Chapit 13

Viv ann akò ak volonte Bondye pote bonè

1. Poukisa nou ka di chemen Jewova pote lebonè ?

JEWOVA se yon “ Dye ere ”, e li vle pou nou kontan viv (1 Timote 1:11). Nan mache nan chemen li, w ap kapab jwenn anpil avantay, epi w ap goute yon trankilite dirab toutbonvre, menm jan ak yon larivyè dlo ki pap janm sèch. Mache nan chemen Bondye tou fè moun santi yo anvi kontinye fè sa ki dwat san rete, “ tankou vag lanmè ”. Tout bagay sa yo pote vrè bonè. — Izayi 48:17, 18.

2. Kouman kretyen yo kapab ere menmsi pafwa yo maltrete yo ?

² Gen moun ki kapab pwoteste : “ Pafwa moun soufri poutèt yo fè sa ki byen. ” Se vre, e se sa ki te rive apòt Jezi yo. Poutan, malgre pèsekisyon, yo te gen kè kontan e yo te kontinye “ anonse bon nouvèl konsènan Kris la ”. (Travay 5:40-42.) Nou ka aprann leson enpòtan sou sa. Men youn : menmsi lavi nou ann akò ak volonte Bondye, se pa yon garanti moun ap toujou byen trete nou. Apòt Pòl te ekri : “ Dayè, tout moun ki vle viv nan atachman devwe pou Bondye nan relasyon ak Kris Jezi, ap jwenn pèsekisyon tou. ” ​(2 Timote 3:12). Rezon an se paske Satan ak monn ni an fè opozisyon kont moun k ap viv ann akò ak volonte Bondye (Jan 15:18, 19 ; 1 Pyè 5:8). Men vrè bonè a pa depann de sikonstans moun twouve yo. Depreferans li vini de konviksyon nou genyen dèske n ap fè  sa ki dwat, e pakonsekan, dèske nou santi Bondye dakò avèk nou. — Matye 5:10-12 ; Jak 1:2, 3 ; 1 Pyè 4:13, 14.

3. Kouman adorasyon Jewova a ta dwe enfliyanse lavi yon moun ?

³ Gen de moun ki panse yo ka rive gen favè Bondye nan fè kèk jès devosyon detanzantan, men yo mèt bliye l nan lòt moman. Vrè adorasyon n ap bay Jewova Dye a pa konsa. Li enfliyanse konduit yon moun tout lè nan jounen an, jou apre jou, ane apre ane. Se poutètsa tou yo rele l “ Chemen an ”. (Travay 19:9 ; Izayi 30:21.) Fason de viv sa a konfòm ak volonte Bondye. Li mande pou nou pale e pou nou aji ann amoni ak Pawòl li.

4. Poukisa li pwofitab pou yon moun fè chanjman pou lavi li ann akò ak chemen Bondye a ?

⁴ Pafwa, lè moun ki fèk ap etidye Labib wè yo dwe pote chanjman nan lavi yo pou yo fè Bondye plezi, yo mande : “ Èske sa vo lapèn vrèman pou moun viv ann akò ak volonte Bondye ? ” Wi, ou mèt asire sou sa. Poukisa ? Paske “ Bondye se lanmou ” e chemen l trase se pou avantaj nou ! (1 Jan 4:8). Apa de sa, Bondye saj tou, e li konnen sa ki pi bon pou nou. Piske Jewova Dye toupisan, li kapab ban nou fòs pou nou fè sa l renmen, pou nou sispann pratike sa ki pa bon (Filipyen 4:13). Annou egzamine kèk prensip nou dwe suiv pou lavi nou ann akò ak volonte Bondye, epi annou wè kouman obsève yo pote bonè.

