Vin chèche sekirite pami pèp Bondye a
Chapit 17
Vin chèche sekirite pami pèp Bondye a
1, 2. Nan ki sans sitiyasyon limanite konparab ak sitiyasyon moun k ap viv yon kote tanpèt fin debalize ?
IMAJINE gen yon tanpèt vyolan ki ravaje zòn kote w rete a. Kay ou kraze epi w pèdi tou sa w te posede. Manje vin ra. Sitiyasyon an sanble li sanzespwa. Epi sanzatann sekou vin rive. Yo ba w manje ak rad an gran kantite. Yo bati yon nouvo kay pou ou. Sètènman ou t ap santi w rekonesan pou moun sa a ki pran tout dispozisyon sa yo pou ou a.
2 Gen yon bagay konparab ki rive jounen jodi a. Menm jan ak tanpèt sa a, rebelyon Adan ak Èv la lakòz gwo ravaj nan mitan lèzòm. Limanite vin pèdi fwaye paradi li a. Depi lè sa a, gouvènman lèzòm pa reyisi pwoteje moun anba lagè, krim ak enjistis. Larelijyon kite yon miltitid moun nan grangou paske li pa ba yo bonjan nouriti espirityèl. Toutfwa, nan domèn espirityèl Jewova Dye bay manje, rad ak abri. Kouman l fè sa ?
“ ESKLAV FIDÈL E EKLERE A ”
3. Kouman Jewova pote lèzòm sekou, e ki egzanp ki montre sa ?
3 An jeneral se ak yon òganizasyon yo konn sèvi pou distribye sekou. Se konsa tou Jewova fè pou l founi pèp li a nouriti espirityèl. Paregzanp, Izrayelit yo te “ kongregasyon Jewova ” pandan 1 500 ane apeprè. Bondye te itilize kèk nan yo kòm entèmedyè pou anseye lalwa li a (1 Kwonik 28:8 ; 2 Kwonik 17:7-9). Nan premye syèk epòk nou an, Jewova te mete òganizasyon kretyen an sou pye. Yo te fòme plizyè kongregasyon ki t ap fonksyone sou kontwòl yon kolèj santral ki te gen apòt ansanm ak ansyen ladann (Travay 15:22-31). Se menm jan an jodi a tou, Jewova sèvi ak yon kò òganize pou l pran swen pèp li a. Kouman nou fè konn sa ?
4. Kilès ki bay prèv li se “ esklav fidèl e eklere a ” nan tan pa nou an, e kouman Bondye fè pou nouriti espirityèl la disponib ?
4 Jezi te di diran tan prezans li envesti ak pouvwa wayal la, “ esklav fidèl e eklere a ” ta okipe ap bay disip li yo “ nouriti nan tan apwopriye ” a (Matye 24:45-47). Lè Jezi, Wa a, te monte sou pouvwa a nan syèl la an 1914, kilès ki te bay prèv se li ki “ esklav ” sa a ? Sètènman se pa t klèje kretyènte a. Pifò nan yo t ap plen tèt fidèl yo ak pwopagann pou gouvènman peyi pa yo ki te angaje nan Premye Gè mondyal la. Men, gwoup vrè kretyen Bondye te wenn ak lespri sen an, gwoup ki reprezante yon pati nan sa Jezi te rele “ ti twoupo a ”, t ap sèvi yon bon kalite nouriti espirityèl nan tan apwopriye (Lik 12:32). Kretyen wen sa yo te pito preche Wayòm Bondye a olye pou yo t ap preche gouvènman lèzòm. Kòm rezilta, ofiramezi ane ap pase, plizyè milyon “ lòt mouton ” k ap chèche aprann sa ki dwat te vin asosye ak “ esklav ” wen an, pou yo pratike vrè relijyon an (Jan 10:16). Pa lentèmedyè “ esklav fidèl la ” ansanm ak Kolèj santral li a ki la kounye a, Bondye dirije pèp òganize l la pou founi manje, rad ak abri espirityèl bay tout moun ki vle pwofite.
