VERITE sou ki sa? Verite sou kèk nan kesyon ki pi enpòtan moun konn poze. Petèt ou konn reflechi sou kesyon tankou:

• Èske Bondye sousye de nou toutbonvre?

• Èske lagè ak soufrans ap janm fini?

• Ki sa k rive apre yon moun fin mouri?

• Èske gen yon espwa pou moun ki mouri yo?

• Ki jan pou m priye pou Bondye tande m?

• Ki sa m ka fè pou m viv ak kè kontan?

Ki kote w ta chèche repons kesyon sa yo? Si w mande plizyè moun, w ap jwenn divès repons. Si w mande moun ki alatèt nan relijyon yo, repons youn ap kontrè ak repons lòt. Si w al chèche nan libreri oubyen nan bibliyotèk, ou ka jwenn plizyè milye liv ki lese konprann yo gen repons kesyon sa yo. Sepandan souvan, pou yon menm kesyon sa yon liv di konn pa menm ak sa yon lòt liv di. Gen kèk liv ki konn sanble bon nan moman yo parèt la, men byen vit yo pase mòd e lè sa a, swa yo korije yo swa yo ranplase yo.

Sepandan, gen yon liv ki gen repons nou ka fè konfyans pou kesyon sa yo. Se liv ki gen verite a. Men sa Jezi Kris te di Bondye nan yon priyè: “Pawòl ou se laverite.” ​(Jan 17:17). Jodi a, nou konnen Pawòl Bondye a sou non Lasent Bib. Nan paj ki vin apre yo, w ap jwenn yon apèsi sou repons klè, repons veridik Bib la bay pou kesyon nou sot poze yo.

REZON KI FÈ NOU POZE KESYON SA A: N ap viv nan yon monn ki chaje ak move zak ki fè moun soufri, e ki chaje ak enjistis. Gen anpil relijyon ki fè konnen se volonte Bondye pou nou soufri.

MEN SA LABIB APRANN NOU: Bondye pa janm lakòz sa ki mal. Men sa nou jwenn nan Jòb 34:10: “Li enposib pou vrè Dye a aji ak mechanste, pou Toupisan an fè sa ki mal!” Bondye gen yon objektif ki montre li gen anpil lanmou pou lèzòm. Se pou sa Jezi te anseye nou pou nou priye: “Papa nou ki nan syèl la, se [...] pou Wayòm ou an vini. Se pou volonte w fèt sou tè a kou nan syèl la.” ​(Matye 6:9, 10). Bondye tèlman sousye de nou, sa fè l itilize anpil gwo mwayen pou objektif li a ka reyalize. — Jan 3:16.

Tou gade Jenèz 1:26-28; Jak 1:13 epi 1 Pyè 5:6, 7.

REZON KI FÈ NOU POZE KESYON SA A: Lagè kontinye retire lavi yon kantite moun nou pa ka konte. Soufrans lèzòm touche nou tout.

MEN SA LABIB APRANN NOU: Bondye anonse gen yon epòk kote li pral mete lapè sou tout tè a. Anba pouvwa Wayòm li an, yon gouvènman ki nan syèl la, moun pap “aprann fè lagè ankò”. Olye de sa, yo pral “bat epe yo pou yo fè yo tounen zouti pou raboure latè”. (Ezayi 2:4.) Bondye pral mete fen nan tout enjistis ak tout soufrans. Bib la pwomèt: “[Bondye] ap siye tout dlo nan je yo, pap gen lanmò ankò, e moun pap nan lapenn ankò akoz moun pa yo ki mouri. Pap gen ni rèl, ni doulè ankò. Ansyen bagay yo [san wete enjistis ak soufrans ki gen jodi a] disparèt.” — Revelasyon 21:3, 4.

Tou gade Sòm 37:10, 11; 46:9 epi Miche 4:1-4.

REZON KI FÈ NOU POZE KESYON SA A: Pifò relijyon sou tè a fè konnen gen yon bagay anndan moun ki kontinye viv lè moun nan fin mouri. Gen kèk ladan yo ki fè konprann moun ki mouri a ka fè moun ki vivan yo mal, oubyen yo di pou Bondye ka pini mechan yo, li kondane yo pou yo toumante nan yon dife lanfè pou letènite.

MEN SA LABIB APRANN NOU: Lè yon moun mouri, li sispann egziste. Eklezyas 9:5 di: “Moun ki mouri yo pa konn anyen ditou.” Piske moun ki mouri a pa konn anyen, li pa santi anyen e li pa ka fè okenn lòt bagay, kidonk li pa ka ni fè moun ki vivan mal, ni li pa ka ede yo. — Sòm 146:3, 4.

Tou gade Jenèz 3:19 ak Eklezyas 9:6, 10.

REZON KI FÈ NOU POZE KESYON SA A: Nou vle viv e nou vle pwofite lavi a ansanm ak moun nou renmen yo. Se sa k fè li toutafè nòmal pou nou anvi wè moun pa nou yo ki mouri.

