1, 2. Ki sa Sòl te gen entansyon fè nan Damas?

 GEN plizyè mesye k ap vwayaje, yo prèske rive Damas, min yo byen mare, yo pral Damas pou y al fè yon move zak. Yo rayi disip Jezi yo. Yo vle al rale yo lakay yo pou yo mare yo, imilye yo epi trennen yo mennen Jerizalèm pou Sanedren an pini yo.

² Se Sòl ki alatèt mesye sa yo, e li deja soutni yon zak asasinay a. Sa pa gen lontan, li te la lè Juif ki zele menm jan avè l pou relijyon yo a t ap touye Etyèn, yon disip Jezi ki te gen atachman pou Bondye, e li te dakò ak sa (Tra. 7:57–8:1). Sòl pa kontante l pèsekite disip Jezi k ap viv Jerizalèm yo sèlman, men li prepare l pou l gaye dife pèsekisyon an toupatou. Li vle elimine kretyen sa yo ki fè pati “Chemen an” e ki reprezante yon pwoblèm pou li. — Tra. 9:1, 2; gade kare ki gen tit “ Manda Sòl te resevwa pou Damas”.

3, 4. a) Ki sa k te rive Sòl? b) Ki kesyon nou pral egzamine nan chapit sa a?

³ Bridsoukou, gen yon limyè ki sot nan syèl la ki klere toutotou Sòl. Moun k ap vwayaje avè l yo wè limyè a, men yo tèlman sezi yo pa ka pale. Sòl vin pa wè ankò, li tonbe atè. Toutpandan l pa wè a, li tande yon vwa nan syèl la ki di l: “Sòl, Sòl, poukisa w ap pèsekite m?” Sòl sezi e li mande: “Kiyès ou ye, Mèt?” Repons yo bay Sòl la dwe fè l sezi pi rèd, vwa a di l: “Mwen se Jezi. Se mwen w ap pèsekite a.” — Tra. 9:3-5; 22:9.

⁴ Ki sa nou ka aprann nan premye pawòl Jezi te di Sòl yo? Ki sa nou ka aprann lè nou egzamine sa ki te pase lè Sòl vin konvèti a? E ki leson nou ka aprann lè nou wè fason kongregasyon an te pwofite peryòd lapè ki te vin genyen apre Sòl te fin konvèti a?

5, 6. Ki sa nou ka aprann nan pawòl Jezi te di Sòl yo?

⁵ Lè Jezi te kanpe Sòl sou wout Damas la, li pa t mande l: “Poukisa w ap pèsekite disip mwen yo?” Jan nou te wè sa pi wo a, li te di l: “Poukisa  w ap pèsekite m?” ​(Tra. 9:4). Sa vle di Jezi te santi se li menm ki te jwenn eprèv disip li yo te jwenn yo. — Mat. 25:34-40, 45.

⁶ Si w ap pase anba eprèv akoz lafwa w gen nan Kris, ou mèt gen asirans ni Jewova ni Jezi konnen nan ki sitiyasyon w ye (Mat. 10:22, 28-31). Sa ka rive Jewova pa retire eprèv la menm kote a. Sonje, Jezi t ap gade Sòl ki te la avèk moun ki t ap touye Etyèn yo, e li te wè Sòl k ap antre lakay disip fidèl li yo ki Jerizalèm, k ap rale yo met deyò e k ap fè mete yo nan prizon (Tra. 8:3). Malgre sa, Jezi pa t aji nan moman sa yo. Men, Jewova te sèvi ak Jezi pou l bay ni Etyèn ni lòt disip yo fòs yo te bezwen pou yo rete fidèl.

7. Ki sa w dwe fè pou w ka andire pèsekisyon?

⁷ Ou menm tou ou ka andire pèsekisyon si w fè kat bagay ki vin apre yo: 1) Pran detèminasyon pou w rete fidèl devan kèlkeswa eprèv ou jwenn. 2) Priye Jewova pou l ede w (Flp. 4:6, 7). 3) Pa vanje tèt ou, kite sa nan men Jewova (Wom. 12:17-21). 4) Toujou gen konfyans Jewova ap ba w fòs pou w andire eprèv la annatandan l retire l. — Flp. 4:12, 13.

8, 9. Ki jan Anànyas dwe te santi l devan responsablite Jezi te ba li a?

