Chapit 42

Jezi reprimande Farizyen yo

REZÒNMAN Jezi fè sèke si se grasa pouvwa Satan li chase demon, konnen Satan ap lite ak pwòp tèt li. Anplis de sa, li di: “Si nou se yon bon pyebwa, n ap bay bon fwi. Men, si nou se yon move pyebwa, nou pap bay bon fwi. Paske, se fwi yon pyebwa bay ki fè yo konn si l bon ak si l pa bon.”

Li pa lojik pou yon moun panse se paske Jezi ap sèvi Satan ki fè l pwodui bon fwi, sètadi ki fè l chase demon. Si yon fwi bon, pyebwa a pa ka pa bon. Yon lòt bò, fwi ki pa bon Farizyen yo pwodui se akizasyon derezonab ak opozisyon san fondman yo fè kont Jezi, e sa pwouve yo menm yo pa bon. Jezi di yo: “Ras vipè, kòman nou ta fè di bon bagay, piske nou mechan? Paske, pawòl ki sot nan bouch yon moun montre sa k ranpli kè l.”

Piske pawòl nou montre nan ki eta kè nou ye, se dapre sa nou di y ap jije nou. Men sa Jezi di: “M ap di nou sa: tout pawòl ki pa pwofitab lèzòm di, y ap gen pou yo rann kont pou li nan Jou Jijman an. Paske, se pawòl ou di k ap fè swa yo deklare w jis swa yo kondane w.”

Malgre tout mirak Jezi fè, espè nan Lalwa yo ak Farizyen yo mande l: “Anseyan, nou ta renmen w ban nou yon siy.” Menmsi mesye sa yo ki sot Jerizalèm pa t wè lè Jezi fè mirak yo, gen prèv vizib konsènan mirak sa yo ki egziste, yon seri prèv moun pa ka nye. Se poutèt sa Jezi di chèf relijye juif yo: “Nou se yon jenerasyon ki mechan e ki pa fidèl anvè Bondye. Nou kontinye ap chèche yon siy, men sèl siy y ap ban nou se siy pwofèt Yona a.”

Pou Jezi esplike sa l vle di, li di apre sa: “Menm jan Yona te fè twa jou twa nuit anndan vant gwo pwason an, se konsa tou Pitit lòm nan ap fè twa jou twa nuit nan zantray tè a.” Lè Yona te soti nan vant pwason ki te vale l la, se kòmsi se resisite li te resisite. Donk, Jezi anonse li gen pou l mouri e li gen pou l resisite sou twazyèm jou a. Poutan, pi devan, menm apre Jezi fin resisite, chèf relijye juif yo pap vle rekonèt “siy pwofèt Yona a”.

Se sa k fè Jezi fè konnen mesye Niniv yo ki te repanti lè Yona te preche yo a ap leve lè jijman an pou yo kondane Juif ki rejte l yo. Jezi bay yon lòt egzanp nan menm sans lan, li fè remake rèn Cheba a te soti nan dènye bout tè a pou l vin tande pawòl sajès Salomon t ap di e li te sezi pou sa l te wè ak sa l te tande. Apre sa, Jezi di: “Men gade! gen yon moun la a ki pi enpòtan pase Salomon.”

Apre sa, Jezi bay egzanp yon mesye ki gen yon movèzespri ki sot sou li. Men, mesye a pa ranpli vid li vin gen nan li a ak bon bagay, se poutèt sa gen sèt movèzespri pi mechan ki rantre sou li. Jezi di: “Se konsa sa ap ye tou pou jenerasyon mechan sa a.” Nasyon Izrayèl la se te yon nasyon yo te pirifye e ki te fè yon seri chanjman, tankou lè yon movèzespri ale pou yon ti tan. Men, lefètke nasyon juif la te rejte pwofèt Bondye yo, sa ki fè l vin opoze ak Kris la menm, sa montre li vin pi mechan pase anvan.

Pandan Jezi kontinye pale, manman l ak frè l yo vin toupre foul la. Konsa, gen yon moun ki di: “Gade! Men manman w ak frè w yo kanpe deyò a, yo bezwen pale avè w.”

Jezi mande: “Ki moun ki manman m? Ki moun ki frè m?” Li lonje men l sou disip li yo, li di: “Gade! Men manman m ak frè m! Paske, kèlkeswa moun ki fè volonte Papa m ki nan syèl la, se moun sa a ki frè m, ki sè m, ki manman m.” Nan sans sa a, Jezi montre, menmsi lyen ki atache l ak fanmi l gen valè nan je l, relasyon li gen ak disip li yo gen plis valè toujou. Matye 12:33-50; Mak 3:31-35; Lik 8:19-21.

▪ Nan ki sans Farizyen yo pa yon bon “pyebwa” k ap bay bon “fwi”?

▪ Ki sa “siy pwofèt Yona a” ye, e ki jan yo pa t vle rekonèt siy sa a annapre?

▪ Ki jan nasyon Izrayèl nan premye syèk la sanble ak mesye ki gen yon movèzespri ki sot sou li a?

▪ Ki jan Jezi montre nan ki pwen li gen relasyon sere ak disip li yo?