Chapit 2

Yo onore l anvan l fèt

APRE zanj Gabriyèl fin di Mari li pral fè yon pitit gason k ap wa pou toutan, Mari mande l: “Kòman sa ap fè rive, piske mwen pa janm gen relasyon ak okenn gason?”

Zanj Gabriyèl di l: “Lespri sen ap vin sou ou, e pisans Trèwo a ap kouvri w. Se pou rezon sa a tou, timoun k ap fèt la, y ap rele l sen e y ap rele l Pitit Bondye.”

Men sa zanj Gabriyèl di Mari apre sa pou l ede l kwè mesaj la: “Epi, gade! Elizabèt, fanmi w, li menm yo te di ki pa ka fè pitit la, li menm tou li ansent yon tigason, pandan l tou granmoun nan. Kounye a li sou sizyèm mwa li. Paske, pa gen yon pawòl ki enposib pou Bondye reyalize.”

Mari aksepte sa Gabriyèl di l la. E ki jan l reyaji? Mari di: “Mwen se esklav Jewova! Se pou sa rive m jan w di a.”

Tousuit apre zanj Gabriyèl fin ale, Mari prepare l pou l al vizite Elizabèt, k ap viv ak mari l, Zekarya, nan yon zòn nan Jide ki gen mòn. Kòm Mari abite Nazarèt, l ap gen pou l fè yon vwayaj byen long k ap dire petèt twa ou kat jou.

Finalman, lè Mari rive lakay Zekarya, li antre e li salye moun yo. Nan moman sa a, Elizabèt vin ranpli ak lespri sen, e li di Mari: “Ou beni pami tout fi, e pitit ki nan vant ou an beni tou! Kòman m fè gen privilèj sa a, pou manman Seyè m nan vin wè m? Paske, ou wè, lè m tande salitasyon w lan, tibebe ki nan vant mwen an sote tèlman l kontan.”

Lè Mari tande sa, men sa li reponn pou l montre rekonesans li gen nan kè l: “M ap fè lwanj pou Jewova, e kè m pa ka pa kontan anpil grasa Bondye, Sovè m nan. Paske, li voye je l gade esklav li a ki nan yon kondisyon ki ba. Paske, depi kounye a, tout jenerasyon pral deklare m byennere. Paske, Toupisan an fè gwo bagay pou mwen.” Sepandan, byenke Mari jwenn gwo onè sa a, se Bondye li bay tout glwa a. Li di: “Non li se yon non ki sen. E jenerasyon apre jenerasyon, li fè moun ki gen lakrentif pou li yo mizèrikòd.”

Mari kontinye louwe Bondye ak yon chan ki gen yon pwofesi Jewova enspire l pou l chante. Men sa l di: “Li aji ak fòs ponyèt li. Li gaye moun ki montre yo gen ògèy nan entansyon yo gen nan kè yo. Li desann moun ki gen pouvwa yo sou twòn yo, e li leve moun ki ba yo. Li bay moun ki nan grangou yo bon bagay jis yo satisfè nèt, e li voye moun ki rich yo ale san anyen. Li vin ede Izrayèl, sèvitè l la, pou l montre li sonje pwomès li te fè pou l demontre mizèrikòd pou Abraram ak desandan l yo pou toutan.”

Mari rete ak Elizabèt pandan anviwon twa mwa, e pa gen dout nan sa, li ede Elizabèt anpil pandan dènye semèn ki rete pou Elizabèt akouche yo. Se vrèman yon bon bagay lefètke de medam fidèl sa yo, ki ansent grasa entèvansyon Bondye, te ansanm nan epòk beni sa a nan lavi yo!

Èske w remake jan yo te onore Jezi anvan menm li fèt? Elizabèt te rele l “Seyè m nan”, epi tibebe ki te nan vant Elizabèt la te sote tèlman l te kontan lè Mari te parèt la. Sepandan, annapre gen moun ki pa t montre respè pou Mari ak pitit li a ki pral fèt la, jan nou pral wè sa. Lik 1:26-56.

▪ Ki sa zanj Gabriyèl di pou l ede Mari konprann fason l ap vin ansent?

▪ Ki jan yo onore Jezi anvan l fèt?

▪ Ki sa Mari di nan yon chan ki gen yon pwofesi pou l bay Bondye louwanj?

▪ Pandan konbyen tan Mari rete ak Elizabèt, e poukisa li te bon pou Mari rete ak Elizabèt pandan tan sa a?