Chapit 12

Batèm Jezi

ANVIWON sis mwa apre Jan kòmanse preche, Jezi, ki gen 30 an kounye a, vin kot Jan nan rivyè Jouden an. Poukisa li vin kote l? Èske se wè li annik vin wè l? Èske se paske li enterese konnen fason travay predikasyon Jan ap fè a ap pwogrese? Non, Jezi vin kot Jan pou Jan batize l.

Lè Jan wè sa, li eseye anpeche Jezi. Li di l: “Se mwen menm ki bezwen pou w batize m, epi se ou menm k ap vin kote m?” Jan konnen kouzen l lan, Jezi, se yon Pitit espesyal Bondye genyen. Annefè, Jan li menm te sote nan vant manman l tèlman li te kontan lè Mari te vin vizite manman l pandan Mari te ansent Jezi! Se sèten Elizabèt, manman Jan, te rakonte Jan sa annapre. E sandout li te pale l de zanj ki te anonse nesans Jezi a e de zanj ki te fè aparisyon pou anonse bèje yo nouvèl la nan nuit Jezi te fèt la.

Kidonk, Jan konn Jezi trè byen. E li konnen batèm l ap fè a pa pou Jezi, paske batèm sa a rezève pou moun ki repanti pou peche yo, e Jezi li menm li san peche. Epoutan, malgre Jan pa vle batize Jezi, li ensiste. Li di l: “Kite sa fèt konsa, paske se konsa pou nou akonpli tout sa ki jis.”

Poukisa li apwopriye pou Jezi batize? Se pa pou l montre li repanti pou peche, men se pou l montre li prezante tèt li pou l fè volonte Papa l. Jezi se yon bòs chapant. Men kounye a, moman an rive pou l kòmanse travay Jewova Dye te voye l fè sou tè a. Èske w panse Jan ap tann pou yon bagay espesyal rive pandan l ap batize Jezi?

Ebyen, annapre, Jan t apral deklare: “Sila a ki voye m batize moun nan dlo a te di m: ‘Sou moun ou wè lespri a desann e li rete anlè tèt li a, se li menm k ap batize moun nan lespri sen an.’” Konsa, Jan ap tann pou lespri Bondye desann sou youn nan moun k ap vin jwenn li pou l batize yo a. Sandout, Jan pa vrèman sezi lè Jezi sot nan dlo a e li wè “lespri a desann sot nan syèl la sou fòm yon pijon”.

Men, gen yon lòt evènman ki rive lè Jezi ap batize: “Syèl la ouvri” pou li. Ki sa sa vle di? Sanble sa vle di, pandan Jezi ap batize, li vin ap sonje ki jan sa te ye lè l t ap viv nan syèl la. Se sa k fè kounye a Jezi vin sonje tout bagay konsènan lavi li t ap mennen antanke Pitit Jewova Dye, lè l te yon espri nan syèl la, san wete tout sa Bondye te di l nan syèl la anvan l vin sou tè a.

Anplis de sa, nan moman batèm Jezi, gen yon vwa ki sot nan syèl la ki di: “Ou se Pitit Gason m, pitit mwen renmen anpil la. Mwen apwouve w.” Vwa ki moun sa a? Èske se vwa Jezi? Non! Se vwa Bondye. Li klè Jezi se Pitit Bondye, se pa li menm ki Bondye, jan kèk moun fè konn sa.

Sepandan, Jezi se yon moun, yon pitit Bondye gen sou tè a, menm jan premye gason an, Adan, se te yon pitit Bondye te gen sou tè a. Apre disip Lik fin pale konsènan batèm Jezi, men sa l ekri: “Lè Jezi te kòmanse aktivite l la, li te gen anviwon trant an. Selon sa moun yo te kwè, se pitit Jozèf li te ye, e Jozèf se te pitit Eli, [...] pitit David, [...] pitit Abraram, [...] pitit Noye, [...] pitit Adan, [...] pitit Bondye.”

Menm jan Adan se te yon “pitit Bondye”, se menm jan an tou Jezi se yon “pitit Bondye”. Jezi se moun ki pi enpòtan ki pase sou tè a, e nou kapab wè sa lè nou egzamine lavi li te mennen sou tè a. Sepandan, lè Jezi batize, li vin gen yon lòt relasyon ak Bondye, li vin Pitit espirityèl li tou. Nan moman sa a, se kòmsi Bondye rele l pou l retounen nan syèl la, paske li fè l kòmanse yon lòt etap nan lavi l k ap pèmèt li bay vi l kòm sakrifis pou l sove limanite anba kondanasyon. Matye 3:13-17; Lik 3:21-38; 1:34-36, 44; 2:10-14; Jan 1:32-34; Ebre 10:5-9.

▪ Poukisa nou ka di Jan konn Jezi trè byen?

▪ Piske Jezi pa fè peche, poukisa l batize?

▪ Si nou baze sou sa Jan konnen sou Jezi, poukisa Jan pa sezi lè l wè lespri Bondye desann sou Jezi?