ONÈTETE SE SOUS BONÈ

5. Ki sa Bib la di sou fè manti ak sou vòlè ?

⁵ Jewova se “ Bondye verite a ”. (Sòm 31:5.) Se sèten, ou ta renmen suiv egzanp li pou w ka vin gen repitasyon moun onèt. Onètete bay moun diyite, li bay yon santiman satisfaksyon tou. Sepandan, akòz malonètete sitèlman gaye nan monn pèvès sa a, li nesesè pou fè kretyen yo sonje konsèy sa a : “ Nou chak, se pou nou di pwochen nou sa k laverite. (...) Se pou vòlè a pa vòlè ankò, men se pou l travay di pito (...) pou l ka gen kichòy pou l pataje ak moun ki nan nesesite. ” ​(Efezyen 4:25,  28). Kretyen k ap travay fèt pou founi yon jounen travay onèt. Yo pap pran afè patwon an, amwenske li ba yo otorizasyon. Kit se nan travay, kit se lekòl oswa lakay, yon adoratè Jewova dwe “ onèt nan tout bagay ”. (Ebre 13:18.) Nenpòt moun ki pran abitid swa pou yo bay manti swa pou yo vòlè pap ka jwenn favè Bondye. — Detewonòm 5:19 ; Revelasyon 21:8.

6. Kouman onètete yon moun ki gen atachman pou Bondye kapab glorifye Jewova ?

⁶ Onètete bay anpil benediksyon. Selina se yon vèv malerèz ann Afrik ki renmen Jewova e ki renmen prensip dwat li yo. Yon jou li jwenn yon valiz ki gen yon kanè chèk ak yon gwo sòm lajan ladann. Lè l chèche nan yon ànyè telefòn, li jwenn adrès mèt lajan an. Se te yon komèsan yo te devalize. Malgre Selina te malad anpil, l al lakay mesye a pou l remèt li valiz lajan an ak lòt bagay yo. Lè l te rive, mesye a te mande tèt li si l wè byen nan je l. Komèsan an te di li : “ Yon moun onèt tankou w merite yon rekonpans ”, e li ba li enpe lajan. Sa ki pi enpòtan ankò sèke mesye sa a te fè lwanj pou relijyon Selina a. An verite, aksyon onèt konsa anbeli ansèyman Bib la, yo fè laglwa Jewova Dye epi yo pwokire sèvitè onèt li yo lebonè. — Tit 2:10 ; 1 Pyè 2:12.

JENEWOZITE POTE BONÈ

7. Poukisa jwèt aza se yon bagay kondanab ?

⁷ Moun ki jenere se moun ki ere, alòske moun ki afre ‘ pap eritye Wayòm Bondye a ’. (1 Korentyen 6:10.) Jwèt aza se youn nan fason pi souvan moun montre yo afre, paske moun nan ap chèche fè lajan sou pèdans lòt jwè yo. Jewova pa apwouve moun ki “ afre nan gany malonèt ”. (1 Timote 3:8.) Menmsi jwèt aza a legal, e menmsi moun k ap jwe a fè li pou anmizman, moun nan kapab vin esklav jwèt aza. Anmenmtan se bay jarèt pou yon pratik ki fin depafini lavi anpil moun. Jwèt aza pou lajan fè fanmi azamann nan mennen lavi di, opwen se kapab  ak ti rès lajan ki rete a yo oblije pwokire nesesite tèlke manje ak rad. — 1 Timote 6:10.

