Chapit 45

Li pa t sanble yon disip menm

LÈ Jezi desann bato a, li wè yon bagay efreyan! Gen de mesye ki fewòs anpil ki soti nan yon simityè ki toupre a e k ap kouri vin kote l. Yo gen demon sou yo. Etandone gen youn nan yo ki sanble pi vyolan pase lòt la e li gen plis tan depi li anba kontwòl demon, se li ki plis atire atansyon moun.

Depi yon bon bout tan, mesye sa a ki nan yon eta deplorab ap viv toutouni nan simityè a. Se toutan, lajounen kou lannuit, l ap rele san rete e l ap kòche kò l ak wòch. Li tèlman vyolan pèsonn pa pran chans pase nan wout sa a. Yo eseye mare l ak chenn, men li pete chenn yo e li kase fè ki mare pye l yo. Pa gen moun ki gen ase fòs pou metrize l.

Lè misye pwoche bò kot Jezi e li met ajenou nan pye l, demon ki sou li yo fè l pouse yon gwo rèl, li di: “Ki rapò mwen gen avè w, Jezi, Pitit Bondye Trèwo a? Sèmante devan Bondye ou pap toumante m.”

Jezi di l plizyè fwa: “Movèzespri, soti sou mesye a.” E apre sa, Jezi mande l: “Kòman w rele?”

Li reponn: “Mwen rele Rejiman, paske nou anpil.” Demon yo fete lè yo wè yon moun yo antre nan li ap soufri, e sanble yo pran plezi fè kò sou moun avèk lachte. Men, lè yo rankontre Jezi, yo sipliye l pou l pa voye yo nan twou san fon an. Yon lòt fwa ankò, nou wè jan Jezi gen anpil pouvwa. Li kapab venk menm demon ki fewòs. Sa montre tou demon yo konnen jijman final Bondye rezève pou yo menm ansanm ak chèf yo Satan Ledyab se lage li pral lage yo nan twou san fon an.

Twouve, gen yon twoupo kochon ki gen anviwon 2 000 kochon k ap manje toupre a sou mòn nan. Demon yo mande Jezi: “Pèmèt nou antre nan kochon yo.” Li parèt klè, demon yo pran plezi pou yo antre nan moun oswa nan bèt avèk mechanste. Lè Jezi pèmèt yo antre nan kochon yo, toule 2 000 kochon yo kouri al sou tèt falèz la e yo lage kò yo nan lanmè.

Lè moun ki t ap gade kochon yo wè sa, yo kouri al rakonte sa nan vil la ak nan zòn andeyò yo. Lè sa a, moun yo vini pou yo wè sa k pase. Lè yo rive, yo wè mesye ki te gen demon sou li a. Se pa ti sezi moun yo sezi dèske misye gen rad sou li, e dèske li ak tout bonsans li e li chita nan pye Jezi!

Moun ki te wè sa k pase a rakonte kòman mesye a fè geri. Yo rakonte moun yo tou jan kochon yo mouri yon fason dwòl. Lè moun yo tande sa, yo vin pè anpil, e yo priye Jezi angras pou l kite zòn nan. Jezi dakò ale e li monte abò bato a. Mesye ki te gen demon sou li a sipliye Jezi pou l kite l al avè l. Men, Jezi di l: “Al lakay ou, al jwenn fanmi w, epi rakonte yo tout sa Jewova fè pou ou e ki jan li te gen pitye pou ou.”

Jeneralman, Jezi bay moun li geri yo lòd pou yo pa di pèsonn sa, paske li pa vle moun tire konklizyon ki baze sou bagay egzajere moun ta ka rakonte. Men, eksepsyon sa a Jezi fè a apwopriye, paske mesye ki te gen demon sou li a pral bay moun petèt Jezi pap gen okazyon rankontre yo temwayaj. Anplis de sa, lefètke mesye sa a t ap la e sa t ap bay temwayaj sou bon aksyon Jezi te fè pou li a, sa t ap sèvi pou demanti rimè ki gendwa ap gaye konsènan pakèt kochon ki mouri yo.

Mesye ki te gen demon sou li a koute Jezi, epi l al nan tout Dekapòl la, li kòmanse rakonte tout sa Jezi te fè pou li, e tout moun sezi. Matye 8:28-34; Mak 5:1-20; Lik 8:26-39; Revelasyon 20:1-3.

▪ Poukisa sanble se yon sèl mesye ki gen demon sou li ki plis atire atansyon moun, alòske se de mesye ki gen demon sou yo?

▪ Ki sa k montre demon yo konnen yo pral lage yo nan twou san fon an?

▪ Poukisa li parèt klè demon yo renmen antre nan moun ak nan bèt?

▪ Poukisa Jezi mande mesye ki te gen demon sou li a pou l al rakonte lòt moun sa Li fè pou li, alòske li pa t janm mande lòt moun yo fè sa?