Chapit 78

Montre nou pare!

APRE Jezi fin avèti foul moun yo pou yo pa gen tanta e li avèti disip li yo pou yo pa bay bagay materyèl yo twòp enpòtans, men ankourajman li bay: “Nou pa bezwen pè, nou menm ti twoupo a, paske Papa nou twouve li bon pou li ban nou wayòm nan.” Konsa, li fè konnen se sèlman yon ti kantite moun (144 000, jan sa te vin parèt pi devan) k ap nan Wayòm syèl la. Pifò moun k ap resevwa lavi ki pap janm fini an pral viv sou tè a anba dominasyon Wayòm nan.

Vrèmanvre, “wayòm nan” se yon kado estrawòdinè! Pou Jezi montre sa disip yo ta dwe fè lè yo resevwa kado sa a, men konsèy li ba yo: “Vann bagay nou genyen yo, bay moun ki nan nesesite.” Wi, yo ta dwe sèvi ak sa yo posede pou ede lòt moun nan domèn espirityèl e konsa y ap anpile “yon trezò nan syèl la ki pap janm fini”.

Ansuit, Jezi konseye disip li yo pou yo montre yo pare pou lè l retounen. Li di: “Mare ren nou, epi limen lanp nou. Se pou nou tankou esklav k ap tann mèt yo tounen sot marye, dekwa pou lè l rive epi l frape, yo ka ouvri pou li tousuit. Byennere esklav sa yo, esklav lè mèt yo tounen, li jwenn yo t ap veye! Anverite m ap di nou sa: L ap abiye l, l ap fè yo chita bò tab la, e l ap vin bò kote yo pou l sèvi yo.”

Nan egzanp sa a, moun ka wè jan sèvitè yo pare lefètke yo monte ke rad long yo gen sou yo a e yo foure l anba senti yo e lefètke yo kontinye fè travay yo nan nuit lan nan limyè lanp ki plen luil. Men sa Jezi esplike: ‘Si mèt la rive nan dezyèm vèy nuit lan [soti anviwon nevè diswa pou rive minui], oubyen menm nan twazyèm vèy la [soti minui pou rive anviwon twazè dimaten], e li jwenn yo ap tann, yo byennere!’

Mèt la rekonpanse sèvitè l yo yon fason espesyal. Li fè yo chita bò tab la e li kòmanse sèvi yo. Li pa trete yo tankou esklav, men li trete yo tankou zanmi ki fidèl. Ala yon bèl rekonpans yo resevwa poutèt yo te kontinye ap travay pou mèt yo tout lannuit pandan yo t ap ret tann li tounen! Alafen, Jezi di: “Ebyen nou menm tou, montre nou pare, paske se nan yon lè nou pa panse Pitit lòm nan ap vini.”

Kounye a, Pyè mande: “Seyè, èske se pou nou ou bay egzanp sa a oubyen pou tout moun?”

Jezi pa reponn dirèkteman, men li bay yon lòt egzanp. Li mande: “Kiyès ki vrèman entandan fidèl, ki prevwayan, mèt li ap etabli sou gwoup sèvitè l yo pou l toujou ba yo kantite pwovizyon yo bezwen nan moman apwopriye a? Esklav sa a byennere si lè mèt li rive, li jwenn se sa l ap fè! Anverite m ap di nou sa: L ap mete l responsab tout byen l yo.”

Li klè “mèt” la se Jezi Kris. “Entandan” an reprezante “ti twoupo” disip yo fòme a, lè nou konsidere yo tout ansanm. “Gwoup sèvitè” yo se menm ti twoupo sa a ki gen 144 000 moun ki resevwa Wayòm syèl la, men ekspresyon sa a mete aksan sou travay yo chak ap fè. “Byen” yo bay entandan fidèl la pou l pran swen yo se byen Mèt la, Wa a, genyen sou tè a, sa gen ladan l moun sou tè a k ap viv anba dominasyon Wayòm nan.

Jezi kontinye bay egzanp lan, li montre se pa tout moun ki fè pati klas entandan sa a oubyen klas esklav sa a k ap rete fidèl. Men sa li esplike: “Si esklav sa a ta di nan kè l: ‘Mèt mwen ap fè reta,’ epi li ta kòmanse ap bat sèvitè yo ak sèvant yo, li ta manje, li ta bwè, epi li ta vin sou, mèt esklav sa a ap vini nan yon jou li pa atann [...], l ap ba l yon pinisyon ki rèd anpil.”

Jezi fè konnen vini li vini an leve yon dife nan mitan Juif yo, etandone gen kèk ki aksepte ansèyman l yo, e gen kèk lòt ki rejte yo. Sa gen plis pase twazan, li te batize nan dlo, men kounye a batèm li nan lanmò a prèske fini. Li di: “Se pa ti boulvès m ap genyen pou jiskaske mwen fin pran l!”

Apre Jezi fin di disip li yo bagay sa yo, li pale ak foul la ankò. Li gen lapenn poutèt yo derefize aksepte prèv klè yo genyen sou kiyès li ye e sou sans sa genyen. Li di: “Lè nou wè yon nyaj parèt nan lwès, tousuit nou di: ‘Li pral fè yon gwo lapli ak gwo van,’ e sa fèt vre. E lè nou wè van an ap soufle sot nan sid, nou di: ‘Li pral fè yon sèl chalè,’ e se sa k pase vre. Bann ipokrit! nou konn egzamine jan tè a ak syèl la ye, men kòman fè nou pa konn ki jan pou n egzamine tan sa a n ap viv la a?” Lik 12:32-59.

▪ Konbyen moun ki nan “ti twoupo” a, e ki sa yo resevwa?

▪ Ki jan Jezi atire atansyon sou nesesite pou sèvitè l yo pare?

▪ Nan egzanp Jezi bay la, kiyès ki “mèt” la, “entandan” an, “gwoup sèvitè” yo, ak “byen” yo?