8. Ki bèl egzanp jenewozite Jezi bay, e kouman nou ka montre nou jenere ?

⁸ Piske kretyen yo se moun ki jenere, yo kontan ede lòt moun, sitou frè ak sè yo ki manke mwayen (Jak 2:15, 16). Anvan Jezi te vin sou tè a, li te konstate jan Jewova jenere anvè lèzòm (Travay 14:16, 17). Jezi li menm te bay tan li, talan li e menm lavi li pou pwofi limanite. Se sa ki fè l te kapab di : “ Gen plis bonè nan bay pase nan resevwa. ” ​(Travay 20:35). Jezi te pale an byen tou de pòv vèv jenere a ki te mete de ti pyès monnen nan kòf trezò tanp la, paske sa l te bay la se te “ tout sa li te genyen pou l viv ”. (Mak 12:41-44.) Izrayelit nan tan lontan yo ansanm ak kretyen premye syèk yo kite yon bèl egzanp jenewozite pou nou nan soutyen materyèl yo te konn bay kongregasyon an ak travay Wayòm nan (1 Kwonik 29:9 ; 2 Korentyen 9:11-14). Apa de kontribisyon materyèl kretyen jodi a fè nan bi sa yo, yo kontan bay Bondye lwanj e yo kontan itilize lavi yo nan sèvis li (Women 12:1 ; Ebre 13:15). Jewova beni yo paske yo bay tan yo, fòs yo, lajan yo ak lòt resous yo genyen pou soutni vrè adorasyon an ak predikasyon bon nouvèl Wayòm nan toupatou sou tè a. — Pwovèb 3:9, 10.

LÒT SOUS BONÈ

9. Ki mal ki genyen nan bwè twòp alkòl ?

⁹ Pou kretyen yo ere fòk yo ‘ konsève kapasite refleksyon yo ’ tou. (Pwovèb 5:1, 2.) Kidonk sa mande lekti ak meditasyon Pawòl Bondye a ansanm ak lekti ak meditasyon bon kalte liv ki dechifre Bib la. Men gen bagay pou moun evite tankou bwè twòp alkòl, paske sa kapab fè yon moun pèdi kontwòl sèvo li. Gen anpil moun lè yo sou, yo lage kò yo nan konduit imoral, nan vyolans, oubyen yo ka lakòz aksidan mòtèl. Se pa etonan ditou si Bib la di bwasonyè pap eritye Wayòm Bondye a (1 Korentyen 6:10). Vrè kretyen yo detèmine pou yo rete ak  “ tèt yo an plas ”. Poutètsa, yo evite gagòt bweson, e sa favorize lajwa pami yo. — Tit 2:2-6.

10. a) Poukisa kretyen yo pa sèvi ak tabak ? b) Ki avantaj yon moun jwenn lè l soti anba lobedyans pwodui toksik ?

¹⁰ Yon kò ki sen kontribye pou bay lebonè. Epoutan, anpil moun vin esklav pwodui toksik. Paregzanp, annou egzamine tabak. Òganizasyon mondyal lasante fè konnen fimen “ touye twa milyon moun chak ane ”. Li ka difisil pou yon moun kite fimen akòz sentòm anvi fimen li konn santi pou yon ti moman an. Men anpil ansyen fimè rekonèt sante yo vin pi bon e yo gen pi plis lajan pou okipe bezwen fanmi yo. Wi, kite abitid tabak oswa panchan pou lòt pwodui nuizib ap pèmèt ou gen yon kò sen, yon konsyans pwòp e sa ap kontribye pou fè yon moun jwenn vrè bonè a. — 2 Korentyen 7:1.

LEBONÈ NAN MARYAJ

11. Ki kondisyon ki pou fè yon maryaj legal onorab e ki pou fè li dirab ?

¹¹ Moun k ap viv ansanm kòm mari ak madanm ta dwe asire yo ak maryaj yo enskri nan kaye ofisye d eta sivil (Mak 12:17). Epitou yo bezwen konsidere maryaj la kòm yon reskonsablite serye. Se vre, nan kèk ka, separasyon kapab nesesè, tankou refize okipe madanm nan volontèman, fè vyolans grav sou li oswa mete espirityalite l an danje nèt (1 Timote 5:8 ; Galat 5:19-21). Men nan 1 Korentyen 7:10-17, apòt Pòl ankouraje pou de moun marye rete ansanm. Natirèlman, pou yo jwenn vrè bonè a, yo dwe rete fidèl youn ak lòt. Men sa Pòl te ekri : “ Se pou tout moun onore maryaj, e se pou kabann maryaj la san salte, paske Bondye pral jije fònikatè ak adiltè. ” ​(Ebre 13:4). Lè yo di “ kabann maryaj ” y ap pale de kontak seksyèl yon gason ak yon fanm ki marye legalman genyen youn ak lòt. Tout lòt relasyon seksyèl, tankou yon gason ki gen plizyè madanm, pa ka regade kòm ‘ onorab ’. Plis ankò, Bib la kondane gason ak fi ki nan kontak  seksyèl anvan maryaj, menm jan li kondane kontak gason ak gason, fi ak fi. — Women 1:26, 27 ; 1 Korentyen 6:18.

