Chapit 28

Yo poze l kesyon konsènan fè jèn

SA FÈ prèske ennan depi Jezi te asiste fèt Pak ane 30 epòk nou an. Kounye a, Jan ki konn batize moun nan nan prizon depi plizyè mwa. Byenke li te vle pou disip li yo vin disip Kris, se pa yo tout ki fè sa.

Kounye a, pandan Jan nan prizon, kèk nan disip li yo vin kot Jezi e yo mande l: “Poukisa nou menm ak Farizyen yo nou fè jèn, men disip pa w yo pa fè jèn?” Farizyen yo fè jèn de fwa pa semèn, se yon abitid ki gen nan relijyon yo a. Petèt, se menm koutim nan disip Jan yo ap suiv. Li posib tou se paske Jan nan prizon ki fè yo fè jèn pou montre yo nan lapenn, e y ap mande tèt yo poukisa disip Jezi yo pa montre yo nan lapenn menm jan ak yo.

Jezi reponn yo, li di: “Toutotan lemarye a la avèk zanmi l yo, yo pa gen okenn rezon pou yo nan lapenn, pa vre? Men, gen jou k ap vini kote y ap pran lemarye a nan men yo, lè sa a y ap fè jèn.”

Disip Jan yo dwe sonje Jan li menm te pale de Jezi antanke Lemarye a. Se poutèt sa, pandan Jezi la avèk yo, Jan pa t ap janm wè li bon pou li menm li fè jèn, menm jan disip Jezi yo pa wè li bon pou yo fè jèn. Men, annapre, lè Jezi mouri, disip li yo t apral nan lapenn e yo t apral fè jèn. Men, lè l resisite e li monte nan syèl la, pa t ap gen rezon ankò pou yo fè jèn pou montre yo nan lapenn.

Apre sa, Jezi bay egzanp sa yo: “Pèsonn pap pyese yon vye rad ak yon moso twal nèf. Paske, moso twal nèf la pi fò, l ap pati ak moso nan vye rad la, e rad la ap vin chire plis toujou. Nitou, moun pap met diven ki fèk fèt nan bidon an po ki ize. Si yo fè sa, bidon yo ap pete, diven an ap koule atè e bidon yo ap tou elimine. Men, moun met diven ki fèk fèt nan bidon an po ki nèf.” Ki rapò egzanp sa yo genyen ak kesyon fè jèn nan?

Lè Jezi te bay egzanp sa yo, se pou l te ka ede disip Jan ki te konn batize moun nan konprann pèsonn pa ta dwe atann pou disip pa l yo konfòme yo ak ansyen koutim ki nan relijyon juif la, tankou koutim fè jèn nan. Jezi pa t vin pou l pyese ansyen koutim Juif yo t ap suiv nan fason yo adore Bondye, ni li pa t vin pou l kontinye kenbe koutim sa yo ki te rive nan moman pou yo rejte yo. Krisyanis la pa t gen pou l konfòme l ak relijyon Juif yo t ap pratike nan epòk la, yon relijyon ki chaje ak tradisyon lèzòm. Non, li pa t ap sanble ni ak yon moso twal nèf yo pyese sou yon vye rad, ni ak diven ki fèk fèt yo mete nan yon bidon an po ki ize. Matye 9:14-17; Mak 2:18-22; Lik 5:33-39; Jan 3:27-29.

▪ Kiyès ki fè jèn, e poukisa yo fè sa?

▪ Poukisa disip Jezi yo pa fè jèn pandan Jezi la ak yo? Pi devan, ki jan rezon pou yo fè jèn nan t apral disparèt nan yon ti tan?

▪ Ki egzanp Jezi bay, e ki sans egzanp sa yo genyen?