MEN SA LABIB APRANN NOU: Pifò moun ki mouri yo ap resisite. Jezi te pwomèt: “Moun ki nan tonm yo pral [...] soti.” ​(Jan 5:28, 29). Ann amoni ak objektif Bondye te genyen okòmansman an, moun ki resisite sou tè a pral gen posiblite pou yo viv nan yon paradi sou tè a (Lik 23:43). Avni sa a Bondye pwomèt la gen ladan l yon sante ki pap janm deteryore ansanm ak lavi ki pap janm fini pou moun ki obeyisan yo. Bib la di: “Moun ki jis yo gen pou yo posede tè a e yo gen pou yo viv sou li pou toutan.” — Sòm 37:29.

Tou gade Jòb 14:14, 15; Lik 7:11-17 epi Travay 24:15.

REZON KI FÈ NOU POZE KESYON SA A: An jeneral, moun nan tout relijyon priye. Poutan, anpil nan moun sa yo gen enpresyon priyè yo pa jwenn repons.

MEN SA LABIB APRANN NOU: Jezi te anseye nou pou nou evite repete menm pawòl yo nan priyè n ap fè. Li te di: “Lè n ap priye, pinga nou plede repete menm bagay yo.” ​(Matye 6:7). Si nou vle Bondye koute priyè nou yo, nou dwe priye fason l mande nou an. Pou nou fè sa, nou bezwen aprann konnen volonte Bondye e nou bezwen priye ann akò ak volonte sa a. Men sa 1 Jan 5:14 esplike: “Kèlkeswa sa nou mande [Bondye] selon volonte l, li tande nou.”

Tou gade Sòm 65:2; Jan 14:6, 14 epi 1 Jan 3:22.

REZON KI FÈ NOU POZE KESYON SA A: Anpil moun kwè lajan, gwo renome, oubyen bote ap ba yo kè kontan. Se sa k fè se dèyè bagay sa yo y ap kouri, men, sa pa fè yo jwenn kè kontan vre.

MEN SA LABIB APRANN NOU: Jezi te devwale sekrè ki bay kè kontan an lè l te di: “Byennere moun ki pran konsyans yo bezwen Bondye.” ​(Matye 5:3). Sèl fason pou nou jwenn bonjan kè kontan se si nou fè efò pou nou satisfè pi gwo bezwen nou genyen an: swaf pou nou konnen laverite sou Bondye ak sou objektif li gen pou nou. Nou jwenn verite sa a nan Bib la. Lè nou konnen verite sa a, sa ka ede nou rive fè diferans ant sa ki vrèman enpòtan ak sa ki pa enpòtan. Lè nou kite verite ki nan Bib la gide nou ni nan desizyon nou ni nan aksyon nou, sa ap bay lavi nou plis sans. — Lik 11:28.

Tou gade Pwovèb 3:5, 6, 13-18 ak 1 Timote 6:9, 10.

 Sa nou sot di pi wo a se sèlman yon apèsi tou kout sou repons Bib la bay pou sis kesyon. Èske w ta renmen konn plis bagay? Si w pami moun ki “pran konsyans yo bezwen Bondye” yo, pa gen dout, ou anvi konn plis bagay. Petèt, w ap poze tèt ou lòt kesyon ankò, tankou: ‘Si Bondye sousye de nou, poukisa li pèmèt tout mechanste sa yo ak tout soufrans sa yo pandan tout listwa? Ki sa m ka fè pou m amelyore kalite lavi fanmi m?’ Bib la bay bonjan repons pou kesyon sa yo ak pou yon bann lòt kesyon e repons li bay yo ap satisfè w.

Sepandan, jodi a, anpil moun ezite egzamine sa k nan Bib la. Yo konsidere l kòm yon gwo liv ki difisil pou moun konprann pafwa. Èske w ta renmen yo ede w jwenn repons Bib la bay pou kesyon ou konn ap poze yo? Temwen Jewova yo itilize de mwayen pou yo ka ede w.

Toudabò, yo sèvi ak yon liv ki rele Ki sa Labib kapab anseye nou? Yo fè liv sa a pou yo ka ede moun ki okipe anpil yo egzamine repons klè Bib la bay pou kesyon ki enpòtan yo. Ansuit, yo gen yon pwogram etid biblik gratis yo fè lakay moun yo. Chak semèn, pandan yon ti tan, san w pa peye anyen, yon Temwen Jewova nan zòn ou an, antanke moun ki kalifye pou anseye moun Bib la, ka vin lakay ou oswa li ka ale yon lòt kote k ap bon pou ou pou l fè yon ti pale avè w sou Bib la. Gen plizyè milyon moun nan lemonnantye ki benefisye pwogram sa a. Anpil ladan yo rive nan bèl konklizyon sa a: “Mwen jwenn verite a!”

Pa gen trezò yon moun ap jwenn ki pi gwo pase sa. Verite ki nan Bib la libere nou anba sipèstisyon ak laperèz. Li retire nou nan erè. Li ban nou espwa, li fè nou gen objektif e li ban nou lajwa. Jezi te di: “N ap konnen laverite, e laverite ap libere nou.” — Jan 8:32.