12. Ki move fwi fònikasyon bay ?

¹² Fònikasyon kapab bay kèk ti moman plezi lachè, men li pa pote vrè bonè. Li deplè Bondye e li ka make konsyans yon moun (1 Tesalonisyen 4:3-5). Konsekans relasyon ki pa legal yo konn tris : se kapab sida ak lòt maladi trapan. Yon rapò medikal di : “ Chak ane plis pase 250 milyon moun nan lemonnantye pran blenoraji, e apeprè 50 milyon trape sifilis. ” Genyen pwoblèm gwosès san swete tou. Selon Federasyon entènasyonal planing familyal, plis pase 15 milyon jenn fi nan laj 15 rive 19 an ansent chak ane nan lemonn. Yon tyè ladan yo fè avòtman. Nan yon peyi Afrik, yon etid montre 72 % jenn demwazèl ki mouri se konplikasyon nan avòtman ki lakòz. Gen kèk fònikatè ki kapab chape anba maladi ak anba gwosès, men yo pa kapab chape anba soufrans moral. Anpil pèdi diyite yo e yo menm rive rayi tèt yo.

13. Ki lòt pwoblèm adiltè bay, epitou ki sò k ap tann fònikatè ak adiltè ki pa repanti yo ?

¹³ Se vre peche adiltè kapab jwenn padon, men selon Bib la se yon rezon valab pou pèmèt mari oswa madanm ki inosan an divòse (Matye 5:32 ; gade Ocheya 3:1-5 tou). Lè yon zak imoral kraze yon maryaj, sa riske kite sikatris fon nan mesye oswa nan madanm ki inosan an ak nan timoun yo. Pou Pawòl Bondye a pwoteje bonè fanmi an, li montre Jewova pral kondane fònikatè ansanm ak adiltè ki pa repanti yo. Plis ankò, li montre klè moun ki chita ap fè imoralite “ pap eritye Wayòm Bondye a ”. — Galat 5:19, 21.

“ YO PA FÈ PATI MONN NAN ”

14. a) Bay ki fòm idolatri yon moun ki gen atachman pou Bondye dwe evite ? b) Ki konsèy yo bay nan Jan 17:14 ak nan Izayi 2:4 ?

¹⁴ Moun ki vle fè Jewova plezi e ki vle resevwa benediksyon Wayòm nan, pran distans yo ak tout fòm idolatri.  Li pa bon pou moun fè imaj pou yo adore, menmsi imaj sa yo reprezante Kris oswa Mari manman Jezi (Egzòd 20:4, 5 ; 1 Jan 5:21). Se sa ki fè, vrè kretyen yo pa adore bèl tablo relijye, yo pa adore ni kwa, ni estati. Yo rejte idolatri sibtil tankou devosyon pou drapo ak chan pou lapatri ki ap chante laglwa pou nasyon yo. Lè kretyen yo sibi presyon pou yo fè bagay sa yo, yo sonje pawòl Jezi te di Satan an : “ Se Jewova Dye w la ou dwe adore, e se li menm sèl ou dwe ofri yon sèvis sakre. ” ​(Matye 4:8-10). Jezi te di disip li yo “ pa fè pati monn nan ”. (Jan 17:14.) Sa vle di yo pouryen nan zafè politik. Yo viv nan lapè ann akò ak Izayi 2:4 ki di : “ Li [Jewova Dye] pral rann jijman nan mitan nasyon yo, e l ap remete bagay yo annòd konsènan anpil pèp. Yo gen pou fè epe yo tounen pyès chari, e yo gen pou fè lans yo tounen gwo sizo. Yon nasyon pap leve epe kont yon nasyon, e yo pap aprann lagè ankò. ”

