Chapit 88

Mesye rich la ak Laza

JEZI t ap pale ak disip li yo konsènan fason pou yo byen sèvi ak richès materyèl, li fè yo konnen yo pa kapab esklav richès e anmenmtan pou yo esklav Bondye. Farizyen yo ap koute tou e yo kòmanse pase Jezi nan rizib paske yo renmen lajan. Se poutèt sa li di yo: “Nou se moun ki deklare tèt nou jis devan lèzòm, men Bondye konnen kè nou. Paske, bagay ki gen anpil valè nan je lèzòm, se bagay ki repiyan nan je Bondye.”

Moman an rive pou bagay yo vire kont moun ki gen richès nan monn nan, ki gen pouvwa politik e ki gen otorite ak enfliyans nan domèn relijye. Yo gen pou yo tonbe plat atè. Men, moun ki rann yo kont yo bezwen Bondye yo, y ap leve yo byen wo. Jezi atire atansyon sou chanjman sa a lè l di Farizyen yo:

“Se Lalwa ak pawòl pwofèt yo yo te konn pwoklame jiskaske Jan [ki te konn batize moun nan] vini. Men, depi lè Jan vini, yo kòmanse pwoklame wayòm Bondye a kòm yon bon nouvèl, e tout kalite moun ap fè gwo efò pou yo antre ladan l. Anverite, li pi fasil pou syèl la ak tè a pase, pase pou yon ti moso nan yon lèt ki nan Lalwa pa ta akonpli.”

Espè nan Lalwa yo ak Farizyen yo fyè dèske yo rete atache ak Lwa Moyiz la dapre sa yo pretann. N ap sonje lè Jezi te fè mirak pou l fè yon mesye wè nan Jerizalèm, yo te di avèk ògèy: “Nou menm, se disip Moyiz nou ye. Nou konnen Bondye te pale ak Moyiz.” Men, kounye a, Lwa Moyiz la akonpli objektif li te genyen an, sètadi pou l mennen moun ki enb yo bay Jezi Kris, Wa Bondye chwazi a. Se sa k fè, lè Jan te kòmanse aktivite l, tout kalite moun, sitou moun ki enb yo ak moun ki pòv yo fè gwo efò pou yo vin anba dominasyon Wayòm Bondye a.

Piske Lwa Moyiz la ap akonpli kounye a, talè moun yo pap oblije suiv li ankò. Lalwa pèmèt moun divòse pou tout kalite rezon. Men kounye a, Jezi di: “Nenpòt moun ki divòse ak madanm li e k al marye ak yon lòt moun fè adiltè. E yon moun ki marye ak yon fi ki divòse ak mari l, moun sa a fè adiltè.” Se pa ti fache deklarasyon sa a fè Farizyen yo fache, sitou yo pèmèt moun divòse pou plizyè rezon!

Jezi kontinye pale ak Farizyen yo, li bay yon egzanp ki prezante de mesye sitiyasyon yo vin chanje nèt yon lè. Gade si w ka wè kiyès mesye sa yo reprezante, e ki sa chanjman sitiyasyon yo a vle di?

Jezi esplike: “Te gen yon mesye ki te rich. Li te konn abiye ak rad wouj vyolèt ak len, e chak jou se plezi l li t ap pran an granpanpan. Men, te gen yon pòv yo te rele Laza, ki te chaje ak maleng sou kò l, yo te konn vin met devan pòt li a. Laza te anvi plen vant li ak manje ki t ap sot sou tab mesye rich la e ki t ap tonbe atè. Chen te menm konn vin niche maleng li yo.”

Nan egzanp sa a, Jezi sèvi ak mesye rich la pou l reprezante chèf relijye juif yo ki gen ladan yo nonsèlman Farizyen yo, espè nan Lalwa yo, men tou Sadiseyen yo ak prèt an chèf yo. Yo rich ak privilèj ak avantaj nan domèn espirityèl, e yo aji menm jan ak mesye rich la. Lefètke yo abiye menm jan ak wa yo, ak rad wouj vyolèt, sa reprezante pozisyon privilejye yo genyen. Len blan an montre yo se moun ki jis nan je pa yo.

