Chapit 114

Soupe Memoryal la

APRE Jezi fin lave pye apot li yo, li site Sòm 41:9 ki di: ‘Moun ki te konn manje nan pen m nan soulve kont mwen.’ Apre sa, lespri l vin boulvèse, li di: “Gen youn nan nou ki pral livre m.”

Apot yo vin tris, epi youn apre lòt yo di Jezi: “Se pa mwen, pa vre?” Menm Jida Iskaryòt mande l sa tou. Jan, ki chita toupre Jezi bò tab la, kage sou lestomak Jezi e li mande l: “Seyè, kiyès sa a?”

Jezi reponn: “Se youn nan nou douz la k ap mete men l nan bòl la avè m k ap livre m. Se vre, Pitit lòm nan pral kite nou, jan sa te ekri sou li a. Men, malè pou moun sa a ki livre Pitit lòm nan! Li t ap pi bon pou moun sa a si l pa t fèt.” Apre sa, Satan antre nan Jida ankò, paske l jwenn yon jwen nan kè Jida ki vin mechan. Apre sa, nan menm sware a, se avèk rezon Jezi rele Jida “pitit destriksyon an”.

Kounye a, Jezi di Jida: “Sa w ap fè a, fè l pi vit.” Pa gen youn nan lòt apot yo ki konprann sa Jezi vle di. Gen kèk ladan yo ki panse, kòm se Jida ki gen kès lajan an nan men l, Jezi di l pou l “achte bagay ki nesesè pou fèt la”, oswa pou l al bay pòv yo yon bagay.

Apre Jida fin ale, Jezi mete yon nouvo selebrasyon oubyen yon nouvo komemorasyon sou pye ansanm ak apot fidèl li yo. Li pran yon pen, li di Bondye mèsi, li kase l, li ba yo l, epi li di: “Men. Manje.” Apre sa, li di: “Sa a reprezante kò m mwen pral bay pou nou. Kontinye fè sa pou nou montre nou sonje m.”

Lè yo chak fin manje nan pen an, Jezi pran yon koup diven, sandout se katriyèm koup yo te itilize nan fèt Pak la. Li priye Bondye sou li pou l di l mèsi ankò, li ba yo bwè ladan l, epi li di: “Koup sa a reprezante nouvo alyans lan ki fèt grasa san m ki pral koule pou nou.”

Anfèt, sa Jezi fè a se Memoryal lanmò l. Se yon selebrasyon pou moun fè chak ane, nan dat 14 Nizan, pou yo montre yo sonje l, jan l di a. L ap fè moun k ap selebre fèt sa a sonje sa Jezi ak Papa l ki nan syèl la fè pou pèmèt limanite chape anba kondanasyon amò a. Pou Juif ki vin disip Kris yo, selebrasyon sa a ap ranplase fèt Pak la.

Nouvo alyans, ki vin antre an fonksyon grasa san Jezi vèse a, ranplase ansyen alyans Lalwa a. Se Jezi Kris ki Medyatè ant de pati ki fè alyans yo: yon bò, gen Jewova Dye, e lòt bò a, gen 144 000 kretyen ki vin fèt grasa lespri sen. Nonsèlman alyans sa a fèt pou moun ka jwenn padon pou peche yo, men grasa li gen yon nasyon ki vin egziste, e se moun ki wa e ki prèt ki nan nasyon sa a. Matye 26:21-29; Mak 14:18-25; Lik 22:19-23; Jan 13:18-30; 17:12; 1 Korentyen 5:7.

▪ Ki pwofesi nan Bib la Jezi site konsènan youn nan konpayon l yo, e ki aplikasyon li fè sou sa?

▪ Poukisa apot yo vin tris anpil, e ki sa yo chak mande Jezi?

▪ Ki sa Jezi di Jida pou l fè, men ki jan lòt apot yo konprann sa Jezi di l la?

▪ Ki selebrasyon Jezi mete sou pye apre Jida fin ale, e poukisa li fè l?

▪ Site de pati ki fè nouvo alyans lan, e ki sa alyans sa a reyalize?