa pou l pale ak papa a se menm mo yo li toujou repete ?
14. Anplis rekèt, ki lòt priyè ki genyen ankò ?
14 Apa rekèt ak siplikasyon sensè, nou ta dwe adrese Bondye priyè lwanj ak priyè aksyondegras (Sòm 34:1 ; 92:1 ; 1 Tesalonisyen 5:18). Nou kapab lapriyè pou lòt moun tou. Lapriyè nou fè pou frè ak sè espirityèl nou yo ki aflije oswa ki anba pèsekisyon demontre enterè nou pou yo, epi Jewova renmen tande nou pale de yo tou (Lik 22:32 ; Jan 17:20 ; 1 Tesalonisyen 5:25). Apòt Pòl te ekri : “ Pa enkyete nou pou anyen, men nan tout bagay, nan lapriyè ak nan siplikasyon ansanm ak aksyondegras, fè Bondye konnen rekèt nou yo, epi lapè Bondye a ki depase tout panse, ap pwoteje kè nou ak fakilte mantal nou pa mwayen Kris Jezi. ” — Filipyen 4:6, 7.
PÈSEVERE NAN LAPRIYÈ
15. Ki sa nou ta dwe sonje si priyè nou yo sanble yo pa egzose ?
15 Kwak ou vin gen plis konesans sou Bondye, ou kapab santi petèt gen de fwa lapriyè w yo pa egzose. Se kapab paske Bondye konsidere se poko moman pou l reponn yon priyè presi (Eklezyas 3:1-9). Jewova kapab pèmèt yon sitiyasyon dire pou yon tan, men li reponn priyè yo e li konnen ki pi bon moman pou l fè sa. — 2 Korentyen 12:7-9.
16. Poukisa nou ta dwe pèsevere nan lapriyè, e ki efè sa kapab genyen sou relasyon nou avèk Jewova ?
16 Pèseverans nou nan lapriyè demontre nou pran sa n ap di Bondye a akè (Lik 18:1-8). Paregzanp, nou kapab mande Jewova ede nou venk yon feblès. Lè nou pèsevere nan lapriyè, lè nou aji konfòm ak rekèt nou yo, nou demontre senserite nou. Nou ta dwe presi, nou ta dwe onèt nan rekèt nou yo. Li espesyalman enpòtan pou nou mete tout nou menm nan priyè a lè nou devan yon tantasyon (Matye 6:13). Kòm n ap kontinye lapriyè e, anmenmtan n ap fè efò pou metrize tandans pou nou fè peche, nou pral wè ki jan Jewova ap ede nou. Sa ap bati lafwa nou e l ap fòtifye relasyon nou avèk li. — 1 Korentyen 10:13 ; Filipyen 4:13.
17. Pandan n ap sèvi Bondye, ki sa n ap benefisye si nou lapriyè regilyèman ?
17 Lè nou fè efò pou nou toujou bay lapriyè yon plas enpòtan nan sèvis sakre n ap ofri Jewova Dye a, n ap reyalize se pa ak fòs pa nou senpman n ap sèvi li. Se Jewova ki ban nou mwayen yo (1 Korentyen 4:7). Si nou rekonèt sa, sa ap ede nou vin enb e sa ap anrichi relasyon nou avè l (1 Pyè 5:5, 6). Wi, nou gen rezon solid pou nou pèsevere nan lapriyè. Lapriyè serye nou fè yo ak konesans presye nou genyen sou jan pou nou pwoche kote Papa nou nan syèl la ki renmen nou an, ap fè lavi nou vin vrèman ere.
KOMINIKASYON AVÈK JEWOVA PA FÈT NAN SANS INIK
18. Ki jan nou kapab koute sa Bondye di ?
18 Si nou vle Bondye tande priyè nou yo nou dwe koute sa l di nou (Zekarya 7:13). Bondye pa voye mesaj ankò pa mwayen pwofèt li enspire yo, epi se sèten li pa itilize metòd espiritis nonplis (Detewonòm 18:10-12). Men nou kapab tande Bondye pandan n ap etidye Labib Pawòl li (Women 15:4 ; 2 Timote 3:16, 17). Menm jan nou oblije petèt aprann renmen yon manje k ap fè nou dibyen, menm jan an tou nou ankouraje pou nou genyen “ yon anvi cho pou lèt san melanj pawòl la ”. Aprann konn gou nouriti espirityèl la nan li Pawòl Bondye a chak jou. — 1 Pyè 2:2, 3 ; Travay 17:11.
19. Ki pwofi w ap jwenn si w medite sou sa w li nan Bib la ?
19 Medite sou sa w ap li nan Bib la (Sòm 1:1-3 ; 77:11, 12). Sa vle di reflechi sou bagay ou li yo. Ou ta kapab konpare sa ak dijesyon manje. Ou kapab dijere nouriti espirityèl la lè w konekte sa w ap li a ak sa w te konnen deja. Panse sou rezilta sa w ap li a kapab genyen sou lavi w, oswa reflechi sou sa l aprann ou sou kalite Jewova genyen yo ak sou fason l aji. Konsa grasa etid pèsonèl, ou kapab pwofite nouriti espirityèl Jewova bay la. Sa ap fè w pwoche pi pre Bondye e sa ap ede w fè fas ak pwoblèm toulejou yo.
20. Kouman prezans nou nan reyinyon yo ka ede nou pwoche kote Bondye ?
20 Ou kapab pwoche kote Bondye nan koute esplikasyon Pawòl li nan reyinyon kretyen yo, menm jan Izrayelit yo te veyatif pou yo te koute lekti piblik lalwa Bondye lè yo te reyini. Anseyan nan epòk sa a te konn esplike sans lekti lalwa a. Konsa, yo te konn ede moun k ap koute yo konprann sa yo tande a, epi yo te konn ankouraje yo mete l an pratik. Sa te pote gwo kontantman (Neyemya 8:8, 12). Kifèla, se pou w pran abitid asiste reyinyon Temwen Jewova yo (Ebre 10:24, 25). Sa pral ede w konprann konesans Bondye a, anmenmtan sa pral ede w mete l an pratik nan lavi w e konsa w ap jwenn bonè a. Nan asosye w ak fanmi kretyen entènasyonal la sa pral ede w rete pre Jewova. E kòm nou pral wè, w ap kapab jwenn vrè sekirite a pami pèp Bondye a.
TESTE KONESANS OU
Poukisa w ta dwe pwoche kote Jewova ?
Site kèk bagay ki nesesè pou nou ka pwoche kote Bondye.
Pou ki bagay ou kapab lapriyè ?
Poukisa w dwe pèsevere nan lapriyè ?
Ki jan jodi a ou kapab koute sa Jewova di ?
[Kesyon]
[Gwo foto nan paj 157]