⁸ Apre Jezi te fin reponn Sòl kesyon l te poze a, lè Sòl te mande l: “Kiyès ou ye, Mèt?”, Jezi te di l: “Leve, epi antre nan vil la e y ap di w sa w dwe fè.” ​(Tra. 9:6). Piske Sòl te avèg, se mennen yo te mennen l kote l t apral rete nan Damas la. Lè l te rive la, li pa t manje, li pa t bwè pandan twa jou e li t ap priye Bondye. Pandan tan sa a, Jezi te pale ak Anànyas konsènan Sòl. Anànyas se te yon disip Kris ki t ap viv Damas, e “tout Juif ki t ap viv Damas yo te pale an byen de li”. — Tra. 22:12.

⁹ Imajine jan Anànyas dwe te santi l lè sa a, siman li te yon jan bwouye! Se Jezi Kris, Chèf kongregasyon an, li menm ki te leve sot nan lanmò a, ki t ap pale avè l dirèkteman e ki t ap ba l yon travay espesyal pou l fè. Ala yon gwo onè sa te ye pou li, men tou, ala yon kokenn responsablite sa te ye! Lè Jezi te di Anànyas li dwe pale ak Sòl, Anànyas te di Jezi: “Seyè, mwen tande  anpil moun ap pale de mesye sa a, mwen tande kantite bagay mal li fè moun ou yo ki sen yo nan Jerizalèm. E prèt an chèf yo ba l pouvwa isit la pou l arete tout moun ki met konfyans yo nan non w.” — Tra. 9:13, 14.

10. Ki sa nou ka aprann konsènan Jezi lè nou wè jan li te boule ak Anànyas?

¹⁰ Jezi pa t reprimande Anànyas lè Anànyas te di sa ki te enkyete l. Okontrè, li te ba l enstriksyon ki byen klè konsènan sa l dwe fè. E Jezi te montre li gen konsiderasyon pou li lè l te di l rezon ki fè li te ba l responsablite sa a ki san parèy. Men sa Jezi te di Anànyas konsènan Sòl: “Mesye sa a se yon enstriman mwen chwazi pou pote non m devan moun nasyon yo, devan wa e devan pitit Izrayèl yo, paske, m ap montre l aklè ki kantite bagay l ap gen pou l sibi pou non m.” ​(Tra. 9:15, 16). Anànyas  te obeyi Jezi tousuit. L al kote Sòl, pèsekitè a, e li di l: “Sòl, frè m, Seyè a, Jezi, ki te parèt devan w sou wout la pandan w t ap vini an, se li menm ki voye m pou w ka retounen wè ankò e pou w ka vin ranpli ak lespri sen.” — Tra. 9:17.

11, 12. Ki sa nou aprann lè nou egzamine istwa konsènan sa ki te pase lè Sòl te fin konvèti a?

¹¹ Lè nou egzamine sa ki te pase lè Sòl te fin konvèti a, gen plizyè bagay nou vin byen konprann. Pa egzanp, nou jwenn prèv ki montre Jezi ap dirije travay predikasyon an, jan li te pwomèt sa (Mat. 28:20). Menm lè Jezi pa pale ak moun dirèkteman jodi a, li sèvi ak “esklav fidèl ki prevwayan an” pou l dirije travay predikasyon an, e se esklav sa a li etabli sou sèvitè ki lakay li yo (Mat. 24:45-47). Anba direksyon Kolèj santral la, pwoklamatè yo ak pyonye yo al nan tèritwa yo pou yo ka jwenn moun ki vle konnen plis bagay sou Kris. Jan nou te wè sa nan chapit anvan an, gen anpil nan moun sa yo ki priye pou Bondye gide yo, e apre sa, yon Temwen Jewova kontakte yo. — Tra. 9:11.

