Vrè kretyen yo pran detèminasyon pou yo pa kite anyen, ni pèsonn anpeche yo adore Jewova. Sandout, se detèminasyon sa a ou pran tou. Jewova bay fidelite w anpil valè. (Li 1 Kwonik 28:9.) Ki sa k ka fè l difisil pou w ret fidèl ak Jewova e ki sa k ka ede w?

1. Ki jan lòt moun ka eseye fè w sispann ret fidèl ak Jewova?

Gen moun k ap eseye fè nou sispann sèvi Jewova. Kiyès ki ka eseye fè yon bagay konsa? Gen kèk moun ki kite laverite k ap bay yon seri manti sou òganizasyon Jewova a yon fason pou yo kraze lafwa nou. Yo rele moun sa yo aposta. Mete sou sa, gen kèk chèf relijye k ap gaye fo enfòmasyon sou nou pou fè kèk moun ki pap veye kite laverite. Se yon danje sa ye si n ap eseye defann tèt nou devan moun sa yo, si n al li liv yo fè oubyen li sa yo ekri sou Entènèt, oubyen al sou sit yo oswa gade videyo yo fè. Men sa Jezi te di sou moun sa yo k ap eseye anpeche lòt moun sèvi Jewova avèk fidelite: “Pinga nou okipe yo. Yo se yon bann gid je pete. Si yon avèg ap mennen yon lòt avèg, yo toule de ap tonbe nan twou.”— Matye 15:14.

Men, e si yon moun nou konnen deside li pap Temwen Jewova ankò? Sa ka fè nou mal anpil si yon moun nou te pwòch avè l ta fè yon bagay konsa. Se kòmsi moun sa a fòse nou chwazi ant li menm ak Jewova. Nou dwe pran detèminasyon pou nou ret fidèl ak Bondye anvan tout moun (Matye 10:37). Donk, nou obeyi lòd Jewova ban nou pou nou pa frekante moun konsa.— Li 1 Korentyen 5:11.

2. Ki jan desizyon n ap pran kapab montre si nou fidèl ak Jewova?

Lefètke nou renmen Jewova, sa pouse nou pou n pa mele ak fo relijyon nan anyen. Nou bezwen veye pou travay nou, òganizasyon n ap pran pa avèk yo oubyen kèlkeswa aktivite n ap fè pa gen okenn rapò ak fo relijyon. Men sa Jewova di nou fè: “Sot [nan Gran Babilòn nan], pèp mwen.”— Revelasyon 18:2, 4.

 FOUYE PLIS

3. Fè atansyon ak fo anseyan

Ki sa nou ta dwe fè si n ta tande move pawòl sou òganizasyon Jewova a? Li Pwovèb 14:15, epi reponn kesyon sa a:

• Poukisa nou veye pou n pa kouri kwè tout sa nou tande?

Li 2 Jan 10, epi reponn kesyon sa yo:

• Ki jan nou dwe aji avèk aposta yo?

• Menmsi nou pa pale ak yon aposta dirèkteman, ki jan nou kapab vin an kontak avèk sa y ap anseye?

• Ki jan w panse Jewova t ap santi l si nou ta koute move pawòl y ap di sou li oubyen sou òganizasyon l lan?

4. Ret fidèl ak Jewova lè yon frè oswa yon sè peche

Ki sa nou dwe fè si nou aprann gen yon moun nan kongregasyon an ki fè yon peche grav? Gade yon prensip ki nan lwa Bondye te bay pèp Izrayèl la nan tan lontan. Li Levitik 5:1.

Jan nou wè sa nan vèsè sa a, si nou ta aprann yon moun fè yon peche grav, nou dwe fè ansyen yo konn sa. Men, anvan nou fè sa, l ap bon pou nou pale ak moun ki fè peche a pou n ankouraje l pale ak ansyen yo pou l fè yo konnen peche l fè a. Si l pa fè sa, n ap di ansyen yo sa, konsa, n ap montre nou fidèl ak Jewova. Lè nou fè bagay yo konsa, ki jan sa montre nou fidèl ak . . .

• Jewova?

• moun ki peche a?

• lòt moun nan kongregasyon an?

 5. Rete lwen Gran Babilòn nan

 SA W TE APRANN

Pou nou ret fidèl ak Jewova, nou pa dwe frekante moun ki pa fidèl avè l. Mete sou sa, nou dwe separe nèt ak fo relijyon.

Revizyon

• Poukisa nou pa dwe ni gade, ni li, ni koute sa aposta yo ap di?

• Ki jan nou ta dwe aji avèk moun ki pa vle rete Temwen Jewova ankò?

• Ki jan nou montre nou koute lòd Bondye bay pou nou soti nan fo relijyon an?