Chapit48

Lè l kite kay Jayiris, l al revizite Nazarèt

JEZI gen anpil aktivite nan jounen an. Li retounen sot nan Dekapòl la nan bato, li geri fi ki te gen san k ap koule sou li a e li resisite pitit fi Jayiris la. Men, jounen an poko fini. Sanble nan moman Jezi ap sot lakay Jayiris, gen de mesye avèg ki vin ap suiv li, y ap di byen fò: “Gen pitye pou nou, Pitit David!”

Lefètke mesye sa yo rele Jezi “Pitit David”, yo fè konnen yo kwè Jezi se eritye twòn David la, e konsa li se Mesi Bondye te pwomèt la. Sepandan, Jezi fè kòmsi li pa tande y ap rele l pou l ede yo, petèt l ap gade pou l wè si y ap pèsiste. Men, mesye yo pa dekouraje. Yo suiv Jezi rive jis kote li rete a, e lè l antre nan kay la, yo antre dèyè l.

Jezi mande yo: “Èske nou kwè mwen ka ouvri je nou?”

Yo reponn ak lafwa: “Wi, Seyè.”

Lè sa a, Jezi manyen je yo, li di: “Se pou sa fèt pou nou selon lafwa nou.” Lamenm je yo ouvri! Lè sa a, Jezi pase yo lòd, li di yo: “Veye pou pèsonn pa konn sa.” Men, yo tèlman kontan, yo pa okipe lòd Jezi ba yo a, yo pale de li nan tout zòn nan.

Kou mesye yo ale, gen moun ki mennen yon mesye ki gen demon sou li bay Jezi. Demon an te fè mesye a bèbè. Jezi chase demon an, e lamenm mesye a kòmanse pale. Foul moun yo sezi lè yo wè mirak sa yo, yo di: “Moun pa t janm wè yon bagay konsa ann Izrayèl.”

Gen Farizyen ki la tou. Yo pa ka nye mirak ki fèt yo, men akoz yo refize kwè e akoz mechanste yo gen nan yo, yo retounen fè menm akizasyon yo te fè konsènan kote Jezi jwenn pouvwa pou l fè mirak sa yo, yo di: “Se chèf demon yo ki ba l pouvwa pou l chase demon.”

Yon ti tan apre sa, Jezi retounen nan peyi l Nazarèt, men fwa sa a disip li yo akonpaye l. Anviwon ennan anvan sa, li te vizite sinagòg la e li te anseye moun ki te la yo. Byenke okòmansman moun yo te rete bouch ouvè devan bèl pawòl li t ap di yo, annapre yo te vekse lè yo te tande sa l t ap anseye yo e yo te eseye touye l. Kounye a, avèk konpasyon, Jezi ap eseye ede ansyen vwazen l yo ankò.

Byenke moun lòt kote vin an foul kot Jezi, sanble moun Nazarèt yo pa fè sa. Se poutèt sa, lè jou saba a, li ale nan sinagòg la pou l anseye moun yo. Pifò moun k ap koute l yo sezi, yo mande: “Ki kote misye jwenn sajès sa a ak pouvwa pou l fè mirak sa yo? Èske se pa pitit bòs chapant lan? Èske se pa Mari ki manman l? Èske se pa frè Jak, Jozèf, Simon ak Jida li ye? E sè l yo, èske yo tout pa ansanm avèk nou? Ebyen, ki kote misye jwenn tout bagay sa yo?”

Men rezònman yo fè: ‘Jezi se moun zòn nan menm jan ak nou, nou te wè l k ap grandi e nou konn fanmi l. Kòman fè l se Mesi a?’ Se konsa, malgre tout prèv yo genyen, sètadi pakèt sajès Jezi genyen ak mirak li fè, yo rejte l. Lefètke fanmi Jezi yo te abitye avè l anpil, yo refize kwè nan li. Se poutèt sa Jezi di: “Yo onore yon pwofèt tout kote, sof nan peyi l ak nan fanmi l ak lakay li.”

Jezi vrèman sezi wè jan moun yo pa gen lafwa! Se poutèt sa, li pa fè okenn mirak nan zòn nan, eksepte kèk moun malad li poze men sou yo pou l geri yo. Matye 9:27-34; 13:54-58; Mak 6:1-6; Izayi 9:7.

▪ Lè avèg yo rele Jezi “Pitit David”, ki sa yo montre yo kwè?

▪ Ki esplikasyon Farizyen yo chwazi bay sou mirak Jezi yo?

▪ Poukisa nou ka di se konpasyon ki pouse Jezi retounen al ede moun Nazarèt yo?

▪ Ki jan moun Nazarèt yo akeyi Jezi, e poukisa?