Klas moun rich sa a ki ògeye konsidere moun ki pòv yo, moun ki nan pèp la, avèk yon mepri total. Yo rele yo ‛am ha’arèts oswa moun ki nan mas pèp la. Konsa, mandyan an, Laza, reprezante moun chèf relijye yo refize bay bonjan manje ak privilèj nan domèn espirityèl. Se sa k fè, menm jan yo te meprize Laza paske kò l te kouvri ak maleng, se konsa tou yo meprize moun ki nan pèp la, kòmsi yo malad nan domèn espirityèl e yo sèlman bon pou ret ansanm ak chen. Poutan, moun ki fè pati klas Laza yo grangou e yo swaf jwenn manje nan domèn espirityèl, se sa k fè yo devan pòt la, y ap chèche jwenn nenpòt ti kal manje espirityèl ki ta tonbe sot sou tab mesye rich la.

Kounye a, Jezi kontinye esplike jan sitiyasyon mesye rich la ak sitiyasyon Laza vin chanje. Ki jan sitiyasyon yo chanje, e ki sa chanjman sa yo reprezante?

Sitiyasyon an chanje ni pou mesye rich la ni pou Laza

Mesye rich la reprezante chèf relijye yo ki benefisye privilèj ak avantaj nan domèn espirityèl, e Laza reprezante moun ki nan pèp la ki swaf jwenn manje espirityèl. Jezi kontinye istwa a, li montre sitiyasyon mesye yo chanje totalman.

Jezi di: “Ebyen, sa k vin pase, pòv la vin mouri, e zanj yo pote l al mete bò kote Abraram. Epi, mesye rich la vin mouri tou, e yo antere l. Pandan li nan adès, e li te nan touman, li leve je l, e li wè Abraram byen lwen ak Laza bò kote l.”

Piske mesye rich la ak Laza se pa moun ki egziste vre, men yo chak reprezante yon kategori moun, lojikman lanmò yo se yon senbòl tou. Ki sa lanmò yo chak reprezante?

Jezi te fèk fin atire atansyon sou yon sitiyasyon ki chanje, lè l te di: ‘Se Lalwa ak pawòl pwofèt yo yo te konn pwoklame jiskaske Jan ki te konn batize moun nan vini. Men, depi lè Jan vini, yo kòmanse pwoklame wayòm Bondye a.’ Kidonk, se travay predikasyon Jan ak Jezi Kris ki fè mesye rich la ak Laza mouri anrapò ak ansyen sitiyasyon yo.

Moun ki fè pati klas Laza a ki enb e ki repanti mouri anrapò ak ansyen sitiyasyon espirityèl mizerab yo te ladan l lan e yo vin nan yon pozisyon kote yo jwenn favè Bondye. Byenke anvan sa yo te met espwa yo nan chèf relijye yo pou yo jwenn ti kal manje k ap sot sou tab yo tonbe atè nan sans espirityèl, kounye a, verite Jezi anseye ki sot nan Ekriti yo satisfè bezwen yo genyen. Konsa, yo vin bò kote Gran Abraram nan, Jewova Dye, sètadi nan yon pozisyon privilejye.

Yon lòt bò, moun ki fè pati klas mesye rich la vin pèdi favè Bondye, paske yo derefize aksepte mesaj Wayòm nan Jezi te anseye a. Konsa, yo mouri anrapò ak pozisyon yo te ye kote yo te sanble gen favè Bondye. Anfèt, yo pale de yo kòmsi yo nan yon touman senbolik. Koute sa mesye rich la di kounye a:

“Abraram papa, gen pitye pou mwen, voye Laza tranpe pwent dwèt li nan dlo pou l ka rafrechi lang mwen, paske m ap soufri nan flanm dife sa a.” Mesaj jijman Bondye yo ki boule kou dife disip Jezi yo ap pwoklame a se sa k ap toumante moun ki fè pati klas mesye rich la. Yo vle pou disip yo sispann preche mesaj sa yo, konsa y ap jwenn yon ti soulajman anba touman y ap sibi a.

