Òganizasyon mondyal yo a ak travay y ap fè

YO SÈVI ak plizyè mwayen ki makònen ansanm pou dirije travay predikasyon an nan plis pase 230 peyi. Kolèj santral la, ki nan biwo mondyal Bwouklin nan Nouyòk la, ap bay direksyon. Chak ane, Kolèj santral la voye reprezantan l nan divès rejyon nan lemonnantye pou yo reyini ak reprezantan filyal yo ki nan rejyon sa yo. Nan filyal yo, ou jwenn yon komite filyal ki gen twa jiska sèt manm anviwon k ap sipèvize travay k ap fèt nan peyi ki sou reskonsablite yo a. Kèk biwo filyal ki gen enprimri sèvi ak près wotatif, machin ki kapab enprime rapid rapid. Yo divize peyi oswa tèritwa chak filyal ap sipèvize an distri, e distri yo divize an sikonskripsyon. Chak sikonskripsyon gen anviwon 20 kongregasyon. Gen yon siveyan distri ki vizite sikonskripsyon ki nan distri pa l, youn apre lòt. Chak ane, yo fè de asanble nan chak sikonskripsyon. Gen yon siveyan sikonskripsyon tou ki vizite chak kongregasyon ki nan sikonskripsyon pa l, abityèlman de fwa pa an. Konsa, siveyan sikonskripsyon an ede Temwen yo òganize travay predikasyon an, e li ede yo tou pou yo fè travay la mache nan tèritwa ki sou kont kongregasyon an.

Kongregasyon an ansanm ak Sal Wayòm nan se sant pou bon nouvèl la simaye nan lokalite w rete a. Tout tèritwa ki sou kont chak kongregasyon dekoupe an ti tèritwa ki pi piti. Yo bay Temwen yo ti tèritwa sa yo pou yo fè efò pou yo vizite yo e pou yo pale ak moun ki nan chak kay. Chak kongregasyon kapab gen yon ti gwoup Temwen ki ka menm rive jiska 200 moun anviwon, e kongregasyon an gen ansyen yo konfye divès reskonsablite. Pwoklamatè bon nouvèl la se eleman esansyèl òganizasyon Temwen Jewova a. Se chak Temwen ki pou fè travay al preche moun bon nouvèl Wayòm nan, kit y ap sèvi nan biwo mondyal la, nan biwo filyal yo, oswa nan kongregasyon yo.

Rapò sou aktivite predikasyon an rive finalman nan biwo mondyal la ki konpile yon Annuaire chak ane epi li pibliye l. Gen yon tablo yo pibliye tou chak ane nan La Tour de Garde 1^ye janvye. Nan de piblikasyon sa yo, yo detaye rapò sou sa k  te fèt nan travay temwayaj pou Jewova a ansanm ak Wayòm li a Kris Jezi ap dirije a. Nan dènye ane ki sot pase yo, te gen 14 000 000 Temwen anviwon ak moun sa enterese ki te asiste Memoryal lanmò Jezi nou selebre chak ane a. Temwen Jewova yo fè plis pase 1 000 000 000 èdtan ap pwoklame bon nouvèl la, e gen plis pase 300 000 nouvo ki batize pa an. Kanta pou piblikasyon yo, se pa santèn milyon yo distribye yo.