¹² Anànyas te montre l obeyisan lè l te aksepte fè travay Jezi te ba l fè a, e Jewova te beni l pou sa. Èske w obeyi lòd ki mande pou w bay yon temwayaj konplè a menm lè w ta santi w pè? Gen kèk moun ki pè al kay an kay pou y al pale ak moun yo pa konnen. Gen lòt ki twouve li difisil pou yo preche kote ki gen biznis yo, nan lari oubyen nan telefòn oswa lèt. Anànyas te fè efò pou l pa t pè ankò e li te gen privilèj pou l fè Sòl resevwa lespri sen b. Anànyas te fè sa Jezi te ba l fè a paske li te gen konfyans nan Jezi e li te konsidere Sòl kòm yon moun ki pa lwen vin frè l. Nou menm tou, nou ka fè efò pou nou pa pè si nou fè menm jan ak Anànyas, sa vle di si nou gen asirans se Jezi k ap dirije travay predikasyon an, si nou mete nou nan plas moun yo e nou konsidere menm moun nou ta pi pè abòde yo kòm moun ki gen posiblite pou yo vin frè nou oswa sè nou. — Mat. 9:36.

13, 14. Si w ap etidye Labib, men w poko batize, ki sa w ka aprann nan egzanp Sòl?

¹³ Sòl pa t pèdi tan pou l te aji ann amoni ak sa l te aprann yo. Kou l te fin geri, li te batize e li te kòmanse gen kontak sere sere ak disip ki te Damas yo. Men, li te fè plis pase sa. Liv Travay la fè nou konnen “tousuit, li [te] kòmanse preche konsènan Jezi nan sinagòg yo. Li t ap fè konnen moun sa a se Pitit Bondye a”. — Tra. 9:20.

 ¹⁴ Si w ap etidye Labib, men w poko batize, èske w ap imite Sòl lè w pran desizyon pou w batize ann amoni ak sa w ap aprann yo? Se vre, Sòl te wè yon mirak Jezi te fè, e sandout, mirak sa a te pouse l aji, men gen lòt moun ki te wè mirak Jezi te fè, poutan sa pa t fè yo chanje. Pa egzanp, te gen yon gwoup Farizyen ki te la lè Jezi te geri yon mesye ki te gen men pòk, e anpil nan Juif yo te konnen Jezi te resisite Laza, epoutan, anpil ladan yo pa t bay mirak sa yo regle anyen pou yo, e genyen ki te menm opoze ak Jezi (Mak 3:1-6; Jan 12:9, 10). Men, Sòl li menm te chanje. Ki sa k te fè Sòl byen reyaji konsa, alòske gen anpil lòt moun ki pa t fè sa? Se paske se pou Bondye li te gen plis lakrentif, se pa t pou lòm, e li te vrèman apresye mizèrikòd Kris te demontre pou li (Flp. 3:8). Si w fè menm jan an, ou pap kite anyen anpeche w patisipe nan travay predikasyon an, ni anpeche w chèche kalifye pou w batize.

15, 16. Ki sa Sòl te fè nan sinagòg yo, e ki jan Juif ki Damas yo te reyaji?

¹⁵ Èske w ka imajine jan foul moun yo dwe te sezi e jan yo dwe te vin an kòlè lè yo te wè Sòl kòmanse preche konsènan Jezi nan sinagòg yo? Moun yo te kòmanse mande: “Se pa mesye sa a ki t ap pèsekite moun ki abite Jerizalèm ki te met konfyans yo nan non sa a?” ​(Tra. 9:21). Lè Sòl t ap esplike rezon ki fè l vin chanje pwennvi sou Jezi, li te “pwouve avèk lojik se Jezi ki Kris la”. (Tra. 9:22.) Men, se pa tout moun ki aksepte lòt moun konvenk yo menm lè yo ba yo esplikasyon ki lojik. Lè yon moun detèmine pou l suiv tradisyon oubyen li kite ògèy ranpli kè l, esplikasyon lojik pap fè l chanje lide konsa konsa. Malgre sa, Sòl pa t bay vag.

¹⁶ Twazan apre, Juif ki te Damas yo te toujou opoze ak Sòl. Alafen, yo te kòmanse chèche mwayen pou yo touye l (Tra. 9:23; 2 Kor. 11:32, 33; Gal. 1:13-18). Lè Sòl vin konnen konplo a, li te aji avèk pridans, e li te kite vil la. Yo mete l nan yon pànye, yo file l desann nan yon fenèt ki nan miray vil la. Lè Lik ap pale de moun ki te ede Sòl chape poul li jou swa sa a, li di se ‘disip Sòl’ yo te ye (Tra. 9:25). Sa Lik di a ede n konprann genlè te gen kèk nan moun ki te koute Sòl lè li t ap preche Damas yo ki te byen reyaji e ki te vin disip Kris.

