Chapit 98

Disip yo nan diskisyon alòske Jezi pral mouri

JEZI ak disip li yo nan distri Pere, toupre rivyè Jouden. Yo travèse rivyè a pou yo sot nan distri Pere pou yo antre Jide. Gen anpil lòt moun k ap vwayaje avèk yo pou y al nan fèt Pak ane 33 epòk nou an k ap rive nan anviwon yon semèn sèlman.

Jezi ap mache devan disip yo, e kè yo ap sote lè yo wè jan l byen deside ale. Pa bliye, sa gen kèk semèn lè Laza te mouri e Jezi t ap sot Pere pou l al Jide, Toma te di lòt disip yo: “Ann ale tou, pou nou ka mouri avè l.” N ap sonje tou, apre Jezi fin resisite Laza, Sanedren an te monte konplo pou fè touye Jezi. Nou pa bezwen mande jan disip yo pè kounye a, detan y ap rantre Jide ankò.

Pou Jezi prepare yo pou sa k pral fèt la, li pran 12 apot yo apa e li di yo: “Kounye a, n ap monte Jerizalèm. Yo pral livre Pitit lòm nan bay prèt an chèf yo ak espè nan Lalwa yo, y ap kondane l amò, y ap livre l bay moun ki nan nasyon yo, y ap pase l nan rizib, y ap krache sou li, y ap bat li ak kout fwèt e y ap touye l. Men, twa jou apre, l ap leve.”

Sa fè twazyèm fwa nan mwa ki sot pase yo Jezi pale ak disip li yo konsènan lanmò l ak rezirèksyon l. E byenke yo koute l, yo pa rive konprann. Petèt se paske yo kwè li pral remete wayòm Izrayèl la sou pye ankò sou tè a, e y ap tann pou yo jwenn glwa ak onè ansanm ak Kris nan yon wayòm k ap sou tè a.

Pami moun k ap vwayaje ansanm pou al nan fèt Pak la, gen Salome, manman apot Jak ak Jan. Jezi te rele mesye sa yo “Pitit Loray”, sandout paske yo gen gwo san. Depi kèk tan, de mesye sa yo gen anbisyon pou yo nan gwo pozisyon nan Wayòm Kris la, e yo fè manman yo konn sa. Kounye a, l al pale ak Jezi pou yo, li mete ajenou devan l e li mande l pou l fè yon bagay pou li.

Jezi di l: “Ki sa w vle?”

Li reponn: “Bay lòd pou de pitit gason m yo chita bò kote w nan wayòm ou an, youn adwat ou e lòt la agoch ou.”

Jezi rann li kont kiyès ki voye l mande sa, li di Jak ak Jan: “Mesye, nou pa konn sa n ap mande a. Èske nou ka bwè sa m pral bwè a?”

Yo reponn: “Nou kapab.” Byenke Jezi fèk sot di yo gen pèsekisyon terib k ap tann li e apre sa y ap touye l, sanble yo pa konprann se de sa l ap pale lè l pale de ‘sa l pral bwè a’.

Sepandan, Jezi di yo: “Se vre, n ap bwè l, men kanta pou nou chita adwat mwen oswa agoch mwen, se pa mwen menm ki gen pou bay sa. Men, plas sa yo se pou moun Papa m te prepare yo yo ye.”

Rive yon lè, dis lòt apot yo vin aprann sa Jak ak Jan te mande a, e yo fache. Petèt se Jak ak Jan ki te pi cho lè apot yo t ap fè diskisyon anvan sa pou yo konnen kiyès ki pi enpòtan. Demann yo fè kounye a montre yo pa koute konsèy Jezi te ba yo sou sa. Malerezman, yo toujou gen gwo dezi pou yo nan gwo pozisyon.

Donk, pou Jezi mete yon fen nan dènye diskisyon sa a ak nan rankin sa soulve, li rele 12 apot yo ansanm. Li konseye yo avèk amou, li di: “Nou konnen moun k ap dirije nasyon yo kòmande yo ak gwo ponyèt, e gwo mesye yo egzèse otorite sou yo. Se pa konsa sa fèt nan mitan nou. Men, nenpòt moun ki vle vin enpòtan pami nou dwe vin sèvitè nou, e nenpòt moun ki vle premye pami nou dwe vin esklav nou.”

Jezi bay egzanp yo ta dwe imite, jan li pral esplike sa. Li di: “Se menm jan an tou, Pitit lòm nan pa t vini pou moun sèvi l, men li te vini pou l sèvi moun e pou l bay nanm li kòm ranson pou anpil moun.” Nonsèlman Jezi sèvi lòt moun, men li fè sa jis nan pwen li bay lavi l pou limanite! Disip yo bezwen gen menm mantalite Kris te genyen ki te fè l vle sèvi lòt moun olye se lòt moun ki pou sèvi l, e ki te fè l vle vin yon tipiti olye pou l nan yon gwo pozisyon. Matye 20:17-28; Mak 3:17; 9:33-37; 10:32-45; Lik 18:31-34; Jan 11:16.

▪ Poukisa disip yo pè?

▪ Ki jan Jezi prepare disip li yo pou sa k pral fèt la?

▪ Ki demann yo fè Jezi e ki jan sa touche lòt apot yo?

▪ Ki jan Jezi rezoud pwoblèm ki gen ant apot li yo?