Chapit 130

Bò lanmè Galile

KOUNYE A, apot yo retounen Galile, jan Jezi te ba yo lòd pou yo fè sa. Men, pandan yo la, yo pa fin konn sa pou yo fè. Apre yon ti tan, Pyè di Toma, Natanayèl, Jak ak frè l Jan, ak de lòt apot: “Mwen pral lapèch.”

Yo toule sis reponn: “Nou pral avè w.”

Pandan tout nuit lan, yo pa rive pran anyen. Men, pandan l kòmanse fè klè, Jezi parèt bò lanmè a, men apot yo pa wè si se li. Li di byen fò: “Timoun, nou pa gen anyen pou moun manje la a?”

Detan yo sou lanmè a, yo di byen fò: “Non!”

Li di yo: “Lage filè a adwat bato a n ap jwenn kichòy.” E lè yo lage l, yo pa ka rale filè yo a monte, paske yo pran yon pakèt pwason.

Jan di byen fò: “Se Seyè a!”

Kou Pyè tande sa, li mete rad li sou li, paske li te retire rad li, e li plonje nan lanmè a. Apre sa, li naje yon distans katreven dis mèt pou l rive atè. Lòt apot yo vin apre l nan ti bato a, toutpandan y ap trennen filè a ki chaje pwason.

Lè yo rive atè, yo wè yon dife chabon ki gen pwason sou li, e te gen pen tou. Jezi di: “Vin ak kèk nan pwason nou fèk pran yo.” Pyè monte nan bato a e li rale filè a vin atè. Li gen 153 gwo pwason ladan l.

Jezi di yo: “Vin manje.”

Pa gen youn nan yo ki gen kouraj mande l: “Ki moun ou ye?” paske yo tout konnen se Jezi. Se setyèm fwa li parèt depi l resisite, e se twazyèm fwa li parèt devan apot yo pandan yo ansanm. Kounye a, li sèvi yo manje, li ba yo chak kèk pen ak kèk pwason.

Lè yo fin manje, sanble Jezi gade pakèt pwason yo sot kenbe yo, li mande Pyè: “Simon, pitit Jan, èske w renmen m plis pase sa yo?” Sandout, li vle di: Èske w pi atache ak biznis pwason an pase travay mwen te prepare w pou w fè a?

Pyè reponn: “Ou konnen mwen gen afeksyon pou ou.”

Jezi di l: “Bay timouton m yo manje.”

Yon dezyèm fwa, li mande l: “Simon, pitit Jan, èske w renmen m?”

Pyè reponn ak tout kè l: “Wi Seyè, ou konnen mwen gen afeksyon pou ou.”

Jezi ba l lòd ankò, li di l: “Pran swen timouton m yo.”

Jezi mande l yon twazyèm fwa: “Simon, pitit Jan, èske w gen afeksyon pou mwen?”

Fwa sa a, Pyè vin tris. Li dwe ap mande tèt li si Jezi gen dout sou fidelite l. Dayè, sa pa gen twò lontan, lè yo t ap jije Jezi pou yo kondane l amò, Pyè te nye l twa fwa. Se poutèt sa Pyè di: “Seyè, ou konn tout bagay. Ou konnen byen mwen gen afeksyon pou ou.”

Jezi ba l lòd yon twazyèm fwa, li di l: “Bay timouton m yo manje.”

Konsa, se pa ak Pyè sèlman Jezi t ap pale, men li t ap pale ak lòt apot yo tou pou l fè yo byen konprann ki travay li vle yo fè. Talè konsa, li pral kite tè a, e li ta renmen yo pran latèt nan ede moun ki pral vin fè pati twoupo Bondye a.

Kounye a, Jezi fè konnen, menm jan yo te mare l e yo te touye l paske li te fè travay Bondye te ba l fè a, se konsa Pyè ap gen pou l sibi menm eprèv yo. Jezi di l: “Lè w te pi jèn, ou te konn met rad sou ou poukont ou e ou te konn mache al kote w vle. Men, lè w vin granmoun, w ap lonje men w e se yon lòt moun k ap abiye w e k ap pote w al kote w pa vle.” Byenke Pyè ap gen pou l mouri an mati, Jezi di l: “Kontinye suiv mwen.”

Pyè vire, li wè Jan, epi li di Jezi: “Seyè, e misye?”

Jezi reponn: “Si m vle l rete jiskaske m vini, sa w gen pou w wè nan sa? Ou menm, kontinye suiv mwen.” Pawòl sa a Jezi te di a te fè anpil nan disip li yo panse apot Jan pa t ap janm mouri. Men, jan apot Jan esplike sa annapre, Jezi pa t di li pa t ap mouri, men li te di senpleman: “Si m vle l rete jiskaske m vini, sa w gen pou w wè nan sa?”

Men yon remak enpòtan Jan te fè annapre: “Anfèt, gen anpil lòt bagay ankò Jezi te fè. Si yo ta ekri yo tout an detay, mwen panse lemonnantye pa t ap kapab kenbe woulo yo t ap ekri yo.” Jan 21:1-25; Matye 26:32; 28:7, 10.

▪ Ki sa k montre apot yo pa fin konnen sa yo dwe fè pandan yo Galile?

▪ Ki jan apot yo fè rekonèt Jezi detan l bò lanmè Galile?

▪ Konbyen fwa Jezi gentan parèt depi l resisite?

▪ Ki jan Jezi ensiste sou sa li vle apot yo fè?

▪ Ki jan Jezi montre fason Pyè ap mouri?

▪ Ki sa Jezi di konsènan Jan anpil nan disip yo te mal konprann?