“ NOURITI NAN TAN APWOPRIYE ”
5. Ki sitiyasyon espirityèl ki gen nan monn nan jodi a, men ki sa Jewova fè konsènan sitiyasyon sa a ?
5 Jezi te di : “ Lòm dwe viv, pa ak pen sèlman, men ak tout pawòl ki soti nan bouch Jewova. ” (Matye 4:4). Malerezman pifò moun pa okipe pawòl ki soti nan bouch Bondye. Tankou Amòs, pwofèt Jewova a te anonse, gen “ yon grangou, se pa pou pen, ak yon swaf, se pa pou dlo, men se pou tande pawòl Jewova ”. (Amòs 8:11.) Menm moun ki relijye anpil nan grangou espirityèl la tou. Malgre sa, volonte Jewova se pou “ tout kalite moun sove e rive gen konesans egzak verite a ”. (1 Timote 2:3, 4.) Se poutètsa li bay nouriti espirityèl ann abondans. Men, ki kote moun ka jwenn li ?
6. Kouman Jewova te bay pèp li a nouriti espirityèl nan tan lontan ?
6 Toutolon listwa, se toujou an gwoup Jewova bay pèp li nouriti espirityèl (Izayi 65:13). Paregzanp, prèt Izrayelit yo te konn rasanble gason, fanm ak timoun pou ba yo enstriksyon an gwoup nan lalwa Bondye a (Detewonòm 31:9, 12). Sou kontwòl kolèj santral la, kretyen premye syèk yo te òganize kongregasyon yo, e yo te konn fè reyinyon pou bay tout moun ansèyman ak ankourajman (Women 16:5 ; Filemon 1, 2). Temwen Jewova yo suiv menm modèl sa a. Se ak tout kè yo yo envite w asiste tout reyinyon yo.
7. Ki rapò konesans ak lafwa genyen avèk asiste reyinyon regilyèman ?
7 Natirèlman, nan etid pèsonèl ou fè nan Bib la ou kapab deja aprann anpil bagay. Petèt gen yon moun k ap ede w (Travay 8:30-35). Men, lafwa w kapab sanble ak yon plant ki pral seche e ki pral mouri, si l pa jwenn bonjan swen. Konsa ou dwe resevwa nouriti espirityèl konvnab (1 Timote 4:6). Reyinyon yo ofri yon pwogram enstriksyon pèmanan ki vize pou nouri w espirityèlman e pou ede lafwa w grandi ofiramezi w ap devlope nan konesans Bondye a. — Kolosyen 1:9, 10.
8. Poukisa yo ankouraje nou asiste reyinyon Temwen Jewova yo ?
8 Reyinyon yo jwe yon lòt wòl esansyèl. Pòl te ekri : “ Annou voye je nou youn sou lòt, pou nou youn chofe lòt aji ak lanmou ak bon zèv, pandan nou pa abandone reyinyon nou. ” (Ebre 10:24, 25). Mo grèk pou tradui “ chofe ” konn vle di “ file ” tou. Yon pwovèb nan Bib la di : “ Fè file fè. Konsa yon nonm file eskanp figi yon lòt. ” (Pwovèb 27:17). Tout tan nou tout bezwen ‘ file ’. Presyon n ap sibi chak jou nan monn nan kapab defile lafwa nou. Lè nou asiste reyinyon gen yon echanj ankourajman (Women 1:11, 12). Manm kongregasyon an suiv konsèy apòt Pòl te bay la pou ‘ youn kontinye konsole lòt, e pou youn kontinye bati lòt ’. Se bagay konsa ki file lafwa nou (1 Tesalonisyen 5:11). Lè nou toujou la nan reyinyon yo, sa montre tou nou renmen Bondye epi sa ban nou okazyon pou nou ba li lwanj. — Sòm 35:18.