15. Ki sa Gran Babilòn nan ye, e ki sa anpil nouvo etidyan Labib fè pou yo kite l ?

 ¹⁵ ‘ Pa fè pati monn nan ’ vle di tou koupe tout relasyon nèt ak “ Gran Babilòn nan ”, anpi inivèsèl fo relijyon an. Adorasyon pa pwòp la soti nan Babilòn lontan an, e li gaye enfliyans espirityèl nuizib li a sou tout pèp sou tè a. Anndan “ Gran Babilòn nan ” ou jwenn tout relijyon ki gen doktrin ak koutim ki pa ann amoni ak konesans Bondye a (Revelasyon 17:1, 5, 15). Adoratè fidèl Jewova yo pa angaje yo nan mouvman ekimenik pou yo ta nan patisipe nan adorasyon ak divès relijyon, oswa pou yo gen relasyon espirityèl ak yon branch kèlkonk nan Gran Babilòn nan (Nonb 25:1-9 ; 2 Korentyen 6:14). Se sa ki fè anpil nouvo etidyan Labib voye yon lèt demisyon bay òganizasyon relijye yo te ladan an. Lè yo fè sa, yo vin pi pre vrè Dye a ki fè pwomès: “ Se poutètsa,  soti nan mitan yo, mete nou apa Jewova di, e sispann manyen bagay pa pwòp la, e m ap akeyi nou. ” ​(2 Korentyen 6:17 ; Revelasyon 18:4, 5). Èske dezi sensè ou se pa pou Papa nou nan syèl la akeyi w konsa ?

KI JAN POU NOU WÈ SELEBRASYON KI FÈT CHAK ANE YO

16. Poukisa vrè kretyen yo pa fete Nwèl ?

¹⁶ Yon lavi ann akò ak volonte Bondye libere nou anba fado selebrasyon fèt monn nan. Ann pran yon egzanp : Bib la pa di ki jou egzakteman Jezi te fèt. Kèk moun ka di : “ Mwen te kwè se 25 desanm Jezi te fèt ! ” Se pa posib, paske li mouri nan prentan ane 33 epòk nou an a 33 an edmi. Anplis de sa, lè l te fèt la te gen bèje ki “ t ap viv deyò e yo te pase nuit ap siveye twoupo bèt yo ”. (Lik 2:8.) Nan fen mwa desanm, li fè frèt anpil ann Izrayèl, e se yon sezon lapli. Diran lannuit yo fèmen mouton yo nan abri pou pwoteje yo anba sezon livè a. An reyalite Women yo te chwazi 25 desanm kòm dat anivèsè nesans dye solèy yo a. Plizyè syèk apre Jezi te fin vini sou tè a, kretyen aposta yo te kenbe dat sa a pou yo fete nesans Kris. Konsa vrè kretyen yo pa fete Nwèl, ni okenn lòt fèt ki pran rasin nan fo kwayans relijye. Paske yo gen yon devosyon san pataj pou Jewova, yo pa obsève fèt ki fè pechè latè oswa nasyon pase pou idòl.

17. Poukisa moun k ap viv ann akò ak volonte Bondye pa fete anivèsè nesans, e sa k fè ti jèn kretyen yo an jwa kanmenm ?

¹⁷ Bib la rapòte de anivèsè nesans sèlman. Toulede se anivèsè moun ki pa t ap sèvi Bondye (Jenèz 40:20-22 ; Matye 14:6-11). Piske Bib la pa bay dat nesans Jezi ki te yon òm pafè, poukisa pou nou ta pote yon enterè espesyal pou anivèsè moun ki fèt nan peche (Eklezyas 7:1) ? Natirèlman, paran ki gen atachman pou Bondye pa tann yon jou fiks pou yo montre yo renmen pitit yo. Gen yon jenn tifi, kretyèn 13 an, ki te di : “ Mwen menm ak fanmi m nou gen anpil okazyon pou nou distrè nou. (...) Mwen santi m pwòch paran m, e lè ti kanmarad mwen  yo mande m poukisa mwen pa patisipe nan fèt y ap selebre, mwen reponn yo : chak jou se fèt pou mwen. ” Yon jenn kretyen 17 an di : “ Lakay nou, nou bay kado diran tout ane a. ” Lè moun bay kado otomatikman san fòse sa bay anpil kè kontan.

