Yon lèt Kolèj santral la
Frè ak sè nou yo:
Premye nimewo Toudegad piblik la ki te parèt nan dat 1ye janvye 2008 la te vin ak yon nouvo ribrik ki vrèman enteresan ki gen tit: “Annou imite lafwa yo”. Depi lè a, se pa ti kontan nou te kontan wè yon nouvo atik nan seri sa a ki te parèt chak twa mwa!
Ki reyaksyon moun yo te genyen lè yo li atik sa yo? Men sa yon moun fè konnen apre l te fin li atik ki pale sou Mat la: “Mwen te ri lè m t ap li atik sa a paske m wè m se menm moun ak Mat. Mwen renmen akeyi moun lakay mwen e m toujou gen anpil bagay pou m fè. Men, pafwa mwen konn bliye fè yon ti kanpe pou m pwofite konpayi frè ak sè m yo.” Men bèl pawòl yon jèn fi, ki gen 15 an, te di lè l te fin li istwa Estè a: “Mwen ka rive konprann jan l fasil pou jèn yo toujou anvi gen bèl rad ki alamòd. Se vre, nou dwe byen abiye men, nou pa ta dwe fè sa pou fè moun wè.” Men sa l di ankò: “Sa k enpòtan pou Jewova se moun nou ye nan fon kè nou an.” Men sa yon sè te di lè l te fin li yon atik ki pale sou apot Pyè: “Lè m t ap li istwa a, se kòmsi m te la. Mwen te viv sa m t ap li a! Mwen te eseye imajine tout sa k te ka pase nan istwa a.”
Lektè sa yo ak plizyè lòt lektè ankò ki te ekri pou fè konnen jan yo apresye ribrik sa yo fè nou wè pawòl apot Pòl te ekri depi lontan yo se laverite. Men sa l te di: “Tout bagay ki te ekri nan tan lontan, yo te ekri yo pou enstriksyon nou.” (Wom. 15:4). Anfèt, Jewova fè yo met istwa sa yo nan Bib la pou l anseye nou yon seri leson ki gen anpil valè. Kèlkeswa kantite ane nou gen nan laverite, nou tout ka aprann anpil leson lè n egzamine istwa sa yo.
Se ak tout kè nou, nou ankouraje w li liv sa a kou sa posib. Mete l nan pwogram adorasyon an fanmi w, timoun yo ap renmen l. Lè kongregasyon an ap etidye liv sa a nan etid biblik kongregasyon an, bat pou w pa rate menm yon semèn. Lè w ap li liv la, pa kouri fin li l. Okontrè, byen pran san w pou w li l. Sèvi ak imajinasyon w pou w wè sa k ap pase nan chak istwa. Eseye mete w nan po pèsonaj biblik yo pou w ka wè jan yo te wè bagay yo. Panse ak fason yo te reyaji devan yon sitiyasyon ak fason ou menm ou t ap reyaji devan menm sitiyasyon an.
Se pa ti kontan n kontan ban nou piblikasyon sa a! Nou swete l ap yon benediksyon pou ou ak fanmi w. Nou vle di nou nou renmen nou anpil.
Kolèj santral Temwen Jewova yo
Lòt sijè ki enteresan
KESYON MOUN POZE SOUVAN
Ki sa Kolèj santral Temwen Jewova yo ye?
Èske moun ki fòme l yo se mèt òganizasyon nou an?