“ SE POU NOU ABIYE NOU AK LANMOU ”
9. Nan manifeste lanmou, ki egzanp Jewova bay ?
9 Pòl te ekri : “ Se pou nou abiye nou ak lanmou, paske se yon chenn linyon ki total. ” (Kolosyen 3:14). Jewova ban nou posiblite abiye ak kalite sa a gratis. Kouman sa ? Kretyen yo kapab manifeste lanmou paske se youn nan fwi lespri sen Jewova pwodui (Galat 5:22, 23). Jewova li menm te bay pi gwo prèv lanmou ki genyen an lè l te voye sèl Pitit li fè a pou nou kapab gen lavi etènèl (Jan 3:16). Manifestasyon lanmou siprèm sa a founi nou yon modèl pou nou ka demontre kalite sa a. Apòt Jan te ekri : “ Si se konsa Bondye renmen nou, alòs nou menm nou oblije renmen nou youn lòt. ” — 1 Jan 4:11.
10. Ki benediksyon nou kapab jwenn nan pami “ tout kominote frè yo nèt ” ?
10 Nan asiste reyinyon nan Sal Wayòm nan w ap gen okazyon espesyal pou demontre lanmou. Nan Sal la w ap rankontre yon bann kalite moun. Pa gen dout, w ap santi anpil nan yo atire w la menm. Natirèlman, pèsonalite chak moun diferan menmsi y ap sèvi Jewova. Petèt lontan ou te konn tou senpleman evite moun ki pa enterese ak menm bagay avè w oswa ki pa gen menm tanperaman avè w. Poutan kretyen yo dwe “ renmen tout kominote frè yo nèt ”. (1 Pyè 2:17.) Kifèla, fikse objektif ou pou w fè konesans ak moun ki vin nan Sal Wayòm nan, menm ak moun ki pa gen menm laj avè w, ki pa gen menm pèsonalite avè w, ki pa menm ras avè w oswa ki pa gen menm fòmasyon avè w. Li pwobab pou w dekouvri yo chak yo gen kalite espesyal ki fè yo atiran.
11. Poukisa sa pa ta dwe ban nou pwoblèm dèske pami pèp Jewova a gen moun tout kalite pèsonalite ?
11 Divès kalite pèsonalite moun yo nan kongregasyon an pa ta dwe ba w pwoblèm. Annou pran yon egzanp : imajine yon bann machin k ap woule sou menm wout avè w. Yo tout pap mache ak menm vitès, ni yo pa nan menm eta. Gen kèk ki gentan rale anpil kilomèt, alòske gen lòt ki fèk demare menm jan avè w. Sepandan, kèlkeswa diferans lan se pa sa ki enpòtan, lè w gade yo tout ap sikile sou menm wout. Se menm bagay pou moun ki fè pati yon kongregasyon. Yo tout pa devlope kalite kretyen dwe devlope ak menm vitès. Anplis, yo tout pa nan menm kondisyon fizik ni yo pa gen menm sansiblite. Genyen k ap adore Jewova depi anpil ane, gen lòt ki fèk kòmanse. Poutan yo tout ap vwayaje sou menm wout k ap mennen nan lavi etènèl la, yo ‘ byen ini nan menm panse, nan menm entansyon ’. (1 Korentyen 1:10.) Se poutètsa, gade sou pwen fò manm kongregasyon an olye pou w gade sou pwen fèb yo. Sa ap ankouraje w paske w ap rann ou kont Bondye reyèlman pami moun sa yo. E siman se la ou vle ye. — 1 Korentyen 14:25.
12, 13. a) Si yon moun nan kongregasyon an ofanse w, ki sa w ka fè ? b) Poukisa li enpòtan pou w pa kenbe rankin ?
12 Piske tout moun fèt pechè, li ka rive pafwa yon moun nan kongregasyon an di oswa fè yon bagay ki kontrarye w (Women 3:23). Disip Jak te ekri yon pawòl trè reyèl : “ Nou tout, nou bite anpil fwa. Si yon moun pa bite nan pawòl, li se yon òm total. ” (Jak 3:2.) Ki jan w ap reyaji si yon moun ofanse w ? Yon pwovèb biblik di : “ Klèvwayans yon nonm sètènman retade kòlè l, epi bote li se pase sou fot. ” (Pwovèb 19:11). Gen klèvwayans se jije pwofondè yon sitiyasyon, pi lwen pase aparans li, pou w konprann rezon kache ki lakòz yon moun pale oswa aji yon sèten fason. Pifò nan nou gen anpil klèvwayans pou pase sou erè pa nou. Poukisa nou pa sèvi ak menm klèvwayans lan pou nou konprann fot lezòt yo e pou nou kouvri yo ? — Matye 7:1-5 ; Kolosyen 3:13.