“Men, Abraram di li: ‘Pitit mwen, sonje ou te jwenn tout bon bagay pa w yo deja lè w te vivan, tandiske Laza se move bagay li te jwenn. Kounye a, l ap jwenn konsolasyon isit la, men ou menm w ap soufri. Epitou, gen yon twou san fon ki separe nou. Konsa, menmsi yon moun ta vle sot bò isit la al jwenn nou, li pap kapab, ni moun pa ka sot kote nou ye a pou l vin bò isit la.’”

Yon chanjman total konsa ki fèt ant moun ki fè pati klas Laza a ak moun ki fè pati klas mesye rich la se yon bagay ki vrèman jis e ki kòrèk! Chanjman sa a fèt kèk mwa apre, nan moman fèt Pannkòt ane 33 epòk nou an, lè nouvo alyans lan te ranplase ansyen alyans ki te fèt sou Lalwa a. Lè sa a, sa vin parèt byen klè se disip yo ki resevwa favè Bondye, se pa Farizyen yo ak lòt chèf relijye yo. Kidonk, “twou san fon” ki separe moun ki senbolize mesye rich la ak disip Jezi yo reprezante jijman Bondye a ki jis e ki pap chanje.

Apre sa, men sa mesye rich la di “papa Abraram”: “Voye [Laza] lakay papa m, paske mwen gen senk frè.” Konsa, mesye rich la montre li rekonèt li gen yon relasyon pi sere ak yon lòt papa, e anfèt lòt papa sa a se Satan Ledyab. Mesye rich la mande pou Laza adousi mesaj jijman Bondye yo, yon fason pou yo pa mete “senk frè” l yo, sètadi asosye li genyen nan domèn relijye yo, nan “touman sa a”.

“Men, Abraram di li: ‘Yo gen Moyiz ak Pwofèt yo, se pou yo koute yo.’” Annefè, si “senk frè” yo ta vle chape anba touman, sèl sa yo ta dwe fè se ta obeyi sa Moyiz ak Pwofèt yo te ekri ki montre se Jezi ki Mesi a, e pou yo vin disip li. Men, mesye rich la di: “Non, papa Abraram, yo pap koute, men si se yon moun ki sot pami mò yo ki al kote yo, y ap repanti.”

Sepandan, Abraram di l: “Si yo pa koute Moyiz ak Pwofèt yo, menmsi yon moun sot pami mò yo, yo pap kite l konvenk yo.” Bondye pa pral bay siy espesyal ni li pa pral fè mirak pou l konvenk moun yo. Yo dwe li Ekriti yo e yo dwe mete yo ann aplikasyon si yo vle jwenn favè l. Lik 16:14-31; Jan 9:28, 29; Matye 19:3-9; Galat 3:24; Kolosyen 2:14; Jan 8:44.

▪ Poukisa lanmò mesye rich la ak lanmò Laza se yon bagay senbolik, e ki sa lanmò yo chak reprezante?

▪ Ki chanjman Jezi di ki fèt nan kòmansman aktivite Jan?

▪ Ki sa k pap la ankò apre lanmò Jezi, e ki efè sa ap genyen sou kesyon divòs la?

▪ Nan egzanp Jezi bay la, kiyès mesye rich la reprezante e kiyès Laza reprezante?

▪ Nan ki touman mesye rich la ye, e ki sa l mande pou l ka jwenn soulajman?

▪ Ki sa “twou san fon” an reprezante?

▪ Kiyès ki vrè papa mesye rich la, e kiyès ki senk frè l yo?