Chapit 87

Annou aji avèk sajès pou nou asire avni nou

JEZI fèk fin rakonte istwa pitit gason gaspiyè a devan yon foul moun. Nan foul la, gen disip li yo, pèseptè malonèt yo ak lòt moun tout moun konnen k ap pratike peche, espè nan Lalwa yo ak Farizyen yo. Kounye a, l ap pale ak disip li yo, li bay yon egzanp ki gen rapò ak yon mesye ki rich ki resevwa yon move rapò sou moun k ap jere kay li a oswa entandan l lan.

Jezi esplike mesye ki rich la rele entandan l lan e li di l li pral revoke l. Lè sa a, entandan an di tèt li: “Ki sa m ta dwe fè la a, etandone mèt mwen pral retire responsablite a nan men m? Mwen pa gen fòs ase pou m al travay tè, epi mwen wont al mande charite. Bon, m konn sa m ap fè pou lè yo mete m deyò nan travay la moun ka resevwa m lakay yo.”

Ki sa entandan an deside fè? Li rele moun ki dwe mèt li yo. Li mande yo: “Konbyen w dwe?”

Premye a reponn: ‘580 galon luil doliv.’

Li di l: ‘Pran kontra a, chita la, ekri 290. Fè vit.’

Li mande yon lòt: ‘E ou menm, konbyen w dwe?’

Li di: ‘100 sak ble.’

Li di l: ‘Pran kontra a, mete 80.’

Entandan an gen dwa diminye dèt moun yo gen pou mèt li, piske li responsab biznis mèt li a jiska prezan. Lefètke l redui montan moun yo dwe yo, li tou fè zanmi ak moun ki ka remèt li sa l te fè pou yo lè l pèdi djòb li.

Lè mèt la tande sa k pase a, li sezi. Anfèt, “byenke entandan an pa aji yon fason ki jis, mèt li fè l konpliman, paske li aji avèk sajès”. Se sa k fè Jezi di apre sa: “Moun nan monn sa a aji ak plis sajès avèk moun ki nan menm jenerasyon avèk yo pase moun ki nan limyè yo.”

Kounye a, pou Jezi fè disip li yo tire leson nan egzanp sa a, men ankourajman li ba yo: “Fè zanmi grasa richès nou posede nan monn enjis sa a, dekwa pou lè richès sa yo disparèt, zanmi sa yo ka resevwa nou kote ki la pou toutan yo.”

Jezi pa fè entandan an konpliman poutèt li aji yon fason ki enjis, men li felisite l poutèt li wè lwen e poutèt li gen sajès. Souvan, “moun nan monn sa a” itilize kòb yo oswa pozisyon yo genyen avèk entèlijans pou yo fè zanmi ak moun ki ka remèt yo sa yo fè pou yo. Se poutèt sa tou sèvitè Bondye yo, sètadi “moun ki nan limyè yo”, bezwen itilize byen materyèl yo genyen, sètadi ‘richès yo posede nan monn enjis sa a’, yon fason ki saj e ki pwofitab pou yo.

Men, tankou Jezi di, yo ta dwe sèvi ak richès sa yo pou yo fè zanmi ak moun ki ka resevwa yo “kote ki la pou toutan yo”. Pou moun ki nan ti twoupo a, se nan syèl la kote sa yo ye. Pou “lòt mouton” yo, kote sa yo ap nan Paradi a sou tè a. Etandone se Jewova Dye ak Pitit li a sèlman ki ka resevwa moun nan kote sa yo, nou ta dwe fè tout sa nou kapab pou nou fè zanmi ak yo lè nou itilize kèlkeswa “richès nou posede nan monn enjis sa a” pou nou soutni enterè Wayòm nan. Konsa, lè richès materyèl yo pa la ankò oswa yo peri, jan sa pral fèt vre, avni etènèl nou ap asire.

Ansuit, Jezi di moun ki fidèl menm nan bagay sa yo ki piti, sètadi bagay materyèl, ap fidèl tou nan bagay ki gen plis enpòtans. Apre sa, li di: “Donk, si nou pa montre nou fidèl anrapò ak richès ki gen nan monn enjis sa a, kiyès k ap konfye nou vrè richès la [sètadi enterè espirityèl yo oswa enterè Wayòm nan]? E si nou pa montre nou fidèl anrapò ak sa ki pou yon lòt moun [enterè Wayòm nan Bondye konfye sèvitè l yo], kiyès k ap ban nou sa ki pou nou an [lavi kote ki la pou toutan yo kòm rekonpans]?”

Nou pa ka ap sèvi Bondye toutbon epi anmenmtan pou nou esklav richès ki gen nan monn enjis sa a, sètadi richès materyèl, jan Jezi pral montre sa finalman. Men sa l di: “Pa gen yon sèvitè nan yon kay ki ka esklav de mèt. Paske, se swa li rayi youn, li renmen lòt la, oswa li atache ak youn, epi li meprize lòt la. Nou pa kapab esklav Bondye ak lajan anmenmtan.” Lik 15:1, 2; 16:1-13; Jan 10:16.

▪ Ki jan entandan nan egzanp Jezi bay la fè zanmi ak moun ki ka ede l pi devan?

▪ Ki sa “richès nou posede nan monn enjis sa a” ye, e ki jan nou ka fè zanmi grasa yo?

▪ Kiyès ki ka resevwa nou “kote ki la pou toutan yo”, e ki sa kote sa yo ye?