13 Pa janm bliye si nou vle Jewova padone nou, fòk nou menm nou padone lezòt yo (Matye 6:9, 12, 14, 15). Si n ap pratike laverite a, n apral trete lezòt yo avèk lanmou (1 Jan 1:6, 7 ; 3:14-16 ; 4:20, 21). Konsa si w gen yon pwoblèm kèlkonk ak yon manm kongregasyon an, lite pou w pa kenbe rankin. Si w abiye w ak lanmou, ou pral fè efò pou w rezoud pwoblèm nan, epi ou pap ezite mande eskiz si w te ofanse yon moun. — Matye 5:23, 24 ; 18:15-17.
14. Ak ki kalite nou ta dwe abiye nou ?
14 Abiman espirityèl nou an ta dwe gen lòt kalite ladann, lòt kalite ki byen makònen ak lanmou. Pòl te ekri : “ Abiye nou avèk tandrès, afeksyon, konpasyon ansanm ak bonte, imilite, dousè ak pasyans. ” Kalite sa yo ki anndan lanmou an fè pati “ nouvo pèsonalite ” Bondye apwouve a (Kolosyen 3:10, 12). Èske w pral fè efò pou w abiye w avè yo fason sa a ? Espesyalman si ou menm ou abiye w ak lanmou fratènèl la, w ap pote siy ki idantifye disip Jezi yo, paske li te di : “ Tout moun ap konnen nou se disip mwen, si nou gen lanmou antre nou. ” — Jan 13:35.
YON REFIJ ASIRE
15. Nan ki sans kongregasyon an tankou yon azil ?
15 Kongregasyon an sèvi kòm yon azil tou, yon refij pwotektè kote w kapab santi w an sekirite. W ap jwenn moun sensè ladann k ap fè efò pou yo fè sa ki dwat nan je Bondye. Anpil nan yo rive kite de vye mès ak de vye pòz petèt w ap lite ak yo pou w venk yo (Tit 3:3). Yo kapab ede w, paske yo di nou se pou nou “ pote fado nou youn pou lòt ”. (Galat 6:2.) Natirèlman, mache nan chemen k ap mennen w nan lavi etènèl la se reskonsablite pa w finalman (Galat 6:5 ; Filipyen 2:12). Toutfwa, Jewova bay kongregasyon kretyen an kòm yon bèl mwayen pou pote èd ak sipò. Kèlkeswa pwoblèm k ap boulvèse w, w ap jwenn yon bonjan sekou disponib : yon kongregasyon chaje lanmou, k ap kore w nan moman afliksyon oswa nan moman nesesite. — Gade Lik 10:29-37 ; Travay 20:35.
16. Ki èd ansyen nan kongregasyon an kapab bay ?
16 Pami moun ki kapab ede w yo gen “ lèzòm an kado yo ”, sa vle di ansyen oswa siveyan etabli nan kongregasyon an. Yo pran swen twoupo a de bongre avèk anpresman (Efezyen 4:8, 11, 12 ; Travay 20:28 ; 1 Pyè 5:2, 3). Se anpalan de yo Izayi te pwofetize : “ Yo chak dwe vin tankou yon kachèt pou bare van, tankou yon refij pou pare tanpèt lapli, tankou rigòl dlo nan yon tè sèk, tankou lonbray yon wòch masif nan yon tè ki fin depafini. ” — Izayi 32:2.
17. a) Ki kalite èd Jezi te vle bay sitou ? b) Ki dispozisyon Bondye te pwomèt l ap pran pou pèp li a ?