18. Ki fèt Jezi te òdone disip li yo pou yo fete chak ane, e ki sa sa fè nou sonje ?

¹⁸ Chak ane, moun lavi yo ann akò ak volonte Bondye gen yon jou espesyal yo fete. Se Repa Seyè a, yo rele tou Komemorasyon lanmò Kris. Konsènan fèt sa a, Jezi te òdone disip li yo : “ Kontinye fè sa pou nou montre nou sonje m. ” ​(Lik 22:19, 20 ; 1 Korentyen 11:23-25). Lè Jezi te etabli repa sa a, nan lannuit 14 nizan nan ane 33 epòk nou an, li te sèvi ak pen san leven ak diven wouj. Pen an reprezante kò san peche li a e diven an reprezante san pafè li a (Matye 26:26-29). Se kretyen lespri sen Bondye wenn yo ki ka patisipe nan anblèm yo. Sa antre yo nan nouvo kontra a ak kontra pou Wayòm nan, e sa fè yo gen esperans selès (Lik 12:32 ; 22:20, 28-30 ; Women 8:16, 17 ; Revelasyon 14:1-5). Men, gen benediksyon pou tout moun ki asiste selebrasyon sa a nan aswè ki koresponn ak 14 nizan nan ansyen almanak jwif la. Yo fè yo sonje lanmou Jewova Dye ak Jezi Kris demontre lè yo bay ranson an, sakrifis redanmtè ki fè lavi etènèl la posib pou moun Bondye apwouve yo. — Matye 20:28 ; Jan 3:16.

DISTRAKSYON AK TRAVAY

19. Ki difikilte kretyen yo jwenn nan travay pou chèche lavi ?

¹⁹ Vrè kretyen yo oblije travay di pou yo jwenn sa yo bezwen (1 Tesalonisyen 4:11, 12). Nan pran reskonsablite sa a oserye, chèf fanmi yo gen yon santiman satisfaksyon. Se byen sèten si travay kretyen an ap fè a pa ann amoni ak Bib la, li pa t ap an jwa. Sepandan, li difisil pafwa pou yon moun jwenn yon travay ki ann akò ak prensip Bib la. Paregzanp gen anplwaye yo konn mande pou yo twonpe kliyan yo. Yon lòt bò, anpil patwon dakò pou yo respekte konsyans yon travayè onèt, paske yo pa  vle pèdi yon anplwaye ki diy de konfyans. Kèlkeswa sa ki rive, ou mèt asire Bondye ap beni efò w ap fè pou w jwenn yon travay k ap pèmèt ou rete ak yon konsyans pwòp. — 2 Korentyen 4:2.

20. Poukisa nou ta dwe fè yon triyay nan chwazi anmizman nou ?

²⁰ Piske Bondye vle pou sèvitè l yo ere, nou bezwen kenbe yon bonjan ekilib ant travay, distraksyon konvnab ak repo (Mak 6:31 ; Eklezyas 3:12, 13). Monn Satan an ankouraje anmizman ki lekontrè ak volonte Bondye. Men, pou nou fè Bondye plezi, nou dwe chwazi liv n ap li, pwogram radyo ak mizik n ap koute, konsè, fim, pyès teyat, pwogram televizyon ak kasèt videyo n ap gade. Si lontan nou te konn chwazi anmizman ki pa t konn tonbe dakò ak avètisman nou jwenn nan Detewonòm 18:10-12, Sòm 11:5 ak Efezyen 5:3-5, n ap fè Jewova plezi e n ap pi ere si nou fè ajisteman ki nesesè yo.

