Chapit 110

Li fini ak aktivite l nan tanp lan

JEZI vin nan tanp lan yon dènye fwa. Anfèt, apa evènman ki gen rapò ak jijman l ak egzekisyon l ki pral rive nan twa jou, se dènye aktivite predikasyon l ap fè sou tè a. Kounye a, li kontinye blame espè nan Lalwa yo ak Farizyen yo.

Li di twa lòt fwa ankò: “Malè pou nou, espè nan Lalwa ak Farizyen, bann ipokrit!” Toudabò, li lage malediksyon sou yo paske yo netwaye “deyò koup la ak do asyèt la, men pa anndan, yo chaje ak tanta ansanm ak eksè”. Se poutèt sa li konseye yo, li di: “Netwaye anndan koup la ak anndan asyèt la anvan, konsa deyò a ap vin pwòp tou.”

Li lage malediksyon sou espè nan Lalwa yo ak Farizyen yo ankò poutèt pouriti ak santò yo gen anndan yo y ap eseye kache dèyè atachman yo pran pòz yo gen pou Bondye. Li di: “Nou sanble ak tonm ki blanchi, ki parèt bèl pa deyò, men anndan yo, yo chaje ak zosman mò ansanm ak tout kalite bagay sal.”

Finalman, ipokrizi yo parèt aklè, paske yo chofe pou yo fè tonm pou pwofèt yo e pou yo dekore yo, dekwa pou yo atire atansyon sou zèv yo fè. Men, jan Jezi di sa, yo “se pitit moun ki te asasinen pwofèt yo”. Annefè, nenpòt moun ki pran chans devwale ipokrizi yo vin an danje!

Jezi kontinye pale, li sèvi ak pawòl ki pi di toujou pou l denonse yo. Li di: “Bann sèpan, ras vipè, ki jan n ap fè chape anba kondanasyon jeyèn nan?” Jeyèn nan se kote yo te konn jete fatra pa deyò vil Jerizalèm. Konsa, Jezi fè konnen, lefètke espè nan Lalwa yo ak Farizyen yo kontinye aji ak mechanste, y ap detwi pou toutan.

Men sa Jezi di konsènan moun li voye kòm reprezantan l yo: “Gen ladan yo n ap touye e genyen n ap kloure sou poto, genyen n ap bat ak kout fwèt nan sinagòg nou yo e genyen n ap pèsekite sot nan yon vil al nan yon lòt. Konsa, n ap responsab san tout moun jis ki koule sou tè a, soti nan san Abèl, yon moun ki te jis, rive nan san Zekarya, pitit Barakya, [yo rele l Yewoyada nan dezyèm liv Kwonik la,] li menm nou te asasinen ant tanp lan ak lotèl la. Anverite m ap di nou sa: Chatiman ap tonbe sou jenerasyon sa a pou tout bagay sa yo.”

Lefètke Zekarya te blame dirijan Izrayèl yo, “yo fè konplo sou do l e yo touye l ak kout wòch souzòd wa a, nan lakou kay Jewova a”. Men, jan Jezi anonse sa, Izrayèl ap peye pou tout san moun jis sa yo ki koule. Yo peye sa 37 an apre, nan ane 70 epòk nou an, lè lame women an te detwi Jerizalèm e plis pase yon milyon Juif te peri.

Pandan Jezi ap panse ak sitiyasyon terib sa a, li vin tris anpil. Li di yon fwa lòt ankò: “Jerizalèm, Jerizalèm [...], se pa ni de ni twa fwa mwen te vle rasanble pitit ou yo, menm jan yon manman poul rasanble ti poul li yo anba zèl li! Men, nou pa t vle sa. Gade! Yo kite kay nou an ban nou.”

Ansuit, Jezi di: “Apati jodi a, nou pa gendwa wè m ankò jiskaske nou di: ‘Benediksyon pou moun ki vini nan non Jewova a!’” Jou sa a ap rive pandan prezans Kris la, lè l ap vini nan Wayòm li an ki nan syèl la, e lè sa a moun ap kapab wè l ak je lafwa yo genyen.

Kounye a, Jezi deplase al nan yon zòn kote li ka wè kès yo konn met ofrann nan tanp lan e li t ap gade foul moun yo k ap mete lajan nan kès la. Moun rich yo t ap mete anpil pyès monnen. Men, gen yon malerèz ki vèv ki vini, li mete de ti pyès monnen ki prèske pa vo anyen.

Lè sa a, Jezi rele disip li yo, li di yo: “Anverite m ap di nou sa: Malerèz sa a ki vèv la mete plis pase tout moun ki t ap mete lajan nan kès yo konn met ofrann nan.” Yo dwe mande tèt yo kòman sa fè posib. Men esplikasyon li ba yo: “Yo menm, sa yo mete a pa deranje yo, men dam sa a ki nan nesesite a mete tout sa l te posede, tout sa l te gen pou l viv.” Apre Jezi fin di pawòl sa a, li ale, e se dènye fwa li te vin nan tanp lan.

Disip li yo t ap admire gwosè tanp lan e yo t ap admire jan l bèl. Youn nan yo di l: “Anseyan, gade! Ala de bèl wòch! Ala yon bèl konstriksyon!” Anfèt, selon sa yo rapòte, wòch yo gen plis pase 11 mèt longè, 5 mèt lajè ak 3 mèt wotè.

Jezi reponn: ‘Nou wè bèl konstriksyon sa a n ap gade a? Pa gen yon wòch k ap ret sou yon lòt wòch la a pou yo pa vide l atè.’

Apre Jezi fin di sa, li menm ak apot li yo travèse ravin Kidwòn e yo monte sou mòn Oliv. Detan yo la, yo kapab wè jan tanp lan estrawòdinè. Matye 23:25–24:3; Mak 12:41–13:3; Lik 21:1-6; 2 Kwonik 24:20-22.

▪ Ki sa Jezi fè pandan dènye vizit li nan tanp lan?

▪ Ki jan ipokrizi espè nan Lalwa yo ak Farizyen yo parèt aklè?

▪ Ki sa “kondanasyon jeyèn nan” vle di?

▪ Poukisa Jezi di vèv la te bay plis pase moun rich yo?