17 Lè Jezi te sou tè a, malerezman lidè relijye yo pa t pote yon siveyans chaje lanmou konsa. Sitiyasyon pèp la te touche Jezi jis nan zantray, e li te vle ede yo sitou espirityèlman. Li te gen pitye pou yo paske “ yo te deplimen, e yo te gaye tankou mouton san bèje ”. (Matye 9:36.) Ala daplon pawòl sa yo tonbe daplon ak sitiyasyon malouk anpil moun ap andire jodi a anba pwoblèm ki mete kè yo sou biskèt ! E yo pa gen pèsonn pou yo al kote yo pou yo jwenn èd ak rekonfò espirityèl ! Men, pèp Jewova a jwenn sekou espirityèl, paske Jewova te pwomèt : “ M apral mete bèje alatèt yo ki pral pran swen yo toutbonvre, yo pap pè ankò, yo pap nan boulvès ankò, pa youn pap manke. ” — Jeremi 23:4.
18. Poukisa nou ta dwe adrese yon ansyen si nou bezwen èd espirityèl ?
18 Chèche konnen ansyen ki etabli nan kongregasyon an. Yo gen anpil esperyans nan pratike konesans Bondye a, paske yo ranpli kondisyon Bib la mande pou moun ka siveyan (1 Timote 3:1-7 ; Tit 1:5-9). Pa ezite pale ak youn nan yo si w bezwen èd espirityèl pou w rive venk yon move abitid, oswa yon tanperaman ki kontrè ak sa Bondye mande. W apral konstate ansyen yo suiv konsèy Pòl la : “ Pale yon fason pou w konsole nanm ki nan chagren, soutni sa ki fèb, pran pasyans ak tout moun. ” — 1 Tesalonisyen 2:7, 8 ; 5:14.
ANNOU PWOFITE SEKIRITE A PAMI PÈP JEWOVA A
19. Ki byenfè Jewova akòde moun k ap chèche jwi sekirite anndan òganizasyon l lan ?
19 Menmsi n ap viv kounye a nan move sitiyasyon, Jewova founi nou manje, rad ak abri espirityèl. Natirèlman, fòk nou tann monn nouvo Bondye pwomèt la pou nou jwi byenfè yon paradi toutbon. Men moun ki nan òganizasyon Jewova a kòmanse jwi sekirite nan paradi espirityèl la depi kounye a. Men sa Ezekyèl te pwofetize sou yo : “ Y ap abite an sekirite, san pèsonn pap fè yo tranble. ” — Ezekyèl 34:28 ; Sòm 4:8.
20. Kouman Jewova ap konpanse nou pou tout sakrifis nou konsanti fè pou adorasyon l lan ?
20 Ala rekonesan nou rekonesan pou dispozisyon espirityèl chaje lanmou Jewova pran pa mwayen Pawòl li ak òganizasyon l lan ! Pwoche kote pèp Bondye a. Pa ezite akòz krent sa zanmi oswa sa paran kapab panse de ou paske ou asepte konesans Bondye a. Genyen ki kapab pa dakò paske w ap frekante Temwen Jewova, epi w ap asiste reyinyon nan Sal Wayòm nan. Men, Bondye ap fè plis pase konpanse w pou kèlkeswa sakrifis ou konsanti fè pou adorasyon l lan (Malaki 3:10). Dayè Jezi te di : “ Pèsonn pap kite kay, frè, sè, manman, papa, pitit, jaden, akòz mwen e akòz bon nouvèl la, pou l pa jwenn kay, frè, sè, manman, pitit, jaden, san fwa plis, kounye a, nan peryòd sa a, ak tout pèsekisyon, e nan sistèm k ap vini an, lavi etènèl. ” (Mak 10:29, 30). Wi, kèlkeswa sa w kite dèyè oswa sa w oblije andire, ou kapab jwenn yon konpayi agreyab ak sekirite espirityèl pami pèp Bondye a.
TESTE KONESANS OU
Kilès ki “ esklav fidèl e eklere a ” ?
Ki dispozisyon Jewova te pran pou nouri nou espirityèlman ?
Ki jan moun nan kongregasyon an kapab ede nou ?
[Kesyon]
[Gwo foto nan paj 165]