RESPEKTE LAVI, RESPEKTE SAN

21. Kouman respè nou pou lavi ap aji sou pwennvi nou sou avòtman, sou abitid nou ak sou konduit nou ?

²¹ Si nou vle ere toutbonvre, nou dwe gade lavi moun kòm bagay sakre menm jan Jewova konsidere l. Pawòl li defann nou asasinen (Matye 19:16-18). Wi, lalwa Bondye te bay Izrayèl montre pou li, yon tibebe nan vant se yon vi presye, e non pa yon bagay pou moun detwi (Egzòd 21:22, 23). Se poutètsa nou pa dwe pran lavi pou yon bagay ki pa gen valè nan sèvi ak tabak, nan maltrete kò nou nan pran dwòg, nan bwè alkòl, oswa ankò nan riske lavi nou pou granmesi. Li pa ta bon tou pou nou antre nan trafik ki ka mete lavi moun an danje, oswa pou nou reskonsab san moun paske nou pa t respekte regleman sekirite. — Detewonòm 22:8.

22. a) Ki sa Bondye panse sou san ak jan pou yo sèvi avè l ? b) Sèl san kilès ki kapab sove lavi ?

²² Jewova te esplike Noye ak fanmi li san reprezante nanm oswa lavi. Se sa ki fè li te entèdi yo manje kèlkeswa san an (Jenèz 9:3, 4). Piske nou se desandan Noye, lalwa  sa a valab pou nou tout. Jewova te di Izrayelit yo : san an fèt pou vèse nan tè a, lèzòm pa dwe sèvi avè l pou bi pa yo (Detewonòm 12:15, 16). Nan premye syèk la, yo te raple kretyen yo lalwa Bondye sou san an, lè disip yo te resevwa lòd pou yo ‘ evite san ’. (Travay 15:28, 29.) Nan dezi pou yo respekte lavi kòm sakre, moun ki fidèl devan Bondye pa asepte transfizyon san, menmsi lòt moun afime tretman sa a ta ka sove lavi yo. Gen yon bann tretman an ranplasman ki trè efikas Temwen Jewova yo asepte. Konsa, yo pa espoze malad la anba danje ki makònen ak transfizyon san. Kretyen yo konnen se sèl san Jezi Kris te vèse a ki kapab reyèlman sove lavi. Lafwa nan san li vèse a pèmèt nou jwenn padon, e li bay espwa lavi etènèl. — Efezyen 1:7.

23. Site kèk rekonpans yon vi ann akò ak volonte Bondye kapab bay ?

²³ Klèman, viv ann akò ak volonte Bondye mande efò. Petèt kèk manm fanmi ak zanmi kapab pase nou anba rizib (Matye 10:32-39 ; 1 Pyè 4:4). Men, yon lavi konsa ap fè nou jwenn rekonpans k ap fè n bliye nenpòt ki difikilte. Yon jan de vi konsa bay yon konsyans lejè, epi li pèmèt nou mare relasyon fratènèl san repwòch ak lòt adoratè Jewova yo (Matye 19:27, 29). Anplis, imajine nou pral viv etènèlman nan monn nouvo jis Bondye a (Izayi 65:17, 18). E ala yon plezi pou moun obeyi konsèy Bib la, e konsa pou yo tou fè kè Jewova kontan (Pwovèb 27:11) ! Se pa etonan si viv ann akò ak volonte Bondye pote bonè ! — Sòm 128:1, 2.

TESTE KONESANS OU

Bay kèk rezon ki fè yon vi ann akò ak volonte Bondye pote bonè.

Ki chanjman moun dwe petèt fè pou yo viv ann akò ak volonte Bondye ?

Poukisa ou dwe anvi viv ann akò ak volonte Bondye ?

[Kesyon]

[Foto nan paj 125]

Travay espirityèl ki kore ak kèk moman detant rezonab kapab ogmante lajwa moun k ap viv ann akò ak volonte Bondye.