Chapit 60

Yon apèsi sou glwa Kris nan Wayòm li

JEZI rive nan zòn Sezare Filip, l ap anseye yon foul moun e apot yo la pami foul la. Li anonse yo yon bagay ki fè yo sezi. Men sa l di yo: “Anverite m ap di nou sa: Gen kèk nan moun ki kanpe la a ki pap mouri toutotan yo pa wè Pitit lòm nan k ap vini nan wayòm li.”

Disip yo dwe ap mande tèt yo: ‘Ki sa Jezi vle di la a?’ Anviwon yon semèn apre, Jezi pran Pyè, Jak ak Jan avè l, li monte nan yon mòn ki byen wo. Petèt se lannuit li fè sa, piske disip li yo gen dòmi nan je yo. Pandan Jezi ap priye, aparans li chanje devan yo. Figi l vin klere tankou solèy la, e rad sou li vin ap briye tankou limyè.

Ansuit, gen de pèsonaj, “Moyiz ak Eliya”, ki parèt e k ap pale ak Jezi sou ‘ale li gen pou l ale detan l Jerizalèm nan’. Sanble ale Jezi gen pou l ale a gen rapò ak lanmò l ansanm ak rezirèksyon l ki t apral fèt annapre. Kidonk, konvèsasyon sa a montre lanmò Jezi nan imilyasyon se pa yon bagay li dwe evite, jan Pyè ta renmen sa fèt la.

Kounye a, disip yo reveye, yo sezi pou sa yo wè ak sa yo tande. Byenke se yon vizyon, li tèlman parèt reyèl, Pyè di: “Seyè, se yon bon bagay lefètke nou la a. Si w vle, m ap monte twa tant, youn pou ou, youn pou Moyiz e youn pou Eliya.”

Pandan Pyè ap pale, gen yon nyaj klere ki kouvri yo, e gen yon vwa ki soti nan nyaj la ki di: “Se Pitit Gason m, Pitit mwen renmen anpil la, li menm mwen apwouve a. Koute l.” Lè disip yo tande vwa a, yo tonbe fas atè. Men, Jezi di: “Leve, nou pa bezwen pè.” Lè yo leve, yo pa wè pèsonn, sof Jezi.

Nan demen, lè y ap desann mòn nan, Jezi ba yo lòd, li di yo: “Pa rakonte pèsonn vizyon an toutotan Pitit lòm nan pa leve sot nan lanmò.” Lefètke Eliya parèt nan vizyon an, sa soulve yon kesyon nan lespri disip yo. Yo mande Jezi: “Poukisa espè nan Lalwa yo di Eliya dwe vini anvan?”

Jezi reponn yo, li di: “Eliya vini deja, men yo pa t rekonèt li.” Men, se konsènan Jan ki te konn batize moun nan Jezi ap pale, li menm ki te jwe yon wòl ki sanble ak wòl Eliya te jwe a. Jan te prepare chemen an pou Kris, menm jan Eliya te fè sa pou Elicha.

Se pa ti fòs vizyon sa a bay ni Jezi ni disip yo! Nan yon sans, vizyon an bay yon apèsi sou glwa Kris nan Wayòm li. Anfèt, disip yo wè “Pitit lòm nan k ap vini nan wayòm li”, jan Jezi te pwomèt sa yon semèn anvan. Apre lanmò Jezi, Pyè te ekri konsènan tounen yo te ‘vin tounen temwen grandè Kris ak je yo pandan yo te avè l sou mòn sakre a’.

Farizyen yo te mande Jezi pou l ba yo yon siy ki montre li se moun Bondye pwomèt nan Ekriti yo, moun Li chwazi pou vin Wa a. Jezi pa t ba yo okenn siy nan sans sa a. Yon lòt bò, disip ki pwòch Jezi yo te gen posiblite wè l lè aparans li te chanje a, sa ki pwouve pwofesi konsènan Wayòm nan se verite. Se poutèt sa Pyè te ekri annapre: “Se sa k fè, pawòl ki ekri nan pwofesi yo vin pi sèten pou nou.” Matye 16:13, Mt 16:28–17:13; Mak 9:1-13; Lik 9:27-37; 2 Pyè 1:16-19.

▪ Anvan Kris mouri, ki jan kèk moun te wè l k ap vini nan Wayòm li?

▪ Konsènan ki sa Moyiz ak Eliya ap pale ak Jezi nan vizyon an?

▪ Poukisa vizyon sa a fòtifye disip yo anpil?