Chapit 75

Sa ki bay kè kontan

PANDAN Jezi t ap preche nan Galile, li te fè mirak, e kounye a li refè menm bagay la nan Jide. Pa egzanp, li chase yon demon ki sou yon mesye ki anpeche mesye a pale. Foul moun yo sezi, men moun k ap kritike l yo di menm bagay moun yo te di nan Galile. Yo pretann “se Beyèlzeboub, chèf demon yo, ki ba l pouvwa pou l chase demon”. Gen lòt moun ki ta renmen Jezi bay plis prèv sou kiyès li ye, e yo eseye tante Jezi lè yo mande l pou l ba yo yon siy ki sot nan syèl la.

Piske Jezi konnen sa k nan panse moun k ap kritike l nan Jide yo, li ba yo menm repons li te bay moun ki t ap kritike l nan Galile yo. Li fè konnen tout wayòm ki gen divizyon ladan l ap tonbe. “Se sa k fè” li mande: “Si Satan tou ap lite ak tèt li, ki jan wayòm li an ap fè ret kanpe?” Li montre moun k ap kritike l yo an danje lè l di: “Si se grasa lespri sen Bondye [“dwèt Bondye”, nòt anba paj] mwen chase demon, wayòm Bondye a rive sou nou toutbon.”

Moun ki te wè mirak Jezi yo ta dwe reyaji devan mirak sa yo menm jan ak moun ki te wè Moyiz ap fè yon mirak sa gen plizyè syèk. Moun yo te di: “Se dwèt Bondye!” Se te “dwèt Bondye” tou ki te grave Dis Kòmandman yo sou wòch plat yo. E se “dwèt Bondye”, sètadi lespri sen l oswa fòs aktif li, ki pèmèt Jezi chase demon e ki pèmèt li geri malad. Donk, Wayòm Bondye a rive sou moun sa yo k ap kritike Jezi, etandone Jezi se Wa Bondye chwazi pou dirije Wayòm nan e li la a nan mitan yo.

Apre sa, Jezi bay yon egzanp pou l montre pouvwa li genyen pou l chase demon se prèv ki montre li gen pouvwa sou Satan, menm jan yon moun ki gen plis fòs pase yon gason vanyan ki byen ame k ap veye kay li atake l e li venk li. Epitou, Jezi bay yon egzanp li te bay nan Galile konsènan yon movèzespri. Movèzespri a soti sou yon moun, men etandone moun nan pa ranpli kote ki vid la ak bon bagay, movèzespri a retounen ak sèt lòt, e moun sa a vin nan yon eta ki pi mal pase jan l te ye anvan an.

Pandan moun yo t ap koute ansèyman sa yo, gen yon dam nan foul la ki leve vwa l li di: “Byennere fi ki te pote w nan vant li e ki te ba w tete a!” Piske tout fi juif ta renmen manman yon pwofèt e sitou yo ta renmen manman Mesi a, nou ka konprann poukisa dam sa a di sa. Sanble li panse Mari dwe kontan anpil poutèt li se manman Jezi.

Men, Jezi korije dam nan byen vit anrapò ak sa ki bay vrè kè kontan an. Li reponn: “Now, di pito: Byennere moun ki tande pawòl Bondye e ki pratike l!” Jezi pa janm fè konprann manman l Mari ta dwe resevwa yon onè espesyal. Okontrè, li montre yon moun ap jwenn vrè kè kontan an lè l se yon sèvitè Bondye ki fidèl, se pa relasyon l genyen oswa sa l reyalize k ap fè sa.

Menm jan Jezi te fè nan Galile, li reprimande moun Jide yo poutèt yo mande l pou l ba yo yon siy ki sot nan syèl la. Li di sèl siy y ap ba yo se siy Yona a. Yona te vin yon siy poutèt li te pase twa jou nan vant pwason an e poutèt li te preche avèk kran, sa ki te pouse moun Niniv yo repanti. Jezi di: “Men gade! gen yon moun la a ki pi enpòtan pase Yona.” Menm jan an tou, rèn Cheba a te sezi wè sajès Salomon genyen. Anplis, Jezi di: “Men gade! gen yon moun la a ki pi enpòtan pase Salomon.”

Jezi esplike lè yon moun limen yon lanp, li pap mete l yon kote ki kache ni anba yon pànye, men l ap mete l sou yon etajè pou moun ka wè limyè a. Petèt Jezi vle fè konprann lè l ap anseye e lè l ap fè mirak devan moun rebèl ki pami moun k ap koute l yo se tankou lè yon moun kache limyè yon lanp. Je moun sa yo pa fikse sou yon sèl bagay, konsa mirak li fè yo pa atenn objektif yo.

Jezi fèk chase yon demon ki te sou yon mesye e li fè mesye a ki te bèbè pale. Sa ta dwe pouse moun ki gen je yo fikse sou yon sèl bagay yo pou yo fè lwanj pou aksyon estrawòdinè sa a e pou yo pwoklame bon nouvèl la. Epoutan, se pa sa moun sa yo k ap kritike l yo fè. Se sa k fè Jezi di finalman: “Donk, veye pou limyè ki nan ou a pa fènwa. Kidonk, si tout kò w klere, san l pa gen okenn fènwa ditou, l ap klere menm jan ak yon lanp k ap ba w limyè.” Lik 11:14-36; Egzòd 8:18, 19; 31:18; Matye 12:22, 28.

▪ Ki jan moun yo reyaji lè Jezi geri mesye a?

▪ Ki sa “dwèt Bondye” ye, e ki jan Wayòm Bondye a te rive sou moun ki t ap koute Jezi yo?

▪ Ki sa ki bay vrè kè kontan an?

▪ Ki jan yon moun ka gen je l fikse sou yon sèl bagay?