Chapit 109

Jezi denonse opozan l yo

JEZI tèlman lage opozan relijye yo nan konfizyon, yo pè poze l kesyon ankò. Se sa k fè li menm li poze yo kesyon pou l devwale inyorans yo gen lakay yo. Li mande yo: “Ki sa nou panse de Kris la? Pitit kiyès li ye?”

Farizyen yo reponn: “Pitit David.”

Byenke Jezi pa nye David se zansèt Kris la oswa Mesi a, li mande yo: “Si se sa, kòman David, anba enfliyans lespri sen [nan Sòm 110], fè rele l ‘Seyè’, lè l te di: ‘Jewova di Seyè m nan: “Chita adwat mwen jiskaske mwen mete ènmi w yo anba pye w”’? Kidonk, si David rele l ‘Seyè’, kòman l fè pitit li senpleman?”

Farizyen yo ret an silans, paske yo pa konn vrè idantite Kris la, sètadi Moun Bondye chwazi a. Mesi a pa senpleman yon desandan David nan lachè, jan Farizyen yo sanble kwè sa, men li te egziste nan syèl la e li siperyè David oswa li se Seyè li.

Kounye a, Jezi vire kote foul moun yo e kot disip li yo, li ba yo avètisman kont espè nan Lalwa yo ak Farizyen yo. Piske mesye sa yo ap anseye Lwa Bondye, “yo chita sou chèz Moyiz la”. Se poutèt sa Jezi di: “Tout sa yo di nou fè, fè yo.” Men, li di tou: “Pa aji menm jan avèk yo, paske sa yo di, se pa sa yo fè.”

Yo se ipokrit, e Jezi denonse yo, li di apeprè menm bagay li te di lè l t al manje lakay yon Farizyen sa gen kèk mwa. Li di: “Tout sa y ap fè, yo fè yo pou moun ka wè yo.” E li bay egzanp pou l montre sa. Li di:

“Yo fè ti bwat ki gen pasaj Ekriti yo pi gwo, e yo mete yo sou fwon yo ak sou bra yo pou pwoteje yo.” Ti bwat sa yo gen kat pòsyon nan Lalwa ladan yo: Egzòd 13:1-10, 11-16 ak Detewonòm 6:4-9; 11:13-21. Men, Farizyen yo fè ti bwat sa yo pi gwo pou yo fè konprann yo se moun ki renmen Lalwa anpil.

Ansuit, Jezi fè konnen yo “fè franj rad yo pi long”. Nan Nonb 15:38-40, Izrayelit yo te resevwa lòd pou yo mete franj nan rad yo, men Farizyen yo fè pa yo a pi long pase pa tout lòt moun yo. Yo fè tout sa pou fè wè! Jezi di: “Yo renmen pi bèl plas” la.

Malerezman, menm disip li yo kite anvi pou yo gen gwo pozisyon pran tèt yo. Se poutèt sa li ba yo konsèy, li di yo: “Men nou menm, pa fè yo rele nou anseyan, paske se yon sèl Anseyan nou genyen, tandiske nou tout se frè. Anplis de sa, pa rele pèsonn sou latè papa nou, paske sèl Papa nou genyen, se Sila a ki nan syèl la. Pa kite yo rele nou gid, paske sèl Gid nou genyen, se Kris.” Disip yo dwe elimine anvi yo genyen pou yo pi enpòtan pase lòt moun. Men konsèy fèm Jezi ba yo: “Moun ki pi enpòtan pami nou an dwe vin sèvitè nou.”

Apre sa, li lanse yon seri malediksyon kont espè nan Lalwa yo ak Farizyen yo, e pandan plizyè fwa li rele yo bann ipokrit. Li di yo “fèmen pòt wayòm syèl la devan lèzòm” e li fè konnen “se yo menm k ap dechèpiye kay vèv yo e k ap priye byen long pou fè wè”.

Jezi di: “Malè pou nou, bann gid je pete.” Li kondane Farizyen yo poutèt yo pa suiv prensip espirityèl yo. Mankman sa a parèt klè nan distenksyon yo pran desizyon fè poukont yo. Pa egzanp, yo di: “Si yon moun sèmante sou tanp lan, se pa anyen sa, men si yon moun sèmante sou lò ki nan tanp lan, li oblije respekte sèman an.” Lefètke yo bay lò ki nan tanp lan plis enpòtans pase valè espirityèl tanp kote moun yo vin adore Bondye a genyen, sa montre yo nan fènwa nan domèn moral.

Apre sa, jan Jezi te fè sa anvan, li kondane Farizyen yo poutèt yo neglije “pwen ki pi enpòtan nan Lalwa yo, anpalan de jistis, mizèrikòd ak fidelite”, alòske yo plis veye pou yo peye ladim sou tout ti epis yo, sa vle di pou yo peye yon dizyèm nan yo.

Jezi rele Farizyen yo: “Bann gid je pete!” Li di yo: “N ap koule sa n ap bwè pou nou pa bwè yon moustik, men n ap vale yon chamo.” Yo koule diven y ap bwè pou yo pa bwè yon moustik, nonsèlman paske se yon ti bèt, men paske sa ka fè yo vin pa pwòp pou yo fè sèvis Bondye. Epoutan, lefètke yo neglije bagay ki pi enpòtan nan Lalwa yo, se kòmsi yo vale yon chamo, yon lòt bèt ki ka fè yo pa pwòp tou pou yo fè sèvis Bondye. Matye 22:41–23:24; Mak 12:35-40; Lik 20:41-47; Levitik 11:4, 21-24.

▪ Poukisa Farizyen yo ret an silans lè Jezi poze yo kesyon sou sa David te di nan Sòm 110 la?

▪ Poukisa Farizyen yo fè ti bwat ki gen pasaj Ekriti yo pi gwo e yo fè franj rad yo pi long?

▪ Ki konsèy Jezi bay disip li yo?

▪ Ki distenksyon Farizyen yo pran desizyon fè poukont yo, e ki jan Jezi kondane yo poutèt yo neglije bagay ki pi enpòtan yo?