17. a) Ki jan moun yo reyaji devan verite ki nan Bib la? b) Ki sa n ta dwe kontinye fè, e poukisa?

¹⁷ Lè w te fèk kòmanse fè moun lakay ou, zanmi w ak lòt moun ankò konnen bèl verite w t ap aprann nan Bib la, ou ka te atann pou yo tout aksepte verite sa yo paske yo lojik. Petèt gen ladan yo ki te aksepte yo, men gen anpil ki pa t fè sa. Anfèt, moun lakay ou gendwa menm trete w tankou yon ènmi (Mat. 10:32-38). Men, si w kontinye chèche amelyore kapasite w genyen pou w rezone sou Bib la e si w toujou gen yon bon konduit antanke kretyen, menm moun ki opoze avè w ka vin chanje pwennvi. — Tra. 17:2; 1 Pyè 2:12; 3:1, 2, 7.

18, 19. a) Lè Banabas te pwouve se toutbon Sòl vin yon disip Kris, ki rezilta sa te bay? b) Ki jan nou ka imite Banabas ak Sòl?

 ¹⁸ Lè Sòl te antre Jerizalèm, disip yo pa t kwè l lè l t ap di li se yon disip Kris kounye a, e nou ka konprann yo. Men, lè Banabas te pwouve se toutbon Sòl vin yon disip Kris, apot yo te vin aksepte l nan mitan yo e li te rete avèk yo pandan kèk tan (Tra. 9:26-28). Sòl te aji avèk pridans, men li pa t wont preche bon nouvèl la (Wom. 1:16). Li te preche avèk kran nan Jerizalèm, vil kote li te alatèt pakèt moun yo te lage pou pèsekite disip Jezi Kris yo. Se pa ti sezi Juif nan Jerizalèm yo te sezi lè yo te rann yo kont Sòl yo te konte sou li pou pran latèt pou elimine kretyen yo te vin yon kretyen kounye a! Se sa k fè yo t ap chèche touye l. Lik fè nou konnen: “Lè frè yo aprann sa, yo fè l desann Sezare, epi yo voye l nan vil Tas.” ​(Tra. 9:30). Sòl te kite Jezi dirije l pa mwayen kongregasyon an, e sa te fè ni Sòl ni kongregasyon an jwenn byenfè.

¹⁹ Li bon pou nou note Banabas te pran inisyativ pou l ede Sòl. Sandout, bon aksyon sa a li te fè a te pèmèt yo de a vin bon zanmi antanke sèvitè Jewova ki zele. Menm jan ak Banabas, èske w byen kontan ede nouvo yo ki nan kongregasyon an, lè w preche avèk yo e lè w ede yo pwogrese antanke kretyen? W ap jwenn anpil byenfè si w fè sa. Si w fèk ap preche bon nouvèl la, èske w aksepte pou lòt moun ede w, menm jan Sòl te aksepte sa? Lè w preche ak pwoklamatè ki gen plis eksperyans pase w, w ap vin pi maton nan travay predikasyon an, w ap vin gen plis kè kontan, w ap vin bon zanmi yo, e petèt n ap zanmi pou lavi.

20, 21. Ki jan sèvitè Bondye yo ni nan tan lontan ni jodi a byen pwofite peryòd kote yo “gen lapè” yo?

²⁰ Apre Sòl te fin konvèti e apre l te fin kite Jerizalèm san anyen pa t rive l, “kongregasyon an te vin gen lapè toupatou nan Jide, nan Galile ak nan Samari”. (Tra. 9:31.) Ki jan disip yo te pwofite tan favorab sa a (2 Tim. 4:2)? Bib la fè nou konnen yo “te vin pran fòs”. Apot yo ansanm ak lòt frè ki te gen responsablite nan kongregasyon an te fòtifye lafwa disip yo e yo te pran latèt nan aktivite kongregasyon an, konsa, kongregasyon an “t ap mache nan lakrentif pou Jewova e li te jwenn konsolasyon grasa lespri sen”. Pa egzanp, Pyè te pwofite peryòd sa a pou l fòtifye lafwa disip ki te abite nan vil Lida ak nan plèn Chawon yo. Grasa efò l te fè yo, anpil moun k ap viv toupre zòn sa yo te “vin kwè nan Seyè a”. (Tra. 9:32-35.) Disip yo pa t kite yon seri objektif pèsonèl fè yo distrè nan sèvis Jewova a, men yo te fè tout sa yo kapab pou youn pran swen lòt e pou yo bay tout yo menm nan travay predikasyon bon nouvèl la. Kòm rezilta, kongregasyon an te “kontinye ap grandi”.

