Chapit 52

Jezi fè mirak pou l bay plizyè milye moun manje

KANPAY predikasyon 12 apot yo te fè nan tout Galile a te estrawòdinè. Kounye a, yon ti tan apre lanmò Jan, yo retounen vin jwenn Jezi e yo rakonte l bèl eksperyans yo fè. Kòm Jezi wè yo fatige epi gen anpil ale vini k ap fèt, e yo pa menm jwenn tan pou yo manje, li di: ‘Ann al yon kote apa pou nou ka pran yon ti repo.’

Yo monte nan bato yo a, petèt toupre Kapènawòm, yo met tèt sou yon zòn ki izole, sanble nan direksyon lès rivyè Jouden pa lòtbò Betsayida. Men, gen anpil moun ki wè lè yo ale a, e gen lòt ki vin aprann sa. Yo tout kouri arebò lanmè a pou yo pran devan, e lè bato a fè tè, moun yo te gentan la pou vin rankontre yo.

Pandan Jezi ap desann bato a e li wè gwo foul moun nan, li santi l gen pitye pou yo, paske moun yo tankou mouton ki san bèje. Se sa k fè li geri moun ki malad yo e li kòmanse anseye yo anpil bagay.

Tan an pase vit, e disip Jezi yo vin kote l, yo di l: “Zòn nan izole, e li fin ta. Voye yo ale, dekwa pou yo ka al nan zòn andeyò yo ak nan bouk ki ozalantou yo pou yo achte bagay pou yo manje.”

Men, Jezi di: “Ba yo manje nou menm.” Lè sa a, kòm Jezi deja konn sa l pral fè, li teste Filip, li mande l: “Ki kote nou pral achte pen pou moun sa yo manje?”

Dapre sa Filip panse, pa gen anyen yo ka fè. Paske, gen anviwon 5 000 gason, e petèt gen plis pase 10 000 moun, si yo ta konte fi ak timoun. Filip reponn: “200 denye [yon denye se kòb yo te konn peye yon moun nan epòk sa a pou yon jounen travay] pen pap ase pou chak moun ta jwenn menm yon ti moso.”

Petèt pou Andre montre li enposib pou yo bay tout moun sa yo manje, li fè yon pwopozisyon, li di: “Gen yon tigason la a ki gen senk pen lòj ak de ti pwason.” Apre sa, li di: “Men, ki sa sa ka fè pou tout moun sa yo?”

Etandone sa pase ant mwa mas ak mwa avril, jis anvan fèt Pak ane 32 epòk nou an, gen anpil zèb. Se sa k fè Jezi di disip li yo pou yo fè moun yo chita nan zèb la pa gwoup 50 ak gwoup 100. Li pran senk pen yo ak de pwason yo, li gade syèl la e li fè yon priyè. Apre sa, li kase pen yo ak pwason yo. Li lonje yo bay disip yo pou yo distribye bay moun yo. Sa ki etonan, tout moun manje jiskaske yo satisfè.

Apre sa, Jezi di disip li yo: “Ranmase rès ki rete yo, dekwa pou anyen pa gaspiye.” Lè yo fè sa, yo plen 12 pànye ak rès ki rete nan sa yo te manje yo. Matye 14:13-21; Mak 6:30-44; Lik 9:10-17; Jan 6:1-13.

▪ Poukisa Jezi ap chèche yon kote apa pou apot li yo?

▪ Ki kote Jezi mennen disip li yo, e sa k fè yo pa rive repoze vre?

▪ Lè l fin ta, ki sa disip yo mande, men, ki jan Jezi ede moun yo?