Chapit 77

Kesyon eritaj la

SANBLE moun yo konnen Jezi ap manje lakay Farizyen an. Se poutèt sa plizyè milye moun rasanble deyò a ap tann lè Jezi ap soti. Kontrèman ak Farizyen yo ki opoze ak Jezi e k ap chèche fè l di yon bagay ki mal, moun yo chofe pou yo koute Jezi avèk plezi.

Toudabò, Jezi vire bò kot disip li yo, li di: “Fè atansyon ak ledven Farizyen yo, ki se ipokrizi.” Jan nou te wè sa lè Jezi t al manje lakay Farizyen an, tout sistèm relijye Farizyen yo chaje ak ipokrizi. Sepandan, menmsi Farizyen yo montre yo gen atachman pou Bondye pou yo kache mechanste yo gen nan kè yo, yon lè sa ap parèt aklè. Jezi di: “Pa gen anyen ki byen kache ki pap vin devwale, e pa gen anyen ki sekrè moun pap vin konnen.”

Jezi rebay ankourajman li te bay 12 apot li yo lè l te voye yo devan pou y al fè yon kanpay predikasyon nan Galile. Li di: “Pa pè moun k ap touye kò a e ki pa ka fè anyen apre sa.” Piske Bondye pa bliye menm yon sèl tikit, Jezi bay disip li yo asirans Bondye pap bliye yo. Li di: “Lè yo mennen nou devan gwo rasanbleman moun, devan fonksyonè nan gouvènman yo, devan moun ki gen otorite yo, [...] nan moman sa a menm, lespri sen ap fè nou konnen sa pou nou di.”

Nan moman sa a, gen yon mesye nan foul la ki di: “Anseyan, di frè m nan pou l ban m pa m nan eritaj mwen gen avè l la.” Lwa Moyiz la fè konnen premye pitit gason an dwe resevwa de pòsyon nan eritaj la, se poutèt sa pa ta dwe gen diskisyon. Men sanble mesye a vle plis nan eritaj la pase sa lalwa mande.

Jezi gen rezon refize antre nan bagay sa a. Li mande mesye a: “Zanmi, kiyès ki mete m jij nou oswa kiyès ki mete m la pou m fè pataj pou nou?” Ansuit, li bay foul la yon avètisman ki enpòtan, li di: “Rete je ouvè, epi evite tout kalite tanta. Paske, menm lè yon moun ap viv nan abondans, lavi l pa depann de bagay li posede yo.” Vrèmanvre, kèlkeswa kantite bagay yon moun rive posede, nòmalman l ap gen pou l mouri e l ap kite tout dèyè. Pou Jezi atire atansyon sou sa e pou l montre se yon foli lè yon moun pa chèche gen bon repitasyon devan Bondye, li sèvi ak yon egzanp. Li di:

“Te gen yon mesye rich ki te gen tè ki te bay bon rannman. Konsa, misye kòmanse ap reflechi, li di: ‘Ki sa m pral fè, paske kounye a mwen pa gen kote pou m met rekòt mwen yo?’ Finalman, li di: ‘Men sa m ap fè: M ap kraze depo m yo, m ap bati depo ki pi gwo, epi m ap mete tout manje angren m yo ak tout bon bagay mwen genyen yo ladan yo. Apre sa, m ap di tèt mwen: “Monchè, ou gen anpil bon bagay la a pou anpil ane. Pran lèz kò w, manje, bwè, epi pran plezi w.”’ Men, Bondye di li: ‘Egare! Aswè a menm y ap mande w vi w. Bon, bagay ou sere yo, pou kiyès y ap ye?’”

Finalman, Jezi di: “Se konsa sa ye pou moun k ap sere trezò pou tèt li, men ki pa rich anvè Bondye.” Byenke disip yo gendwa pa tonbe nan pyèj pou yo fou ap anpile richès, men, akoz pwoblèm ki gen chak jou nan lavi a, yo ka distrè byen fasil nan sèvis y ap bay Jewova ak tout nanm yo. Se sa k fè Jezi pwofite okazyon an pou l rebay bon konsèy li te bay nan Sèmon sou montay la sa gen anviwon ennan edmi. Li vire bò kot disip li yo, li di:

“Se poutèt sa, m ap di nou sa: Sispann enkyete nou pou tèt nou pou n ap mande ki sa n ap manje, oubyen pou kò nou pou n ap mande ki sa n ap met sou nou. [...] Gade kaw yo byen. Yo pa ni simen ni rekòlte, ni yo pa gen depo manje. Men, Bondye ba yo manje. [...] Suiv byen jan flè yo pouse. Yo pa ni travay di, ni koud rad. Men, m ap di nou sa: Menm Salomon lè l te nan tout glwa li pa t abiye tankou youn nan yo. [...]

“Se poutèt sa, sispann enkyete nou pou n ap mande ki sa n ap manje ak ki sa n ap bwè, e sispann trakase tèt nou. Paske, se dèyè tout bagay sa yo nasyon nan monn nan ap kouri ak tout fòs, men Papa nou konnen nou bezwen bagay sa yo. Okontrè, kontinye chèche wayòm li an, e l ap ajoute bagay sa yo pou nou.”

Se sitou nan moman pwoblèm ekonomik, nou dwe bay pawòl Jezi yo anpil atansyon. Yon moun ki bay tèt li twòp pwoblèm pou bezwen materyèl li genyen e ki kòmanse neglije aktivite espirityèl yo, anfèt li demontre li manke lafwa nan kapasite Bondye genyen pou l bay sèvitè l yo sa yo gen bezwen. Lik 12:1-31; Detewonòm 21:17.

▪ Poukisa, petèt, mesye a mande Jezi pou l ede l rezoud yon pwoblèm eritaj, e ki konsèy Jezi bay?

▪ Ki egzanp Jezi bay, e ki leson ki gen ladan l?

▪ Ki konsèy Jezi rebay, e poukisa li apwopriye?