²¹ Menm jan an tou, nan fen 20^yèm syèk la, Temwen Jewova yo te “vin gen lapè” nan anpil peyi. Gen yon seri gouvènman ki te fè plizyè dizèn  ane ap pèsekite pèp Bondye a ki vin pa sou pouvwa a ankò bridsoukou, konsa, li te vin pi fasil pou nou preche nan yon seri peyi kote yo te entèdi travay predikasyon an, e nan kèk ka, yo te leve tout entèdiksyon yo nèt. Plizyè dizèn milye Temwen Jewova te pwofite okazyon an pou yo preche an piblik, e rezilta yo te jwenn yo te estrawòdinè!

22. Ki jan w ka byen pwofite libète w genyen an?

²² Èske w byen pwofite libète w genyen an? Si w ap viv nan yon peyi kote Temwen Jewova yo ka preche lib e libè, Satan ap byen kontan wè w lage kò w nan kouri dèyè byen materyèl, olye w bay tout ou menm nan sèvis Jewova a (Mat. 13:22). Pa kite anyen distrè w pandan w nan sèvis Jewova a. Si nan peyi w, pa vrèman gen yon gouvènman k ap bay sèvitè Jewova yo pwoblèm, byen pwofite tan sa a. Konsidere tan sa a kòm yon posiblite pou w bay yon temwayaj konplè e pou w fòtifye kongregasyon an. Yon bagay ou dwe sonje, sèke sitiyasyon an ka chanje nan yon batje.

23, 24. a) Ki sa n aprann nan istwa konsènan Tabita a? b) Ki sa nou ta dwe detèmine pou nou fè?

²³ Kounye a, ann egzamine sa k te rive yon disip Kris ki te rele Tabita oubyen Dòkas c. Li t ap viv Jope, yon vil ki pa t lwen Lida. Se te yon sè ki fidèl. Li te konn itilize tan l ak talan l yon fason ki saj, li “te konn fè anpil bèl aksyon, e li te konn ede moun”. Men, sanzatann, li te vin malad e li mouri. Disip yo ki nan Jope te nan gwo lapenn akoz lanmò l, sitou vèv yo, paske l te konn fè anpil bèl aksyon anvè yo. Lè Pyè te rive nan kay la, yo te gentan kòmanse prepare kò Dòkas pou yo antere l. Pyè te fè yon mirak okenn nan apot Jezi yo potko janm fè. Pyè te priye Jewova e li te resisite Tabita. Èske w ka imajine jan vèv yo ak lòt disip yo te kontan lè Pyè te fè yo antre nan chanm nan e li montre yo Tabita ki retounen vivan? Sandout, rezirèksyon sa a te fòtifye yo pou yo fè fas ak eprèv ki t ap tann yo pi devan! Jan nou ka konprann sa, nouvèl konsènan mirak sa a te “gaye nan tout vil Jope, e anpil moun te vin kwè nan Seyè a”. — Tra. 9:36-42.

²⁴ Nou aprann de bagay enpòtan nan istwa sa a konsènan Tabita, yon istwa ki touche kè nou. 1) Lavi a kout. Donk, ala enpòtan sa enpòtan pou nou chèche gen yon bon repitasyon devan Bondye pandan nou gen posiblite fè sa (Ekl. 7:1)! 2) Esperans rezirèksyon an se yon bagay ki sèten. Jewova te wè tout bon aksyon Tabita  te fè yo, e li te rekonpanse l. L ap sonje travay di nou fè nan sèvis li a e l ap resisite nou si lanmò ta pase pran nou anvan Amagedon (Ebre 6:10). Kidonk, kit nou “nan tan difisil”, kit nou “nan tan favorab”, ann kontinye bay yon temwayaj konplè sou Kris. — 2 Tim. 4:2.