Chapit 120

Li nye Jezi nan lakou a

APRE Pyè ak Jan fin abandone Jezi nan jaden Jetsemane e yo chape poul yo ansanm ak lòt apot yo paske yo pè, rive yon kote, yo sispann kouri. Petèt, y al dèyè Jezi nan moman y ap mennen l lakay Àn. Lè Àn voye Jezi al jwenn Kayif, gran prèt la, Pyè ak Jan suiv li, detan yo ret nan yon bèl distans. Sanble, yo pè pou pwòp vi yo e anmenmtan yo enkyete paske yo ta renmen konnen sa k pral rive Mèt yo.

Lè yo rive lakay Kayif ki te yon gwo kay, yo kite Jan antre nan lakou a, etandone gran prèt la konnen l. Sepandan, yo kite Pyè kanpe deyò a bò baryè a. Men tousuit, Jan tounen al pale ak sèvant ki t ap veye baryè a, e li kite Pyè antre.

Nan moman sa a, li fè frèt, e sèvitè yo ak gad ki te souzòd gran prèt la te fè yon boukan dife. Pyè vin jwenn yo pou l ka chofe kò l pandan l ap tann pou l wè jan jijman Jezi ap fini. Pandan Pyè la, sèvant ki t ap veye baryè a ki te kite l antre a wè l pi byen nan limyè dife a ki klere, li di l: “Ou menm tou, ou te avèk Jezi, moun Galile a!”

Lè Pyè wè yo rekonèt li, li sezi, li nye Jezi devan yo tout, li di: “Mwen pa konnen l, ni m pa konprann sa w ap di a.”

Lè sa a, Pyè soti l al bò pòtay la. Pandan l la, gen yon lòt fi ki wè l e li di moun ki kanpe la yo tou: “Mesye sa a te avèk Jezi, moun Nazarèt la.” Li nye sa yon lòt fwa ankò e li sèmante, li di: “Mwen pa konn moun w ap pale a!”

Pyè rete nan lakou a, l ap eseye kamoufle kò l otank posib. Petèt, nan moman sa a, li pantan lè yon kòk chante nan fènwa granmmaten an. Pandan tan sa a, jijman Jezi ap kontinye. Sanble yo mennen l yon kote nan kay la pa anlè ki bay sou lakou a. Se sèten, Pyè ak lòt moun yo k ap tann anba a wè bann ale vini divès temwen yo mennen vin temwaye yo ap fè.

Gen inèdtan anviwon ki pase depi yo te rekonèt Pyè te ansanm ak Jezi. Kounye a, plizyè nan moun ki kanpe nan zòn nan vin kote l, yo di l: “Se sèten, ou menm tou, ou se youn nan yo. Dayè, fason w pale montre sa.” Youn nan moun yo se fanmi Malkis, li menm Pyè te koupe zòrèy li a. Li di: “Se pa ou menm mwen te wè nan jaden an avè l la?”

Pyè di avèk fòs: “Mwen pa konn misye!” Epi, li sèmante e li mande pou madichon tonbe sou li pou l eseye konvenk yo yo tout twonpe yo. Annefè, se mande li mande pou malè tonbe sou li si sa l di a pa laverite.

Pandan Pyè ap nye Jezi yon twazyèm fwa, yon kòk chante. E nan moman sa a, sanble Jezi parèt sou yon balkon ki bay sou lakou a e li vire gade Pyè. Menm kote a, Pyè sonje sa Jezi te di nan pyès aletaj la, sa gen kèk èdtan sèlman. Li te di l: “Anvan yon kòk chante de fwa, w ap gentan nye m twa fwa.” Lè sa a, Pyè mouri frèt, li sot deyò a e li kriye ak anpil lapenn akoz peche li fè a.

Ki jan sa fè rive? Ki jan Pyè fè nye Mèt li twa fwa youn dèyè lòt, apre l fin montre jan l gen asirans li solid anpil nan domèn espirityèl? Pa gen dout, Pyè pa t atann li t ap rankontre sitiyasyon sa yo. Yo tòde laverite e yo prezante Jezi kòm yon gwo kriminèl. Yo fè sa ki bon parèt mal, moun ki inosan parèt koupab. Konsa, akoz presyon Pyè pran nan okazyon sa a, li pèdi ekilib li. Bridsoukou, li pèdi tout bonsans li nan kesyon fidelite a. Sa te fè l tris pou l wè krent pou lòm paralize l. Nou swete pou sa pa janm rive nou! Matye 26:57, 58, 69-75; Mak 14:30, 53, 54, 66-72; Lik 22:54-62; Jan 18:15-18, 25-27.

▪ Ki jan Pyè ak Jan fè antre nan lakou gran prèt la?

▪ Pandan Pyè ak Jan nan lakou a, ki sa k ap pase anndan kay la?

▪ Konbyen fwa yon kòk chante, e konbyen fwa Pyè nye Kris la?

▪ Lefètke Pyè sèmante e li mande pou madichon tonbe sou li, ki sa sa vle di?

▪ Sa k fè Pyè nye Jezi?